Read Northwest Gbaya ESAII 64 Bible Online

ESAII 64 - Northwest Gbaya bible

ESAII 64

¹Ɛ́nɛ́ tɛ̀ɛ́ duk hee wee nɛ dɔ kora zɔ̧, kóó nɛ̀ de ha̧ yì mɛ kpa̧i̧'ɛ ga. Tɛ mɔ‘i, ɛ̀nɛ̀ tɛ̀ɛ́ usi ha̧ o wisɛn k’ɛ́nɛ́‘e, ɛ́nɛ́ Sɔ̧‘i nɛ́ mɔ‘i. Ɓɛɛ bele tɛ̀ɛ́ zar o dɔka dukbíí.

²O kaya tɛ̀ɛ́ nak mbaŋ a nu ŋgimbi n’ɛnɛ tɛ de nɛ mɔɔ-gɔn-ɗɛɗɛ tɛ zira-a k’ɛ́nɛ́ tɛnɛ‘i.

³Nɛti ŋma bíí nɛ zia, kóó nɛ‘i tɛ̀ɛ̀ tɔ̧́ ha̧ a̧, kóó nɛ zɔka nɛ gbaayí‘e, ŋma sɔ̧ yak zu'nɛ́ nɛ dee pɛrti mɔ hegɔ, wen zu o bíí kɔ‘i nɛ e ta nɛ wi, bo na.

⁴Ɛ́nɛ́ we nɛ ti o wi nɛ de mɔ nɛ see'nɛ́ kɔ̧a̧, nɛ ba yuwar k’ɛ́nɛ́ in nɛ tɛ bi ɗoŋ‘nɛ́ na. See'nɛ́ ɗaŋa wen zu ɗaŋmɔ n’ɛɛ dea; mɔ kpɔk, k’ɛ̀ɛ̀ pii ɗoŋ mɛ ba o gba̧‘a̧ yuwar k’ɛ́nɛ́, ɓɛɛ ɛɛ tɛ kpasi.

⁵Ɛɛ yaa so hee o wi-simbo ga, ɓɛɛ o deemɔ k’ɛɛ nɛ yuwar-a mbɛt duka nɛ mɔɔ-nyɛr hee tui-mar ko okoo-zɔk-zɛ ga. O yɔɔ-kaya k’ɛɛ dee h’ɛ́ɛ́ mɛ yambali, hee kora wa̧a̧ a̧ búk kai yaknɛ ga.

⁶Ŋma bíí mɛ sa mɔ sitɛ‘nɛ́ bo na, kóó nɛ ta mɔ mɛ ndaɗi in'nɛ̀ɛ́ bo na mbɛt. Wen ɛnɛ zika ɗoŋ‘nɛ́ e h’ɛ́ɛ́, siŋ nɛ yɛ pi̧ nu wen ha̧ ɗaŋmɔ mɛ kpa ŋgai zu yɛ.

⁷Zu-a'i, GASA WAN, ɛ́nɛ́ nɛ́ dáà k’ɛɛ, ɛɛ nɛ gìì, ɓɛɛ ɛnɛ nɛ wi-ɓu-kpánà, ɓɛɛ ɛɛ lɛŋ nɛ tom n’ɛnɛ dee nɛ er'nɛ́.

⁸Ká see'nɛ́ nyim batɛ na GASA WAN, ká tɛ‘nɛ́ mbaŋ ɗoŋ ɗaŋmɔ k’ɛɛ ɓɔnsɛnɛ na. Ɛnɛ zɔk, ɛɛ lɛŋ nɛ dukbíí k’ɛ́nɛ́.

⁹O sa̧a̧ saaye k’ɛ́nɛ́ kifa bɛɛ-oi, Jerusalɛm kifa ŋga-gbárà, ɓɛɛ Siɔŋ kifi duk nɛ ŋma fara nɛ mɔ ɗaŋa sɛnɛ lɔkɔti-lɔkɔti.

¹⁰Wa dɔɔ sa̧a̧ Tua k’ɛ́nɛ́ nɛ ɔ dee nyɛmna, nɛ̀ o zɔmdáa k’ɛɛ wor só‘nɛ́ sɛnɛ. Fara n’ɛɛ kɔ̧ɔ̧ so nyɛmna'i gbina ɗaŋ lɛŋ kifi geemɔ.

¹¹GASA WAN, mɔɔ nɔ‘i nɛ̀ ɗaŋa lɛŋ‘i de ŋma mɔ tɛ‘nɛ́ na nde? Ɛnɛ beka de ŋma mɔ oi-aa na, ha̧ búù mɛ ba yɛ nde?