Read Northwest Gbaya ESAII 54 Bible Online

ESAII 54 - Northwest Gbaya bible

ESAII 54

¹Ɓɛɛ GASA WAN tɔ̧: Jerusalɛm, mɛ̀ híɗí mɔ nɛ desee, mɛ́ ko-yar-ndɔra nɛ ko so bem na’ɛ, mɛ̀ híɗí mɔ nɛ tortɛ de nɛ nyɛŋɛ, mɛ́ nɛ̀ mɛ̀ iŋ kɔ-mɛ nyimmɔ koo bem na’ɛ, war kɔ-mɛ okoo nɛ wii ee duk’ɛ, o bem kɔ-mɛ tɛ dɔk gan ko wan-wíì.

²Mɛ̀ dé ha̧ bɛr tua-laa kɔ-mɛ mɛ pɛsi, mɛ̀ dé ha̧ tua'i mɛ gasi siti, ká mɛ ta mɔ wen sede-a na. Mɛ̀ dák nyak tua'i nɛ ŋgaya-a, ɓɛɛ mɛ̀ zú̧ te-a nɛ nɔa-a.

³Mɛ̀ dé ha̧ nù kɔ-mɛ mɛ pɛsi nɛ war wiiko in nɛ gale; o bezaŋ mɛ tɛ ba fara oi o tugun bíí, ɓɛɛ wa tɛ de zɔm ye bɛɛ-oi nɛ o bíí gbina so sɛnɛ yak.

⁴Ká kíí de mɛ na, wen foe beka de mɛ na; ká búù ba mɛ na mbɛt, wen mɛ beka zɔk bɔnɛ ɓɔna. Tɛ-mɛ tɛ bi ɗoŋ foe nɛ baa so mɛ ŋgimbi nɛ mɛ ɓɔna so nɛnɛ nɛ zɔŋa; ká mɛ́ kpa ɗaŋsee na, wen búù beka ba mɛ ɓɔna, ziimɔ nɛ baa so mɛ ŋgimbi gera kɔ-mɛ bo ɓɔna mbɛt.

⁵Wen wíì nɛ mɛ tɛ ba tɛ duk nɛ wi nɛ dee mɛ, nin wi’ɛi nɛ GASA WAN nɛ a̧a̧ nɛ ŋgayamɔ lɛŋ, a̧ nɛ Sa̧a̧ Wi ko Israɛl, Wan-kpasi-mɛ, nɛ‘i sa'e, Sɔ̧ nɛ ɔ wan zu nu lɛŋ.

⁶GASA WAN saa mɛ piinɛ ɗoŋ, hee ŋma okoo nɛ‘i ee duk nɛ̀ duk de nɛ̀ ko nɛ̀ tɛ ga. GASA WAN tɔ̧ɔ̧ nde: «Wi tɛ ndak bɔɔ koo nɛ‘i baa so nɛ gbɛ̧-naŋ hee ge?

⁷Mɛ̀ nɛ́ tɛ ŋma be ŋgimbi a̧‘m siŋa so nɛ mɛ pi̧ nu, ɓɛɛ sɛn tɛ gasa kɔ̧ɔ̧mɔ kɔ‘m, mi saa mɛ piinɛ ɗoŋ tɛ‘m.

⁸Mi zika so ɗoŋ-am e ha̧ mɛ nɛ nyimsea tɛ ŋma be ŋgimbi, ɓɛɛ tɛ gasa kɔ̧ɔ̧mɔ kɔ‘m nɛ kaɗi na, mi zɔka mɛ nɛ de yí. Nɛ mi GASA WAN Wan-gɔn-zu-mɛ a̧ tɔ̧ wen’ɛ.

⁹«Mi tɛ de kalemɔ hee tɛ ŋgimbi ko Nɔe ga, wen mi kana so mɔ‘e yi beka ha̧ hur kpe zu nu hee tɛ ŋgimbi ko Nɔe ga ɓɔna, Mi kana mɔ woyo sɔsɔɔ nɛ̀ see-am beka kur zu mɛ wen ha̧‘m mɛ nasi mɛ hegɔ ɓɔna.

¹⁰Kóó o kaya yuu so fara kɔ‘i, kóó o zu-tɔ̧́ mbaŋa so mbɛt, kɔ̧ɔ̧mɔ n'am a̧a̧ nɛnɛ wen mɛ beka kpai na. Nɔɔ-tɔk ga̧a̧mɔ kɔ‘m in mɛɛ beka kaɗi na mbɛt. Nɛ mi GASA WAN nɛ a̧a̧ nɛ kɔ̧ɔ̧mɔ in mɛɛ a̧ tɔ̧ hegɔ.»

¹¹GASA WAN'e: «Jerusalɛm! Mɛ ye-bɔnɛ nɛ gba búk gbina a nu, nɛ̀ wi-ga̧-see-mɛ bo na’ɛ! Mi tɛ mbo mɛ woyo nɛ o de be dap ta, mi tɛ e naŋ-mɛ nɛ de tu̧ ta nɛ duk hee gba̧a̧-yí-zan ga.

¹²Mi tɛ gbɛ nu garo-a nɛ gbɛ̧ ta, mi tɛ e o nutua-yè-nɛnɛ nɛ̀ o de sa̧a̧ ta hee ta-kórò ga, ɓɛɛ mi ɗafa o fara-hu̧si-sɛnɛ zaŋ garo'i lɛŋ, nɛ̀ o de ta nɛ gɛnɛ-a ɔ ŋgaya.

¹³O bezaŋ-mɛ tɛ ya nɛ o ŋgaiwi kɔ‘m, ɓɛɛ wa yaa tɛ ga̧a̧mɔ nyɛɓi nɛnɛ nɛ de-a.

¹⁴Mɛ tɛ duk nɛ nɔa-a tɛ deemɔ kɔ-mɛ nɛ yuwar-a; ŋma ŋgamɔ beka kpa mɛ na, mɛ beka yu mɔ ɓɔna mbɛt; mɛ tɛ yu sɛn ɗɔɔ mɔɔ-kíì, a̧ beka de ŋma mɔ in mɛɛ na.

¹⁵Kà ŋmà bíí nɛ́ bíí mɛ́, bó nɛ́ mi'i toma a̧ na, wen o nde nɛ tɛ bi mɛ tɛ tik nu ti mɛ.

¹⁶Mɛ̀ íŋ‘e nɛ mi'i dee wi-dui-mɔ, nɛ ufi wee wen ha̧ kɛ̧i̧-wee mɛ nyɔŋ, ɓɛɛ wi-dui-mɔ‘i duia nɛ boi-biro nɛtɛ nɛtɛ. Ɓɛɛ mɛ̀ nɛ́ mi mbɛt a̧ dee wi nɛ ɗaŋ o mɔɔ nɔ‘i.

¹⁷Kóó nɛ ge boi-biro ge nɛ‘i tɛ dui, wen dee ɗaŋmɔ in mɛɛ, beka de ŋma mɔ na, ɓɛɛ kóó o nde nɛ ba wen zu mɛ, kita tɛ tik a̧. «Yí-mɔ n'am ɗafa e wen o wi-de-tom kɔ‘m, in mɔɔ-oi-tom kɔ-wa nɛ mɔ‘i.» Mɛ nɛ GASA WAN a̧ tɔ̧ wen'i.