Read Northwest Gbaya ESAII 58 Bible Online

ESAII 58 - Northwest Gbaya bible

ESAII 58

¹Mɛ̀ híɗí mɔ nɛ hee-ger yaknɛ; ger-mɛ a̧ wor hee mbia ga; mɛ̀ úsí ŋgazu ko dukbíí kɔ‘m ha̧ wa, mɛ̀ úsí yɔɔ-kaya ko o bíí nutua ko Jakob ha̧ wa.

²Wa duk tɛ kia'm wese lɛŋ; desee kɔ-wa mɛ nɛ wen iŋa mɔ n'am kɔ̧a̧, hee ŋma dukbíí nɛ e see tɛ deemɔ nɛ yuwar-a, nɛ́ e deemɔ nɛ Sɔ̧ kɔ̧a̧ duk na ga, Wa kɔ̧ɔ̧ ha̧‘m mɛ gɔn kita nɛ yuwar-a; desee kɔ-wa mɛ nɛ yaa-a kpɔk in Sɔ̧; wa'e:

³«Kà zima-yì k’ɛɛ a̧ dee tɛ‘nɛ́ na, in k’ɛ̀nɛ̀ nɛ zɔka gɔma-er k’ɛɛ na, mɔ n’ɛɛ tɛ kpa sɛnɛ nɛ ge?» Zaŋ zima-yì k’ɛ́nɛ́‘i, ŋma mɔ nɛ dor'nɛ́ tɛ kia mbɔi bo na; ɛ́nɛ́ nasi nɛ o wi-de-tom k’ɛ́nɛ́ lɛŋ mbɛt.

⁴Zaŋ zima-yì k’ɛ́nɛ́, ɛ́nɛ́ kii nɛ wen, sɔm nɛ ŋmaa sɛnɛ mbɛt. Pɛrti zima-yì hegɔ‘i de tɛ‘m, sɛka'm kpɛk nɛ̀ kɔfa-sɔ̧ k’ɛ́nɛ́‘i na.

⁵Só nɛ́ zima-yì mɛ i̧i̧ hegɔ, nɛ‘i duk usi nɛ bɔnɛ ha̧ tɛ-wi sɛnɛ‘i a̧‘m tɛ̀ɛ́ kpɛk so! Zuma-zu kɔ̧ɔ̧sɔ̧ɔ̧ hee ɓoɓo ga, ɔ nɛnɛ nɛ bufu zu bùk-paa nɛnɛ, nɛ mɔ‘i a̧ ɛnɛ sa'e zima-yì nɛ tɛ de tɛ‘m?

⁶Zima-yì wan n'am kɔ̧ɔ̧ nɛ mɔ'ɔ: Ɛ̀nɛ̀ búr o bíí n’ɛnɛ hɛra nɛ nyak-ɗaŋ k’ɛ́nɛ́, ɛ̀nɛ̀ bá kpáŋá ger-wa yinɛ; ɛ̀nɛ̀ é ha̧ o bara mɛ gbo tɛ bɔnɛ, ɛ̀nɛ̀ gbín o kpáŋá a taŋ lɛŋ.

⁷Mɛ̀ há̧ nyɔŋmɔ ha̧ o wi nɛ wɔ gbɛ, mɛ̀ zír o wisan kɔ̧ kira kɔ-mɛ; mɛ̀ pí̧ laa tɛ o wi nɛ ya nɛ gee tɛ, ɓɛɛ ká mɛ́ zik ɗoŋ e ha̧ nya-mɛ nɛ duk nɛ́ mgbák mur-tɛ-mɛ na.

⁸Mɔ‘i tɛ duk nɛ sa̧a̧mɔ wen mɛ, hee daŋa-wese-tuyɛ ga; tɛ ɓan na mɛ kpaa de duka-a woyo nɛ haya-a; deemɔ nɛ yuwar kɔ-mɛ tɛ yak ti ha̧ mɛ, ɓɛɛ gasamɔ ko GASA WAN tɛ duk nɛ wi-kpe-ɗoŋ-mɛ.

⁹Hegɔ, kà mɛ sa sara, ɓɛɛ GASA WAN tɛ kɔ̧ sara nú-mɛ́; kà mɛ hiɗi mɔ ɓɛɛ a̧ tɛ kifi nú ha̧ mɛ‘e, wi nɛ mɔ'ɔ. Kà mɛ gbo o bara yinɛ, kà mɛ e usa er yí bíí in ɓira ɗaŋ wen e nú bíí duk,

¹⁰ɓɛɛ kà mɛ ha̧ nyɔŋmɔ ha̧ o wi nɛ wɔ gbɛ in o wisan mbɛt, ɓɛɛ gba-tum tɛ kifi nɛ sa̧a̧mɔ ti mɛ, ɓɛɛ tum gɔna duk hee wese-see-zu ga wen mɛ.

¹¹GASA WAN tɛ yak ti ha̧ mɛ ɓɔnsɛnɛ; a̧ tɛ dai mɛ sɛn ŋga-gbárà mɛ mbɛt, a̧ tɛ ha̧ mbe ŋgai ha̧ mɛ, ɓɛɛ mɛ tɛ duk hee nyɔnɔ nɛ yì a̧a̧ gun-aa ga, hee kpút-kpút yi zu-zer nɛ̀ gɔn na kpoo nɛ kpoo’ɛ ga.

¹²Hegɔ mɛ tɛ ba tua nɛ gbina so'i e ŋgɔn, zu gba̧‘a̧ naŋ-tua mɛ ti, ɓɛɛ o bíí tɛ sa nin-mɛ‘e: «Wan-ba-gbina tua e ŋgɔn.»

¹³«Kà mɛ bɛ̧ dee tom wese-ɔm-tɛ, e nɛ kia mbɔi duk tɛ sa̧a̧ wese kɔ‘m, kà mɛ e wese'i nɛ wese-tortɛ, ha̧ mɛ duk nɛ wese-zɔn nin-am tu̧ nɛ tɛ‘m sɛnɛ, e nɛ dee tom in dee gɛnɛ sɛnɛ kpɛr nɛnɛ mbɛt duk,

¹⁴ɓɛɛ mi tɛ duk nɛ wi-ha̧-desee ha̧ mɛ; mi GASA WAN tɛ zɔn mɛ, ba nɛ mɛ si ŋgɔn e zu kusa-fara mɛ; mi tɛ de ha̧ mɛ mɛ duk tɛ nu ko zɔmdáa kɔ-mɛ Jakob nɛ̀ kpaa so nɛ mɔɔ-oi. Mɔ nɛ mi GASA WAN ha̧ nú zu-a sɛnɛ ha̧ mɛ nɛ mɔ‘i.»