Read Northwest Gbaya ESAII 28 Bible Online

ESAII 28 - Northwest Gbaya bible

ESAII 28

¹Bɔnɛ a̧a̧ zu Efraim! Gasamɔ kɔ̧-a̧ hɔɔ ŋmaa in gba de mɛtɛwol ko o wi-gbɛ-dɔ̧ɔ̧ Efraim, nɛ ŋmaŋ nɛ tɛ wen déè kɔ-wa, nɛ duk kɔ̧ ɗɔŋgɔ ko o wi-gbɛ-dɔ̧ɔ̧.

²GASA WAN tɛ tom ŋma ŋga-wi, wi-de-ŋgamɔ tɛnɛ hee kórò ɓɔrɔ, kóó hee ŋga búk-ɗaŋ-mɔ ga, hee yì-kórò nɛ hɔ nɛ dɔka-a ha̧ yi mɛ ha̧'ɛ ga; a̧ tɛ gan wa lɛŋ,

³a̧ tɛ i̧si̧ wa nɛ naŋ, a̧ tɛ i̧si̧ gba de mɛtɛwol ko o wi-gbɛ-dɔ̧ɔ̧ Efraim mbɛt.

⁴O be Efraim nɛ ŋmaŋ tɛ wen déè kɔ-wa’ɛ, wa duk mgbara ɗɔŋgɔ hee te-mbɔra mɛ bɛɛ, kà bíí zɔk, ɓɛɛ tɛɛ ɓi waya-a mɛ nyɔŋ'ɛ ga.

⁵Wese'i, GASA WAN nɛ a̧a̧ nɛ ŋgayamɔ lɛŋ tɛ kifi duk nɛ́ gba de laasɔ̧i̧-wan, de toka mɔɔ-wan see zu ko o wannu, in mbɔi-tɛ ko oi dukbíí kɔ̧-a̧.

⁶A̧ tɛ ha̧ taamɔ deemɔ nɛ yuwar-a ha̧ o wi-gɔn-kita, ɓɛɛ nɛ a̧ a̧ tɛ ha̧ ŋgai ha̧ o wi nɛ ndak o wisɛn yinɛ sɛn nu garo ye.

⁷Dɔ̧ɔ̧ ɗaŋa zu o wi-ɗafi-sɔ̧ in o wi-tɔ̧-wen oi nú Sɔ̧; ŋga dɔ̧ɔ̧ gana wa, ɓɛɛ wa hui hui kɔɗɔŋ-kɔɗɔŋ. Dɔ̧ɔ̧ gana ŋgai kɔ-wa, ɓɛɛ ɗaŋ zu wa lɛŋ. O wi-tɔ̧-wen oi nú Sɔ̧ iŋ zu wen nɛ wa tɔ̧ tɛ mɔ nɛ Sɔ̧ usi ha̧ wa na; o wi-ɗafi-sɔ̧ iŋ yuwar gɔna kita nɛ yuwar-a na mbɛt, wen dɔ̧ɔ̧ ɗaŋa zu-wa lɛŋ.

⁸Zu taŋe-nyɔŋ-mɔ lɛŋ duna nɛ ɗaŋ ɔ̧i̧ kɔ-wa; ŋma de fara bo na!

⁹Ɓɛɛ wa tɔ̧ wen’ɛ zu'm: «Nɛ o a̧ a̧ tɛ usi mɔ ha̧ a̧ o? A̧ tɛ we ɗoŋ wen kɔ̧-a̧ ha̧ o? Ha̧ o bem nɛ‘i gɔna bere nú-wa kinii naa, kóó ha̧ o be zɔɗi bem nɛ bɛ̧ɛ̧ bere kinii’ɛ nde?

¹⁰Ɛ̀nɛ̀ zíí wen kɔ̧-a̧: S-A-S-A, S-A-S-A, T-A-T-A, T-A-T-A, wen nɛ tɔ̧: kuti-a hegɔ, yiitoo-aa hee mɔ‘i ga.»

¹¹Hego, GASA WAN tɛ ha̧m nɛ́ gúgúma, nɛ́ ŋma gɔni nú ko o ŋma bíí a̧ tɛ tɔ̧ nɛ wen ha̧ dukbíí'ɛ.

¹²A̧ baa tɔ̧ so ha̧ wa'e nde: «Ɔma-tɛ nɛ mɔ'ɔ! Ɛ̀nɛ̀ é ha̧ wi nɛ mbɔia ɔm tɛ! Zɔk ga̧a̧mɔ nɛ mɔ'ɔ!» Ɓɛɛ wa kɔ̧ so mɛ zii na.

¹³Hegɔ wen ko GASA WAN tɛ duk nɛ ŋma wen nɛ wa beka zii gba̧a̧-a̧ na, hee «S-A-S-A, S-A-S-A, T-A-T-A, T-A-T-A» ga, wen nɛ tɔ̧: kuti-a hegɔ, yiitoo-aa hee mɔ‘i ga. Nɛ̀ sɔŋkur-aa wa tɛ hɔ̧fi̧ yo nu nɛ zaŋ-kpasa, goto-wa tɛ mbaŋ, naŋ-wa tɛ mbar mɔ, ɓɛɛ wa kimia daka-a yinɛ takaɗi.

¹⁴Ɛ̀nɛ̀ zíí wen ko GASA WAN, ɛnɛ o wi-de-zɛŋ, ɛnɛ o wi-ɔ-wan zu dukbíí nɛ a̧a̧ Jerusalɛm.

¹⁵Ɛ́nɛ́ dúk tɔ̧ nɛnɛ‘e: «Ɛɛ nɔɔ tɔk in fio, hɔ nɛnɛ fara ko o fio mɛ mbɛt; hegɔ ɛ́ɛ́ ee nú yɛ in ŋmaa kaɗi, ŋgimbi nɛ ɗaŋ mɔɔ-kum-wi be tɛɛ hɔ, mɔ‘i beka ba yɛ na, wen ndela nɛ fara-hu̧si k’ɛɛ in ɔramɔ nɛ fara-duk k’ɛɛ.»

¹⁶Mɛ nɛ wen hegɔ sa GASA WAN Sɔ̧ tɔ̧‘e: «Zɔk mi ee ŋma ta nɛ mɔɔ-sedaako sɛn Siɔŋ, a̧ tɛ duk nɛ yɔka ta-e-mgbii-tua nɛ duk gun naŋ-tua. Wi nɛ tɛ ɛk tɛ nɛ a̧ beka tir yɔɔ-mɔ na.

¹⁷Hegɔ, kpasawen tɛ duk nɛ dɔ́rá-nɛ-nɔ kɔ‘m, ɓɛɛ deemɔ nɛ yuwar-a nɛ mɔɔ-we-mɔ mbɛt.» Ɓɔrɔ tɛ ɗaŋ fara-hu̧si ko ndela, ɓɛɛ yì tɛ ha̧ kai fara-hu̧si k’ɛ́nɛ́ yaknɛ.

¹⁸Nɔɔ-tɔk k’ɛ́nɛ́ in fio, ká bá nɛ̀ ee-zu-mɔ k’ɛ́nɛ́ in fara ko o fio mbɛt tɛ ɗaŋ; ɓɛɛ ŋgimbi nɛ ŋga mɔɔ-kum-wi be tɛɛ ɓir yak, a̧ tɛ mbɔli'nɛ́ nɛ gasa mɔɔ-mbɔli-mɔ.

¹⁹Ŋgimbi lɛŋ n'aa tɛ ɓir yak fara'i, a̧ tɛ i̧si̧ zu'nɛ́ yak nɛnɛ; a̧ tɛ ɓir fara'i mɛ tutuyɛ in mɛ gira-wese, mɛ wese in mɛ zɛ mbɛt; ɓɛɛ nyɛrɛ mɔ‘i tɛ duk nɛ mɔɔ-kíì tɛ zia-a!

²⁰Wi beka ɔ nu gɔn gado na, wen gado zi̧i̧ ɓɔna; borgo beka pɛsi nyɛm mɛ kpe zu-wi ɓɔna.

²¹Ɓɛɛ GASA WAN tɛ kur hee mɔ'ɔ n'aa dee so zu kaya Perasim ga. Ŋga nyimsea kɔ̧-a̧ tɛ kur zu wa hee mɔ'ɔ n'aa dee so kɔ̧ ɗɔŋgɔ Gabaɔŋ ga. A̧ tɛ kur ha̧ a̧ mɛ de ŋga tom nɛ‘i iŋ zu-a na; tom'i tɛ duk nɛ mɔɔ-gɔn ɗɛɗɛ-wi.

²²Ɛ̀nɛ̀ káɗí zɛkɛɗa bíí wen ká nyak tɛɛ nɔ ger'nɛ́ siti, wen mi zia ŋma nyɛrɛ wen ɗaŋa nu’ɛ lɛŋ. Nɛ GASA WAN Sɔ̧ nɛ a̧a̧ nɛ ŋgayamɔ lɛŋ a̧ tɔ̧ɔ̧ ha̧‘m hegɔ!

²³Ɛ̀nɛ̀ yéŋ zer'nɛ́, ɛ̀nɛ̀ zíí wen kɔ‘m, ɛ̀nɛ̀ ya keɗeŋ, ɛnɛ zii gba̧a̧ wen kɔ‘m:

²⁴Mɔ'ɔ, ko wi-wa-fɔ nɛ duk nɛ kɔ‘i’ɛ, nɛ́ wáá fɔ, gbuta nu in kaia zɔ̧ yinɛ wese lɛŋ ɓɛɛ nde?

²⁵Bo nɛ kà a̧ nɛ ɗafa nu kaɗi, ɓɛɛ a̧ guna o wa̧a̧-kpoo hee mɛ̧ɛ̧wa in zima[12] ga, nɛti sɛka a̧ pɛɛ alkamaari in fon na nde?

²⁶Nɛ́ Sɔ̧ a̧ usa yuwar guna mɔ ha̧ wi-wa-fɔ yambi nɛnɛ ha̧ a̧ mbɛt.

²⁷Wi nyɛm mɛ gusi mɛ̧ɛ̧wa wen ha̧ gba̧a̧-a̧ mɛ sɔti na, in wi zuɗi zima nɛ oi gun, na mbɛt. Ɓɛɛ wi hɔ̧n nɛ mɛ̧ɛ̧wa nɛ ta-hɔ̧n-mɔ, ɓɛɛ wi ɓii wa̧a̧-zima ɓii wen gia-a nɛ nyɔŋmɔ.

²⁸Wi mbɛr nɛ alkamaari, ɓɛɛ bo nɛ ɓɔnsɛnɛ na; wi ba nɛ keekee i̧si̧ nɛ saɗa-a ha̧ gba̧a̧-a̧ mɛ sɔti a nu, nɛ̀ bó nɛ́ wi ɗaŋ nɛ gba̧a̧-a̧ na.

²⁹Mɔ‘i tɛ nɛ tɛ GASA WAN nɛ a̧a̧ nɛ ŋgayamɔ lɛŋ. Tɔ̧ɔ̧ mbɔrɔ kɔ̧-a̧ ɔ dee, wen tɔ̧ɔ̧ mbɔrɔ‘i de nɛ gasamɔ.