Read Northwest Gbaya ESAII 3 Bible Online

ESAII 3 - Northwest Gbaya bible

ESAII 3

¹Ɛnɛ zɔk, GASA WAN nɛ a̧a̧ nɛ ŋgayamɔ lɛŋ tɛ dɔ o be Jerusalɛm in o be Juda nɛ nyɔŋmɔ in yi, ká bá nɛ̀ o ŋma gbakamɔ lɛŋ:

²o wi nɔ‘i nɛ́ o ŋga bíí in o yaa-ŋgo-biro, o wi-gɔn-kita in o wi-tɔ̧-wen oi nú Sɔ̧, o wi-de-mɔɔ-gbana in o kuti-wi,

³o wi-duk-zu o wi-biro in o dita-bíí, ká bá nɛ̀ o wi-tɔ̧-mbɔrɔ, o wi-zɔk-mɔ in o wi-de-mɔɔ-kifi.

⁴«Mi tɛ ha̧ nɛ gee o be geɗek bem mɛ duk zu wa, wen zu dee ŋgazu kɔ-wa; wa tɛ ɔ wan zu wa.»

⁵O bíí tɛ de mɔ ba nú ŋmaa in o ŋmaa; kóó o nde tɛ de bɔnɛ in ŋma-wi, be-ŋgaiwi tɛ de ŋmaa in gbɛ́rɛ́, ɓɛɛ gee wi-de-gba̧a̧-mɔ na dee ŋmaa in dita-bíí.

⁶O ŋma bíí tɛ nɛɛ ba ger nya-wi kɔ̧ tua ko daa kɔ‘i, ɓɛɛ wi tɔ̧ɔ̧ ha̧ a̧‘e: «Mɛ a̧a̧ nɛ gasa laa, mɛ̀ ɔ́ wan zu yɛ! Mɛ̀ ɔ́ wan zu oi mɔ nɛ ɓɔna’ɛ.»

⁷Ɓɛɛ wese'i, nya-a̧‘i tɛ kifi nú‘e: «Mi bó nɛ́ wi-de-nyina na, mi bó nɛ̀ nyɔŋmɔ in gasa laa kɔ̧ tua kɔ‘m na mbɛt, hegɔ k’ɛ́nɛ́ e ha̧‘m mɛ ɔ wan zu o bíí na.»

⁸Jerusalɛm ɗaŋa kifi bɛɛ-oi, Juda yoo nu wen wen mɛ nú-wa in deemɔ ko o bíí tɛ ye'i duk hee dara a̧ wa da̧a̧ nɛ gasamɔ ko GASA WAN ga.

⁹Mɔ nɛ sɔnti-wa usi nɛ mɔ mɛ tɛ-wa; wa dee ɗaŋmɔ ɓɔn yí o bíí hee ko o bíí Sɔdɔm ga, wa hu̧si na. Nɛ mɔ‘i nɛ wa de'i a̧ tɛ ɗaŋ wa yinɛ.

¹⁰Ɛ̀nɛ̀ tɔ̧́‘e nde, wi-de-mɔ nɛ yuwar-a a̧ duk kɔ‘i nɛ desee, wen a̧ tɛ kpa mɔɔ-oi de tom kɔ̧-a̧.

¹¹Wi-ɗaŋ nɛ wi-bɔnɛ, wen ɗaŋmɔ a̧a̧ zu a̧. GASA WAN tɛ de mɔ in a̧ nyɛm nɛ ɗoŋ tom kɔ̧-a̧.

¹²Nɛ́ be geɗek bem a̧ duk wi-usi-bɔnɛ ha̧ dukbíí kɔ‘m; ɓɛɛ nɛ o okoo a̧ ɔ wan zu wa. Dukbíí kɔ‘m, nɛ́ o gasawi k’ɛ́nɛ́ a̧ mgbɔ‘nɛ́ pi̧ tɛ ɗaŋ war n’ɛnɛ nɛ sɛnɛ'ɛ.

¹³GASA WAN kura mɛ de kita, a̧ kura mɛ gɔn kita zu o dukbíí kɔ̧-a̧.

¹⁴GASA WAN ɓa nɛ wen in o gasawi, ká bá nɛ̀ o be-wan ko o bíí tɔ̧ nɛnɛ ha̧ wa'e: «Mɛ nɛ ɛnɛ'ɛ ɗaŋ o nyak-dɔ̧ɔ̧ kɔ‘m, kai nɛ mɔ ko o wisan dun nɛ tua k’ɛ́nɛ́.

¹⁵Wen ge s’ɛnɛ mbɔli dukbíí kɔ‘m, e nɛ o wisan tɛ geemɔ ge? Nɛ mi GASA WAN Sɔ̧ nɛ a̧a̧ nɛ ŋgayamɔ lɛŋ a̧ tɔ̧ wen’ɛ.»

¹⁶Ɓɛɛ GASA WAN tɔ̧: «O boko be Siɔŋ ŋmaŋ nɛ tɛ, gbin nɛ ger, pi̧ nɛ yí ɔr nɛ wiwii; wa dɔɓi dɔɓi nɛ́ nɛ nɔ wen ha̧ o bíí mɛ zii giti kana nɛ to ŋmaa naŋ-wa'i.

¹⁷GASA WAN tɛ de ha̧ kputu mɛ a zu o boko be Siɔŋ lɛŋ, ɓɛɛ a̧ tɛ ba mɔɔ-kpe-zu-wa yinɛ wen ha̧ foe mɛ de wa.»

¹⁸Wese'i GASA WAN tɛ kai o mɔɔ-ɗafi-tɛ nɔ‘i tɛ-wa yinɛ lɛŋ: o kana, o kalaafi, o kísí-ger,

¹⁹o mɔɔ-a-zer, o kana-yí-er, ká bá nɛ̀ goe-gu-zu,

²⁰o mɔɔ-ɓam-zu, o geɗek kísí nɛ tok tok, o fura-nyina-pɛm-tɛ,

²¹o wele-pi̧-er in wan mɛ pi̧ zɔ̧ɔ̧,

²²o de laa-de-gbaŋa, o gasa laa, o gba laa in o ŋgoɓo;

²³o mɔɔ-zɔk-yí[1] in o be yɛm-yɛm laa, o laa-kar-zu nɛ diti na ká bá nɛ̀ goe-gaɓi-tɛ.

²⁴Wen ha̧ wa mɛ kpa nɛ de fuu-nyama wo, wa tɛ̀ɛ̀ kpá nɛ mbɔra mɔ. Ha̧ wa mɛ kpa nɛ kanda wo, wa tɛ̀ɛ̀ kpá nɛ gba̧a̧-pɛr; ha̧ wa mɛ de zu-wa wo, ɓɛɛ wa tɛ̀ɛ̀ kpúí kpui a nu. Ha̧ wa mɛ mar de goe wo, wa tɛ mar nɛ a̧ka̧ goe. Ha̧ wa mɛ ɗafi tɛ-wa wo, ɓɛɛ wa dir nɛ tɛ nɛ wee-boi.

²⁵Wa tɛ kum o bíí kɔ-mɛ a nu nɛ gba-paa, ɓɛɛ o ŋga-wi kɔ-mɛ tɛ tir a nu yi biro.

²⁶O bíí kɔ-mɛ tɛ gɔfi mɔ, hi̧i̧ nɛ kɔ̧a̧; ɓɛɛ mɛ tɛ a er-mɛ bɛɗɛ zu-mɛ.