Read Northwest Gbaya LEVITIK 10 Bible Online

LEVITIK 10 - Northwest Gbaya bible

LEVITIK 10

¹Nɛ mɔ'ɔ nɛ Nadab in Abihu, o bem ko Arɔŋ aa wee kɔ̧ be nyɛk-dɔ-fuu-nyama, ɓɛɛ a fuu-nyama zu-a ba nɛnɛ ti GASA WAN. Wee'i bo nɛ wee ko GASA WAN na, wen n'aa ha̧ so nú ha̧ wa na.

²Nɛ mɔ'ɔ nɛ ŋma wee gɔma nɛ tɛ GASA WAN, dɔ wa a nu, ɓɛɛ wa fe ɓɔn ti a̧.

³Moisɛ tɔ̧ɔ̧ ha̧ Arɔŋ: «GASA WAN tɔ̧ɔ̧ so nɛ sa̧a̧-a̧‘e: ‹Mi kɔ̧ɔ̧ mɛ duk nɛ sa̧a̧-a̧ nɛ̀ tɛ o bíí nɛ tɛ pii tɛ‘m, in mi kɔ̧ɔ̧ ha̧ dukbíí mɛ gas'am.› » Ɓɛɛ Arɔŋ duk sɛ́ɛ́m.

⁴Moisɛ saa Misaɛl in Elisafaŋ, o bem ko Oziɛl, nɔkɔ ko Arɔŋ, ɓɛɛ tɔ̧ ha̧ wa: «Ɛ̀nɛ̀ ɗɔ́ŋ piiti, ɛ̀nɛ̀ káí wɔr nya'nɛ́ yinɛ tɛ sa̧a̧ fara si ɗoŋ ye mɛ.»

⁵Wa tɛɛ kai o wɔr nɔ‘i nɛ oi laa kɔ-wa yaknɛ si ɗoŋ ye hee mɔ'ɔ nɛ Moisɛ tɔ̧ɔ̧ ga.

⁶Moisɛ tɔ̧ɔ̧ ha̧ Arɔŋ in o bem kɔ̧-a̧ Eleazar in Itamar: «K’ɛ́nɛ́ kpui zu'nɛ́ na, k’ɛ́nɛ́ a̧k laa tɛ‘nɛ́ na mbɛt, k’ɛ́nɛ́ tɛɛ fe in k’ɛ́nɛ́ tɛɛ dak nyimsea ko GASA WAN pi̧ zu dukbíí lɛŋ. Nɛ́ o nya'nɛ́ lɛŋ, o be Israɛl a̧ tɛ hi̧i̧ fio o wi nɛ GASA WAN gbɛɛ nɛ wee.

⁷K’ɛ́nɛ́ yu nú Tua-kpa-ŋmaa na, k’ɛ́nɛ́ tɛɛ fe wen wa tɛna nɔ̧́ ko GASA WAN a zu'nɛ́ kaɗi.» Wa dee mɔ hee mɔ'ɔ nɛ Moisɛ tɔ̧ɔ̧ ga.

⁸GASA WAN tɔ̧ɔ̧ ha̧ Arɔŋ:

⁹«Mɛ in o bem kɔ-mɛ, k’ɛ́nɛ́ nɔ́ dɔ̧ɔ̧, koo ŋma mɔɔ-zik-zu-wi ŋgimbi nɛa-a si kɔ̧ tua-mɔi̧a-a na, wen k’ɛ́nɛ́ tɛɛ fe. Mɔ‘i nɛ ŋma heembea n’ɛnɛ tɛ kasi kpoo nɛ kpoo.

¹⁰Nɛ wen h’ɛ́nɛ́ mɛ iŋ kɛ̧ɛ̧ mgbara mɔ nɛ duk nɛ ko Sɔ̧ in mɔ nɛ bo nɛ ko Sɔ̧ na, ká bá nɛ̀ ndiŋmɔ in mɔ nɛ duk nɛ sa̧a̧-a̧,

¹¹wen h’ɛ́nɛ́ mɛ usi o geŋa nɛ GASA WAN tɔ̧ɔ̧ so ha̧ Moisɛ ha̧ o be Israɛl.»

¹²Moisɛ tɔ̧ɔ̧ ha̧ Arɔŋ in o oi bem kɔ‘i yiitoo Eleazar in Itamar ndé: «Ɗoŋ n’ɛnɛ dɔɔ ha̧a̧mɔ ha̧ GASA WAN kaɗi, ɛ̀nɛ̀ bá oi-aa nyɔŋ ká̧ fara-ɗafi-sɔ̧; ká hao bo sɛnɛ na, wen mɔ‘i nɛ sa̧a̧ nyɔŋmɔ.

¹³Ɛ́nɛ́ tɛ nyɔŋ mɔ‘i tɛ sa̧a̧ fara wen i̧i̧ nɛ war kɔ-mɛ in o bem kɔ-mɛ zaŋ dɔɔ ha̧a̧mɔ nɛ nyɔnɔ ha̧ GASA WAN; heembea nɛ GASA WAN ha̧a̧ ha̧‘m nɛ mɔ‘i.

¹⁴Ɓɛɛ tote in ku saɗi nɛ‘i wɛk ha̧ GASA WAN'i, ɛnɛ tɛ nyɔŋ wa tɛ sa̧a̧ fara; mɛ in o bem kɔ-mɛ mɛ wiwii-a ká bá nɛ̀ o bem kɔ-mɛ mɛ okoo-a; i̧i̧ nɛ war kɔ-mɛ in o bem kɔ-mɛ zaŋ o ɗafa-sɔ̧-gaŋmɔ ko o be Israɛl.

¹⁵Ku saɗi'i nɛ‘i ha̧ nɛ zu-mɔ in tote-a nɛ‘i wɛk ha̧ GASA WAN'i, o wi ha̧a̧-a̧ tɛ kai nɛnɛ in o nɔ̧́-a̧ nɛ‘i tɛ dɔ dɔɔ; wi tɛ wɛk ha̧ GASA WAN; hɔ-ɗoŋ-aa, ɓɛɛ o kpoo nɔ‘i duka nɛ kɔ-mɛ in o bem kɔ-mɛ kpoo nɛ kpoo, hee mɔ'ɔ nɛ GASA WAN tɔ̧ɔ̧ so ga.»

¹⁶Moisɛ aka mɔ wen vala gbadua-ɗafi-sɔ̧ wen ea-ɗaŋmɔ, ɓɛɛ wa tɔ̧ ha̧ a̧‘e, wa dɔɔ kpoo-aa kaɗi. Ɓɛɛ see Moisɛ kur zu Eleazar in Itamar, o oi bem ko Arɔŋ nɛ ɓɔna.

¹⁷Moisɛ tɔ̧ɔ̧ ha̧ wa: «Wen ge s’ɛnɛ nyɔŋ kpoo-aa tɛ ŋma sa̧a̧ fara na ge? Wen nɛ́ sa̧a̧ kpoo. GASA WAN ee h’ɛ́nɛ́ mɛ nyɔŋ kpoo'i wen ha̧ war-tɛ dukbíí mɛ sa̧ in h’ɛ́nɛ́ mɛ de do-mɔ nɛ usi ea-ɗaŋmɔ zu wa.

¹⁸Hee mɔ'ɔ nɛ wa ba tɔk-aa si kɔ̧ sa̧a̧-fara na ga, ɛnɛ tɛɛ nyɔŋ so kpoo saɗi'i tɛ sa̧a̧ fara, hee mɔ'ɔ n'am baa tɔ̧ h’ɛ́nɛ́ ga.»

¹⁹Arɔŋ tɔ̧ɔ̧ ha̧ Moisɛ: «Mɛ zii, wese nɛ wa wɛka nɛ ha̧a̧mɔ wen ea-ɗaŋmɔ in ha̧a̧mɔ nɛ‘i tɛ dɔ ha̧ GASA WAN'i, mɔ nɛ hɔɔ zu'm nɛ mɔ'ɔ. GASA WAN tɛ kpɛk ha̧‘m mɛ nyɔŋ kpoo vala gbadua wen ea-ɗaŋmɔ tɛ pɛrti wese hegɔ nde?»

²⁰Ɓɛɛ Moisɛ kpɛk mɔ n'aa zia'i.