Read Northwest Gbaya ESAII 47 Bible Online

ESAII 47 - Northwest Gbaya bible

ESAII 47

¹Ɓɛɛ GASA WAN tɔ̧: Mɛ́ boko be Babilɔŋ, mɛ́ tika kaɗi, mɛ̀ dúk nu tɛ fuunu; mɛ̀ dúk nu mbɔɗɔnu, wen damti yɔɔ er-mɛ kaɗi! Wi beka sa mɛ‘e: «Gba de be-zɔŋa» in «zɔŋa-bɔtɛ» ɓɔna.

²Mɛ̀ bá alkamaari si fara-hɔ̧n-fuu a̧ mɛ hɔ̧n! Mɛ̀ bá laa-kpe-yí-mɛ yinɛ, mɛ̀ mɔ́í̧ nu goe kɔ-mɛ nɛ ŋgɔn, a̧ mɛ ku yi!

³O bíí tɛ zɔk mɛ nɛ mgbii ha̧ foe mɛ de mɛ! Mi tɛ kifi er ha̧ mɛ, nɛ̀ ŋma wi-dor-am beka bo na!

⁴Wi nɛ gɔna zu yɛ, nin-a nɛ GASA WAN, nɛ a̧a̧ nɛ ŋgayamɔ lɛŋ, Sa̧a̧ Wi ko Israɛl.

⁵Mɛ̀ kpé nú-mɛ́, boko be Kaldee, mɛ̀ hú̧sí tɛ-mɛ ti-tum; wi beka sa nin-mɛ‘e: «Boko be-wan zu o nu» ɓɔna.

⁶See-am ɗaŋa so zu dukbíí kɔ‘m, ɓɛɛ mi ɗaŋ o bíí kɔ‘m nɛ duk nɛ mɔ kɔ‘m. Mi ee wa er-mɛ, ɓɛɛ mɛ de ko ha̧ wa na, de nɛ ŋgamɔ in o sɔkawi mbɛt.

⁷Mɛ taa so kɔ-mɛ‘e mɛ tɛ duk tɛ wan hegɔɔ ɓɔnsɛnɛ; mɛ ta so mɔ zu mɔ nɛ de'i na, mɛ ta mɔ zu mɔ nɛ tɛ hɔ nɛ ɗoŋ na mbɛt.

⁸Ɓɛɛ kinii, mɛ̀ zíí mɔ'ɔ sa̧ zer-mɛ, mɛ zɔŋa de gee tum mɔ nɛ mɔ ba tɛ-mɛ na’ɛ, mɛ́'è, ŋma wi-gan-wi, bo na, kana nɛ wi kpɔk ɓɛɛ. Wi beka duk ko-gera na, o bem beka ɓan wi na mbɛt.

⁹O ŋga mɔɔ nɔ'ɔ yiitoo’ɛ tɛ tir a zu mɛ war kpɔk tɛ kale wese! Mɛ̀ nɛ́ hee gɔma-yí ga a̧ o bem kɔ-mɛ tɛ kum nɛnɛ, ɓɛɛ mɛ tɛ kifi ko-gera nɛ bu-wese, nɛ oi o wi-a-tani in o wan-gbana kɔ-mɛ‘i.

¹⁰Mɛ́ dúk tɛ-mɛ nɛ ɗaŋ kɔ-mɛ tɔ̧ nɛnɛ‘e: «Ŋma wi nɛ zɔk am tɛ mɔ'ɔ n'am de’ɛ, bo na.» Iŋa-mgbara-mɔ in iŋamɔ kɔ-mɛ'ɛ kpee yí-mɛ, ɓɛɛ mɛ duk tɛ-mɛ tɔ̧ nɛnɛ‘e nde: «Ŋma bíí nɛ nyɛma ŋmaa in am bo na.»

¹¹Bɔnɛ tɛ tik zu mɛ nɛ mɛ beka gui na. Ŋgamɔ tɛ kpa mɛ nɛ nyina-kpasi-mɛ beka bo na. Mɔɔ-kum-wi tɛ tik zu mɛ hee gɔma-yí ga, nɛ mɛ ɔ zu-a na.

¹²Mɛ̀ yór zu o mɔɔ-gbánà in o mɔɔ-pɛm-tɛ kɔ-mɛ, nɛ mɛ duk de tom ha̧ wa nɛ zɔŋa mɛ tɛnɛ‘i; ŋmafara o mɔɔ nɔ‘i tɛ gbak mɛ, kóó ŋmafara mɛ̀ nɛ́ tɛ̀ o mɔɔ nɔ‘i a̧ mɛ tɛ gan nɛ o wisɛn kɔ-mɛ.

¹³Mɛ́ ɗáŋ nɛ tɛ-mɛ tɛ zɔka mɔ nɛnɛ; mɛ̀ tɔ̧́ ha̧ o wi-zɔk-mɔ nɔ‘i, o wan-zɔk-mɔ tɛ wese in sɔra, nɛ tɔ̧ wen zu mɔ nɛ tɛ hɔ tɛ fio-zɛ lɛŋ‘i, wa a̧ tɛ́ɛ̀ kpasi mɛ ɛɛ zɔk.

¹⁴O wi nɔ‘i tɛ duk hee kora zɔ̧ nɛ wee bíí'ɛ ga; wa beka kpasi tɛ zɔm yoŋgoŋgo-wee'i na. Mɔ‘i beka duk nɛ kɛ̧i̧-wee mɛ ɔ wee-aa na, kóó wee mɛ duk ká̧ a̧ na mbɛt.

¹⁵Mɔ nɛ kpa o wan-gbana nɛ mɛ yɔɔ so ŋgimbi kɔ-mɛ, zɔk nɛ mɔ tɛ-wa nɛ geɗek bem hɔ nɛnɛ tɛ zɔŋa nɛ mɔ'ɔ: Wa tɛ pɛsi kpɔk kpɔk yak, ɓɛɛ ŋma nɛ tɛ kpasi mɛ bo na.