Read Northwest Gbaya ESAII 33 Bible Online

ESAII 33 - Northwest Gbaya bible

ESAII 33

¹Bɔnɛ a̧a̧ zu mɛ wi-de-ɗaŋmɔ, nɛ ŋma bíí tɛ ɗaŋ mɔ kɔ-mɛ hɔ̧ɔ̧ na, in mɛ wi-ɔr-wi nɛ wa tɛ ɔr mɛ hɔ̧ɔ̧ na! Ŋgimbi nɛ mɛ be tɛɛ kaɗi ɗaŋa mɔ ko ŋma bíí, nɛ́ tɛ́ ŋgimbi'i a̧ ŋma bíí tɛ ɗaŋ nɛ mɔ kɔ-mɛ mbɛt. Ŋgimbi nɛ mɛ be tɛɛ kaɗi ɔra bíí, a̧ wa tɛ ɔr nɛ mɛ mbɛt.

²GASA WAN, ɛ̀nɛ̀ dé ko h’ɛ́ɛ́! Ɛ́ɛ́ é ta nɛ ɛnɛ kpɔk ɓɛɛ. Ɛ̀nɛ̀ há̧ ŋgai h’ɛ́ɛ́ mɛ tutuyɛ lɛŋ, ɓɛɛ ɛ̀nɛ̀ kpásí yɛ tɛ ŋgimbi bɔnɛ k’ɛɛ lɛŋ.

³Kà o dukbíí zii giti mbaŋa-kórò, ɓɛɛ wa pɛsa yu mɔ yak; k’ɛ́nɛ́ kur ŋgɔn, ɓɛɛ o tugun bíí lɛŋ pɛsa sót-sót.

⁴O bíí ŋmakpari mɔɔ-oi hee mɔ'ɔ nɛ‘i ba nɛ o gba-dɔya’ɛ ga; ɛ́ɛ́ tik zu mɔ‘i hee mɔ'ɔ nɛ o gba-dɔya tik nɛ zu o nyɔnɔ'ɛ ga mbɛt.

⁵Ɛ̀ɛ̀ gásí GASA WAN nɛ ɔ wan ŋgɔn mɛ; a̧ ee deemɔ nɛ tana-a in deemɔ nɛ yuwar-a zu Siɔŋ.

⁶Gasa kpaamɔ k’ɛ́nɛ́ nɛ́ duka-a nɛ de-a tɛ kpasamɔ; iŋamɔ in iŋa-mgbara-mɔ, ká bá nɛ̀ yuu kíí GASA WAN tɛ duk nɛ mbɔi k’ɛ́nɛ́.

⁷Ɛ̀nɛ̀ zɔ́k o bíí ko Ariɛl nɛ mɔ'ɔ nɛ hi̧i̧ kɔ̧a̧ nɛ gba-war nɛnɛ, o betom ko ga̧a̧mɔ hi̧i̧ nɛ kɔ̧a̧ nɛ ɗaŋsee mbɛt.

⁸O yuwar lɛŋ duk keŋgeŋge, ŋma wi-ɓir-war bo na, nɔɔ-tɔk bo ɓɔna, wa ee ye duk; bíí da̧ nɛ o wi-sedaako kinii, wi zɔk ŋmaa sur yi ɓɔna.

⁹Nù hí̧í̧ nɛ kɔ̧a̧-fio nɛ ɗaŋsee, Libaŋ hí̧í̧ nɛ kɔ̧a̧-foe, kor nɛnɛ; bɔkɔ-nu Sarɔŋ kifa ŋga-gbárà; ŋma mɔ bo zu Basaŋ in Karmɛl ɓɔna.

¹⁰GASA WAN'e: «Mi tɛ kur ŋgɔn kinii, mi kɔ̧ɔ̧ mɛ yor ŋgɔn nɛ de-a kinii, bíí tɛ zɔk ŋgai kɔ‘m kinii mbɛt.

¹¹Ɛnɛ baa zaŋ zɔ̧, ɓɛɛ ɛnɛ ko nɛ yuɗu; búk mɛ kɔ̧ nú‘nɛ́ nɛ duk nɛ wee'i tɛ dɔ‘nɛ́ gbɛ lɛŋ.

¹²O dukbíí tɛ bìì wee ɗololo kifi nɛ ɓɔndɔ; wa tɛ kifi dúk nɛ́ tɛnmɔ nɛ‘i gɔma a nu wen dɔa-a nɛ wee.

¹³Ɛnɛ o wi nɛ ya nɛ nyɛi̧a-a, ɛ̀nɛ̀ zíí mɔ n'am dea, ɓɛɛ k’ɛ́nɛ́ o wi nɛ ya katɛ‘m, ɛ̀nɛ̀ íŋ ŋgai kɔ‘m mbɛt.»

¹⁴O ɗaŋwi ya zu Siɔŋ mɛ nɛ kíì, gasa gba-gbana ba nɛ o wi-ɗaŋ! «Nɛ́ o mgbara yɛ nɛ tɛ yor ti ŋga-wee'i o? Nɛ́ o'o tɛ yor ti gba kɔ̧ wee nɛ bi na kpoo nɛ kpoo'i o?»

¹⁵Nɛ́ wi nɛ de mɔ nɛ yuwar-a, nɛ̀ duk tɛ tɔ̧ɔ̧ kpasawen; nɛ̀ ba mɔ er o bíí nɛ ɔrmɔ na, nɛ̀ pɛr er bɛ̧ nɛ o ha̧a̧mɔ gee, ɓɛɛ nɛ̀ kpe zer tɛ baa ɗaŋ keta ko o wi-gbɛ-zu, nɛ̀ kpe yí wen ka a̧ tɛɛ zɔk ɗaŋmɔ.

¹⁶Wi’ɛi tɛ ɔ wan zu o kusa-fara, a̧ tɛ hu̧si kɔ̧ ŋga tua-hu̧si-tɛ nɛ wa dea zu kam-ta, a̧ tɛ kpa kam, ɓɛɛ yi beka ɓan a̧ na.

¹⁷Yí-mɛ́ tɛ zɔk wannu tɛ déè kɔ‘i, ɓɛɛ wa tɛ zɔk pɛsa nu nɛ oi-aa lɛŋ.

¹⁸Tɛ-mɛ tɛ mbaŋ ɗoŋ ŋga mɔɔ-kíì! Wi nɛ duka so mɛ kpe naŋ mɔ a̧a̧ dee? Wi nɛ duka so mɛ mɔi̧ garama a̧a̧ dee? Wi nɛ duka so mɛ tɔr o tua-pɛm-mɔ mbɛt a̧a̧ dee nde?

¹⁹Mɛ beka zɔk ŋga dukbíí nɛ tɛ gan mɛ na, in mɛ beka zɔk dukbíí nɛ tɔ̧ ŋma nú nɛ mɛ beka zii gba̧a̧-a̧ na, kà bó nɛ̀ ŋma ŋga nú nɛ‘i iŋ mgbara-a na, na mbɛt.

²⁰Mɛ mbaɗi mɔ si Siɔŋ, gba de ye de o gbaŋa k’ɛɛ; yí-mɛ tɛ zɔk Jerusalɛm, gba de ga̧a̧ ye, nɛ duk nɛ́ tua-laa nɛ‘i beka yai yinɛ na, kà bó nɛ̀ bura o nyak-aa yinɛ na mbɛt.

²¹Nɛ́ sɛn hi̧i̧ a̧ GASA WAN tɛ usi nɛ gasamɔ kɔ‘i h’ɛ́ɛ́. Zika-fara'i duna nɛ o zɔm pɛsa nana-yì nyɛmna in o pɛsa gbáá-yì[14] nɛ wa pi̧i̧ dam ká̧ yì‘i; ɓɛɛ o kombon-biro beka bir hi̧i̧ na, kóó o zɔm gasa-a mbɛt beka yak fara'i na.

²²GASA WAN nɛ Wan-gɔn-kita k’ɛɛ, ɓɛɛ a̧ nɛ Wan-ha̧-heembea h’ɛ́ɛ́. GASA WAN nɛ wannu k’ɛɛ, in a̧ nɛ Wan-kpasi-ɛɛ mbɛt.

²³O nyak-kun-kombon kɔ-mɛ bura, wi beka kun làá-bà-búk,[15] kóó tutuwal sɛn tɛ te-kombon'i ɓɔna. Mɛ nɛ hegɔ ɛɛ tɛ kɛ̧ o mɔɔ-oi-biro nɛ dɔka-a nɛ er ŋmaa, ɓɛɛ o wi-kum tɛ kai war kɔ-wa mbɛt.

²⁴Ŋma bíí Jerusalɛm nɛ tɛ tɔ̧‘e, kɔ‘i, wi nɛ wi-zɛɛ wo, bo na; ɓɛɛ o bíí mɛ Jerusalɛm tɛ kpa ea ɗaŋmɔ.