Read Northwest Gbaya ESAII 25 Bible Online

ESAII 25 - Northwest Gbaya bible

ESAII 25

¹GASA WAN, ɛnɛ nɛ Sɔ̧ kɔ‘m, hegɔ mi gasi nɛ ɛnɛ zɔn nɛ nin'nɛ́, wen ɛnɛ dee o gba demɔ nɛ duk nɛnɛ tɛnɛ ɓeemɛ ɗaŋ na.

²Ɛnɛ dee ha̧ ye mɛ kifi duk nɛ duk-ta, ha̧ ŋga ye mɛ kifi nɛ gee bɛɛ-oi; ŋga ye ko o wi-de-ŋgamɔ tɛ gbin a nu nɛ‘i beka mbo ɓɔna ndo ndo ndo.

³Mɛ nɛ wen zu mɔ‘i sa ŋga dukbíí gasi nin'nɛ́; sa ye ko o dukbíí-de-ŋgamɔ, yu'nɛ́.

⁴Ɛnɛ nɛ fara-hu̧si ko o wi nɛ̀ bó nɛ̀ ŋgai na, Wan nɛ o wi-kɔsa e nɛ ta, ŋgimbi bɔnɛ. Ɛnɛ nɛ fara-hu̧si wen ŋga búk-kórò, in ti gi̧ɔ̧, ŋgimbi gbɛ̧ŋmɔ; wen búk nɛ gbo nɛ kɔ̧ nú o wi-de-ŋgamɔ duk hee ŋga búk-kórò a yo ŋgeŋ ga,

⁵kóó hee ŋga gbɛ̧ŋmɔ mɛ nú-kórò ga. Ɛnɛ tɛ kpe kura-a ko o wi-de-ŋgamɔ hee mɔ'ɔ nɛ tura-zan kpe nɛ yiwese’ɛ ga, ɓɛɛ wi beka zii ger-wa ɓɔna.

⁶GASA WAN nɛ a̧a̧ nɛ ŋgayamɔ lɛŋ tɛ ɗafi nyɔŋmɔ sɛn zu kaya’ɛ; a̧ tɛ ha̧ de nɔ-kpoo, dɔ̧ɔ̧ nɛ baa yi nɛ de-a, bá nɛ̀ dé zɔr-zɔr kpoo in mbiɗi-mbiɗi dɔ̧ɔ̧ ha̧ o dukbíí lɛŋ.

⁷A̧ tɛ kpɔ̧i̧ laa-zim-fio tɛ o bíí zu kaya’ɛ in ndɔmbɔ nɛ kpee zu o dukbíí yinɛ lɛŋ mbɛt.

⁸Fio beka bo ɓɔna, GASA WAN Sɔ̧ tɛ di̧ miikɔ̧a yinɛ yí o bíí lɛŋ; a̧ tɛ ba mɔɔ-búù zu nu in zu dukbíí kɔ̧-a̧ yinɛ. Nɛ GASA WAN a̧ tɔ̧ɔ̧ hegɔ!

⁹Wese'i, bíí tɛ tɔ̧ hee mɔ'ɔ ga: «Ɛ̀nɛ̀ zɔ́k wi’ɛ nɛ́ Sɔ̧ k’ɛɛ, n’ɛɛ e ta nɛnɛ nɛ kpasa yɛ. A̧ nɛ GASA WAN n’ɛɛ e nɛ ta. Ɛ̀ɛ̀ dé nyɛŋɛ, ɛ̀ɛ̀ dé tortɛ wen n'aa kpasa yɛ!»

¹⁰GASA WAN tɛ nyɛi̧ er si zu kaya’ɛ, ɓɛɛ wi tɛ mbɔli o be Mɔab ɓɔn bɛɗɛ hee zɔ̧ nɛ‘i i̧si̧ zuku-paa’ɛ ga.

¹¹Sɛn fara'i, wa tɛ nyɛi̧ er-wa misi̧ nɛnɛ hee mɔ'ɔ nɛ‘i zui nɛ yi’ɛ ga. Kóó nɛ oi bia-a kɔ-wa'i, GASA WAN tɛ gbɔsi wa ha̧ gasa-zu kɔ-wa mɛ kaɗi.

¹²Ɓɛɛ nɛ̀ war ko o ŋgárá k’ɛ́nɛ́ o be Mɔab, GASA WAN tɛ gbin wa, a̧ tɛ ndur wa a mbɔɗɔnu kifi nɛ gee fuunu.