Read Northwest Gbaya ESAII 59 Bible Online

ESAII 59 - Northwest Gbaya bible

ESAII 59

¹Taamɔ k’ɛ́nɛ́‘e, ɓaa GASA WAN zi̧i̧ wen kpasa'nɛ́ na, kóó zer-aa ba wen zia wen k’ɛ́nɛ́ na nde?

²Weyaa, mɛ̀ nɛ́ yɔɔ-kaya k’ɛ́nɛ́ a̧ gɔn mgbara'nɛ́ in Sɔ̧ k’ɛ́nɛ́; mɛ̀ nɛ́ o ɗaŋmɔ k’ɛ́nɛ́ a̧ de ha̧ a̧ mɛ wɛr yi-a si mgbɔɔr, ɓɛɛ a̧ zii wen k’ɛ́nɛ́ na mbɛt.

³Wen waza-er'nɛ́ in kiitɛ er'nɛ́ lɛŋ kpee nɛ̀ tɔk wen gbɛɛ zu in dee ŋgamɔ k’ɛ́nɛ́. K’ɛ̀nɛ̀ hu̧i̧ nú‘nɛ́, mɛ̀ nɛ́ wen dee ndela tɔ̧ nɛ ɗaŋ wen.

⁴Wen n’ɛnɛ ba nɛnɛ ti kita, bó nɛ́ kpasawen na; ɛnɛ gɔn nɛ tɛ‘nɛ́ ɓir nɛ wen; o wen nɔ‘i nɛ gee tumui̧-wen, gba̧a̧-a̧ bo na. Ɛ́nɛ́ bá nɛ zaŋ ɗaŋmɔ ɓɛɛ bem n’ɛnɛ ko nɛ́ bɔnɛ.

⁵O ee-zu-mɔ k’ɛ́nɛ́ duk nɛ ɗaŋa hee o kui gɔ́k ga; kóó o nde nɛ tam tɛ fe nú-wi'i; wen mbaŋa-a ko kui hegɔ ɓɛɛ kóró gboa. O nduu n’ɛnɛ tak duk nɛ yɔk ko wanto, bo nɛ wen pi̧a-a̧ mɛ kpe tɛ-wi na, ɓɛɛ mɛ nɛ wen usa bɔnɛ. Tom nɛ er'nɛ́ de kana nɛ ɗaŋa mɔ.

⁷Ɛnɛ ma nɛ yi wen dee ɗaŋmɔ, ɓɛɛ ɛnɛ tika zu ŋma bíí nɛ̀ de ŋma mɔ na wen gbɛɛ a̧. O ee-zu-mɔ k’ɛ́nɛ́ kana nɛ́ wen dee ɗaŋmɔ in o ŋma bíí. Nɛ́ dee ŋgamɔ in ɗaŋmɔ a̧ duk yuwar n’ɛnɛ ba.

⁸Ɛ́nɛ́ íŋ yuwar sitɛ ga̧a̧mɔ na, ɓɛɛ fara n’ɛnɛ nɛ sɛnɛ lɛŋ, ɛ́nɛ́ i̧si̧ nɛ deemɔ nɛ ɔ tana. Nɛ́ o gɔɔ-war ɛ̀nɛ̀ ba, ɓɛɛ koo o nde, nɛ ba o yuwar k’ɛ́nɛ́ nɔ‘i beka kpa ga̧a̧mɔ na.

⁹Mɛ nɛ wen hegɔ sa Sɔ̧ kɔ̧ mɛ ye ɗoŋ yɛ nɛ haya-a na, in sa a̧ e ha̧ mɔ n'aa ha̧ so nú-a sɛnɛ mɛ hɔ gba̧a̧ nɛ haya-a na mbɛt. Ɛɛ taa so'e mɛ nɛ sa̧a̧mɔ ɛ̀ɛ̀ tɛ zɔk, ɓɛɛ fara lɛŋ nɛ́ tum. Ɛnɛ pɛma so ha̧ ndaa-zan mɛ gɔn, ɓɛɛ nɛ́ ɗuka-zɛ ɛ̀ɛ̀ nɛ nɔ sɛnɛ.

¹⁰Ɛ́ɛ́ bá nɛ ká̧ ŋgeŋ tam nɛ mɔ nɛnɛ hee wi nɛ zɔk mɔ na ga, ɓɛɛ ɛɛ taa mɔ hee o wi-boma-yí ga mbɛt. Mɛ́ bu-wese, ɓɛɛ ɛɛ tira yɔɔ-mɔ hee mɛ ɗuka-zɛ ga. Ɛɛ a̧a̧ nɛ haya-tɛ, ɓɛɛ ɛɛ yak ŋmaa in o fio na.

¹¹Ɛ́ɛ́ pɛ́ nɛ see yɛ hee dila[24] ga, ai nɛ nú hee gbaku̧i ga mbɛt. Ɛɛ ee so ta'e Sɔ̧ tɛ gbak yɛ wo, ɓɛɛ a̧ de ŋma mɔ na. Ɛɛ pɛm so nɛ kpasa-a, ɓɛɛ a̧ ɔ nyɛi̧a nɛ yɛ.

¹²Nɛ mbetɛ GASA WAN, ɛɛ dee so ŋgazu in'nɛ̀ɛ́ ɓɔnsɛnɛ; hegɔ o ɗaŋmɔ k’ɛɛ ɓa nɛ wen in yɛɛ, o ŋgazu k’ɛɛ ndaɗa tɛ yɛ, nɛ mbetɛ ɛɛ iŋa yɔɔ-kaya k’ɛɛ mbɛt.

¹³Ɛɛ dee ŋgazu in'nɛ̀ɛ́, ɛɛ ee ɗɔra tɛ‘nɛ́, ɛɛ bɛ̧ɛ̧ ndaka ɗoŋ‘nɛ́, Sɔ̧ k’ɛɛ. Nyɛrɛ-tɔ̧ɔ̧ k’ɛɛ mɛ nɛ wen usa bɔnɛ in dee ŋgazu. Mɔ nɛ a̧a̧ sɛn tɛ yɛ in tɛ taamɔ k’ɛɛ lɛŋ, kana nɛ ndela ɓɛɛ.

¹⁴Hegɔ deemɔ nɛ tana-a ɓɔna si ɗoŋ, ɓɛɛ deemɔ nɛ yuwar-a ɓɔn kpɔk oi nɛ nyɛi̧a-a, wen kpasawen tira yɔɔ mɔ, ɓɛɛ deemɔ nɛ tana-a kpa fara na.

¹⁵Tɔ̧ɔ̧ kpasawen bo ɓɔna; ɓɛɛ wi nɛ bɛ̧ dee ɗaŋ, wa tika zu-a ɗaŋ mɔ kɔ̧-a̧ va̧i̧-va̧i̧. GASA WAN zɔka mɔ‘i, ɓɛɛ see-aa tu̧, wen nɛ̀ deemɔ nɛ yuwar-a bo na.

¹⁶A̧ zɔka'e ŋma bíí tɔ̧ wen tɛ mɔ‘i na; ɗɛɗɛ-a gɔna wen ŋma bíí de ŋma mɔ na mbɛt. Nɛ́ hegɔ sa a̧ pi̧ tɛ-a sɛnɛ nɛ kiitɛ-a, ɓɛɛ a̧ kpasi wa; ɓɛɛ deemɔ nɛ yuwar-a kɔ̧-a̧ ha̧ ŋgai ha̧ a̧.

¹⁷Deemɔ nɛ yuwar-a nɛ laa-boi-pi̧-tɛ kɔ̧-a̧, yuwar kpasa-a duk nɛ laasɔ̧i̧-gu-zu kɔ̧-a̧; a̧ pi̧i̧ laa-kifa-er tɛ-a, ɓɛɛ a̧ gaɓi gɔ̀yá tɛ-a hee gba-laa ga.

¹⁸A̧ tɛ kifi er ha̧ o bíí nyɛm nɛ ɗoŋ deemɔ kɔ-wa: O wi-kur-zu-a tɛ kpa kɔ‘i nɛ ari! A̧ tɛ kifi er hegɔ see-kisi mɛ mbɛt!

¹⁹Hegɔ wa tɛ yu GASA WAN in gasamɔ kɔ̧-a̧ nɛ daŋa-wese hɔ yee-wese, ŋgimbi n'aa tɛ pii nɛ ɗoŋ nɛ ŋgai hee kin-yì a̧ gba-búk pɛŋi ga.

²⁰GASA WAN tɛ tɛ mɛ kpasi Jerusalɛm in o be Israɛl nɛ tɛ ee dee ŋgazu duk. Nɛ GASA WAN a̧ tɔ̧.

²¹GASA WAN'e: «Ɓɛɛ nɛ war-a kɔ‘m, yuwar nɔɔ-tɔk n'am tɛ nɔ in wa nɛ mɔ'ɔ. Mi ee Ɔmi kɔ‘m mɛ zir pii zu'nɛ́, mi ee wen kɔ‘m nú‘nɛ́ kinii yaknɛ kpoo nɛ kpoo nɛ beka yu nú‘nɛ́ na; wen'i beka yu nú o be bezaŋ‘nɛ́ na, kóó nú o bezaŋ be-koo'nɛ́ na mbɛt. Nɛ mi a̧ tɔ̧.»