Read Northwest Gbaya ESAII 45 Bible Online

ESAII 45 - Northwest Gbaya bible

ESAII 45

¹Wen’ɛ, nɛ́ wen ko GASA WAN ha̧ Sirus, n'aa tɛna nɔ̧́ a zu a̧ in n'aa kasa a̧ nɛ er-a mɛ wiiko mɛ de ha̧ o tugun bíí mɛ duk nɛ geemɔ ti a̧, kpɔ̧i̧ nɛ laa-wan yinɛ tɛ o wannu, gbin nɛ o nutua yinɛ ti a̧, hegɔ, o nu garo ye lɛŋ tɛ duk nɛ hu̧i̧a̧-a̧:

²«Kɔ‘m, mi tɛ nɛ nɔ ti mɛ, ɗafi nɛ zu o kusa kaya nɛ de-a, mi tɛ gbin o nu tua nɛ wa dee nɛ boi, gu nɛ o mɔɔ-mana-a lɛŋ yinɛ.

³Mi tɛ usi oi mbɔi nɛ wa hu̧sa̧ tɛ ɗuka fara ha̧ mɛ, ha̧ nɛ kpaamɔ ha̧ mɛ mbɛt, ɓɛɛ mɛ tɛ iŋ‘e nde, mi nɛ GASA WAN Sɔ̧ ko Israɛl, nɛ sa mɛ nɛ̀ nin.

⁴Mi de mɔ‘i wen zu wi-de-tom kɔ‘m Jakob, Israɛl wi n'am hoka. Mi sa mɛ nɛ̀ nin tu̧ nɛ̀ tɛ-mɛ, ɓɛɛ tɛ mɔ‘i, mɛ tɛ iŋ am hɔ̧ɔ̧ na.

⁵Mi nɛ GASA WAN kpɔk ɓɛɛ, ŋma bo na. Ŋma sɔ̧ yak zu'm, bo na! Mi ee ŋgai kɔ‘m tɛ-mɛ, ɓɛɛ mɛ iŋ am na.

⁶O bíí tɛ iŋ nɛ zu-zan gɔm ndaa-zan mɛ‘e nde, ŋma sɔ̧ bo na, kana nɛ mi kpɔk ɓɛɛ. Mi nɛ GASA WAN; ŋma mbe-a bo na.

⁷Nɛ́ mi'i dee sa̧a̧mɔ in tum, nɛ́ mi'i ha̧ ga̧a̧mɔ in nɛ́ mi'i ha̧ ŋgamɔ ha̧ bíí mbɛt. Nɛ́ mi GASA WAN a̧ dee o mɔɔ nɔ‘i lɛŋ.

⁸«Yiwese, mɛ̀ há̧ deemɔ nɛ yuwar-a tɛnɛ hee mɛ̀ nɛ́ mbɛŋ a̧ wai ga, o tu̧-zan, ɛ̀nɛ̀ dé ha̧ deemɔ nɛ yuwar-a mɛ hɔ hee mɛ̀ nɛ́ kórò a̧ hɔ ga; nù a̧ kpɛk mɔ‘i wen ha̧ yuwar-kpasa-a mɛ gasi, ɓɛɛ ha̧ deemɔ nɛ yuwar-a mɛ ɓɔ mbɛt. Nɛ mi GASA WAN a̧ dee mɔ‘i.»

⁹Bɔnɛ a̧a̧ zu wi nɛ de biro in wi-de-a, wen a̧ nɛ kpánà mgbara o dɔka-a! Gii nyɛma mɛ tɔ̧ ha̧ wi-ɓu-a'e nde, nɛ ge mɔ ge a̧ a̧ de’ɛ ge? Tom mɛ er-a nyɛma mɛ tɔ̧ ha̧ a̧‘e nde, er-a kpɔk bo na, nde?

¹⁰Bɔnɛ a̧a̧ zu wi nɛ tɛ tɔ̧ ha̧ dáà kɔ‘i'e: «Nɛ́ ge pɛrti bem ge ɛnɛ koa hegɔ'ɛ ge?» In wi nɛ tɛ tɔ̧ ha̧ naa kɔ‘i'e: «Nɛ́ ge ɛnɛ koa’ɛ ge?»

¹¹Nɛ GASA WAN, Sa̧a̧ Wi nɛ dee Israɛl a̧ tɔ̧ wen’ɛ: «Nɛ́ ɛnɛ'ɛ tɛ ak am zu mɔ ko o bem kɔ‘m nde? Nɛ́ ɛnɛ'ɛ tɛ usi mɔ n'am tɛ de ha̧‘m nde?

¹²Nɛ́ mi'i dee nu, ɓɛɛ mi de bíí e zu a̧. Nɛ́ mi'i tata yiwese nɛ er-am; nɛ́ mi'i ɔ wan zu o sɔra lɛŋ.

¹³Nɛ́ mi'i saa wi’ɛ,[20] wen ha̧ a̧ mɛ ba kpasamɔ kɔ‘m gbonɛ. Mi tɛ yor ɗoŋ-aa tɛ mɔ lɛŋ n'aa tɛ de. Ɓɛɛ nɛ́ a̧‘i a̧ tɛ ba ye kɔ‘m Jerusalɛm e ŋgɔn woyo, ɓɛɛ a̧ tɛ gbo o bíí kɔ‘m nɛ wa kaia so nɛ bara-biro siɗoŋ nu kɔ-wa, nɛ̀ wa beka gɔn zu wa nɛ mbɔi na. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.»

¹⁴Ɓɛɛ GASA WAN tɔ̧: O mbɔi ko o bíí Egiptɛ in o mɔɔ-gɛnɛ ko o bíí Kus, ká bá nɛ̀ o bíí Seba, o gba kusa-wi nɔ‘i tɛ ya nɛ kɔ-mɛ, wa tɛ ya ɗɔɔ ŋgai kɔ-mɛ. Wa tɛ hɛr wa nɛ nyak-boi, ɓɛɛ wa tɛ gu nu ti mɛ, wor nɛ Sɔ̧ tɔ̧ nɛnɛ‘e: «Kpasa Sɔ̧ nɛ́ Sɔ̧ kɔ-mɛ kpɔk ɓɛɛ, ŋma sɔ̧ yak zu'm bo na.»

¹⁵Nɛ kpasawen, ɛ́nɛ́ nɛ́ Sɔ̧ nɛ duk nɛ hu̧sa̧-a̧; Sɔ̧ ko Israɛl nɛ Wan-kpasi-wi.

¹⁶Ziimɔ in búù tɛ ba o wi-ɗafi géé-sɔ̧; wa tɛ zum zu-wa yaknɛ nɛ foe;

¹⁷GASA WAN kpasa Israɛl nɛ kpasa-a ɓɔnsɛnɛ, ziimɔ in búù beka ba a̧ na kpoo nɛ kpoo.

¹⁸Nɛ GASA WAN Sɔ̧ nɛ dee yiwese a̧ tɔ̧ wen’ɛ. A̧ nɛ Sɔ̧ nɛ dee nu, ɓɛɛ ɗafi e; bo nɛ a̧ dee nu wen ha̧ nu mɛ duk gee na; a̧ dee nu wen ha̧ o bíí mɛ ɔ zu a̧. «Mi nɛ GASA WAN, ŋma sɔ̧ bo na.

¹⁹Mi tɔ̧ wen nɛ hu̧sa̧-a̧ na; mi tɔ̧ wen tɛ ŋma fara-tum na mbɛt. Mi tɔ̧ ha̧ o bezaŋ Jakob mɛ kii am nɛ nú-tum na. Mi GASA WAN, kɔ‘m nú‘m tɔ̧ wen nɛ yuwar-a; wen n'am tɔ̧ ɔ tana!»

²⁰Ɛ̀nɛ̀ mɔ́í̧ ŋmaa lɛŋ tɛnɛ, ɛ̀nɛ̀ mɔ́í̧ ŋmaa yá kpɔk fara, ɛnɛ o tugun bíí nɛ̀ mɔ hɔɔ yɔɔ zu'nɛ́. O wi nɔ'ɔ nɛ tui o géé-sɔ̧ nɛ‘i sɛka nɛ te’ɛ iŋ mɔ na; wa kɔfi nɛ o géé-sɔ̧ nɛ kpasi bíí na.

²¹Ɛ̀nɛ̀ bá wen k’ɛ́nɛ́ tɛ‘nɛ́, ɓɛɛ ɛ̀nɛ̀ dé ha̧ war wen k’ɛ́nɛ́ mɛ sa̧; ɛ̀nɛ̀ mɔ́i̧ ŋmaa, ɓɛɛ ɛ̀nɛ̀ bá keta in o ŋmaa. Nɛ́ o'o tɔ̧ɔ̧ so wen mɔ‘i h’ɛ́nɛ́ nɛti o? Nɛ́ o'o usa wen-aa h’ɛ́nɛ́ nɛti ɓeemɛ o? Bo nɛ mi GASA WAN na? Ŋma sɔ̧ yak zu'm, bo na. Ŋma sɔ̧-de-mɔ nɛ yuwar-a kpasi nɛ bíí, bo na, kana nɛ mi kpɔk ɓɛɛ.

²²Ɛnɛ o bíí mɛ mgbii-nu lɛŋ, ɛ̀nɛ̀ zík tɛ‘nɛ́ pii tɛ‘m h’ɛ́nɛ́ kpasi, wen mi nɛ Sɔ̧ kpɔk ɓɛɛ, ŋma mbe-a bo na.

²³Mi kana mɔ a tɛ‘m, wen mɔ nɛ gbo nɛ kɔ̧ nú‘m lɛŋ nɛ kpasawen, ɓɛɛ wen kɔ‘m n'am tɔ̧ lɛŋ beka kpai na, wen o bíí lɛŋ tɛ gbɛ zugur nu ti'm, ɓɛɛ leɓe o nde lɛŋ tɛ kan mɔ tɔ̧ nɛnɛ‘e:

²⁴«Kpasamɔ in ŋgai nɛ ko GASA WAN Sɔ̧ kpɔk ɓɛɛ.» O bíí nɛ kura so zu'm lɛŋ tɛ mɔi̧ ti'm, ɓɛɛ foe tɛ ba wa.

²⁵GASA WAN tɛ gbo o bezaŋ Israɛl lɛŋ, ɓɛɛ wa tɛ de nyɛŋɛ tɛ mɔ‘i.