Read Northwest Gbaya ESAII 19 Bible Online

ESAII 19 - Northwest Gbaya bible

ESAII 19

¹Wen nɛ tɔ̧a̧ zu Egiptɛ nɛ mɔ'ɔ. GASA WAN daŋa zu tura-zan mɛ nɛ si Egiptɛ, ɓɛɛ tɛ o géé-sɔ̧ wan mɛ nu Egiptɛ nak ti a̧. Gba̧a̧ tɛ o be Egiptɛ gbina lɛŋ.

²«Mi tɛ de ha̧ o be Egiptɛ mɛ kur zu ŋmaa in o ŋmaa; o nya-wi tɛ bi ŋmaa, o sɛm tɛ bi ŋmaa; o ye tɛ bi ŋmaa, o wan tɛ bi ŋmaa mbɛt.

³Zu Egiptɛ tɛ zik, ɓɛɛ mi tɛ ɗaŋ war deemɔ kɔ-wa. Wa tɛ nɛ tɛ o géé-sɔ̧ in o wan-gbana, ká bá nɛ̀ o wi-zɔk-mɔ, gu nɛ o wi sa o sɔ̧-fio.

⁴Mi tɛ e Egiptɛ er ŋma ŋga wan nɛ tɛ ɔ wan zu wa.» GASA WAN Sɔ̧ nɛ a̧a̧ nɛ ŋgayamɔ lɛŋ a̧ tɔ̧ɔ̧ hegɔ.

⁵Yi gba-tɔp tɛ ɔ̧sa̧ gu nɛ o nana-yì mbɛt kútú-kútú.

⁶O be-zer tɛ ɔ̧si̧, Nana-yì Nil mɛ Egiptɛ tɛ ɔ̧sa̧ kor kútú-kútú mbɛt. O gba-kan tɛ kor lɛŋ,

⁷o zɔ̧ mɛ nu-ŋgere Nil in o nyɔnɔ tɛ kor lɛŋ, wa tɛ yambali ɓɛɛ wi beka zɔk oi-wa ɓɔna.

⁸O wi-pi̧-gɛ̧i̧ tɛ gɔfi mɔ, o wi-pi̧-gɛ̧i̧ ɗɔɔ Nil lɛŋ tɛ ai nú, o wi-pi̧-yɔk zu yi tɛ ai nú mbɛt.

⁹Gɛ̧ɛ̧mɔ tɛ ba o wi-wa-fɔ-nduu, in o okoo-pir-garaazi ká bá nɛ̀ o wi-fan-laa mbɛt.

¹⁰Bɔnɛ tɛ tik zu o wi-fan-laa, wen o wi-de-tom-aa tɛ ya nɛ tu̧u̧-see.

¹¹O be-wan ko Sɔaŋ nɛ́ o mgbelewi, o haya wi-tɔ̧-mbɔrɔ ko wannu Egiptɛ mɔi̧ nɛ ŋmaa tɔ̧ nɛ gee tum wen. Nɛ ge'e de h’ɛ́nɛ́ mɛ tɔ̧ ha̧ wannu Egiptɛ‘e: «Mi nɛ wi-iŋ-mgbara-mɔ, mi nɛ bezaŋ gba̧‘a̧ wannu ge?»

¹²Wannu Egiptɛ, o wi-iŋ-mgbara-mɔ nɔ‘i kɔ-mɛ‘i a̧a̧ dee nde? Wa a̧ iŋ, ɓɛɛ wa a̧ we ɗoŋ mɔ nɛ GASA WAN nɛ a̧a̧ nɛ ŋgayamɔ lɛŋ tɔ̧ɔ̧ zu Egiptɛ‘i ha̧ mɛ zii.

¹³O be-wan ko Sɔaŋ nɛ o mgbelewi; o be-wan ko Nɔf fɛŋ nɛ tɛ; wa ɗaŋ nɛ Egiptɛ hee o wan-gbɛ-dɔ̧ɔ̧ nɛ ɔ̧i̧ ɗaŋ nɛ tɛ'ɛ ga.

¹⁴GASA WAN dee ha̧ zikti mɛ de wa, wen ha̧ o bíí Egiptɛ mɛ ɗaŋ; o be Egiptɛ tɛ yambali tɛ yuwar dee tom kɔ-wa lɛŋ, hee mɔ'ɔ nɛ ŋma wi-nɔ-dɔ̧ɔ̧ ɔ̧i̧ nɛnɛ'ɛ ga.

¹⁵Nɛ̀ zu-a hɔ dom-aa, nɛ̀ tɛ́ ndɛŋgɛ hɔ tɛ toro, ŋma mɔ beka de sɛn Egiptɛ ɓɔna.

¹⁶Wese'i, Egiptɛ tɛ kifi duk hee okoo ga, nɛ naka-tɛ in nɛ kíì mbɛt ti GASA WAN nɛ a̧a̧ nɛ ŋgayamɔ lɛŋ, ŋgimbi n'aa be tɛɛ de ŋmaa in a̧.

¹⁷Nu ko Juda tɛ duk nɛ mɔɔ-pi̧-kíì tɛ Egiptɛ. Ŋgimbi lɛŋ nɛ̀ be wen be tɛɛ ye mgbara wa, tɛ Egiptɛ tɛ nak ti Juda wen ee-zu-mɔ nɛ GASA WAN nɛ a̧a̧ nɛ ŋgayamɔ lɛŋ ee so mɛ de in Egiptɛ.

¹⁸Wese'i, o ye mɔɔrɔ nɛ tɔ̧ nú Kanaŋ tɛ kan mɔ ha̧ nɛ er ha̧ GASA WAN nɛ a̧a̧ nɛ ŋgayamɔ lɛŋ. Ir-Hahɛrɛs tɛ duk nɛ kpɔk ye mgbara o ye nɔ‘i.

¹⁹Wese'i, fara-dɔ-ha̧a̧mɔ ha̧ GASA WAN tɛ duk nɛ mgbák bin-see nú Egiptɛ, ɓɛɛ mboo-mɔ ko GASA WAN tɛ duk sɛn gbisi mbɛt.

²⁰O mɔɔ nɔ‘i tɛ ya nɛ mɔɔ-usi-mɔ in mɔɔ-sedaako ko GASA WAN nɛ a̧a̧ nɛ ŋgayamɔ lɛŋ sɛn nu Egiptɛ. Kà bɔnɛ‘i be tɛɛ tik zu wa, á̧ kà wa nɛ hiɗa mɔ sitɛ GASA WAN, ɓɛɛ a̧ tɛ tom wan-kpasi-wa tɛnɛ nɛ tɛ ye ɗoŋ wa in nɛ tɛ gbo wa mbɛt.

²¹GASA WAN tɛ de ha̧ o be Egiptɛ mɛ iŋ a̧. Ɓɛɛ wese nɛ o be Egiptɛ be tɛɛ iŋ a̧ kaɗi, wa tɛ de tom ha̧ a̧. Wa tɛ ɗaf'a in wa tɛ ha̧ mɔ ha̧ a̧ mbɛt. Wa tɛ ha̧ nú ha̧ GASA WAN, ɓɛɛ wa tɛ de mɔ nyɛm nɛ ɗoŋ ha̧a̧nú‘i mbɛt.

²²Kà GASA WAN nɛ gusa o be Egiptɛ nɛ ŋgaya-a, kana nɛ a̧ a̧ tɛ kpasi wa mbɛt. Wa tɛ kifi see-wa ha̧ a̧, a̧ tɛ kpɛk aia-nú kɔ-wa, ɓɛɛ a̧ kpasa wa.

²³Wese'i, ŋma yuwar tɛ gbo nɛ Egiptɛ si Asirii. O be Asirii tɛ yar hɔ Egiptɛ, ɓɛɛ o be Egiptɛ yara hɔ Asirii mbɛt. O bíí Egiptɛ in o bíí Asirii tɛ mɔi̧ gasi nɛ Sɔ̧ in ŋmaa kpɔk.

²⁴Taar bíí nɛ tɛ ndaɗi in Egiptɛ ká bá nɛ̀ Asirii nɛ Israɛl. Sɔ̧ tɛ tok de yoŋgo zu wa taar'i lɛŋ, nɛ̀ tɛ duk nɛ́ de yoŋgo zu nu'i wese'i.

²⁵GASA WAN nɛ a̧a̧ nɛ ŋgayamɔ lɛŋ tɛ tok de yoŋgo zu wa hee mɔ'ɔ ga: «De yoŋgo a̧ duk zu Egiptɛ dukbíí kɔ‘m, in Asirii n'am dee nɛ er-am, ká bá nɛ̀ Israɛl mɔɔ-oi kɔ‘m.»