Read Northwest Gbaya ESAII 42 Bible Online

ESAII 42 - Northwest Gbaya bible

ESAII 42

¹Wi’ɛ nɛ wi-de-tom kɔ‘m n'am yor ɗoŋ-aa, a̧ nɛ wi n'am hoka, nɛ see-am lɛŋ duk zu a̧. Mi ee Ɔmi kɔ‘m zu a̧; nɛ́ wi’ɛi a̧ tɛ ba usamɔ nɛnɛ ha̧ o dukbíí, ɓɛɛ nɛ́ a̧ a̧ tɛ gɔn kita zu o tugun bíí nɛ̀ yuwar-a.

²A̧ beka tɔ̧ wen nɛ ŋgai na; wi beka zii ger-a na. Ŋma bíí nɛ tɛ zii ger-a bee-gara bo na mbɛt;

³a̧ beka gbin toro nɛ difa na, a̧ ufi wee lamba nɛ ga̧ tɛnɛ mɛ bi na; ɓɛɛ a̧ tɛ usi nɛ deemɔ nɛ yuwar-a.

⁴A̧ beka mbɔi na, ɓɛɛ gɛ̧ɛ̧mɔ beka ba a̧ na mbɛt hɔ ŋgimbi nɛ deemɔ nɛ yuwar-a tɛ ɔ wan zu nu’ɛ, in sɛn see zu o bíí mɛ nyɛi̧a fara mɛ lɛŋ.

⁵Mɔ nɛ GASA WAN Sɔ̧ nɛ tata yiwese mgbalak in nu nɛ oi o mɔ nɛ a̧a̧ zaŋ-aa lɛŋ, ɓɛɛ nɛ̀ ha̧ ɔmi ha̧ o bíí in o mɔ mɛ zu-a, tɔ̧, nɛ mɔ'ɔ:

⁶«Nɛ́ ɗoŋ deemɔ kɔ‘m nɛ yuwar-a a̧ mi GASA WAN saa nɛ mɛ, nɛ́ mi'i yora ɗoŋ mɛ kasi nɛ er-mɛ; mi usa mɔ ha̧ mɛ wen ha̧ mɛ mɛ duk nɛ́ yuwar nɔɔ-tɔk kɔ‘m in o gba gii bíí, in sa̧a̧mɔ ko o tugun bíí.

⁷Mɛ tɛ hú̧í̧ yí o wi nɛ boma, mɛ tɛ gbo o wi-zɔɓɔ yinɛ, in o bíí nɛ ya ti-tum mbɛt.»

⁸Mi nɛ GASA WAN, nin-am nɛ mɔ‘i; ɓɛɛ mi beka e ha̧ ŋma bíí, kóó ha̧ o géé-sɔ̧ mɛ ba hu̧ra-nin kɔ‘m na.

⁹O kuti-mɔ hɔɔ yak kaɗi, ɓɛɛ mi mbaŋ nɛ tɛ‘nɛ́ zu o wan nɛ tɛ‘i nɛti ha̧ wa mɛ hɔ.

¹⁰Ɛnɛ o bíí-yar-nɛ-zu gba-tɔp in o mɔ mɛ ɗɔɔ-aa, ká bá nɛ̀ o bíí mɛ nyɛi̧a fara, ɛ̀nɛ̀ bíí mbe gima zɔn nɛ GASA WAN, ɛ̀nɛ̀ bíí gima zɔn nɛ a̧ hɔ nduti nu mɛ.

¹¹O ye mɛ si ŋga-gbárà in o bezaŋ Kedar a̧ bíí gima nɛ hee ger; o bíí mɛ si zu kaya a̧ gai mɔ de nɛ nyɛŋɛ, wa a̧ de tortɛ nɛ desee!

¹²O bíí mɛ nyɛi̧a fara a̧ zɔn gasamɔ ko GASA WAN nɛ hee ger.

¹³GASA WAN a̧ gbo tɛnɛ hee ŋga bíí ga'i, a̧ a̧ kpɔ̧ tɛnɛ hee ŋma wi-biro ga'i. A̧ tuɓi nɛ da̧ a zu o wisɛn kɔ̧-a̧ tɔ̧ nɛnɛ‘e:

¹⁴Ɗoŋ-aa nyɛi̧a n'am nyɔŋ nɛ nin-am, mi kɔ̧ tɔ̧ɔ̧ wen na, mi de ŋma mɔ na mbɛt. Hee ŋma naa-zaŋ nɛ zaŋ nyim mɛ ko’ɛ ga, kinii, mi tɛ gɔfi mɔ nɛ ŋgai, hiɗ‘am gɔn.

¹⁵Mi tɛ ɗaŋ mɔ zu o kaya in o zu-tɔ̧́ lɔkɔti-lɔkɔti, o ɓɔɔ-mɔ mɛ zu wa tɛ kor; o nana-yì tɛ gɔn kifi nɛ o be ɗuŋgum-yì, ɓɛɛ o tɔp ɔ̧sa̧ ndaɗi ta̧i̧-ta̧i̧.

¹⁶Mi tɛ de ha̧ o wi-boma-yí mɛ ba yuwar nɛ wa tɛ ba so nɛti na; mi tɛ mgbɔ wa nɛnɛ sɛnɛ. Mi tɛ kpai tum nɛ sa̧a̧mɔ sɛn ti wa, ɓɛɛ o gɔɔ-war kifa duk nɛ tana-a. Mɔ‘i, mi tɛ de hɔ gba̧a̧, mi beka e duk na.

¹⁷Zɔk n’ɛnɛ tɛ ɓɔn ɗoŋ ɓɛɛ foe baa'nɛ, ɛnɛ o wi nɛ tɔ̧ ha̧ o géé-sɔ̧, ɗaŋ o mboo-mɔ‘e: «Sɔ̧ k’ɛɛ nɛ ɛnɛ'ɛ!»

¹⁸Ɛnɛ o wi-mgbee-zer nɔ'ɔ, ɛ̀nɛ̀ zíí mɔ; ɛ́nɛ́ o wi-boma-yí nɔ'ɔ ɛ̀nɛ̀ hú̧í̧ yí‘nɛ́, ɛ̀nɛ̀ zɔ́k mɔ!

¹⁹Wi-boma-yí‘i nɛ o? Bo nɛ mɛ wi-de-tom kɔ‘m na? Wi-mgbee-zer nɛ betom kɔ‘m. Wi-boma-yí, nɛ̀ zer mgbea'i, yak zu wi-de-tom ko GASA WAN, nɛ o?

²⁰Yí-mɛ zɔka mɔ nɛ dɔka-a, ɓɛɛ mɛ kasi ŋma mɔ sɛnɛ na; zer-mɛ gboa, ɓɛɛ mɛ zii mɔ na!

²¹GASA WAN yora ɗoŋ ee-zu-mɔ kɔ‘i usi nɛnɛ‘e Heembea kɔ‘i nɛ gba demɔ nyɛmna,

²²ɓɛɛ kinii wa bìí dukbíí'ɛ, kai nɛ mɔ er-wa; wa kifa nɛ o wi-zɔɓɔ nɛ‘i kaia a kɔ kɔ̧ sɛn kɔ̧ tua zɔɓɔ mɛ. Wa nɛ o bíí nɛ wa bia kai nɛnɛ, nɛ ŋma wi-kpasi-wa bo na; ŋma bíí mɛ tɔ̧‘e: «Ɛ̀nɛ̀ gbó wa a nu», bo na mbɛt.

²³Mɛ nɛ o mgbara'nɛ́ nɛ tɛ zii wen’ɛ o? Nɛ ge bíí ge a̧ tɛ kasi yaknɛ siti mɛ o?

²⁴Wi nɛ dee ha̧ wa mɛ bi Jakob kai nɛ mɔ er Israɛl, nɛ o? Bo nɛ GASA WAN, wi n’ɛɛ dee ɗaŋmɔ ti a̧, bɛ̧ nɛ baa yuwar kɔ̧-a̧, e nɛ Heembea kɔ̧-a̧ duk’ɛ na?

²⁵Mɛ nɛ wen zu mɔ‘i a̧ ŋga nyimsea kɔ̧-a̧ kura nɛnɛ zu Israɛl; hegɔ a̧ daka biro pi zu a̧, dɔ nɛ a̧ nɛ wee, ɓɛɛ Israɛl iŋ mgbara mɔ‘i na. Wee nyimsea'i dɔɔ a̧, ɓɛɛ a̧ ta mɔ sɛnɛ na mbɛt.