Read Northwest Gbaya ESAII 20 Bible Online

ESAII 20 - Northwest Gbaya bible

ESAII 20

¹Ti pɛ‘i, Sargɔŋ wannu Asirii toma ŋma gasa wi-biro si Asdod. A̧ bìì ye Asdod ɓɛɛ a̧ ba.

²Ká ŋgimbi'i, GASA WAN tɔ̧ɔ̧ so wen ha̧ wi-de-tom kɔ‘i Esaii bem ko Amɔs hee nde: «Mɛ̀ kpɔ̧́í̧ laa tɛ-mɛ‘i, ɓɛɛ mɛ kpɔ̧i̧a̧ o ndárà naŋ-mɛ yinɛ mbɛt.» Nɛ mɔ'ɔ nɛ Esaii dee hegɔ, ɓɛɛ yar nɛ gee tɛ in nɛ gee naŋ.

³Ɓɛɛ GASA WAN tɔ̧: «Hee mɔ'ɔ nɛ wi-de-tom kɔ‘m Esaii yara nɛ gee tɛ in nɛ gee naŋ tɛ pɛ taar ga, mɔ‘i tɛ duk nɛ mɔɔ-usi-mɔ yí‘nɛ́ in mɔɔ-mbaŋ-tɛ‘nɛ zu mɔ ko Egiptɛ in Etiopii.

⁴Mɛ nɛ hegɔ a̧ wannu Asirii tɛ kai nɛ o wi Egiptɛ nɛ bara, ká bá nɛ̀ o wi Etiopii nɛ Kus kaia so, o be-ŋgaiwi in o gbɛ́rɛ́ nɛ gee tɛ in gee naŋ, in o wan nɛ ɗoro duk zan; mɔ‘i tɛ duk nɛ mɔɔ-búù wen Egiptɛ.

⁵Wen Kus n’ɛ̀nɛ̀ e so nɛ ta tɛ pi̧ foe in kíì zu'nɛ́ mbɛt, ká bá nɛ̀ Egiptɛ n’ɛ̀nɛ̀ zɔk so hee gasamɔ ga'i.

⁶Ɓɛɛ o wi nɛ ya fara'i tɛ tɔ̧ wese'i'e nde: ‹Ɛ̀nɛ̀ zɔ́k ŋgamɔ nɛ hɔɔ zu wi n’ɛɛ ee so nɛ ta in wi n’ɛɛ duka so kii fara-hu̧si-tɛ ɛɛ tɛ a̧, wen ká wannu Asirii tɛɛ de mɔɔ-ba tɛ yɛ wo’ɛ. Kinii a̧ a̧a̧ dee? Ɛɛ tɛ de nɛ tɛ yɛ hee ge?› »