Read Northwest Gbaya ESAII 40 Bible Online

ESAII 40 - Northwest Gbaya bible

ESAII 40

¹Ɛ̀nɛ̀ há̧ nɔɔ-ŋgiɗi ha̧ dukbíí kɔ‘m; k’ɛ́nɛ́ pɛm mɔ na, Sɔ̧ a̧ tɔ̧ wen’ɛ.

²Ɛ̀nɛ̀ gá̧ see Jerusalɛm; ɓɛɛ ɛ̀nɛ̀ tɔ̧́ ha̧ a̧‘e, tom-bara kɔ̧-a̧ kaɗa, bɔnɛ kɔ̧-a̧ kaɗa, GASA WAN usa mɔɔ-oi ɗaŋmɔ kɔ̧-a̧ lɛŋ ha̧ a̧ kaɗi.

³Ɓɛɛ ŋma tiger tɔ̧‘e: «Ɛ̀nɛ̀ ɗáfí yuwar ha̧ GASA WAN, ɛ̀nɛ̀ gbɛ́r war'i gbara mɛ nɛ de-a; mɛ nɛ yuwar ko Sɔ̧ k’ɛɛ.

⁴Gboŋgo lɛŋ a̧ dun, o kaya in o zu-tɔ̧́ lɛŋ a̧ hir. O be kusa-mɔ lɛŋ a̧ hir nyɛm ŋmaa, o gboŋgo lɛŋ a̧ dun nyɛm ŋmaa, ɓɛɛ o kaya kifa bɔkɔ-nu.

⁵Hegɔ, gasamɔ ko GASA WAN tɛ gbo zan, ɓɛɛ bíí lɛŋ tɛ zɔk a̧. Wen nɛ GASA WAN tɔ̧a̧ nɛ mɔ‘i.»

⁶Ŋma tiger tɔ̧ɔ̧ ha̧‘m'e: «Mɛ̀ tɔ̧́ wen!» Ɓɛɛ mi kifi nú: «Nɛ ge wen ge a̧‘m tɛ tɔ̧ ge?» Tiger'i tɔ̧ɔ̧ ha̧‘m: «Mɛ̀ tɔ̧́‘e duka-a ko bíí hɔɔ ŋmaa in zɔ̧, ɓɛɛ kiitɛ bíí duk hee do-te ga.

⁷Ŋgimbi nɛ búk kɔ̧ nú GASA WAN yu, ɓɛɛ zɔ̧ kora, do-a ai a nu. Nɛ mbetɛ, o bíí zu nu’ɛ hɔɔ ŋmaa in zɔ̧.

⁸Zɔ̧ kor kor, ɓɛɛ do-a aia, ɓɛɛ wen ko Sɔ̧ k’ɛɛ, nɛ mɔ nɛ duk kɔ‘i kpoo nɛ kpoo.»

⁹Siɔŋ, mɛ̀ dáŋ zu kusa kaya, mɛ́ yaa-tɔ̧ gba de nú-tom’ɛ! Jerusalɛm, mɛ́ yaa-tɔ̧ nú-tom tortɛ'ɛ, ká kíí de mɛ na, ɓɛɛ mɛ̀ tɔ̧́ nɛ hee ger ha̧ o ye nu Juda'e: «Sɔ̧ k’ɛ́nɛ́ nɛ mɔ'ɔ!

¹⁰GASA WAN Sɔ̧ a̧ tɛ‘i, a̧ tɛ tɛ nɛ ŋgai. Mɔɔ-wan duk tɛ ŋgai mɛ te er-a. A̧ hɔɔ nɛ̀ mɔɔ-oi-tom kɔ̧-a̧; ɓɛɛ kpaamɔ kɔ̧-a̧ ya ti a̧.

¹¹A̧ hɔɔ ŋmaa in ŋma wi-dai-mɔ nɛ dai o mɔ-dai mɔi̧ nɛ wa, kai nɛ o be-a a zu kóŋgó-ɓaa ɓɛɛ mgbɔɔ o nana-a nɛ ɓɔna fara ha̧ bere nɛnɛ mɔktɛ.»

¹²Nɛ o'o mɔi̧a yi gba-tɔp dun kɔ̧-er mɛ zɔk o? O'o wee pɛsa yiwese nɛ ŋgɛɗɛ-er o? Nɛ o'o wee dita mbɔɗa-nu nɛ oi-aa lɛŋ kɔ̧ yee o? Nɛ o'o wee o kaya in o zu-tɔ̧́ mɛ iŋ dita-wa o?

¹³Nɛ o'o wee ɔmi ko GASA WAN o? Nɛ o'o duka nɛ wi-ba-keta in a̧ o?

¹⁴Ŋma bíí nɛ ba keta in a̧ wen kpaa de taamɔ, wen gɔna kita nɛ yuwar-a, wen yuwar iŋamɔ sɛka wen kpaa iŋamɔ nɛ o?

¹⁵O tugun bíí sɛn yí Sɔ̧ duk hee be nu yi nɛ kɛ̧ a nu nɛ kɔ̧ kpánà, kóó hee ɗikɗik fuunu nɛ ya kɔ̧ mɔɔ-we-mɔ'ɛ ga. O zuduk bíí mɛ nyɛi̧a fara duk hee ɗikɗik-mɔ ga, wa diti na.

¹⁶O te mɛ nu Libaŋ nɛ oi gun nyɛm mɛ de gua, kóó o saɗi mɛ sɛnɛ mbɛt nyɛm wen kpoo-sɔ̧ wen-aa na.

¹⁷O zuduk bíí zu nu’ɛ lɛŋ duk nɛ geemɔ ti a̧; ŋma gba̧a̧-mɔ bo tɛ-wa na.

¹⁸Ɛnɛ nyɛma mɛ we Sɔ̧ nɛ ge? Tɛ zɔka mɔ k’ɛ́nɛ́, Sɔ̧ hɔɔ ŋmaa in ge mɔ ge?

¹⁹A̧ nɛ géé-sɔ̧ nɛ̀ wi-nɔi̧-boi nɔi̧a, yɔk ɗoŋ-aa ɓɛɛ a lɔr sɛnɛ?

²⁰Wisan nɛ kpa mɔ wen mboo sɔ̧ nɛ lɔr in bu-mbɔi hegɔ‘i na tɛ kii kɔ‘i nɛ de be ŋga te ha̧ wi-sɛk-te, ɓɛɛ wi’ɛi sɛka nɛ sɔ̧ ha̧ a̧.

²¹Ɛnɛ iŋ so na? Ɛnɛ zii so na? Wa usi so a̧ nɛ ku̧u̧naŋ-a h’ɛ́nɛ́ na? Ɛnɛ iŋ so wi-de-nù na nde?

²²Fara-duk kɔ̧-a̧ si ŋgɔn see zu nu, ɓɛɛ o bíí zaŋnu ya ti ɗɔɔ-aa hee o gba-dɔya ga. A̧ tata yiwese hee ŋma zɔ̧-laa ga, hee ŋma tua-laa nɛ‘i nyɛma ɔɔ ɗɔɔ-aa ga.

²³A̧ dee ha̧ o wannu in o wan-gɔn-kita zu nu’ɛ mɛ kifi geemɔ.

²⁴Ɗoŋ-wa tɛ nyɛi̧ tɛ baa fara, ɔ nɛ wan, kà naŋ-wa nɔ nɛ nu na mbɛt, ɓɛɛ kà ŋga búk mɛ kɔ̧ nú GASA WAN yo wa, wa kora, ɓɛɛ búk'i ɓoɓa wa kai yaknɛ hee kora zɔ̧ ga.

²⁵«K’ɛ́nɛ́, ɛnɛ tɛ we'm nɛ o? Mi hɔɔ ŋmaa in o?» Sɔ̧, Sa̧a̧ Wi a̧ tɔ̧ wen’ɛ.

²⁶Ɛ̀nɛ̀ bá yí‘nɛ́ ɛ̀nɛ́ kɛ̧́í̧ mɔ si yiwese! Nɛ o'o dee o sɔra o? Ɛnɛ zɔk, wa ya hee o wi-biro nɛ duk dɔ̧ɔ̧ wen biro ɓɛɛ nɛ hɛra zaŋ ga. Wa lɛŋ ya wen dee tom ha̧ a̧. Ŋgai in gasamɔ kɔ̧-a̧ ɔ gasa. Ŋma nin kpɔk mgbara wa nɛ tɛ yɔ a̧ bo na.

²⁷Ɛnɛ o be Israɛl bezaŋ Jakob, wen ge s’ɛnɛ tɔ̧‘e: «GASA WAN zɔk mɔ nɛ hɔ zu yɛ, Sɔ̧ k’ɛɛ iŋ yuwar mɔ k’ɛɛ na, ge?»

²⁸Ɛnɛ iŋ na? Ɛnɛ zii so wen-aa na mbɛt? GASA WAN nɛ dee nu nɛ oi gun nɛ́ Sɔ̧ nɛ duk kpoo nɛ kpoo. A̧ mbɔi na in a̧ wɔi na mbɛt; ŋma bíí nɛ tɛ iŋ ndaa ɗukamɔ kɔ̧-a̧ bo na.

²⁹Mɛ nɛ a̧ a̧ ha̧ ŋgai ha̧ wi nɛ mbɔia, in ha̧ wi nɛ wɔia mbɛt.

³⁰O ŋgaiwi mbɔi ɓɛɛ wɔia; o ŋga-wi tir yɔɔ-mɔ tir ɓɛɛ yoo nu.

³¹Ɓɛɛ ko o wi-e-ta nɛ GASA WAN, wa kpa nɛ ŋgai siti. Hiɗi-wa a̧a̧ sɛnɛ ɓɛɛ wa duk hee zua ga; wa war yi ɗoŋ-wa nyɛi̧, wa mbɔi na, wa nɛ siti ɓɛɛ tɛ-wa wɔi na mbɛt.