Read Northwest Gbaya ESAII 27 Bible Online

ESAII 27 - Northwest Gbaya bible

ESAII 27

¹Wese'i, GASA WAN tɛ ba gasa zɔm tɔ̧́ɔ̧́ nú gba-paa kɔ‘i wen dee ŋmaa in ndiɓa, dɔwɔk yɔɔ gɔ́k nɛ duk ɗɔɔ gba-tɔp, ɓɛɛ a̧ gbɛɛ a̧.

²Wese'i, ɛ̀nɛ̀ bíí gima zɔn nɛ gba de fɔ-nyak-dɔ̧ɔ̧ hee mɔ'ɔ ga:

³«Mi GASA WAN, mi nɛ Wan-pɛm-a, mi a nɛ yì gun-aa wese lɛŋ, wen ká wa̧a̧-a̧ tɛɛ ai; mi pɛm a̧ zɛ nɛ wese.

⁴Mi de nyimsea ɓɔna; kà tɛn-dara in o tɛn gbo sɛnɛ, mi tɛ zuɗi wa, ɓɛɛ mi dɔɔ wa a nu lɛŋ.

⁵Wi nɛ e'm nɛ fara-hu̧si kɔ‘i, ga̧a̧mɔ tɛ duk mgbara'm in wi’ɛi, ɓɛɛ ga̧a̧mɔ tɛɛ duk mgbara a̧ in am mbɛt.»

⁶Ŋma wese, ku̧nin Jakob tɛ hɔ, Israɛl tɛ do, waia, ɓɛɛ o waya-a tɛ dun zu nu’ɛ lɛŋ.

⁷GASA WAN gusa Israɛl hee mɔ'ɔ n'aa gusa nɛ o wi nɛ gusa so a̧ ga nde? GASA WAN gbɛɛ wa hee mɔ'ɔ n'aa gbɛɛ nɛ o wi nɛ gbɛɛ so wa ga nde?

⁸Kita kɔ̧-a̧ tika wa; a̧ ndaka wa yaknɛ ɓɛɛ wa kifi bara-biro. Búk mɛ kɔ̧ nú-a kaia wa yaknɛ hee búk-kórò mɛ ti daŋa-wese ga.

⁹Sɔ̧ tɛ e ɗaŋmɔ ha̧ Jakob, ɓɛɛ mɔɔ-oi ee ɗaŋmɔ nɛ Sɔ̧ tɛ e ha̧ a̧‘i nɛ mɔ'ɔ: GASA WAN tɛ mbaŋ o ta fara-ɗafi-sɔ̧ mɛ kifi nɛ mbɔɗa ɓɔndɔ nɛ‘i mbuti kifi fuunu’ɛ ga. Bé kà'ì zɔk o ta-zu-nu, in o sɔ̧-wese fara yor ɓɔna.

¹⁰Ŋga ye tɛ kifi nɛ bɛɛ-oi, nɛ o bíí beka duk sɛnɛ ɓɔna; ye'i tɛ kifi nɛ ŋga-gbárà, fara-nyɔŋ-mɔ ko o ndai, wa tɛ ɔ nu nyɔŋ nɛ mbɔɗi zɔ̧ ɓɔn fara-a mbɛt.

¹¹Kà o gbaa er-te kor, ɓɛɛ gbina a nu; ɓɛɛ o okoo tɛ̀ɛ́ kai wa mɛ a tɛ wee. Nɛ mbetɛ, dukbíí'ɛ iŋ mɔ na, mɛ nɛ hegɔ sa wi nɛ dee wa de ko ha̧ wa, kà a̧ kɔ̧ wa na mbɛt.

¹²Wese'i, GASA WAN tɛ gusi fon kɔ‘i ku̧u̧naŋ nɛ nana-yì Efrat hɔ nɛnɛ tɛ gbar-gbar-yì Egiptɛ mɛ, ɓɛɛ nɛ́ ɛnɛ o be Israɛl a'i tɛ dɔr kpɔk kpɔk.

¹³Wa tɛ dɔm mbia wese'i, ɓɛɛ o wi nɛ yambala so si nu Asirii in o wi nɛ wa ndaka so si sɛn nu Egiptɛ tɛ pii ɗoŋ mɛ gasi GASA WAN sɛn zu sa̧a̧ kaya sɛn Jerusalɛm.