Read Northwest Gbaya ESAII 29 Bible Online

ESAII 29 - Northwest Gbaya bible

ESAII 29

¹Bɔnɛ a̧a̧ zu Ariɛl, ye nɛ David ɔɔ so sɛnɛ! Koo ɛnɛ duk tɛ dee gbaŋa k’ɛ́nɛ́ pɛ yak ɗoŋ ŋmaa ɗoŋ ŋmaa,

²mi tɛ usi bɔnɛ ha̧ mɛ Ariɛl, o bíí tɛ ai nu gɔfi nɛ mɔ, ɓɛɛ ye'i tɛ duk nɛ kɔ‘m.

³Mi tɛ bi ye'i hee mɔ'ɔ nɛ David dee so ga, mi tɛ kɛr a̧ e see-a, kpe a̧ e nu, ɓɛɛ sɛka'm bìí a̧.

⁴Mɛ tɛ hɔ̧fi̧ tik mbɔɗɔnu, ɓɛɛ wi zia tiger mɛ nɛ ɗɔɔ nu mɛ tɛnɛ; wi beka zii gba̧a̧-a̧ nɛ de-a na wen fuunu; tiger-mɛ tɛ gbo tikiɗi hee tiger hɔɔ-bíí ga, tiger'i tɛ gbo nɛ tɛ fuunu mɛ tɛnɛ hee dɔma-fɔ̧i̧ ga.

⁵O wi-sɛn-mɛ tɛ dɔk hee fuunu ga, o dɔka ŋga bíí nɛ tɛ usi bɔnɛ ha̧ mɛ tɛ duk hee kora-zɔ̧ nɛ bu̧i gaɗaguɗaa’ɛ ga. Ɓɛɛ nɛ haya-a hee gɔma-yí ga,

⁶GASA WAN nɛ a̧a̧ nɛ ŋgayamɔ lɛŋ tɛ tɛ mɛ ye ɗoŋ mɛ nɛ mbaŋa-kórò in naka-nù, ŋga-kórò ká bá nɛ̀ gba-búk-kórò in leɓe-wee mɛ dɔ mɔ lɛŋ.

⁷Ɓɛɛ gba duk o tugun bíí nɛ ba so biro duk nɛ Ariɛl, gu nɛ mɔɔ-de-biro kɔ-wa, in o ŋga bíí nɛ usa bɔnɛ ha̧ a̧, wa lɛŋ tɛ duk hee ɔɔ-zu in hɔɔ-zu mɛ zaŋzɛ ga.

⁸A̧ tɛ hɔ ŋmaa in ŋma wi-tik-ŋgata nɛ ɔɔ zu'e, wi nyɔŋ nɛ mɔ; kà a̧ tun, ɓɛɛ nyɔŋmɔ bo kɔ̧ zaŋ-aa na ga. A̧ hɔɔ ŋmaa in ŋma bíí nɛ wɔ yi gbɛ, ɓɛɛ ɔɔ zu'e, wi nɔ nɛ yi; kà a̧ kur, ɓɛɛ a̧ mbɔia, war ger-a mbɛt ɔ kora kútú-kútú'ɛ ga. Mɔ nɛ tɛ hɔ zu o dɔka tugun bíí nɛ tɛ bi kaya Siɔŋ nɛ mɔ‘i.

⁹Kíì a̧ de'nɛ́ ɓɛɛ ɛ̀nɛ̀ sákálí; ɛ̀nɛ̀ kífí wan-boma-yí, k’ɛ́nɛ́ zɔk mɔ na. Zu'nɛ́ a̧ zik bo nɛ wen nɔɔ kpɔra-dɔ̧ɔ̧ na, naŋ‘nɛ́ a̧ mbali ŋmaa, bo nɛ wen nɔɔ ŋga dɔ̧ɔ̧ na mbɛt,

¹⁰wen GASA WAN ee taamɔ-kíì tɛ‘nɛ́, a̧ kpee yí‘nɛ́ o wi-tɔ̧-wen oi nú-a; a̧ kpee yí‘nɛ́ o wi-zɔk-mɔ.

¹¹Zia gba̧a̧ hɔɔ-zu wen'nɛ́ zu mɔ‘i tɛ duk hee ŋma kalata nɛ‘i ee tumbal sɛnɛ, ɓɛɛ wi ha̧ ha̧ ŋma bíí nɛ iŋa tɔra-mɔ tɔ̧ nɛnɛ ha̧ a̧‘e: «Mɛ̀ tɔ́r mɔ'ɔ», ɓɛɛ a̧ kifi nú‘e: «Mi nyɛm mɛ tɔr na, wen tumbal aa̧ sɛnɛ» ga.

¹²Koo wi ha̧a̧ so kalata'i ha̧ wi nɛ iŋ tɔra mɔ na, tɔ̧ nɛnɛ ha̧ a̧‘e, «mɛ̀ tɔ́r mɔ'ɔ», ɓɛɛ a̧ tɛ kifi kana nú mbɛt'e: «Mi iŋ kɔ‘m tɔra mɔ na» mbɛt.

¹³Ɓɛɛ sa GASA WAN tɔ̧‘e: «Dukbíí kɔ‘m iŋa nɛ tɔ̧ɔ̧ gee wen nɛ ndàrá-nú ɓɛɛ, see-wa ɔ nyɛi̧a nɛ‘m, yuwar gasa'm nɛ wa gasi'i nɛ́ heembea ko bíí nɛ wa yamba so.

¹⁴Kinii, mi tɛ ku̧ naŋ dee gasamɔ in mɔɔ-kifi ha̧ dukbíí kɔ‘m; iŋa-mgbara-mɔ ko o wi-iŋ-mgbara-mɔ kɔ-wa tɛ ɗaŋ, iŋamɔ ko o wi-iŋ-mɔ kɔ-wa tɛ yambali mbɛt.»

¹⁵Bɔnɛ a̧a̧ zu o wi nɛ hu̧si yuwar deemɔ kɔ‘i nɛ GASA WAN, de nɛ hu̧sa̧mɔ nɛ ti tum, ɓɛɛ tɔ̧ɔ̧ nɛnɛ‘e: «Nɛ o'o zɔk ɛɛ, sɛka iŋ nɛ ndaa-mɔ k’ɛɛ o?» wo'i.

¹⁶Nɛ ge ɗaŋ taamɔ ge n’ɛnɛ a̧a̧ nɛnɛ'ɛ ge! Wi-ɓu-kpánà hɔɔ ŋmaa in gii wen ha̧ tom n'aa dee nɛ er-a mɛ tɔ̧ ha̧ a̧‘e nde: «Bo nɛ mɛ'ɛ dea'm na», in ha̧ kpánà mɛ tɔ̧ ha̧ wi-ɓu-a'e: «Zu-mɛ bo na,» nde?

¹⁷Bo nɛ ɗoŋ ŋgimbi tikiɗi, Libaŋ kifa de fara-gun-te na nde? Ɓɛɛ fara-gun-te'i tɛɛ kifi nɛ kombo na nde?

¹⁸Wese'i, o wi-mgbee-zer tɛ zii wen kɔ̧ kalata, ɓɛɛ o wan-boma-yí gboo ti tum ɓɛɛ wa zɔka mɔ.

¹⁹O wi-mɔka-see tɛ de nyɛŋɛ ti GASA WAN, ɓɛɛ Sa̧a̧ Wi ko Israɛl tɛ ha̧ desee ha̧ o wi-kɔsa.

²⁰O wi-de-ŋgamɔ in o wi-zɛkɛɗi-wi gu nɛ o wi nɛ dee ɗaŋmɔ lɛŋ tɛ kum,

²¹ká bá nɛ̀ o wi nɛ ɓir wen ndela pi̧ nɛ wen zu ŋma bíí tɛ kita, ɓɛɛ nɛ de ha̧ kita mɛ tik wi-de-mɔ nɛ yuwar-a sɔɔ gee mbɛt.

²²Mɛ nɛ hegɔ sa GASA WAN Sɔ̧ ko Israɛl nɛ kpasa so Abraham tɔ̧‘e: «Foe beka ba Jakob na, in búù beka ba a̧ ɓɔna mbɛt.

²³Ŋgimbi nɛ wa, kóó o bem kɔ-wa, tɛ zɔk mɔ n'am dee sɛn mgbara wa, wa tɛ tu̧ tɛ nin-am, wa tɛ tu̧ tɛ Sa̧a̧ Wi ko Jakob, ɓɛɛ wa dee kíì sɛn ti Sɔ̧ ko Israɛl.

²⁴O wi nɛ taamɔ kɔ-wa sakala so tɛ ta mɔ nɛ de-a, ɓɛɛ o wi-ŋgazu tɛ kpa desee mɛ yambi mɔ.»