Read Northwest Gbaya ESAII 60 Bible Online

ESAII 60 - Northwest Gbaya bible

ESAII 60

¹Mɛ̀ kúr Jerusalɛm, ɓɛɛ mɛ̀ tók kɛɗu-kɛɗu, wen sa̧a̧mɔ kɔ-mɛ hɔɔ kaɗi; gasamɔ ko GASA WAN dee ha̧ mɛ mɛ tok hee wese a̧ daŋ ga.

²Mɛ̀ zɔ́k, tum kpee zu nu, ɓɛɛ zɛ de zu o dukbíí lɛŋ, ɓɛɛ kɔ-mɛ, gasamɔ ko GASA WAN nyɛka zu mɛ hee wese a̧ daŋ ga.

³Hegɔ o tugun bíí tɛ gar tɛnɛ pii tɛ sa̧a̧mɔ kɔ-mɛ‘i, ɓɛɛ o wannu mbɛt tɛ tɛ wen zu sa̧a̧mɔ nɛ nyɛk tɛ-mɛ‘i.

⁴Mɛ̀ zɔ́k mɔ zik katɛ mɛ, mɛ́ tɛ zɔk o bem kɔ-mɛ lɛŋ nɛ gar tɛnɛ. Wa mɔi̧a ŋmaa sɛn katɛ mɛ. O bem nɔ‘i píí nɛ nyɛi̧a fara mɛ; o bíí tɛ ɓuk o boko-bem kɔ-mɛ piinɛ mbɛt.

⁵Mɛ tɛ zɔk mɔ‘i, ɓɛɛ mɛ kpaa desee, see-mɛ tɛ to ɓɛɛ tɛ-mɛ gara, wen o dɔka mbɔi ɗɔɔ o gba-tɔp lɛŋ tɛ gar pii tɛ-mɛ, ɓɛɛ o kpaamɔ ko o tugun bíí lɛŋ tɛ tɛ pii tɛ-mɛ mbɛt.

⁶O ŋgeloba tɛ dun zu nu kɔ-mɛ nɛ dɔka-a, o wi-de-gɛnɛ nɔ‘i nɛ́ o be Madiaŋ in o be Efa, o bíí Seba tɛ tɛ lɛŋ. Wa tɛ kai nɛ́ lɔr in fuu-nyama tɛnɛ, bíí nɛ̀ gima zɔn nɛ gasamɔ ko GASA WAN.

⁷O mɔ-dai ko o bíí Kedar lɛŋ tɛ mɔi̧ sɛn ti mɛ, o vala sami ko o be Nɛbayot tɛ ya nɛ kɔ-mɛ; wa tɛ dɔ wa zu fara-ɗafi GASA WAN. Mɔ‘i tɛ duk nɛ de kpoo-ɗafi-sɔ̧ nɛ ɔ dee nyɛmna wen-aa; hegɔ a̧ tɛ usi gasamɔ nɛ a̧a̧ tɛ Tua kɔ̧-a̧.

⁸O giiwi nɔ'ɔ nɛ o ge bíí ge? Wa ya hee tura-zan ga, kóó hee gii gbaku̧i nɛ bu̧i si fara-ɔɔ kɔ‘i ga.

⁹O kombon gar tɛnɛ nɛ nyɛi̧a-a nɛ kur gba-tɔp mɛ, ɓɛɛ nɛ́ o gasa kombon mɛ Tarsis a̧ ya ti ha̧ wa, kai nɛ o bem kɔ-mɛ nɛ ya nɛ nyɛi̧a-a piinɛ ɗoŋ, nɛ oi sede in lɔr kɔ-wa wen zɔna nin GASA WAN Sɔ̧ kɔ-mɛ, in wen zɔna nin Sa̧a̧ Wi ko Israɛl wen a̧ ha̧a̧ gasamɔ ha̧ mɛ.

¹⁰Nɛ́ o gɛnɛ a̧ tɛ mbo ŋgeŋ kɔ-mɛ woyo, ɓɛɛ o wannu kɔ-wa yaa nɛ o wi-de-tom kɔ-mɛ. Nɛ́ GASA WAN a̧ tɔ̧. Zaŋ nyimsea kɔ‘m, mi gusa so mɛ, ɓɛɛ mi tɛ usi kɔ̧ɔ̧mɔ ha̧ mɛ, wen see-am dee kinii.

¹¹Kóó nɛ̀ wese, kóó nɛ̀ zɛ, nú garo ye kɔ-mɛ tɛ duk booŋ, wa beka kpe na, wen ha̧ o bíí mɛ kai o mbɔi ko o tugun bíí in ko o wannu tɛnɛ ha̧ mɛ ɗoŋ ŋmaa ɗoŋ ŋmaa.

¹²Tugun bíí in o nu lɛŋ nɛ tɛ bɛ̧ dee tom ha̧ mɛ tɛ kum lɛŋ; tugun bíí nɔ‘i tɛ ɗaŋ lɛŋ lɔkɔti-lɔkɔti.

¹³Gasamɔ ko Libaŋ tɛ duk nɛ́ kɔ-mɛ; wa tɛ kai o zawaya in o sumbu gú nɛ̀ o dɛ̧ɛ̧[25] tɛnɛ tɛ kɔ-mɛ, wen ɗafa-a nɛ̀ Sa̧a̧ Tua kɔ‘m. Hegɔ mi tɛ usi gasamɔ nɛ a̧a̧ tɛ fara n'am duk sɛnɛ.

¹⁴O bezaŋ o bíí nɛ usa so bɔnɛ ha̧ mɛ tɛ zum zu sɛn ti mɛ, o bíí nɛ zɛkɛɗa so mɛ tɛ gu nu sɛn ti ɗɔɔ naŋ-mɛ, ɓɛɛ wa tɛ sa nin-mɛ‘e: «Ye ko GASA WAN», «Siɔŋ ko Sa̧a̧ Wi ko Israɛl.»

¹⁵Hee mɔ'ɔ nɛ wa siŋa so mɛ pi̧ nu, wa kɔ̧ mɛ na, wa nɛ mɛ zɔk mɛ ɓɔna mbɛt ga, kinii, mi tɛ de ha̧ mɛ mɛ duk nɛ mɔ nɛ‘i tɛ zɔn pɛ nɛ pɛ, in mɔɔ-ha̧-desee ha̧ o bezaŋ ɗoŋ ŋmaa yaknɛ kpoo nɛ kpoo.

¹⁶Mɛ tɛ nɔ yibere ko o tugun bíí, ɓɛɛ mɛ kaia mbɔi ko o wannu; hegɔ, mɛ tɛ iŋ‘e, Wi-kpasi-mɛ, mi GASA WAN, in Wan-gɔn-zu-mɛ nɛ́ Wan-ŋgai ko Jakob.

¹⁷Mi tɛ de ha̧ wa mɛ kai lɔr tɛnɛ ha̧ mɛ, oi nú ndɛrɛ, in bu-mbɔi tɛnɛ, oi nú gee boi. Wa tɛ kai nɛ ndɛrɛ tɛnɛ, oi nú te, in boi tɛnɛ, oi nú ta mbɛt. Mi tɛ e nɛ ga̧a̧mɔ mɛ ɔ wan zu mɛ in deemɔ nɛ yuwar-a mɛ duk zu mɛ.

¹⁸Wi beka zii nyɛrɛ dee ŋgamɔ zu nu kɔ-mɛ, kóó gbina mɔ in ɗaŋa mɔ tɛ gbìsí-nu kɔ-mɛ na. Mɛ tɛ sa nin ŋga-fara-duk kɔ-mɛ‘e «Yuwar kpasa-a» ɓɛɛ mɛ saa kpar-nú-garo kɔ-mɛ‘e «Zɔnamɔ».

¹⁹Sa̧a̧mɔ nɛ tɛ nyɛk zu mɛ mɛ bu-wese beka duk nɛ wese ɓɔna, in sa̧a̧mɔ nɛ tɛ tok zu mɛ mɛ zaŋzɛ bo nɛ nyaŋa-zɛ ɓɔna mbɛt, ɓɛɛ nɛ́ GASA WAN a̧ tɛ duk nɛ́ sa̧a̧mɔ kɔ-mɛ kpoo nɛ kpoo, nɛ́ Sɔ̧ kɔ-mɛ a̧ tɛ duk nɛ́ gasa nyɛka sa̧a̧mɔ ha̧ mɛ.

²⁰Yee-wese in yee-tum ko nyaŋa-zɛ beka duk nɛ ŋma mɔ wen mɛ na, wen GASA WAN tɛ duk nɛ́ sa̧a̧mɔ nɛ tɛ nyɛk zu mɛ kpoo nɛ kpoo, ɓɛɛ zima-fio kɔ-mɛ tɛ kaɗi mbɛt.

²¹Dukbíí kɔ-mɛ nɛ oi-aa tɛ duk nɛ o wi-de-mɔ nɛ yuwar-a, ɓɛɛ wa tɛ ba nu'i nɛ mɔɔ-oi kpoo nɛ kpoo. Wa nɛ o bíí n'am dee nɛ er-am, wen usa gasamɔ kɔ‘m. Wa tɛ hɔ ŋmaa in bɔr-nyɔnɔ, nɛ hɔɔ sɛn kpɛɛfɔ kɔ‘m.

²²Nú-gara nɛ duka so tikiɗi tɛ nyɛɓi nɛ dɔka-a, ɓɛɛ geɗek nutua tɛ gasi kifi nɛ zɔm ŋgaya tugun bíí. Mɔ nɛ mi GASA WAN tɛ de nɛ haya-a nɛ ŋgimbi-a tɛ hɔ nɛnɛ, nɛ mɔ‘i.