Read Northwest Gbaya ESAII 61 Bible Online

ESAII 61 - Northwest Gbaya bible

ESAII 61

¹Ɔmi ko GASA WAN Sɔ̧ a̧a̧ zu'm, wen a̧ tɛna nɔ̧́ a zu'm. A̧ toma'm ha̧‘m mɛ tɔ̧ de mbe wen ha̧ o wisan, ha̧‘m mɛ ha̧ nɔɔ-ŋgiɗi ha̧ o wi nɛ̀ bó nɛ̀ mɔɔ-e-nɛ-ta na, in ha̧‘m mɛ tɔ̧ ha̧ o bara-biro in ha̧ o wi-zɔɓɔ‘e, wa tɛ gbo ɓɛɛ poka tɛ gbin yinɛ naŋ-wa;

²ha̧‘m mɛ tɔ̧ pɛ nɛ̀ GASA WAN tɛ de nɛ ko ha̧ dukbíí kɔ‘i, in wese nɛ Sɔ̧ k’ɛɛ tɛ kifi nɛ er ha̧ o wisɛn kɔ‘i, ha̧ nɛ nɔɔ-ŋgiɗi ha̧ o wi-zim-fio.

³Wa zim nɛ fio sɛn Siɔŋ, ɓɛɛ mi tɛ kpai ɗaŋsee nɛ desee: bùk nɛ a̧a̧ so zu wa tɛ kifi nɛ laasɔ̧i̧-wan; mi tɛ sɔ̧ nɛ de nɔ̧́-nyama tɛ-wa, ɓɛɛ zima-fio beka bo ɓɔna. Wa tɛ pi̧ nɛ laa-gbaŋa, nɛ bó nɛ́ deeko nɛ tɛ-wa ɓɔna mbɛt. Hegɔ wa tɛ duk nɛ gasa te-zɔn-nin Sɔ̧, wa tɛ duk nɛ fɔ wen usa gasamɔ ko GASA WAN.

⁴Wa tɛ ɗafi o bɛɛ-oi ba e ŋgɔn, wa tɛ mbo o tua nɛ gbina tɛ ŋgimbi ko o zɔmdáa, ɓɛɛ wa ɗafa o ye nɛ ɗaŋa so ɓeemɛ pɛ nɛ pɛ e ŋgɔn woyo.

⁵O gɛnɛ nɛtɛ nɛtɛ tɛ dai o geɗek mɔ-dai k’ɛ́nɛ́, o gɛnɛ nɔ‘i tɛ ya nɛ o wi-wa-fɔ in fɔ-nyak-dɔ̧ɔ̧ k’ɛ́nɛ́ mbɛt.

⁶K’ɛ́nɛ́, wa tɛ sa'nɛ́‘e: «O wi-ɗafi-sɔ̧ ko GASA WAN», in «O wi-de-tom ko Sɔ̧ k’ɛɛ». Mbɔi ko o dukbíí in gasamɔ kɔ-wa tɛ duk nɛ k’ɛ́nɛ́.

⁷Sɛn oi nú búù in dara, ɛnɛ tɛ kpa nɛ nù ko wi nɔ‘i zu ŋmaa war yiitoo; ɓɛɛ ɛnɛ duka tɛ nyɛŋɛ kpoo nɛ kpoo.

⁸Wen kɔ‘m GASA WAN, mi kɔ̧ɔ̧ nɛ deemɔ nɛ yuwar-a, mi sɛna zuzu in gbɛɛ-zu. Mi tɛ yor ɗoŋ wen kɔ‘m ha̧ nɛ mɔɔ-oi-tom k’ɛ́nɛ́ h’ɛ́nɛ́, ɓɛɛ mi nɔɔ tɔk in'nɛ̀ɛ́ kpoo nɛ kpoo mbɛt.

⁹O tugun bíí nɛtɛ nɛtɛ sɛn fara lɛŋ tɛ iŋ o bezaŋ‘nɛ́, o dukbíí lɛŋ tɛ iŋ kpar'nɛ́; kóó o nde nɛ tɛ zɔk wa tɛ iŋ‘e, wa nɛ bezaŋ nɛ GASA WAN toka de yoŋgo zu wa.

¹⁰Nyɛŋɛ pi̧ nɛ‘m wen zu GASA WAN, sɔ̧-tɛ‘m de nɛ tortɛ wen zu Sɔ̧ kɔ‘m, wen a̧ pi̧i̧ laa-duka-kpasa sɛn tɛ‘m, ɓɛɛ a̧ gu gba-laa deemɔ nɛ yuwar-a tɛ‘m mbɛt hee ŋma wi-ba-kóò, kóó ŋma wi-ɗafi-sɔ̧ nɛ guu de laasɔ̧i̧ zu ga. Desee kɔ‘m duk hee ko zɔŋa nɛ ɗafa tɛ mɛ ba wii ga.

¹¹Hee mɔ'ɔ nɛ nù de nɛnɛ ha̧ kpar-mɔ mɛ gbo, in nɛ fɔ dɛm nɛ kpar-mɔ'ɛ ga, nɛ́ hegɔ a̧ GASA WAN tɛ de nɛnɛ ha̧ deemɔ nɛ yuwar-a in zɔnamɔ mɛ dɛm, sɛn ti o tugun bíí lɛŋ.