Read Northwest Gbaya ESAII 57 Bible Online

ESAII 57 - Northwest Gbaya bible

ESAII 57

¹O wi-de-mɔ nɛ yuwar-a fe ɓɛɛ fio kɔ-wa'i de ŋma mɔ tɛ bíí na; o kpasa bíí mbɛt tik nu fe, ɓɛɛ bíí ta mɔ sɛnɛ na. Mɛ nɛ wen zu ɗaŋmɔ ko o wi-ɗaŋ nɛ́ mɔ'ɔ nɛ wi-de-mɔ nɛ yuwar-a fe nɛnɛ.

²Ga̧a̧mɔ tɛ pii ɗoŋ, ɓɛɛ o wi-de-mɔ nɛ yuwar-a ɔɔ nu gɔn gado kɔ‘i nɛ desee.

³Ɛnɛ o bem ko kó-dua’ɛ, ɛ̀nɛ̀ tɛ́ pii hɛ̧ɛ̧, ɗaŋ o be-dàlà, in o bezaŋ kó-de-mɔ nɛ mbɔɗɔnu!

⁴Ɛ́nɛ́ pí̧ leɓe'nɛ́, mir nɛ nú‘nɛ́ mam nɛ ge bíí ge? Ɛ́nɛ́ kɔ̧ɔ̧ mɛ tɔ̧‘e, ɛnɛ bó nɛ́ o be ŋgazu, o bezaŋ wi-ndela na?

⁵Mɛ nɛ sɛn ti ɗɔɔ o gasa te in o da̧a̧ wa̧a̧-te ɛ̀nɛ̀ ɔ in o ŋmaa sɛnɛ, ɓɛɛ ɛnɛ gbɛɛ o bem k’ɛ́nɛ́ ɗafi nɛ sɔ̧ ká̧ ŋgere-yi in sɛn kɔ̧ di̧i̧ mbɛt.

⁶Yí-tom kɔ-mɛ Israɛl, nɛ ɗafa o de yɔka ta gasi nɛnɛ hee Sɔ̧ ga, tɛn nɛ zu dɔ̧ɔ̧, a nɛ zɛzɛ nu ha̧ wa, in o zu-nyɔnɔ k’ɛ́nɛ́ mbɛt. Ɛnɛ taa mi tɛ duk nɛ desee zu o mɔɔ nɔ‘i nde?

⁷Mɛ nɛ sɛn zu kusa-fara a̧ mɛ daŋ nɛɛ ɔ sɛnɛ; mɛ nɛ sɛn fara'i a̧ mɛ ɗafi sɔ̧ sɛnɛ mbɛt.

⁸Sɛn zu nu tua in ɗoŋ kpar-nú tua, mɛ kuna o layuru kɔ-mɛ sɛnɛ,[23] kpɔ̧i̧ nɛ laa yinɛ duk nɛnɛ nɛ mgbii, ɓɛɛ mɛ daŋ ɔ nu gɔn gado kɔ-mɛ. Mɛ gɔna zu o dàlá nɔ‘i kɔ-mɛ‘i, ɓɛɛ wɔ ɔa-a in wa gbɛ nɛ mɛ; mɛ yeŋ nɛ zim tɛ-wa.

⁹Mɛ sɔ̧ɔ̧ nɔ̧́-nyama, a nɛ yi-a tɛ-mɛ mbɛt, ɓɛɛ mɛ kur yak mɛ nɛ̀ɛ́ gasi Mɛlɛk. Ɓɛɛ wen ha̧ mɛ mɛ kpa sɔ̧ mɛ gasi, mɛ toma o betom yaknɛ si nyɛi̧a fara mɛ, ɓɛɛ mɛ zir hɔ fara ko o fio mɛ mbɛt.

¹⁰Tɛ yara-a kɔ-mɛ nɛ tɛ mɔ nɛnɛ‘i, mɛ mbɔia ɓɛɛ mɛ e duk na mbɛt. Mɛ kpaa nɛ mbe ŋgai siti, nɛ̀ bó nɛ́ mbɔia-a na.

¹¹Nɛ́ o a̧ mɛ yu dɔ zu nɛ wee, sa mɛ ɔr nɛ‘m hegɔ‘i o? Tɛ-mɛ bìí ɗoŋ-am, ɓɛɛ mɛ ta mɔ wen am ɓɔna. Zɛ dɔka mi tɔ̧ ŋma wen na; hegɔ mɛ nɛ wen zu mɔ‘i a̧ mɛ yu nɛ‘m ɓɔna.

¹²Mi tɛ gba ndaa-mɛ ha̧ o bíí, wen zu tɔ̧a̧-a̧ nɛ mɛ tɔ̧ɔ̧‘e, wi dúk zóóŋ gee'i, ɓɛɛ mɔ nɛ mɛ de'i lɛŋ beka gbak mɛ na.

¹³Ŋgimbi nɛ mɛ tɛ ai nú-mɛ, o dɔka géé-sɔ̧ nɔ‘i kɔ-mɛ‘i tɛ kpasi mɛ k’ɛɛ zɔka! Gba-búk in hara-búk a̧ ɓoɓi wa, kai yaknɛ lɛŋ, ɓɛɛ nɛ̀ war ko o wi-e-ta nɛ‘m, nù in sa̧a̧ kaya kɔ‘m tɛ duk nɛ kɔ-wa.

¹⁴GASA WAN tɔ̧a̧: «Ɛ̀nɛ̀ ɗáfí yuwar nɛ haya-a, gbɛr nɛnɛ nɛ de-a, ɛ̀nɛ̀ káí o ta yinɛ, wen ká dukbíí kɔ‘m tɛɛ kɔ̧ naŋ nɛnɛ.»

¹⁵Mɔ nɛ Sɔ̧, Wi nɛ duk ŋgɔn mɛ in nɛ̀ fara-duk kɔ‘m duk kpoo nɛ kpoo, nɛ̀ nin-am ɔ sa̧a̧ tɔ̧ nɛ mɔ'ɔ: «Mi Sɔ̧ nɛ ɔ sa̧a̧, nɛ duk ŋgɔn mɛ, mi a̧a̧ in o wi-zɔk-bɔnɛ nɛ a̧a̧ nɛ mɔka-see, ɓɛɛ mi tɛ kpasi o bíí nɛ duk si ɗɔɔ gú nɛ̀ o wi-kɔsa mbɛt.

¹⁶Mi beka duk tɛ kia wen, kpa nɛ ɗaŋsee ɓɔnsɛnɛ na, wen ká ɔmi nɛ a̧a̧ tɛ o mɔ n'am dea tɛɛ yɔ.

¹⁷Yɔɔ-kaya ko Israɛl dee ha̧ see-am mɛ tu̧, ɓɛɛ mi gus'a zik nɛ ɗoŋ-am e ha̧ a̧ mbɛt. Zu-a'i, a̧ dee ŋgazu, de nɛ mɔ hee see-aa kɔ̧ɔ̧ ga.

¹⁸Mi iŋa duka-a kɔ̧-a̧ nɛ de-a! «Kóó hegɔ mbɛt, mɔ n'am tɛ de ha̧ a̧ nɛ mɔ'ɔ: mi tɛ kpas'a, mi tɛ usi war ha̧ a̧, ɓɛɛ mi ga̧a̧ see-aa mbɛt. Ɓɛɛ nɛ̀ war ko o wi-zim-mɔ,

¹⁹mi tɛ de ha̧ nú-wa mɛ gɔn mami. O bíí nyɛi̧a fara in o wan mɛ saŋa hɛ̧ɛ̧ tɛ kpasi lɛŋ. Nɛ mbetɛ mi tɛ kpasi dukbíí kɔ‘m. Nɛ GASA WAN a̧ tɔ̧.»

²⁰O wi-ɗaŋ ya kɔ-wa hee gba-tɔp a̧ pɛŋi ɓɛɛ nyɛm mɛ duk keɗeŋ ga na, wen o yi-a ŋmai̧ ŋmai̧ o ndiŋmɔ nɛtɛ nɛtɛ nɛ a̧a̧ ɗɔɔ-aa a taŋ.

²¹GASA WAN'e: «O wi-ɗaŋ beka kpa ga̧a̧mɔ na!»