Read Northwest Gbaya ESAII 37 Bible Online

ESAII 37 - Northwest Gbaya bible

ESAII 37

¹Nɛ̀ wannu Ezɛkias zia wen'i, a̧ a̧ka̧ laa tɛ-a, pi̧ bufu tɛ, ɓɛɛ yak si kɔ̧ Tua ko GASA WAN.

²A̧ toma Eliakim gasawi zu kira ko wannu, ká bá nɛ̀ Sɛbna, wi-yɔr-kalata in o gasa wi-ɗafi-sɔ̧ nɛ laa-bufu tɛ-wa sitɛ wi-tɔ̧-wen oi nú Sɔ̧ Esaii, bem ko Amɔs,

³mɛ tɔ̧ ha̧ a̧‘e: «Mɛ̀ nɛ́ wannu Ezɛkias a̧ tom ɛɛ tɛnɛ‘e nde: Sɔsɔɔ nɛ wese ɗaŋsee, wese de ko nɛ tɛ yɛ, wese nɛ búù tɛ ba yɛ, wen o bem sɔka mɛ ko kaɗi, ɓɛɛ ŋgai mɛ gɔfi o bem nɔ‘i bo na.

⁴Mana GASA WAN Sɔ̧ k’ɛ́nɛ́ zia mɔ lɛŋ nɛ wannu Asirii toma nɛ wi-de-tom kɔ‘i Rabsake da̧ nɛ kpasa Sɔ̧; ŋmafara GASA WAN Sɔ̧ k’ɛ́nɛ́ tɛ pi̧ bɔnɛ zu a̧ oi ɗaŋ wen kɔ̧-a̧‘i! Ɛ̀nɛ̀ ai nú ha̧ Sɔ̧ k’ɛ́nɛ́ wen oi o bíí nɛ ɓɔna.»

⁵Ŋgimbi nɛ o gasawi ko wannu Ezɛkias nɛɛ tɛ Esaii, Esaii kifa nú ha̧ wa hee mɔ'ɔ ga:

⁶«Ɛ̀nɛ̀ sí ɗoŋ, ɛ̀nɛ̀ tɔ̧́ ha̧ wannu'e nde, mɔ nɛ GASA WAN tɔ̧a̧ a̧a̧: ‹Ká mɛ́ de kíì wen ɗaŋ wen nɛ wannu Asirii toma nɛ o bíí da̧ nɛ‘m'i na;

⁷mi tɛ e ŋma taamɔ tɛ-a nɛ tɛ de ha̧ a̧ mɛ si ɗoŋ si nu kɔ̧-a̧ mɛ, ɓɛɛ mɛ nɛ sɛn tɛ nu kɔ̧-a̧‘i a̧‘m tɛ de ha̧ a̧ mɛ fe nú gba-paa.› »

⁸Rabsake sii ɗoŋ tɛ wannu Asirii, ɓɛɛ kpa a̧ tɛ bíí Libna wen Rabsake zia so nɛti'e nde, wannu Asirii kura Lakis yak kaɗi.

⁹Ŋma nyɛrɛmɔ tɛɛ a zer wannu Asirii'e nde, Tirbaka wannu Etiopii kaia o wi-biro Egiptɛ mɛ bi nɛ wa. Ɓɛɛ nɛ wannu Asirii zia mɔ‘i, a̧ toma o betom nɛ haya-a sitɛ wannu Ezɛkias nɛ wen’ɛ:

¹⁰«Ɛ̀nɛ̀ nɛ́ɛ̀ tɔ̧́ ha̧ Ezɛkias, wannu Juda'e nde: ‹Ká Sɔ̧ k’ɛ́nɛ́ n’ɛnɛ e nɛ ta zik zu'nɛ́ tɛ tɔ̧a̧-a̧‘e, wannu Asirii beka ba Jerusalɛm na wo'i, na.

¹¹Mɛ zia nyɛrɛmɔ nɛ wannu Asirii dee in o nu lɛŋ n'aa ta mɛ ɗaŋ yinɛ, ɓɛɛ mɛ ta kɔ-mɛ‘e nde, mɔ tɛ hɔ yɔɔ zu-mɛ?

¹²O sɔ̧ ko o bíí ye Gozaŋ, Haraŋ, ká bá nɛ̀ Rɛsɛf, o tugun bíí ko Beledɛn nɛ ya Tɛlasar nɛ wa kuma, nɛ̀ o sɔ̧ kɔ-wa kpasi wa na’ɛ, kà bó nɛ̀ mɛ?

¹³O wannu Hamat, Arpad, Lair, Sefarvaim, ká bá nɛ̀ o wannu Hena in Iwa a̧a̧ dee?› »

¹⁴Wannu Ezɛkias baa kalata'i er betom, ɓɛɛ tɔr. Ɗoŋ-aa, a̧ nɛɛ ba kalata'i daŋ si kɔ̧ Tua ko GASA WAN, ɓɛɛ tati kalata'i ti GASA WAN.

¹⁵Ɓɛɛ Ezɛkias gu nu ti GASA WAN, ɓɛɛ ai nú ha̧ a̧ hegɔ:

¹⁶«GASA WAN nɛ a̧a̧ nɛ ŋgayamɔ lɛŋ, Sɔ̧ ko Israɛl, Wan nɛ duk zu damti kɔ‘i, nɛ́ ɛ́nɛ́ ɛ̀nɛ̀‘nɛ́ ɓɛɛ nɛ ɔ wan zu o wannu zaŋnu’ɛ lɛŋ. Nɛ́ ɛnɛ'ɛ dee nu’ɛ in yiwese mbɛt.

¹⁷Ɛ̀nɛ̀ zíí aia-nú k’ɛɛ, GASA WAN, ɛ̀nɛ̀ zɔ́k mɔ pii tɛ yɛ. Ɛ̀nɛ̀ zíí o ɗaŋ wen nɛ Sɛnakɛrib tom da̧ nɛ ɛnɛ Sɔ̧ nɛ duk kpasa’ɛ.

¹⁸Mɛ nɛ kpasawen, GASA WAN, ɛɛ iŋa'e wannu Asirii ɗaŋa o tugun bíí nɛtɛ nɛtɛ gu nɛ o sɔ̧ kɔ-wa lɛŋ.

¹⁹A̧ gbina o géé-sɔ̧ kɔ-wa a tɛ wee, wen o sɔ̧ nɔ‘i bo so nɛ́ kpasa Sɔ̧ na, nɛ o géé-sɔ̧ nɛ er-wi dea, nɛ o te in ta; mɛ nɛ wen mɔ‘i sa wa ɗaŋ wa yinɛ.

²⁰Ɓɛɛ kinii, GASA WAN Sɔ̧ k’ɛɛ, ɛ̀nɛ̀ kpásí yɛ er-a; mi ai nu h’ɛ́nɛ́, wen ha̧ oi o wannu zaŋnu’ɛ mɛ iŋ‘e, nɛ́ ɛ́nɛ́ ɛ̀nɛ̀‘nɛ́ ɓɛɛ nɛ GASA WAN.»

²¹Esaii bem ko Amɔs toma nɛ́ɛ̀ tɔ̧ ha̧ Ezɛkias hee mɔ'ɔ ga: «Kifa-nú ko GASA WAN Sɔ̧ ko Israɛl zu aia-nú kɔ-mɛ wen Sɛnakɛrib wannu Asirii nɛ mɔ'ɔ.

²²GASA WAN tɔ̧a̧: Boko be Siɔŋ mam nɛ mɛ zɛkɛɗi nɛnɛ; Sɛnakɛrib wannu Asirii, boko be Jerusalɛm mir nɛ nú sitɛ mɛ.

²³Mɛ́ nɛ́ o mɛ da̧ GASA WAN, tɔ̧ nɛ ɗaŋ wen ha̧ a̧ o? Mɛ́ hú̧í̧ nú-mɛ tuɓi nɛ da̧ a zu ge bíí ge? Mɛ kura zu Sa̧a̧ Wi ko Israɛl!

²⁴Mɛ toma o ŋgaiwi kɔ-mɛ da̧ nɛ GASA WAN, wen mɛ tɔ̧a̧‘e: ‹Mɛ̀ nɛ́ tɛ o dɔka keekee-nyaŋa kɔ‘m a̧‘m daŋa nɛ kusa kaya hɔ zu-a mɛ, mi hɔɔ mgbák ɗata zu kaya Libaŋ mɛ; mi gɔma o kusa gbatui in zawaya yinɛ, mi tɛ ye kombo kɔ̧-a̧ hɔ nduti-a mɛ.

²⁵Mi gɔna yi, ɓɛɛ mi nɔ o yi nɔ‘i. Mi tɛ de ha̧ o yi mɛ Egiptɛ lɛŋ mɛ ɔ̧sa̧ wen zu naŋ-am.›

²⁶«Mɛ́ íŋ‘e nde, o mɔ nɛ dee kinii lɛŋ, mɛ̀ nɛ́ o mɔ n'am ɗafa so nɛti, ɓɛɛ mɛ̀ nɛ́ kinii a̧ o mɔɔ nɔ‘i tɛ hɔ gba̧a̧ na nde? Mɛ ta mɛ ɗaŋ o gasa ye yinɛ ha̧ wa mɛ kifi bɛɛ-oi.

²⁷O bíí tɛ ye'i lɛŋ bó nɛ̀ ŋgai na, kíì de wa dee, ɓɛɛ tɛ-wa nak nak; wa ya hee bɔr-nyɔnɔ kpɛɛfɔ ga, hee zɔ̧ tua, koo hee alkamaari a̧ gbɛɛ dua ga.

²⁸«Mi iŋa ŋgimbi nɛ mɛ yor nɛ ŋgɔn in nɛ mɛ duk nɛ nù mbɛt; ŋgimbi nɛ mɛ gbo nɛnɛ in ŋgimbi nɛ mɛ ye nɛ mɔ mbɛt; mi iŋa o ŋgimbi nɔ‘i lɛŋ.

²⁹See-mɛ nyima zu'm, hegɔ o ɗaŋ wen kɔ-mɛ aa zer-am. Mi tɛ pi̧ boi zɔ̧ɔ̧-mɛ in káná kɔ‘m nú-mɛ, wen ha̧ mɛ mɛ zik tɛ-mɛ ba yuwar siɗoŋ fara nɛ mɛ tɛɛ so nɛnɛ.

³⁰«Ɓɛɛ nɛ war kɔ-mɛ wannu Ezɛkias, mɔ'ɔ tɛ duk nɛ mɔɔ-usi-mɔ ha̧ mɛ: tɛ pɛ'ɛ, ɛnɛ tɛ nyɔŋ o kpar-nyɔnɔ n’ɛnɛ guna; pɛ mɛ ɗoŋ-aa, ɛnɛ tɛ mɔi̧ kana hegɔ mbɛt, ɓɛɛ tɛ taar pɛ, ɛnɛ tɛ gun mbe mɔ, ɛnɛ mɔi̧a, ɓɛɛ ɛnɛ tɛɛ gun o nyak-dɔ̧ɔ̧ n’ɛnɛ tɛ nyɔŋ o waya-a mbɛt.

³¹Ɓɛɛ oi o bíí nú-gara ko Juda nɛ duk kpasa tɛ dɛm woyo, kunin-wa tɛ gbai, ɓɛɛ wa tɛ wai woyo.

³²Oi o bíí tɛ gbo nɛ Jerusalɛm, in nɛ zu kaya Siɔŋ mɛ mbɛt. Mɛ nɛ tɛ kɔ̧ɔ̧mɔ a̧ GASA WAN nɛ a̧a̧ nɛ ŋgayamɔ lɛŋ tɛ de nɛ mɔ‘i.

³³«Mɛ nɛ hegɔ sa GASA WAN tɔ̧ nɛ wen’ɛ zu wannu Asirii: A̧ beka ye saaye’ɛ mɛ bi a̧ na; a̧ beka pi̧ goo kóó kpɔk na, a̧ beka e ŋgee-biro kɔ̧-a̧ ti ye'i na, kà bó nɛ̀ mboo mɔ zik nɛ ye’ɛ na mbɛt.

³⁴Yuwar n'aa tɛ̀ɛ̀ so nɛnɛ‘i, a̧ a̧ tɛ si kana nɛ ɗoŋ mbɛt, a̧ beka ye saaye’ɛ na. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ɔ̧ hegɔ.

³⁵Mi tɛ pɛm ye’ɛ kpasi nɛ a̧, nɛ ŋma mɔ beka fo a̧ na, wen zu'm nɛ tɛ‘m, in wen zu David wi-de-tom kɔ‘m mbɛt.»

³⁶Mɛ zɛ‘i, betom ko GASA WAN gboo, ye gbagari biro ko o bíí Asirii, ɓɛɛ gbɛ bíí booro-ɓu-mɔɔrɔ-ɗoŋ-taar-zua-mɔɔrɔ. Nɛ mɔ sa̧a̧ mɛ tutuyɛ, tɛ tuna ya, wa zɔka o wɔr nɛ ya nu sinɛ hegɔ riɓiti.

³⁷Ɓɛɛ nɛ mɔ'ɔ nɛ Senakerib wannu Asirii kura, ɓɛɛ gbin yak si ɗoŋ duk sɛn Ninivɛ.

³⁸Ɓɛɛ ŋgimbi n'aa biti gu nu kɔ̧ tua ko Misrok sɔ̧ kɔ̧-a̧, Adramɛlɛk in Saresɛr o bem kɔ̧-a̧ tɛɛ tik zu a̧ gɔm a̧ nɛ gba-paa gbɛ yinɛ; ɓɛɛ wa yu mɔ yak si nu Ararat mɛ. Ɓɛɛ Asaradɔŋ, ŋma bem kɔ̧-a̧ ba wan oi-aa.