Read Northwest Gbaya ESAII 6 Bible Online

ESAII 6 - Northwest Gbaya bible

ESAII 6

¹Nɛ́ ti pɛ‘i a̧ wannu Ozias fee nɛnɛ. Ɓɛɛ tɛ hɔɔ-zu mi zɔk GASA WAN fara duk zu ŋma damti, ɓɛɛ nu gba-laa kɔ̧-a̧ duna so kɔ̧ Tua ko Sɔ̧.

²O ɔmi[3] nɛ tɛ-wa tok tok hee wee ga yora zu a̧: wa kpɔk kpɔk a̧a̧ nɛ ɓaa mɔɔrɔ-ɗoŋ-kpɔk, yiitoo wen kpee yí-wa, ɛ̧ɛ̧ nɔ'ɔ yiitoo’ɛ wen kpee naŋ-wa, ɓɛɛ o oi-aa yiitoo’ɛ nɛ wen bu̧i̧a̧-a̧ kɔ-wa.

³Ɓɛɛ wa hiɗi mɔ tɔ̧ nɛ wen sitɛ o ŋmaa'e: «A̧ ɔ sa̧a̧, a̧ ɔ sa̧a̧, a̧ ɔ sa̧a̧, mgbák Sa̧a̧ Wi ɓɔnsɛnɛ nɛ́ GASA WAN nɛ a̧a̧ nɛ ŋgayamɔ lɛŋ ɛ̀nɛ̀-wí ɓɛɛ, gasamɔ kɔ̧-a̧ duna nu’ɛ lɛŋ.»

⁴Nu Tua ko Sɔ̧ lɛŋ naka ŋgimbi nɛ o wi nɔ‘i hiɗi nɛ mɔ‘i, ɓɛɛ Tua'i dun nɛ zi-wee.

⁵Ɓɛɛ mi tɔ̧: «Oee mi wa! Mi yɔɔ kaɗi; nú‘m de na wen mi a̧a̧ mgbara dukbíí-tɔ̧-ɗaŋ-wen, ɓɛɛ yí‘m zɔka Wannu, GASA WAN nɛ a̧a̧ nɛ ŋgayamɔ lɛŋ.»

⁶Ɓɛɛ ŋma ɔmi nɛ tɛ-a tok tok hee wee ga'i bu̧i̧ pii tɛ‘m ɓam kɛ̧i̧-wee nɛ mɔɔ-ɓam-mɔ zu fara-ɗafi-sɔ̧.

⁷Nɛ mɔ'ɔ n'aa baa kɛ̧i̧-wee'i dir nɛ nú‘m, ɓɛɛ tɔ̧: «Mɛ zɔk; mɔ'ɔ nɛ foo ndara nú-mɛ́'ɛ, ɗaŋmɔ kɔ-mɛ lɛŋ bia, ndiŋmɔ kɔ-mɛ lɛŋ, Sɔ̧ foo yinɛ!»

⁸Ɓɛɛ mi zii tiger GASA WAN nɛ tɔ̧a̧‘e: «Mi tɛ tom nɛ o? Bíí n’ɛɛ tɛ tom nɛ o?» Ɓɛɛ mi kifi nú: «Mi nɛ mɔ'ɔ, ɛ̀nɛ̀ tóm am.»

⁹Ɓɛɛ a̧ tɔ̧ ha̧‘m: «Mɛ̀ nɛ́ ɓɛɛ mɛ̀ tɔ̧́ ha̧ dukbíí‘e nde: ‹Ɛnɛ tɛ yeŋ zer'nɛ́ mɛ zii mɔ, ɓɛɛ ɛnɛ beka zii gba̧a̧-a̧ na; ɛnɛ tɛ zɔk mɔ hee wan-boma-yí ga.›

¹⁰Mɛ̀ dé ha̧ see dukbíí'ɛ mɛ ŋgai, mɛ de ha̧ zer-wa mɛ kpe, in ha̧ yí-wa mbɛt mɛ kpe, wen ká wa tɛɛ zɔk mɔ, in ká wa tɛɛ zii mɔ, ká wa tɛɛ iŋ mgbara mɔ mɛ kɔ̧ ɗɔaa, ká‘m kpasi wa.»

¹¹Ɓɛɛ mi ak mɔ: «GASA WAN! Mɔ‘i tɛ de te ge ŋgimbi ge?» Ɓɛɛ a̧ kifi nu ha̧‘m: «Ŋgimbi nɛ o ye k’ɛ́nɛ́ lɛŋ tɛ ɗaŋ kifi nɛ bɛɛ-oi, nɛ o tua k’ɛ́nɛ́ tɛ kifi nɛ o gɛ̧ɛ̧ tua, ɓɛɛ nu k’ɛ́nɛ́ kifa duk nɛ ŋga-gbárà.»

¹²GASA WAN tɛ ndak o bíí tɛ nu'i yinɛ, ɓɛɛ nu'i tɛ duk sɔɔ gee, ŋma mɔ beka bo sɛnɛ na.

¹³Ɓɛɛ oi bíí nɛ ɓɔna benaŋ nyɛm nɛnɛ‘i duk hee o gasa te[4] nɛ‘i gɔm’ɛ ga; oi mɔ nɛ ɓɔna nɛ́ ŋginda gun-aa: ŋginda gun-aa'i nɛ́ kpar-mɔ nɛ̀ ɔ sa̧a̧.