Read Northwest Gbaya ESAII 35 Bible Online

ESAII 35 - Northwest Gbaya bible

ESAII 35

¹Ŋga-gbárà in kora-nu a̧ ya nɛ desee, ndaɗa-nu a̧ de nyɛŋɛ, ɓɛɛ de mbɔɗi zɔ̧ a̧ hɔ kpe sɛnɛ lɛŋ.

²A̧ a̧ de nyɛŋɛ hiɗi nɛ mɔ nɛ desee; gasamɔ mɛ Libaŋ hɔɔ kaɗi, zɔnamɔ mɛ Karmɛl in Sarɔŋ hɔɔ mbɛt kaɗi; ɛɛ tɛ zɔk gasamɔ ko GASA WAN, ɓɛɛ ɛɛ zɔka zɔnamɔ ko Sɔ̧ k’ɛɛ mbɛt.

³Ɛ̀nɛ̀ dé ha̧ er'nɛ́ nɛ mbɔia so kaɗi mɛ kpa ŋgai in zugur'nɛ́ mbɛt.

⁴Ɛ̀nɛ̀ tɔ̧́ ha̧ o wi nɛ see ŋmana'e: «Ɛ̀nɛ̀ nɔ́ ŋgiɗi, k’ɛ́nɛ́ yu mɔ na. Ɛnɛ zɔk, mɛ nɛ Sɔ̧ k’ɛ́nɛ́ a̧ tɛ mɛ kifi er ha̧ o wisɛn k’ɛ́nɛ́, zu ɗaŋmɔ nɛ wa de so h’ɛ́nɛ́; mɛ nɛ a̧ nɛ tɛ-a a̧ tɛ mɛ kpasi'nɛ́.»

⁵Ɓɛɛ yí o wi-boma-yí nɛ zɔk mɔ na tɛ zɔk mɔ, zer o wi-mgbee-zer tɛ gbo ha̧ wa mɛ zii mɔ mbɛt.

⁶Ɓɛɛ o wi-kum tɛ kpíɗí hee gbin-te ga, mukɛ̧ tɛ hiɗi mɔ nɛ desee, wen yì tɛ kok nɛ ŋga-gbárà mɛ, ɓɛɛ o ŋga foka-yì tɛ fok nɛ tɛ sira-nu mɛ tɛnɛ.

⁷Nù nɛ bia so wee lɛŋ tɛ kifi nɛ yí-fuk, ɓɛɛ zika-nù nɛ wɔ yi a̧a̧ sɛnɛ tɛ kifi nɛ kpút-kpút-yì zu-zer. O di̧i̧ ko o gbóò lɛŋ tɛ kifi nɛ da̧a̧ mbufu-gba-toro in púmbú.

⁸Wa tɛ de ŋma gba de yuwar sɛn hi̧i̧ nɛ̀ wa tɛ sa'e, sa̧a̧ war. Ŋma ndiŋwi beka ɓir zu yuwar'i na, wen nɛ́ GASA WAN nɛ̀ tɛ-wi a̧ hu̧i̧ yuwar'i; o wi-iŋ-mgbara-mɔ-na beka yɔ kaya tɛ war'i na mbɛt.

⁹Dila beka duk hi̧i̧ ɓɔna, o ŋga saɗi-ba-mɔ beka ba war'i ɓɔna mbɛt, ɓɛɛ nɛ o wi nɛ Sɔ̧ gɔna zu wa a̧ tɛ ba war'i.

¹⁰O bíí nɛ́ GASA WAN gɔna zu wa tɛ pii ɗoŋ, ɓɛɛ wa tɛ hɔ Siɔŋ nɛ̀ hiɗimɔ nɛ desee in tortɛ. Saŋa-yi-wa tɛ tok nɛ desee nɛ̀ beka kaɗi na kpoo nɛ kpoo. Wa tɛ ya nɛ̀ nyɛŋɛ in desee; nyimmɔ in aia-nú beka hɔ tɛ-wa ɓɔna.