Read Northwest Gbaya LEVITIK 11 Bible Online

LEVITIK 11 - Northwest Gbaya bible

LEVITIK 11

¹GASA WAN tɔ̧ɔ̧ ha̧ Moisɛ in Arɔŋ:

²«Mɛ̀ tɔ̧́ ha̧ o be Israɛl‘e, mgbara o saɗi lɛŋ, o wan n’ɛnɛ tɛ nyɔŋ nɛ mɔɔ nɔ'ɔ:

³ɛnɛ tɛ nyɔŋ nɛ saɗi nɛ sara naŋ-a a̧a̧ sɛnɛ, nɛ mgbuk mɔ mgbuk.

⁴Hegɔ, mgbara o saɗi nɛ mgbuk mɔ mgbuk in o wan nɛ sara-naŋ-wa a̧a̧ sɛnɛ, wan n’ɛnɛ beka nyɔŋ na nɛ mɔɔ nɔ'ɔ: ŋgeloba, wen a̧ mgbuk mɔ mgbuk ɓɛɛ sara-naŋ-a bo na; ɛ̀nɛ̀ zɔ́k a̧ hee ndiŋ saɗi ga;

⁵kpárɛ́ nɛ mgbuk mɔ mgbuk, ɓɛɛ nɛ sara-naŋ-a bo na, ɛ̀nɛ̀ zɔ́k a̧ hee ndiŋ saɗi ga;

⁶ɛ̀nɛ̀ zɔ́k dɔmɔ mbɛt hee ndiŋ saɗi ga, wen a̧ mgbuk mɔ mgbuk, ɓɛɛ sara-naŋ-a bo na.

⁷Ɛ̀nɛ̀ zɔ́k ŋgɔya hee ndiŋ saɗi ga, wen sara-naŋ-a a̧a̧ sɛnɛ, ɓɛɛ a̧ mgbuk mɔ na.

⁸K’ɛ́nɛ́ nyɔŋ o pɛrti saɗi nɔ‘i na, in k’ɛ́nɛ́ fo wɔr-wa nɛ er'nɛ́ na mbɛt; ɛ̀nɛ̀ zɔk wa lɛŋ hee o ndiŋ saɗi ga.

⁹«Mgbara o saɗi-yì lɛŋ, wan n’ɛnɛ tɛ nyɔŋ nɛ mɔ'ɔ: mɔ nɛ‘i saa'e saɗi-yì lɛŋ, o saɗi ɗɔɔ gba-tɔp in o wan mɛ ɗɔɔ nana-yì lɛŋ nɛ tɛn-aa a̧a̧ sɛnɛ in wan nɛ saɗa-a a̧a̧ sɛnɛ, ɛnɛ nyɛma mɛ nyɔŋ.

¹⁰Ɓɛɛ o saɗi ɗɔɔ tɔp in o wan mɛ ɗɔɔ nana-yì nɛ tɛn-aa bo na in o wan nɛ saɗa-a bo na, ɛnɛ beka nyɔŋ wa na.

¹¹Wa tɛ duk nɛ zim k’ɛ́nɛ́ kpoo nɛ kpoo; ɛnɛ beka nyɔŋ kpoo-wa na, ɓɛɛ ɛnɛ tɛ zɔk wɔr-wa hee ndiŋmɔ ga.

¹²O saɗi-ɗɔɔ-yì lɛŋ nɛ tɛn-aa, kóó saɗa-a bo na nɛ́ zim k’ɛ́nɛ́.

¹³«Mgbara o nɔ̧́í̧ lɛŋ, wan n’ɛnɛ beka nyɔŋ na nɛ zua, gbakaɗa, hi̧i̧-kɔ̧a̧-ga̧a̧,

¹⁴fambɛɛ, o tama nɛtɛ nɛtɛ,

¹⁵o gba-kɔra,

¹⁶o ndao, sɔrɔrɔ, nɔ̧́í̧-ba-ká̧-ŋgere, o ndio nɛtɛ nɛtɛ,

¹⁷gba-diri, kiaŋko, gɔ̧tɔŋ,

¹⁸diri-taŋ-kɔ̧a, gɔm-zaŋ, gbaradaa,

¹⁹nɔ̧́í̧-gba-dɔya, gboozawaya, nɔ̧́í̧-zambɛrɛ ká bá nɛ̀ be-sa̧i̧.

²⁰«K’ɛ́nɛ́ nyɔŋ o kokoɗo-mɔ nɛ a̧a̧ nɛ ɓaa in naŋ naar na.

²¹Ɓɛɛ o kokoɗo-mɔ nɛ a̧a̧ nɛ ɓaa nɛ̀ nɛ́ nɔ̀ nɛ̀ naŋ naar n’ɛnɛ tɛ nyɔŋ nɛ mɔ'ɔ: o wan nɛ a̧a̧ nɛ naŋ in o gata-naŋ wen ndɔra-a nɛ mbɔɗɔnu.

²²O wan n’ɛnɛ tɛ nyɔŋ nɛ mɔɔ nɔ'ɔ: gba-dɔya, diŋgo in o ŋma dɔya nɛtɛ nɛtɛ.

²³Ɓɛɛ k’ɛ́nɛ́ nyɔŋ o kokoɗo-mɔ nɛ a̧a̧ nɛ ɓaa in naŋ naar ɓɛɛ na.

²⁴«O saɗi nɔ‘i tɛ de h’ɛ́nɛ́ mɛ kifi ndiŋ bíí, ɓɛɛ wi nɛ tɛ fo wɔr wa nɛ er, tɛ duk nɛ ndiŋ bíí mɔ ga̧ nɛnɛ.

²⁵Wi nɛ tɛ ba wɔr-aa tɛ fɔr laa kɔ‘i, ɓɛɛ a̧ tɛ duk nɛ ndiŋ bíí mɔ ga̧ nɛnɛ.

²⁶Ɓɛɛ nɛ war ko o saɗi nɛ sara naŋ-wa bo na, kóó nɛ mgbuk mɔ na tɛ duk nɛ ndiŋ saɗi wen'nɛ́. Ɓɛɛ kóó o nde nɛ fo wa tɛ duk nɛ ndiŋ bíí.

²⁷Kale-a mbɛt, o saɗi lɛŋ nɛ̀ nɛ́ nɔ nɛ kɔ̧-er tɛ duk nɛ́ ndiŋmɔ wen'nɛ́. Wi nɛ fo wɔr wa tɛ duk nɛ ndiŋ bíí mɔ ga̧ nɛnɛ.

²⁸Wi nɛ tɛ tui wɔr-wa tɛ fɔr o laa kɔ‘i, ɓɛɛ a̧ duka nɛ ndiŋ bíí mɔ ga̧ nɛnɛ, wen o saɗi nɔ‘i nɛ ndiŋmɔ wen'nɛ́.

²⁹Mgbara o saɗi-gbur-zaŋ nɛ nu, wan nɛ duk nɛ ndiŋmɔ wen'nɛ́ nɛ mɔ'ɔ: ɗuɗu-nu, zɔya in o gba-gbɔɗɔ nɛtɛ nɛtɛ,

³⁰gbɔɗɔ, gbɔɗɔ-wee, mbui-gbɔɗɔ, mbáráwárá ká bá nɛ̀ zɔn.

³¹Saɗi nɛ tɛ duk nɛ ndiŋ wen'nɛ́ mgbara o saɗi lɛŋ nɛ mɔɔ nɔ‘i; kóó o nde nɛ fo wɔr wa nɛ er tɛ duk nɛ ndiŋ bíí mɔ ga̧ nɛnɛ.

³²Kà ŋma saɗi nɔ‘i fe ɓɛɛ tik zu ŋma mɔ, mɔ‘i kifa nɛ ndiŋmɔ; kóó nɛ nyɛk nɛ‘i dee nɛ te, kóó nɛ́ laa, kóó nɛ́ ndàrá, kóó nɛ́ ŋma bufu, kóó nyɛk nɛ‘i dee nɛ tom lɛŋ, wi tɛ fɔr a̧, ɓɛɛ a̧ duka nɛ ndiŋmɔ hɔ̧ ga̧a̧mɔ sɛka a̧ sa̧a̧.

³³Kà ŋma saɗi nɔ‘i fe kɔ̧ ŋma kpánà, mɔ nɛ a̧a̧ kɔ̧ kpánà‘i lɛŋ kifa nɛ ndiŋmɔ, ɓɛɛ ɛnɛ tɛ gba kpánà‘i yinɛ.

³⁴Kà‘i a yi nɛ duka kɔ̧ kpanà‘i tɛ nyɔŋmɔ, nyɔŋmɔ‘i tɛ kifi ndiŋmɔ. Kale-a mbɛt, kà ŋma mɔɔ-nɔ nɛ duka kɔ̧ kpanà‘i, kóó nɛ ge kpánà ge, mɔ‘i kifa nɛ ndiŋmɔ.

³⁵Kà wɔr ŋma saɗi nɔ‘i tik zu ŋma tui, tui'i tɛ kifi nɛ ndiŋmɔ; kóó nɛ wee kɔ̧ lɔk, kóó nɛ sar-kusi-wee, ɛnɛ tɛ gbin yinɛ wen wa kifa ndiŋmɔ, ɓɛɛ ɛnɛ tɛ zɔk wa hee ndiŋmɔ ga.

³⁶War ko kpút-kpút in gɔna-yì duk kana nɛ de yì, ɓɛɛ nɛ́ wi nɛ̀ fo wɔr saɗi nɛ tika ɗɔɔ yì‘i a̧ duk nɛ́ ndiŋ bíí.

³⁷Kà ŋma wɔr saɗi nɔ‘i tik zu ŋma kpar-nyɔnɔ, kpar-nyɔnɔ‘i tɛ ɓɔn nɛ sa̧a̧-a̧.

³⁸Ɓɛɛ kà‘i nɛ aa yì zu kpar-mɔ‘i kaɗi, ɓɛɛ nɛ mɔ'ɔ nɛ wɔr ŋma saɗi nɔ‘i tika zu a̧, kpar-mɔ‘i tɛ duk nɛ́ ndiŋmɔ.

³⁹«Kóó nɛ ŋma saɗi-nyɔŋ k’ɛ́nɛ́ a̧ fea, wi nɛ tɛ fo wɔr saɗi'i tɛ duk nɛ ndiŋ bíí hɔ ga̧a̧mɔ.

⁴⁰Kà ŋma bíí nyɔŋ kpoo wɔr saɗi'i, kóó kà a̧ tui mbɛt, a̧ tɛ fɔr laa kɔ̧-a̧, ɓɛɛ a̧ tɛ duk nɛ ndiŋ bíí hɔ ga̧a̧mɔ.

⁴¹«O saɗi nɛ̀ gbur zaŋ nɛ̀ nu lɛŋ nɛ́ zim k’ɛ́nɛ́, wi nyɔŋ wa na.

⁴²K’ɛ́nɛ́ nyɔŋ saɗi-gbur-zaŋ nɛ̀ nu na, wan nɛ̀ gbur zaŋ nɛ̀ nu in o wan nɛ̀ nɛ́ nɔ̀ nɛ̀ naŋ naar, kóó gan mbɛt, nɛ́ zim k’ɛ́nɛ́.

⁴³K’ɛ́nɛ́ nyɔŋ o saɗi nɔ‘i na, k’ɛ́nɛ́ tɛɛ duk nɛ ndiŋ bíí hee wa ga, kóó wen zu wa.

⁴⁴Mi nɛ GASA WAN Sɔ̧ k’ɛ́nɛ́, ɛ̀nɛ̀ ɗáfí war-tɛ‘nɛ́ nɛ sa̧a̧-a̧ h’ɛ́nɛ́ mɛ duk nɛ́ sa̧a̧ bíí hee mi ga. Ɓɛɛ k’ɛ́nɛ́ nyɔŋ o saɗi-gbur-zaŋ nɛ̀ nu, e nɛ tɛ‘nɛ́ tɛ ndiŋ na;

⁴⁵wen mi nɛ́ GASA WAN nɛ̀ kaia'nɛ́ gbonɛ nú Egiptɛ, ha̧‘m mɛ duk nɛ Sɔ̧ k’ɛ́nɛ́. Ɛnɛ tɛ duk kana nɛ sa̧a̧-a̧ wen mi ɔ sa̧a̧.»

⁴⁶Usamɔ zu o saɗi, o nɔ̧́í̧ in o saɗi-ɗɔɔ-yì lɛŋ ká bá nɛ̀ wan mɛ zan nɛ mɔ‘i.

⁴⁷Nɛ́ usamɔ‘i a̧ de ha'i mɛ kɛ̧ mgbara ndiŋmɔ in mɔ nɛ duk nɛ sa̧a̧-a̧, ha'i mɛ kɛ̧ mgbara saɗi nɛ‘i tɛ nyɔŋ in o wan nɛ‘i beka nyɔŋ na.