Read Northwest Gbaya ESAII 52 Bible Online

ESAII 52 - Northwest Gbaya bible

ESAII 52

¹Siɔŋ, mɛ̀ tún, mɛ̀ tún nɛ haya-a! Ŋgai a̧ pii ɗoŋ tɛ-mɛ, ɓɛɛ mɛ̀ pí̧ gba de laa kɔ-mɛ mbɛt. Mɛ Jerusalɛm, gba de sa̧a̧ ye, wi-mbii in o wi nɛ war-tɛ-wa sa̧ na, beka hɔ tɛ-mɛ ɓɔna ndo-ndo-ndo.

²Mɛ Jerusalɛm be bara’ɛ, mɛ̀ kúr, ɓɛɛ mɛ̀ ŋmásí fuunu tɛ-mɛ yinɛ. Mɛ be bara, boko be Siɔŋ'ɛ, mɛ̀ búr nyak ger-mɛ yinɛ mbɛt!

³Ɓɛɛ GASA WAN tɔ̧: «Wa kaia so ɛnɛ gee, hegɔ mi tɛ gbo'nɛ́ gee mbɛt.»

⁴GASA WAN tɔ̧ɔ̧ woyo: «Nɛti dukbíí kɔ‘m zira so si Egiptɛ nɛ̀ɛ́ duk hi̧i̧, ɓɛɛ nɛ ɗoŋ Asirii usa bɔnɛ ha̧ wa nyɛmna.

⁵Ɓɛɛ kinii, mi tɛ kpa nɛ ge? Nɛ GASA WAN a̧ tɔ̧ wen’ɛ, wa kaia dukbíí kɔ‘m yaknɛ gee, ɓɛɛ o bíí nɛ kaia wa'i de nɛ ŋgamɔ, tuɓi nɛ da̧ a zu wa. Wa ɗaŋ nɛ nin-am wese lɛŋ.

⁶Mɛ nɛ wen hegɔ, o bíí kɔ‘m tɛ iŋ nin-am, ɓɛɛ wa tɛ iŋ‘e nde, wi tɔ̧ wen’ɛ: ‹Nɛ mi’ɛ.› »

⁷Naŋ o yaa-ba-de mbe wen nɛ zu kaya mɛ tɛnɛ dee nyɛmna; wa ba nɛ ga̧a̧mɔ, bɔtɛ in yuwar-kpasa-a tɛnɛ mbɛt. Ɓɛɛ wa tɔ̧ɔ̧ ha̧ Siɔŋ‘e: «Sɔ̧ kɔ-mɛ nɛ́ Wan ɓɔnsɛnɛ.»

⁸Ɛ̀nɛ̀ zíí tiger o wan-pɛm-mɔ nɛ hiɗi mɔ nɛ tortɛ, wen wa lɛŋ zɔka GASA WAN fara pia ɗoŋ Siɔŋ nɛ yí-wa.

⁹Ɛnɛ o bɛɛ-oi Jerusalɛm, ɛ̀nɛ̀ híɗí mɔ nɛ tortɛ ŋgan nɛ mɔ, wen GASA WAN ha̧a̧ mbe ŋgai ha̧ dukbíí kɔ‘i, ɓɛɛ nɛ́ a̧ a̧ kpasa Jerusalɛm mbɛt.

¹⁰GASA WAN dee sa̧a̧ tom kɔ̧-a̧ yí o tugun bíí lɛŋ nɛ ŋgai mɛ te-er-a. Hegɔ o bíí lɛŋ tɛ zɔk yuwar kpasa-a ko Sɔ̧ k’ɛɛ hɔ nduti-nu mɛ.

¹¹Ɛ̀nɛ̀ gbo, ɛ̀nɛ̀ gbó fara'i ɓɛɛ ɛnɛ yak! K’ɛ́nɛ́ fo ŋma ndiŋmɔ nɛ er'nɛ́ na. Ɛ̀nɛ̀ gbó mgbara o be Babilɔŋ, ɓɛɛ ɛ̀nɛ̀ ɗáfí war-tɛ‘nɛ́ nɛ sa̧a̧-a̧, ɛ́nɛ́ o wi-tui o tasi-ɗafi GASA WAN.

¹²Bó nɛ́ ɛnɛ tɛ ir nɛ ŋmaa nɛ ŋgai gbo nɛnɛ na, wen mɛ nɛ GASA WAN a̧ tɛ duk ti h’ɛ́nɛ́; nɛ́ Sɔ̧ ko Israɛl a̧ tɛ kpe ɗoŋ‘nɛ́ mbɛt.

¹³Gasa Wan'e: «Wi-de-tom kɔ‘m tɛ kpa de sɔnti, a̧ tɛ gasi, ɓɛɛ a̧ tɛ duk zu mɔ lɛŋ.

¹⁴Gba giiwi zɔka a̧ ɓɛɛ bele zar wa, wen sɔnti-a kpaia nɛtɛ; a̧ hɔ ŋmaa in bíí na.

¹⁵Hegɔ ɗɛɗɛ o giiwi tɛ gɔn zu a̧, ɓɛɛ nú o wannu tɛ kpe ti a̧, wen wa zɔka mɔ nɛ wa tɔ̧ so nyɛrɛ-a ha̧ wa na, in wa mbaɗa mɔ nɛ wa tɛ zii so nyɛrɛ-a nɛti na mbɛt.»