Read Northwest Gbaya ESAII 21 Bible Online

ESAII 21 - Northwest Gbaya bible

ESAII 21

¹Tɔ̧ɔ̧-wen zu Babilɔŋ nɛ‘i sa'e «Ŋga-gbárá-gba-tɔp.». Hee mɔ'ɔ nɛ gba-búk ŋga-gbárà ɓoɓi nɛ Nɛgɛb ga, wisɛn tɛ́ nɛ̀ ŋga-gbárà mɛ, nɛ̀ ŋma ŋga nù nɛ‘i yu yuu.

²Ɓɛɛ GASA WAN hɔ ŋma ɗaŋ zu ha̧‘m'e: «O wi-e-ɗɔra tɛ-wi a̧ e ɗɔra tɛ o bíí nɛnɛ‘i, o wi-ɗaŋ-mɔ ɗaŋ nɛ mɔ nɛnɛ. Elam, mɛ̀ dáŋ in Mɛd mɛ̀ nɛ́ɛ̀ bí Babilɔŋ; mi tɛ de ha̧ aia-nú ko Babilɔŋ mɛ kaɗi.»

³Mɛ nɛ wen hegɔ sa tɛ‘m lɛŋ nak nɛ kíì, mi zɔk nɛ bɔnɛ, hee mɔ'ɔ nɛ zaŋ ŋma okoo nyim nɛnɛ wen koo bem’ɛ ga. Mɔ n'am zii zik nɛ zu'm, ɓɛɛ mɔ n'am zɔk pi̧ nɛ kíì tɛ‘m.

⁴See-am gɔn gɔn, naka-tɛ pi̧ nɛ kíì tɛ‘m, yɔlɔlɔ-gɛ̧ɛ̧ mɛ ga̧a̧mɔ n'am kɔ̧ so nyɛmna’ɛ kifa duk nɛ mɔɔ-kíì ha̧‘m mbɛt.

⁵Wi ɗafi nɛ taŋe-nyɔŋ-mɔ, ɓɛɛ wi nyɔŋa mɔ nɔ nɛ mɔ zu a̧. «Ɛ̀nɛ̀ kúr, ɛnɛ o wi-yak-ti tɛ biro! Ɛ̀nɛ̀ sɔ̧́ nɔ̧́ tɛ o ŋgee k’ɛ́nɛ́!»

⁶Ɓɛɛ GASA WAN tɔ̧ ha̧‘m woyo: «Mɛ̀ nɛ́ ɓɛɛ mɛ̀ é ŋma wi-pɛm-mɔ, wen ha̧ a̧ mɛ tɔ̧ mɔ n'aa tɛ zɔk h’ɛ́nɛ́.

⁷Kà a̧ nɛ zɔka keekee-nyaŋa nɛ o nyaŋa yiitoo gbur tɛnɛ, kà a̧ nɛ zɔka ŋma bíí zu tuifuu, in ka a̧ nɛ zɔka ŋma bíí zu ŋgeloba, ɓɛɛ a̧ a̧ mbo ta-a, a̧ a̧ mbaɗi mɔ nɛ de-a.»

⁸Nɛ mɔ'ɔ nɛ wi-pɛm-mɔ‘i hiɗa mɔ tɔ̧ nɛnɛ‘e: «Nyaa, mi ɓɔn kana kɔ‘m sɛn fara-pɛm-mɔ'ɛ, pɛm nɛ mɔ wese lɛŋ, in mi yor nɛ ŋgɔn mɛ zɛ lɛŋ mbɛt».

⁹Ɓɛɛ kà a̧ tɛ zɔk mɔ wo, ŋma bíí nɛ duk zu keekee-nyaŋa nɛ o nyaŋa yiitoo gbur nɛ mɔ'ɔ nɛ tɛ‘i. Ɓɛɛ nɛ mɔ'ɔ nɛ wi’ɛi hiɗa mɔ tɔ̧ nɛnɛ‘e: «Babilɔŋ tika! Babilɔŋ tika kaɗi wo! O géé-sɔ̧ nɛ wa dee so gbina a nu lɛŋ.»

¹⁰Mɛ́, nɛ̀ GASA WAN gusa hee gba̧a̧-fon ga, mɔ nɛ GASA WAN nɛ a̧a̧ nɛ ŋgayamɔ lɛŋ, Sɔ̧ ko Israɛl tɔ̧a̧, nɛ mɔ‘i a̧‘m tɔ̧ ha̧ mɛ‘i.

¹¹Tɔ̧ɔ̧-wen zu Duma. O bíí hiɗi nɛ mɔ ha̧‘m nɛ Sɛir mɛ tɛnɛ‘e: «Wi-pɛm-mɔ, zɛ a̧a̧ dee? Mɛ̀ tɔ̧́ ha̧‘m, zɛ a̧a̧ dee?»

¹²Ɓɛɛ wi-pɛm-mɔ kifi nú: «Kà mɔ sa̧, ɓɛɛ zɛ dea. K’ɛ̀nɛ̀ nɛ kɔ̧ɔ̧ mɛ ak mɔ, ɛ̀nɛ̀ tɛ́ɛ̀ ak mɔ.»

¹³Ɛ́nɛ́ tɛ ɔ zaŋbɛɛ ŋga-gbárà Arabii, ɛ́nɛ́ o be Dedaŋ o wi-yar-war nɔ'ɔ.

¹⁴Ɛ̀nɛ̀ bá yi nɛnɛ ha̧ o wi nɛ wɔ yi gbɛ, ɓɛɛ ɛ́nɛ́ o be nu Tɛma, ɛ̀nɛ̀ bá nyɔŋmɔ nɛnɛ ha̧ o wi-yu-mɔ.

¹⁵Wen wa yu nɛ o gba-paa, wa yu nɛ tɔ̧ɔ̧ nu gba-paa, in kusaa nɛ‘i ŋgaŋa, wa yu nɛ mɔ ti ŋga biro.

¹⁶Ɓɛɛ GASA WAN tɔ̧ ha̧‘m woyo: «Oi pɛ kpɔk woyo, ɓɛɛ dee ŋgamɔ in gasamɔ ko Kedar yambala kifi geemɔ.

¹⁷Oi o kpasa wi-pi̧-góò mgbara o yaa-ŋgo-biro kɔ̧-a̧ tɛ ɓɔn tikiɗi ɓɛɛ.» Nɛ GASA WAN Sɔ̧ ko Israɛl a̧ tɔ̧ wen’ɛ.