Read Northwest Gbaya ESAII 2 Bible Online

ESAII 2 - Northwest Gbaya bible

ESAII 2

¹Mɔ nɛ Esaii bem ko Amɔs zɔka tɛ hɔɔ-zu nɛ Sɔ̧ hɔɔ ha̧ a̧ zu Juda in Jerusalɛm nɛ mɔ'ɔ.

²Ŋma wese tɛ hɔ nɛ GASA WAN tɛ de Tua kɔ‘i sɛn mgbák zu kaya mɛ, nɛ tɛ kusi gan o kaya lɛŋ; ɓɛɛ o tugun bíí lɛŋ tɛ mɔi̧ ŋmaa si hi̧i̧.

³O dɔka dukbíí lɛŋ tɛ nɛ hi̧i̧, ɓɛɛ wa tɛ tɔ̧: «Ɛ̀nɛ̀ tɛ́ ɛ̀ɛ̀ dáŋ si zu kaya ko GASA WAN, ɛ̀ɛ̀ dáŋ si kɔ̧ Tua ko Sɔ̧ ko Jakob, wen ha̧ a̧ mɛ usi yuwar kɔ̧-a̧ h’ɛ́ɛ́ ba.» Wen usamɔ tɛ tɛ nɛ Siɔŋ, ɓɛɛ wen ko GASA WAN tɛ tɛ nɛ Jerusalɛm.

⁴A̧ tɛ ɔ wan zu o tugun bíí lɛŋ; a̧ tɛ duk nɛ wi-gɔn-kita mgbara o dɔka dukbíí. O dukbíí nɔ‘i tɛ kai o gba-paa kɔ‘i dui nɛ o wara, ɓɛɛ wa kaia o sɛɛ kɔ-wa dui nɛ o ada mbɛt. O tugun bíí beka ba gba-paa sitɛ o ŋmaa ɓɔna, ɓɛɛ biro beka bo mgbara wa in o ŋmaa ɓɔna mbɛt.

⁵Ɛ́nɛ́ o bíí nutua ko Jakob, ɛ̀nɛ̀ tɛ́ ɛ̀ɛ̀ nɛ́ nɔ tɛ sa̧a̧mɔ ko GASA WAN.

⁶Nɛ mbetɛ GASA WAN, ɛ́nɛ́ ee dukbíí k’ɛ́nɛ́, o be nutua ko Jakob dúk, ɓɛɛ o wan-gbana in o wi-a-tani ko o be daŋa-wese ká bá nɛ̀ o be Filistii dun mgbara wa, ɓɛɛ wa si tɛ dee mɔ ko o gɔni-duk.

⁷Nu'i duna nɛ o bu-mbɔi in lɔr; ɓɛɛ kpaamɔ kɔ-wa dɔka yak zale mbɛt. Nu'i duna nɛ o nyaŋa in o keekee nɛ‘i nyɛm mɛ tɔr pi̧ nu na.

⁸O géé-sɔ̧ duna zu nu'i, ɓɛɛ o bíí gbɛ zugur nu ti mɔ nɛ wa dee nɛ er, ɗaŋ geemɔ sɔɔ gee nɛ wa mboo nɛ er.

⁹Kóó o bíí guu so nu de nɛ ko nɛ tɛ-wi, Sɔ̧, k’ɛ́nɛ́ e ɗaŋmɔ ha̧ wa na.

¹⁰Ɛ̀nɛ̀ yú mɔ si kɔ̧ ta, ɓɛɛ ɛ̀nɛ̀ nɛ́ɛ̀ hu̧si tɛ‘nɛ́ ɗɔɔ fuunu, yu nɛ ŋgamɔ ko GASA WAN in gasamɔ kɔ̧-a̧ nɛ tɛ‘i.

¹¹Wi-gasi-zu beka ba zu nɛ ŋgɔn na, ɓɛɛ gba̧a̧-tɛ o wi-de-ŋgazu tɛ gbin. Ɓɛɛ wese'i wi tɛ iŋ‘e nɛ́ GASA WAN kpɔk ɓɛɛ a̧ ɔ gasa.

¹²Ŋma wese tɛ hɔ nɛ GASA WAN nɛ a̧a̧ nɛ ŋgayamɔ lɛŋ tɛ ba zu duk nɛ̀ o wi-ŋmaŋ-tɛ, o wi-gasi-zu, ká bá nɛ̀ o wi-gɔ-tɛ, mɛ de ha̧ wa lɛŋ mɛ kifi geemɔ.

¹³A̧ tɛ ɗaŋ o gbatui Libaŋ in o gasa te nú Basaŋ mbɛt,

¹⁴gu nɛ o kusa kaya in o gasa zu-tɔ̧́ lɛŋ,

¹⁵ká bá nɛ̀ o kusa tua-pɛm-mɔ in o garo nɛ‘i nyɛm mɛ daŋ na,

¹⁶sɛka o zɔm kombon in o gba de-a mɛ Tarsis lɛŋ.

¹⁷Wi-gasi-zu beka ba zu nɛ ŋgɔn na, ɓɛɛ gba̧a̧-tɛ o wi-de-ŋgazu tɛ gbin. Wese'i nɛ́ GASA WAN kpɔk ɓɛɛ a'i tɛ gasi.

¹⁸Ɓɛɛ o géé-sɔ̧ lɛŋ tɛ yambali de geemɔ.

¹⁹Ɛ̀nɛ̀ hú̧sí kɔ̧ o ta, ɓɛɛ ɛ̀nɛ̀ yé nɛ ɗuka-a si ɗɔɔ nu, wen h’ɛ́nɛ́ mɛ yu ŋgamɔ in gasamɔ ko GASA WAN, ŋgimbi n'aa be tɛɛ kur mɛ de ha̧ nu mɛ nak.

²⁰Wese'i o bíí tɛ siŋ o géé-sɔ̧ nɛ‘i dee nɛ bu-mbɔi in lɔr ka'i gbɛ zugur nu ti wa gasi nɛnɛ‘i ha̧ o zai in o doŋge.

²¹Wa tɛ kai ŋmaa hu̧si kɔ̧ ta in o mgbara ta nɛnɛ wen yuu ŋgamɔ in gasamɔ ko GASA WAN ŋgimbi n'aa be tɛɛ kur mɛ de ha̧ nu mɛ nak.

²²K’ɛ́nɛ́ e ta nɛ bíí nɛ ɔm ɔm’ɛ na; ŋma gba̧a̧ mɔ ko bíí a̧a̧ dee nde?