Read Northwest Gbaya ESAII 24 Bible Online

ESAII 24 - Northwest Gbaya bible

ESAII 24

¹GASA WAN tɛ ɗaŋ nu lɔkɔti-lɔkɔti; a̧ tɛ ɗaŋ mɔ zu nu lɛŋ, ɓɛɛ a̧ ndaka o bíí pɛsi á taŋ, kɛ̧́ɛ̧́ mgbara-a bo na:

²o wi-ɗafi-sɔ̧ hee gee bíí ga, wan-tom hee wi-de-tom ga, naa-wan-tom hee kó-de-tom ga, wi-ɗɔr-mɔ hee wi-hi̧fi̧-mɔ ga, wi-ha̧-mɔ hee wi-gbak-mɔ ga, wi-ha̧-nyamando hee wi-ba-nyamandoi ga mbɛt.

³Nu tɛ ɗaŋ nɛ oi-aa, mɔ tɛ ɗaŋ nɛ ndaa-zan hɔ zu-zan lɛŋ hee mɔ'ɔ nɛ GASA WAN tɔ̧ɔ̧ ga.

⁴Nù zim nɛ mɔ ɗaŋ nɛnɛ; nù nɛ oi-aa lɛŋ tik tik ɗaŋ nɛnɛ!

⁵O bíí ɗaŋa nù lɛŋ, wen wa gbina heembea, wa yaka zu o geŋa; wa gbina nɔɔ-tɔk nɛ duk ɓɔnsɛnɛ.

⁶Mɛ nɛ wen hegɔ sa fom ba nù, nɛ mɔ‘i sa bɔnɛ-oi-aa kpa o bíí zaŋnu, sa o bíí bíí wee, ɓɛɛ oi-wa dɔk ɓɔna.

⁷Mbe dɔ̧ɔ̧ dɔk ɓɔna, o nyak-dɔ̧ɔ̧ ɔ̧ka̧ kor ɗaŋ lɛŋ. O wi nɛ ya so nɛ desee, pɛ nɛ see, gɔfi nɛ mɔ.

⁸Giti bi̧ɔ̧ kaɗa, ger desee kaɗa, wi zii giti koloŋ ɓɔna mbɛt.

⁹Nɔɔ dɔ̧ɔ̧ bíí nɛ̀ gima bo ɓɔna; ŋga dɔ̧ɔ̧ kifa nɛ paŋmɔ kpírírí sɛn nú o wi-nɔa-a.

¹⁰Gee tum ye tika, nu tua lɛŋ kpea, wi nyɛm mɛ ye ɓɔna.

¹¹O bíí kii nɛ dɔ̧ɔ̧ nɛ yuwar nɛnɛ; tortɛ bo na, desee kaɗa zu nu lɛŋ.

¹²Ŋma mɔ nɛ ɓɔna saaye bo na, nu garo gbina a nu mutu-mutu.

¹³Sɛn zu nu in mgbara o dukbíí, mɔ duk hee oi fɔ-te-nɔ̧́, kóó hee oi fɔ-nyak-dɔ̧ɔ̧ nɛ‘i ɓii waya-a kaɗi ga.

¹⁴O bíí nɛ̀ mɔ hɔɔ yɔɔ zu wa bíí nɛ gima zɔn nɛ gasamɔ ko GASA WAN. Wa de nɛ nyɛŋɛ si kur gba-tɔp mɛ.

¹⁵Wi zii nɛ zɔna nin GASA WAN nɛ wa zɔn si daŋa-wese; wa sa nɛ nin GASA WAN Sɔ̧ ko Israɛl sɛn see-kisi mɛ.

¹⁶Wi zii nɛ gima nɛ nduti-nu mɛ tɛnɛ‘e: «Zɔnamɔ a̧ duk nɛ ko Sɔ̧ Wan-de-mɔ nɛ yuwar-a.» Ɓɛɛ mi tɔ̧: «Oee mi, oee mi wa! Bɔnɛ a̧a̧ zu'm!» O wi-e-ɗɔra yee tɛ ee ɗɔra, o nde e nɛ ɗɔra tɛ bíí lɛŋ!

¹⁷Bele a̧ zar'nɛ́, ɛ̀nɛ̀ tík lim ɓɛɛ pɛ́r a̧ ba'nɛ́, ɛ́nɛ́ o bíí zu nu’ɛ.

¹⁸Wi nɛ tɛ yu mɔ wen hiɗimɔ-kíì tɛ tik lim, ɓɛɛ wi nɛ tɛ daŋ nɛ kɔ̧ lim tɛ ba pɛ́r. O woi yiwese tɛ hú̧í̧, ɓɛɛ naŋ-nu, foo mɔ.

¹⁹Nu tɛ fo mɔ, gbaa, ɓɛɛ mbaŋa ɗɛsɛ-ɗɛsɛ.

²⁰Nu tɛ pi̧ liki-liki hee wi-gbɛ-dɔ̧ɔ̧ ga; a̧ tɛ pi̧ hee dana-nyak[11] ga. Ɗaŋmɔ kɔ̧-a̧ dita zu-a, a̧ tɛ yo nu ɓɛɛ a̧ beka kur ŋgɔn ɓɔna.

²¹Wese'i, GASA WAN tɛ gɔn kita zu o wi-biro mɛ ŋgɔn mɛ, in zu o wannu zaŋnu’ɛ.

²²Wa tɛ mɔi̧ wa nɛ bara-biro a kɔ̧ lim, ɓɛɛ wa kpee nú wa e kɔ̧ zɔɓɔ. Tɛ duk ɗoŋ-aa nyɛi̧, ɓɛɛ wa kifa nú zu mɔ nɛ wa dea.

²³Ziimɔ tɛ ba nyaŋa-zɛ, ɓɛɛ búù baa wese; hegɔ, GASA WAN nɛ a̧a̧ nɛ ŋgayamɔ lɛŋ tɛ ɔ wan zu kaya Siɔŋ in sɛn Jerusalɛm mbɛt nɛ oi gasamɔ kɔ̧-a̧ sɛn ti o kuti bíí.