Read Northwest Gbaya ESAII 50 Bible Online

ESAII 50 - Northwest Gbaya bible

ESAII 50

¹GASA WAN tɔ̧ɔ̧‘e nde, kalata-ndaka naa k’ɛ́nɛ́, n'am ha̧a̧ ndak nɛ a̧ a̧a̧ dee? Ŋma bíí n'am ɗɔra'nɛ́ ha̧ a̧, gbo nɛ nyamandoi kɔ‘m, nɛ o? Nɛ́ ɗaŋmɔ k’ɛ́nɛ́ a̧ de h’ɛ́nɛ́ mɛ duk bara; nɛ́ ŋgazu ko naa k’ɛ́nɛ́ a̧ dee ha̧ a̧ mɛ gbii.

²Wen ge mi hɔa, ɓɛɛ mi kpa bíí na ge? Mi saa'nɛ́, ɓɛɛ ɛnɛ kɔ̧ sara nú‘m na wen ge? Ŋgai mɛ te-er-am[21] nyɛm mɛ kpasi'nɛ́ na? Ŋgai kɔ‘m nyɛm kpasa'nɛ́ na? Mɛ̀ nɛ́ tɛ tɔ̧ɔ̧-wen kɔ‘m, ɓɛɛ gba-tɔp ɔ̧sa̧ ndaɗi ta̧i̧-ta̧i̧; kà‘m kɔ̧, ɓɛɛ o zɔm nana-yì ɔ̧sa̧ kifi nɛ ŋga-gbárà. O zoro mɛ ɗɔɔ-aa kuma kor nɛ zan nɛnɛ mbɛt.

³Mi nyɛma mɛ de ha̧ yiwese mɛ kifi tum, ɓɛɛ mi pi̧i̧ laa-zim-mɔ tɛ-a.

⁴GASA WAN Sɔ̧ usa yuwar tɔ̧ɔ̧-wen ha̧‘m, wen ha̧‘m mɛ ha̧ nɔɔ-ŋgiɗi ha̧ o wi-kɔsa. GASA WAN nɛ wan-tun-am mɛ tutuyɛ lɛŋ, ɓɛɛ a̧ dee ha̧‘m mɛ yeŋ zer-am, zii nɛ̀ mɔ hee mɔ'ɔ nɛ ŋgaiwi zii nɛ̀ wen’ɛ ga.

⁵GASA WAN Sɔ̧ hu̧i̧a̧ taamɔ kɔ‘m, wen ha̧‘m mɛ iŋ mgbara usamɔ kɔ̧-a̧, ɓɛɛ mi de ŋgazu kà bó nɛ̀ zika yí‘m yinɛ tɛ-a na.

⁶Mi zika ɗoŋ-am e ha̧ o wi nɛ mbɛr am, ɓɛɛ mi zik zaɗa'm e ha̧ o wi nɛ zuɗi zera kɔ‘m. Mi zik yí‘m si mgbɔɔr wen zu da̧a̧‘m nɛ wa da̧, in sap nɛ wa a yí‘m na mbɛt.

⁷Ɓɛɛ GASA WAN Sɔ̧ gbak am, wen hegɔ o dara kɔ-wa pi̧ foe tɛ‘m na. Mɛ̀ nɛ́ zu mɔ‘i ɓɛɛ sa'm kai sɔnti'm ŋgai hee ta ga, wen mi iŋa'e foe beka de'm na.

⁸GASA WAN Sɔ̧ nɛ wan-yor-ɗoŋ-am; wi nɛ kɔ̧ɔ̧ mɛ de kita in am nɛ o? Wi’ɛi a̧ tɛ́ ɛ̀ɛ̀ nɛ́ in ŋmaa ti wi-gɔn-kita! Wi nɛ kɔ̧ɔ̧ mɛ de wen in am nɛ o? A̧ a̧ tɛ́ɛ̀ tɔ̧́ ŋgaɓo!

⁹GASA WAN Sɔ̧ nɛ wan-ye-ɗoŋ-am; wi nɛ kita kɔ̧-a̧ tɛ tika'm nɛ o? O wi-sɛn-am tɛ ɗaŋ hee a̧ka̧ laa nɛ zɛmɛ nyɔŋa a nu ga.

¹⁰Ŋma wi yu GASA WAN a̧ boo mgbara'nɛ́'ɛ, ɓɛɛ nɛ̀ wi’ɛi a̧ zii wen ko wi-de-tom kɔ̧-a̧. O wi nɛ nɛ́ nɔ zaŋ tum nɛ kpa sa̧a̧mɔ na, a̧ e ta nɛ nin GASA WAN; wi’ɛi a̧ e ta nɛ Sɔ̧ kɔ̧-a̧.

¹¹Ɓɛɛ k’ɛ́nɛ́ o wi-ye-wee nɛ tusi nu gua nɛ ŋmaa’ɛ, ɛ́nɛ́ tɛ tik yi wee'i! Nɛ́ ŋgai kɔ‘m a̧ tɛ de mɔ‘i in'nɛ̀ɛ́, ɛ́nɛ́ tɛ ɔ fara bɔnɛ‘i.