Read Northwest Gbaya ESAII 26 Bible Online

ESAII 26 - Northwest Gbaya bible

ESAII 26

¹Wese'i, wi tɛ bìì gima’ɛ nu Juda: «GASA WAN ha̧a̧ ŋga ye h’ɛ́ɛ́! A̧ mboo garo in ŋgárá zik ye'i kpa nu ŋmaa.

²Ɛ̀nɛ̀ hú̧í̧ o nu garo ha̧ o dukbíí-de-mɔ nɛ yuwar-a nɛ yor ɗoŋ ha̧a̧nú kɔ‘i mɛ ye mɔ.

³Yuwar deemɔ kɔ̧-a̧ ɔ dee, a̧ kii kɔ̧-a̧ nɛ ga̧a̧mɔ, wen a̧ e ta nɛ ɛnɛ.

⁴Ɛ̀nɛ̀ é ta nɛ GASA WAN ɓɔnsɛnɛ, wen a̧ nɛ kam-ta nɛ duk kpoo nɛ kpoo.

⁵A̧ dee ha̧ o wi nɛ ɔ zu kusa-fara mɛ zir si ɗɔɔ; a̧ ɗaŋa gee tum ye nɛ‘i nyɛm mɛ ye sɛnɛ na'i gbuɗuk a mbɔɗɔnu,

⁶ɓɛɛ fara'i kifi nɛ mɔɔ-i̧si̧ ko o wisan in o wi-kɔsa.»

⁷Yuwar ko wi-de-mɔ nɛ yuwar ɔ tana; ɛnɛ ɗafa yuwar kɔ̧-a̧ nɛ yɔka-a.

⁸Ɛ́ɛ́ bá nɛ yuwar nɛ geŋa k’ɛ́nɛ́ usa h’ɛ́ɛ́, wen ɛnɛ nɛ mɔɔ-e-nɛ-ta k’ɛɛ GASA WAN; ɓɛɛ mɔ nɛ see yɛ gbɛŋ wen-aa mɛ nɛ saa nin'nɛ́.

⁹Sɔ̧-tɛ‘m de nɛ wɔ‘nɛ́ mɛ zɛ ɓɛɛ ɔmi nɛ a̧a̧ kiitɛ‘m kii nɛ ɛnɛ. Ŋgimbi n’ɛnɛ gɔn kita zu nu’ɛ, ɓɛɛ o bíí zaŋnu lɛŋ yamba deemɔ nɛ yuwar-a.

¹⁰Kà'í de ko ha̧ wi-ɗaŋ, ɓɛɛ a̧ kɔ̧ mɛ de mɔ nɛ yuwar-a na; a̧ ɗaŋ nɛ mɔ zu nu’ɛ, ɓɛɛ a̧ zɔk kɔ̧-a̧ gasi ko GASA WAN na.

¹¹GASA WAN, er'nɛ́ nɛ ŋgamɔ, ɓɛɛ o bíí zɔk na; o bíí be tɛɛ zɔk kɔ̧ɔ̧mɔ n’ɛnɛ kɔ̧ɔ̧ nɛ o bíí k’ɛ́nɛ́, ɓɛɛ foe baa wa! Ɓɛɛ wee n’ɛnɛ ɗafa so e wen wi-sɛn'nɛ́ tɛ dɔ wa.

¹²GASA WAN, nɛ́ ɛnɛ'ɛ ha̧ ga̧a̧mɔ h’ɛ́ɛ́; mɔ n’ɛɛ de lɛŋ, nɛ́ ɛnɛ'ɛ de ha̧ mɛ hɔ gba̧a̧.

¹³GASA WAN Sɔ̧ k’ɛɛ, o ŋma wan ɔɔ so wan zu yɛ, ɓɛɛ nɛ́ nin'nɛ́ kpɔk a̧ duk ɓɔn nú yɛ ɓɛɛ!

¹⁴Hee mɔ'ɔ nɛ fio fe ɓɛɛ kpasi ɓɔna, in wɔr mbɛt kur ŋgɔn na ga’ɛ, ɛnɛ kuma wa, ɓɛɛ ɛnɛ de ha̧ tɛ-wi mɛ bi ɗoŋ wa ɓɔn.

¹⁵GASA WAN, ɛnɛ dee ha̧ tugun bíí k’ɛɛ mɛ dɔk, ɛnɛ dee ha̧ tugun bíí mɛ gasi; ɛnɛ usa gasamɔ k’ɛ́nɛ́, ɓɛɛ ɛnɛ ɗɔŋ o gbisi e siti.

¹⁶GASA WAN, zaŋ dita-see k’ɛɛ, ŋgimbi n’ɛnɛ pi̧i̧ nɛ bɔnɛ zu yɛ, ɛɛ aia nú h’ɛ́nɛ́,

¹⁷hee naa-zaŋ nɛ hɛɗa mɛ ko bem ɓɛɛ nɛ bi ai nɛ nú'ɛ ga. Duka-a k’ɛɛ ti'nɛ́ hee mɔ‘i ga, GASA WAN.

¹⁸Ɛɛ baa zaŋ, zɔk nɛ bɔnɛ nyima-a ɓɛɛ ɛɛ ko nɛ geemɔ; ŋma mɔ n’ɛɛ dee nɛ tɛ gbak nu bo na; mbe bíí n’ɛɛ koo a zu nu’ɛ bo na mbɛt.

¹⁹O wɔr tɛ kur ŋgɔn, ɓɛɛ o fio kɔ-mɛ kpasa. Ɛ̀nɛ̀ tún, ɛ̀nɛ̀ bíí gima nɛ desee, ɛnɛ o wi nɛ ɔ nu tɛ fuunu. Wen mbɛŋ sa̧a̧mɔ ko GASA WAN nɛ tok tok tɛ ɓɔ nu, ɓɛɛ dee ha̧ o fio mɛ kur.

²⁰O bíí kɔ‘m, ɛ̀nɛ̀ sí ɗoŋ kɔ̧ tua k’ɛ́nɛ́, ɛ̀nɛ̀ kpé nu tua e zu'nɛ́, hu̧si nɛnɛ tikiɗi ha̧ ŋgimbi nyimsea ko GASA WAN yak sɛ,

²¹wen a̧ tɛ gbo nɛ kɔ̧ Tua kɔ̧-a̧ mɛ ɓa ndaa gbɛɛ-zu ko o bíí zu nu, ɓɛɛ nu tɛ e ha̧ tɔk mɛ fok n'aa beka hu̧si wɔr ɓɔna.