Read Northwest Gbaya ESAII 48 Bible Online

ESAII 48 - Northwest Gbaya bible

ESAII 48

¹Ɛ́nɛ́ o be nutua ko Jakob, ɛ́nɛ́ nɛ̀ sa nin'nɛ́‘e o be Israɛl, ɛ́nɛ́ o bezaŋ Juda, ɛ́nɛ́ nɛ̀ kan mɔ nɛ nin GASA WAN, gasi nɛ̀ Sɔ̧ ko o be Israɛl nɛ sa̧a̧-see, kóó nɛ̀ yuwar-a na mbɛt’ɛ, ɛ̀nɛ̀ zíí wen’ɛ:

²Ɛ́nɛ́ tɔ̧‘e: Ɛ́nɛ́ nɛ́ o bíí tɛ Sa̧a̧ Ye ko Sɔ̧, ɛ́nɛ́ nɛ̀ e ta nɛ Sɔ̧ ko Israɛl, wan nɛ nin-a nɛ GASA WAN nɛ a̧a̧ nɛ ŋgayamɔ lɛŋ.

³Nɛti ɓeemɛ, mi tɔ̧ɔ̧ so wen mɔ nɛ dee so h’ɛ́nɛ́; mi'i tɔ̧ɔ̧ so wen'i h’ɛ́nɛ́ nɛ nú‘m, ɓɛɛ nɛ mi a̧ dee o mɔɔ nɔ‘i hee gɔma-yí ga.

⁴Mi iŋa'e, mɛ́ nɛ́ wi-ŋgazu; gun ger-mɛ ɔ ŋgaya hee mboɗa boi ga, ɓɛɛ sɔnti-mɛ duk hee ndɛrɛ ga mbɛt.

⁵Wen hegɔ, mi mbaŋa tɛ-mɛ nɛti zu mɔ nɛ tɛ hɔ; mi tɔ̧ɔ̧ so wen-aa ha̧ mɛ kaɗi, wen ká mɛ tɔ̧‘e ndé mɛ̀ nɛ́ o géé-sɔ̧ kɔ‘i, nɛ‘i dee nɛ te in boi a̧ de mɔ'ɛ.

⁶Mɛ zia in mɛ zɔka o mɔɔ nɔ‘i lɛŋ, ɓɛɛ tɛ nyɛm ha̧ mɛ mɛ kpɛk mɔɔ nɔ‘i hɔ̧ɔ̧ na nde? Kinii, mi usi nɛ mbe mɔ ha̧ mɛ, mɛ̀ nɛ́ ŋma mɔ nɛ duk nɛ hu̧sa̧-a̧ nɛ mɛ tɛ iŋ na.

⁷Nɛ́ kinii ɓɛɛ a̧‘m dee nɛ mɔ‘i nɛ mbe-a; ŋma pɛrti mɔ hegɔ bo so nɛti na, sɛka mɛ zii nyɛrɛ-a ka mɛ tɔ̧ nɛnɛ‘e, wi iŋa so nɛti na.

⁸Mɛ̀ zíí so nyɛrɛmɔ hegɔ nɛti na, mɛ́ íŋ so o ŋma mɔ hegɔ nɛti na mbɛt, zer-mɛ hu̧i̧ so mɛ zii wen-aa nɛti na; mi iŋa'e mɛ́ nɛ́ mgbák kpasa wi-de-ŋgazu, ká mɛ ɓɔna kɔ̧ zaŋ naa kɔ-mɛ mɛ.

⁹Ɓɛɛ wen ká nin-am tɛɛ ɗaŋ, mi ga̧a̧ see-am zu nyimsea kɔ‘m, ɓɛɛ mi beka ɗaŋ mɛ yinɛ na.

¹⁰Mi nɔi̧a mɛ tɛ wee-dɔra ɓɛɛ bó nɛ́ hee bu-mbɔi ga na, mi wee mɛ tɛ wee-bɔnɛ.

¹¹Ɓɛɛ mɔ n'am dea, mi dea wen tɛ‘m nɛ tɛ‘m; mi beka e ha̧ bíí mɛ ɗaŋ nin-am na; mi beka e ha̧ ŋma bíí mɛ ba gasamɔ kɔ‘m na mbɛt.

¹²Jakob, mɛ̀ zíí wen kɔ‘m; Israɛl wan n'am saa, mi nɛ Sɔ̧ nɛ duk nɛ kuti mɔ in sɔŋkur mɔ mbɛt.

¹³Nɛ́ er-am a̧ dee nu, ɓɛɛ mi tati yiwese nɛ ŋgai kɔ‘m. Kà‘m sa mɔ, ɓɛɛ wa lɛŋ tɛa.

¹⁴Ɛ̀nɛ̀ mɔ́í̧ ŋmaa, ɛnɛ lɛŋ, ɛ̀nɛ̀ zíí wen kɔ‘m. Ŋma sɔ̧ k’ɛ́nɛ́ nɛ tɔ̧ɔ̧ so wen mɔ‘i h’ɛ́nɛ́ nɛti nɛ o? Ɓɛɛ nɛ́ sɛm kɔ‘m n'am hoka'i, a̧ tɛ de mɔ nɛ see-am kɔ̧a̧ zu Babilɔŋ in dukbíí Kaldee.

¹⁵Nɛ́ mi nɛ tɛ‘m a̧ tɔ̧ wen'i, nɛ́ mi a̧ saa a̧ tɛnɛ, ɓɛɛ nɛ́ mi'i a̧ tɛ de ha̧ tom n'am sa a̧ wen-aa'i mɛ hɔ gba̧a̧.

¹⁶Ɛ̀nɛ̀ ɗɔ́ŋ pii katɛ‘m, ɓɛɛ ɛ̀nɛ̀ zíí wen n'am tɛ tɔ̧'ɛ: Nɛ̀ ku̧u̧naŋ-a mɛ tɛnɛ, mi tɛ tɔ̧ ŋma wen h’ɛ́nɛ́ nɛ hu̧sa̧-a̧ nɛti na; ŋgimbi nɛ o mɔɔ nɔ‘i dee nɛnɛ, mi a̧a̧ so sɛnɛ. (Ɓɛɛ kinii, GASA WAN Sɔ̧ ha̧a̧ Ɔmi kɔ‘i ha̧‘m, ɓɛɛ tom am tɛnɛ.)

¹⁷Mɔ nɛ GASA WAN wi-gɔn-zu mɛ, Sa̧a̧ Wi ko Israɛl tɔ̧ɔ̧ ha̧‘m mɛ tɔ̧ h’ɛ́nɛ́ nɛ mɔ'ɔ: «Mi nɛ GASA WAN Sɔ̧ kɔ-mɛ, wan nɛ usi mɔ nɛ tɛ gbak mɛ ha̧ mɛ; nɛ́ mi'i usi yuwar nɛ mɛ ba'i ha̧ mɛ.

¹⁸A̧ bo so'e mɛ kasa o heembea kɔ‘m gaa, ɓɛɛ de yoŋgo in ga̧a̧mɔ tɛ̀ɛ́ fok nɛ ɗoŋ-mɛ hee nana-yì ga!

¹⁹O bezaŋ-mɛ tɛ̀ɛ́ dɔk hee nyɛmɛ ga, wa tɛ̀ɛ́ dɔk hee nyɛmɛ ga nɛ wi tɔra-a beka bo na. Ɓɛɛ ŋma mɔɔ-bi-nin-wa, kóó ɗaŋa nin-wa yinɛ sɛn yí‘m bo na!»

²⁰Ɛ̀nɛ̀ gbó saaye Babilɔŋ! Ɛ̀nɛ̀ yú o be Kaldee! Ɛ̀nɛ̀ híɗí mɔ nɛ tortɛ yaknɛ, ɛ̀nɛ̀ tɔ̧́ wen-aa ha̧ o bíí nɛnɛ; ɛ̀nɛ̀ pɛ́sí nyɛrɛ mɔ'ɔ hɔ nduti nu mɛ. Ɛ̀nɛ̀ tɔ̧́ ha̧ wa'e: «GASA WAN gɔna zu wi-de-tom kɔ‘i Jakob!»

²¹Ŋgimbi nɛ GASA WAN kaia nɛ dukbíí kɔ‘i si ŋga-gbárà zaŋbɛɛ mɛ‘i, wɔ yi ba tɛ-wa na. A̧ dee ha̧ yi mɛ suli nɛ kɔ̧ ta gbonɛ ha̧ wa; a̧ gusa ta mbaŋ, ɓɛɛ yi fok yaknɛ.

²²GASA WAN tɔ̧a̧‘e, o wi-ɗaŋ bó nɛ̀ ga̧a̧mɔ na.