Read Northwest Gbaya LEVITIK 13 Bible Online

LEVITIK 13 - Northwest Gbaya bible

LEVITIK 13

²«K’ɛ̀nɛ̀ nɛ zɔka gbayamɔ a̧a̧ tɛ ŋma bíí, kóó lalamzi, kóó nɛ yiŋgamɔ a̧ duk tɛ ŋma bíí, ɓɛɛ kà nɛ́ kifa ŋma zɛɛ hee doko ga, ɓɛɛ n’ɛ̀nɛ̀ mgbɔ́ wi’ɛi sitɛ Arɔŋ, kóó sitɛ ŋma bem kɔ̧-a̧ kpɔk.

³Ɓɛɛ wi-ɗafi-sɔ̧ tɛ kii mɛ iŋ mɔ nɛ a̧a̧ tɛ wi’ɛi. Kà wa nɛ́ zɔka yí mɔ nɛ a̧a̧ tɛ wi’ɛi fɛŋa, ɓɛɛ nɛ mɔ'ɔ nɛ yí da̧i̧-a̧ ɗuka, mɔ‘i nɛ́ ku̧u̧naŋ doko. Ɗoŋ nɛ wi-ɗafi-sɔ̧ zɔka kaɗi, a̧ a̧ sa wi’ɛi nɛ́ ndiŋ bíí.

⁴Kà tɛ wi’ɛi nɛ yiŋga fɛŋ, ɓɛɛ kà da̧i̧-a̧ nɛ ɗuka na, in kà buma tɛ-a fara'i nɛ fɛŋa na, wi-ɗafi-sɔ̧ tɛ e wi’ɛi ŋma fara nɛtɛ zɛ mɔɔrɔ-ɗoŋ-yiitoo.

⁵Tɛ mɔɔrɔ-ɗoŋ-yiitoo zɛ, wi-ɗafi-sɔ̧ tɛ zɔk tɛ wi’ɛi woyo; ɓɛɛ kà yí mɔ‘i nɛ pɛsa siti na, wi-ɗafi-sɔ̧ tɛ e wi’ɛi ŋma fara nɛtɛ, tɛ zɛ mɔɔrɔ-ɗoŋ-yiitoo woyo.

⁶Ɗoŋ zɛ mɔɔrɔ-ɗoŋ-yiitoo, wi-ɗafi-sɔ̧ tɛ zɔk a̧ woyo. Kà mɔ nɛ̀ yiŋga tɛ wi’ɛi nɛ́ tu̧a, nɛ nyɔŋ ndara tɛ-a siti na, wi-ɗafi-sɔ̧ tɛ tɔ̧‘e a̧ duk nɛ sa̧a̧-a̧, nɛ́ lalamzi a̧ dee a̧; hegɔ wi’ɛi tɛ fɔr o laa kɔ‘i, ɓɛɛ a̧ duka nɛ sa̧a̧-a̧.

⁷Ɗoŋ nɛ wi-ɗafi-sɔ̧ zɔka a̧ mɛ tɔ̧‘e, tɛ-a duka nɛ sa̧a̧-a̧, ɓɛɛ kà lalamzi pɛsi tɛ wi’ɛi siti, wi-ɗafi-sɔ̧ tɛ zɔk wi’ɛi woyo.

⁸Wi-ɗafi-sɔ̧ tɛ zɔk a̧; ɓɛɛ hee mɔ'ɔ nɛ lalamzi pɛsa tɛ-a siti ga, wi-ɗafi-sɔ̧ tɛ tɔ̧‘e nɛ ndiŋ bíí, nɛ zɛɛ doko.

⁹«Kà ŋma zɛɛ hee doko ga ba ŋma bíí, wa tɛ mgbɔ wi’ɛi nɛnɛ sitɛ wi-ɗafi-sɔ̧.

¹⁰Wi-ɗafi-sɔ̧ tɛ zɔk a̧, ɓɛɛ kà a̧ nɛ́ zɔka'e, mɔ nɛ gbaia tɛ wi’ɛi dee ha̧ ndàrà tɛ-a mɛ fɛŋ kifi duk nɛ bu-a gu nɛ buma tɛ-a, kà‘i nɛ zɔka gbɛ̧ mur tɛ-a kaɗi,

¹¹ɓɛɛ nɛ́ zɛɛ doko a̧ yee tɛ-a; hegɔ, wi-ɗafi-sɔ̧ tɛ tɔ̧‘e a̧ nɛ ndiŋ bíí; a̧ beka e a̧ ŋma fara nɛtɛ ɓɔna, wen zɛɛ usa tɛ nɛ sa̧a̧-a̧ kaɗi.

¹²Kà doko'i nɛ́ kpee tɛ wi’ɛi lɛŋ nɛ‘i zɔk woi tɛ-a na, ku̧u̧naŋ nɛ zu-a hɔ naŋ-a hee mɔ'ɔ nɛ wi-ɗafi-sɔ̧ tɛ zɔk ga,

¹³wi-ɗafi-sɔ̧ tɛ zɔk wi’ɛi; ɓɛɛ hee mɔ'ɔ nɛ zɛɛ doko kpee tɛ-a lɛŋ ga, wi-ɗafi-sɔ̧ tɛ tɔ̧‘e, wi’ɛi duk nɛ sa̧a̧-a̧. Hee mɔ'ɔ nɛ tɛ-a lɛŋ fɛŋa kaɗi ga, a̧ duk nɛ sa̧a̧-a̧.

¹⁴Wese nɛ‘i tɛ zɔk gbɛ̧ mur-tɛ-a, ɓɛɛ a̧ nɛ ndiŋ bíí.

¹⁵Wi-ɗafi-sɔ̧ tɛ zɔk mur-tɛ-a'i, ɓɛɛ tɔ̧a̧‘e, a̧ nɛ ndiŋ bíí. Gbɛ̧ mur-tɛ-wi nɛ duk nɛ zan nɛ ndiŋmɔ, mɔ‘i nɛ zɛɛ doko.

¹⁶Kà gbɛ̧ mur-tɛ-wi nɛ fɛŋa woyo, ɓɛɛ wi’ɛi a̧ nɛ́ɛ̀ zɔk wi-ɗafi-sɔ̧.

¹⁷Wi-ɗafi-sɔ̧ tɛ zɔk tɛ-a; ɓɛɛ hee mɔ'ɔ nɛ yí-da̧i̧‘i fɛŋa ga, wi-ɗafi-sɔ̧ tɛ tɔ̧‘e, zɛɛ‘i bo nɛ zɛɛ doko ɓɔna, tɛ wi’ɛi duk nɛ sa̧a̧-a̧.

¹⁸«Nɛ́ bòò nɛ́ kore a̧ ha̧a̧ ŋma bíí, ɓɛɛ nɛ mɔ'ɔ nɛ oi da̧i̧-a̧ wia,

¹⁹ɓɛɛ kà ndɔla oi kore'i sui nɛ bu-a, kóó hɔɔ nɛ sayo nɛ gbɛ̧-a̧ yerere, wi’ɛi tɛ nɛ tɛ wi-ɗafi-sɔ̧ ha̧ a̧ mɛ zɔk tɛ wi’ɛi.

²⁰Kà wi-ɗafi-sɔ̧ zɔk tɛ wi’ɛi, ɓɛɛ kà suyamɔ‘i de mɛ ɗuk, nɛ mɔ'ɔ nɛ buma tɛ-a fɛŋa fara'i, wi-ɗafi-sɔ̧ tɛ tɔ̧‘e, a̧ nɛ ndiŋ bíí; mɔ‘i nɛ zɛɛ doko a̧ ku̧u̧naŋ nɛ kore.

²¹Ɓɛɛ kà wi-ɗafi-sɔ̧ zɔk ŋma buma tɛ-a fɛŋ na, in kà yí-da̧i̧ nɛ́ ɗuka siti na, kà nɛ́ ku̧u̧ naŋ wia-a, wi-ɗafi-sɔ̧ tɛ e wi’ɛi tɛ ŋma fara nɛtɛ tɛ zɛ mɔɔrɔ-ɗoŋ-yiitoo.

²²Kà yí-da̧i̧ nɛ́ gɔna siti, wi-ɗafi-sɔ̧ tɛ tɔ̧‘e wi’ɛi nɛ ndiŋ bíí, nɛ́ ŋma zɛɛ.

²³Kà suyamɔ‘i nɛ ɓɔna oi-aa, ɓɛɛ kà gasi siti na, nɛ́ ndɔla kore; wi-ɗafi-sɔ̧ tɛ tɔ̧‘e tɛ-wi’ɛi duk nɛ sa̧a̧-a̧.

²⁴«Kà wee a̧ dɔɔ ŋma bíí, ɓɛɛ kà oi fara nɛ̀ hɔa'i duk nɛ gbɛ̧-a̧ kóó nɛ bu-a,

²⁵wi-ɗafi-sɔ̧ tɛ zɔk tɛ wi’ɛi, ɓɛɛ kà a̧ zɔk buma te-a nɛ̀ kɛra ndɔla da̧i̧-wee'i fɛŋa, ɓɛɛ nɛ́ mɔ'ɔ nɛ̀ yí mɔ‘i ɗuk ɗuk mbɛt, mɔ‘i usi nɛ́ zɛɛ doko a̧ ku̧naŋ nɛ yí-da̧i̧-wee; wi-ɗafi-sɔ̧ tɛ tɔ̧‘e, wi’ɛi nɛ ndiŋ bíí; mɔ‘i nɛ ŋma zɛɛ hee doko ga.

²⁶Ɓɛɛ kà wi-ɗafi-sɔ̧ nɛ́ zɔka buma tɛ-wi’ɛi fɛŋ fara'i na, kóó kà da̧i̧‘i nɛ́ ɗuka siti na, nɛ́ mɔ'ɔ nɛ̀ ku̧u̧naŋ wia-a, wi-ɗafi-sɔ̧ tɛ e wi’ɛi ŋma fara nɛtɛ tɛ zɛ mɔɔrɔ-ɗoŋ-yiitoo.

²⁷Tɛ mɔɔrɔ-ɗoŋ-yiitoo zɛ, wi-ɗafi-sɔ̧ tɛ zɔk a̧, ɓɛɛ kà yí-da̧i̧‘i̧ nɛ́ gɔna siti, wi-ɗafi-sɔ̧ tɛ tɔ̧‘e, wi’ɛi nɛ ndiŋ bíí; mɔ‘i nɛ ŋma zɛɛ hee doko ga.

²⁸Kà fara wee nɛ hɔa'i nɛ ɓɔna nɛ oi-aa, kà gɔn siti na, kà nɛ́ wia, ɓɛɛ nɛ́ ndɔla-wee; wi-ɗafi-sɔ̧ tɛ tɔ̧‘e, tɛ wi’ɛi duk nɛ sa̧a̧-a̧, mɔ‘i nɛ ndɔla-wee.

²⁹«Kà mɔ de ŋma wiwii, kóó ŋma okoo tɛ zu, kóó tɛ yaŋgo,

³⁰wi-ɗafi-sɔ̧ tɛ zɔk fara nyimmɔ‘i; kà fara'i nɛ dee mɛ ɗuk, kà buma tɛ-a nɛ́ gbɛ̧a̧, kà buma fara'i duk kpɔk kpɔk, wi-ɗafi-sɔ̧ tɛ tɔ̧‘e wi’ɛi nɛ ndiŋ bíí; mɔ‘i nɛ laaloo, nɛ wen nɛ tɔ̧‘e, doko-zu, kóó doko-nyaŋgo.

³¹Kà wi-ɗafi-sɔ̧ nɛ́ zɔka laaloo'i, ɓɛɛ kà nɛ́ nyɔŋa siti na, kà buma zu-a nɛ́ duka nɛ̀ tu̧-a̧ na, wi-ɗafi-sɔ̧ tɛ e wi’ɛi nɛ laaloo dea'i ŋma fara nɛtɛ tɛ zɛ mɔɔrɔ-ɗoŋ-yiitoo.

³²Tɛ mɔɔrɔ-ɗoŋ-yiitoo zɛ, wi-ɗafi-sɔ̧ tɛ zɔk nyimmɔ‘i woyo; kà laaloo nɛ́ nyɔŋa siti na, ɓɛɛ kà buma fara'i nɛ́ gbɛ̧ɛ̧ na, in kà laaloo'i nɛ́ nyɔŋa ndàrá tɛ-a ɗuk na,

³³wi’ɛi tɛ kpui zu, ɓɛɛ a̧ beka kpui zu fara laaloo'i na; hegɔ, wi-ɗafi-sɔ̧ tɛ e wi’ɛi ŋma fara nɛtɛ woyo tɛ zɛ mɔɔrɔ-ɗoŋ-yiitoo.

³⁴Tɛ mɔɔrɔ-ɗoŋ-yiitoo zɛ, wi-ɗafi-sɔ̧ tɛ zɔk laaloo'i woyo; kà laaloo'i nɛ́ nyɔŋa siti ɗuk nɛnɛ na, wi-ɗafi-sɔ̧ tɛ tɔ̧‘e, tɛ wi’ɛi duk nɛ sa̧a̧-a̧; ɗoŋ nɛ wi’ɛi fɔra laa kɔ‘i kaɗi, tɛ-a duk nɛ sa̧a̧-a̧.

³⁵Kà wi-ɗafi-sɔ̧ tɔ̧‘e, tɛ wi’ɛi duk nɛ sa̧a̧-a̧, ɓɛɛ sɛka laaloo'i tɛ̀ɛ́ nyɔŋ a̧ siti,

³⁶wi-ɗafi-sɔ̧ tɛ zɔk a̧ woyo. Hee mɔ'ɔ nɛ laaloo nyɔŋa siti ga, wi-ɗafi-sɔ̧ beka kii mɛ zɔk gbɛ̧ buma tɛ-a ɓɔna; wi’ɛi nɛ ndiŋ bíí.

³⁷Kà laaloo nɛ́ nyɔŋa siti na, ɓɛɛ kà buma tɛ-a hɔ sɛnɛ nɛ tu̧-a̧, laaloo'i kaɗa kaɗi, ɓɛɛ tɛ wi’ɛi duk nɛ sa̧a̧-a̧; wi-ɗafi-sɔ̧ tɛ tɔ̧‘e, tɛ wi’ɛi duk nɛ sa̧a̧-a̧.

³⁸«Kà ŋma mɔ nɛ gbaia tɛ wiwii, kóó tɛ ŋma okoo nɛ bu-a,

³⁹wi-ɗafi-sɔ̧ tɛ zɔk wi’ɛi: kà o gbayamɔ nɔ‘i tɛ-wa'i nɛ́ duka nɛ̀ bu-a fata-futu, ɓɛɛ nɛ́ gee mɔ a̧ aa tɛ-wa; tɛ o wi nɔ‘i duk nɛ sa̧a̧-a̧.

⁴⁰«Kà zu ŋma bíí nɛ́ zuɗa, ɓɛɛ mɛ nɛ gee er-wara, bo nɛ ŋma zɛɛ na, tɛ wi’ɛi duk nɛ sa̧a̧-a̧.

⁴¹Kà zu ŋma bíí nɛ́ zuɗa nɛ war sɔnti, sɔnti-a duk gee, i̧i̧ bo nɛ zɛɛ na, tɛ-a duk nɛ sa̧a̧-a̧.

⁴²Ɓɛɛ kà ŋma mɔ nɛ́ gbaia nɛ gbɛ̧-a̧ bɛɗɛ zu-a, kóó sɔnti-a, nɛ́ doko a̧ gbaia zu-a kóó sɔnti-a'i.

⁴³Wi-ɗafi-sɔ̧ tɛ zɔk wi’ɛi, ɓɛɛ kà gbayamɔ sɔnti-a'i nɛ́ fɛŋa gbɛ̧ hee doko ga,

⁴⁴wi’ɛi nɛ wi-doko, a̧ nɛ ndiŋ bíí; wi-ɗafi-sɔ̧ tɛ tɔ̧‘e a̧ nɛ bíí ndiŋ bíí nɛ̀ zɛɛ baa zu-a.

⁴⁵Wi-doko tɛ pi̧ nɛ a̧ka̧ laa, ɓɛɛ a̧ hiɗa mɔ tɔ̧ nɛnɛ‘e: ‹Ndiŋ bíí, ndiŋ bíí!›

⁴⁶A̧ tɛ duk kànà nɛ ndiŋ bíí ŋgimbi nɛ zɛɛ doko'i ɓɔna tɛ-a. A̧ tɛ o kɔ̧-a̧ nɛtɛ, ɓɛɛ fara kɔ̧-a̧ tɛ duk si ɗoŋ ye mɛ.»

⁴⁷«Kà mɔka laa, koo yɛ́m-yɛ́m laa, laa-ulu, ndárà, kóó mɔ lɛŋ nɛ‘i fura nɛ ndàrá do ɓuki,

⁴⁸

⁴⁹kà ŋma mbui-mɔ kóó gbɛ̧-mɔ ba tɛ laa kóó tɛ ndàrá, koo tɛ mɔka laa, kóó tɛ laa-ulu, kóó tɛ ŋma mɔ nɛ‘i dee nɛ ndàrá, mɔ‘i nɛ́ ɓuki, ɓɛɛ wi-ɗafi-sɔ̧ tɛ zɔk o mɔɔ nɔ‘i.

⁵⁰Wi-ɗafi-sɔ̧ tɛ zɔk mɔ nɛ ɓuki doo sɛnɛ‘i, ɓɛɛ a̧ ee mɔ‘i ŋma fara nɛtɛ tɛ zɛ mɔɔrɔ-ɗoŋ-yiitoo.

⁵¹Tɛ mɔɔrɔ-ɗoŋ-yiitoo zɛ, a̧ tɛ zɔk mɔ nɛ baa tɛ mɔɔ nɔ‘i. Kà mɔ‘i nɛ́ pɛsa siti tɛ mɔka laa, kóó tɛ laa-ulu, kóó tɛ ndàrá, kóó tɛ ŋma mɔ nɛ‘i dee nɛ ndàrá, mɔ‘i nɛ ɓuki, ɓɛɛ mɔ nɛ ɓuki doo sɛnɛ‘i nɛ́ ndiŋmɔ.

⁵²Hegɔ wi tɛ dɔ mɔka laa, laa-ulu, kóó yɛ́m-yɛ́m laa, kóó mɔ lɛŋ nɛ‘i dee nɛ ndàrá nɛ ɓuki doo sɛnɛ‘i. Hee mɔ'ɔ nɛ mɔ‘i nɛ́ ɓuki nɛ do doo siti ga, wi tɛ dɔ kànà mɔ‘i nɛ ɓuki doo sɛnɛ‘i.

⁵³«Ɓɛɛ kà wi-ɗafi-sɔ̧ zɔk'e mɔ nɛ aa tɛ mɔka laa, kóó tɛ laa-ulu, kóó tɛ mɔ lɛŋ nɛ‘i dee nɛ ndàrá, pɛsi siti na,

⁵⁴a̧ tɛ tɔ̧ ha̧ wa mɛ fɔr mɔ‘i, ɓɛɛ a̧ ee ŋma fara nɛtɛ tɛ zɛ mɔɔrɔ-ɗoŋ-yiitoo woyo.

⁵⁵Ɗoŋ fɔra mɔ‘i, wi-ɗafi-sɔ̧ tɛ zɔk, kà mɔ‘i kpai na, kóó kà pɛsi siti na mbɛt, mɔ nɛ ɓuki doo sɛnɛ‘i nɛ ndiŋmɔ. Mɛ tɛ dɔ a̧ wen nɛ́ laa nɛ̀ mɔ nyɔŋa nɛ ɗoŋ-aa, kóó nɛ kɔ̧ a̧.

⁵⁶Ɗoŋ fɔra mɔ, kà wi-ɗafi-sɔ̧ zɔk'e, mɔ nɛ aa tɛ laa, kóó tɛ ndàrá, kóó tɛ mɔka laa, koo tɛ laa-ulu'i nɛ́ fɛŋa, a̧ tɛ a̧k mɔ‘i yinɛ.

⁵⁷Ɓɛɛ kà ŋma mɔ a tɛ laa'i woyo, kóó tɛ mɔka laa, kóó tɛ laa-ulu, kóó tɛ mɔ nɛ‘i dee nɛ ndàrá, mɔ‘i nɛ ɓuki a̧ do siti; mɛ tɛ dɔ mɔ‘i a nu.

⁵⁸Ɓɛɛ laa'i, mɔka laa, laa-ulu, kóó mɔ nɛ‘i dee nɛ ndàrá, kà‘i fɔr o mɔɔ nɔ‘i ha̧ ndiŋ mɔ‘i mɛ yu sɛnɛ kaɗi, wi tɛ fɔr woyo, ha̧ mɛ duk nɛ sa̧a̧-a̧.»

⁵⁹O usamɔ wen ɓuki nɛ do tɛ mɔka laa, kóó tɛ yɛ́m-yɛ́m laa, kóó tɛ laa-ulu, kóó tɛ ŋma mɔ nɛ‘i dee nɛ ndàrá, ɓɛɛ nɛ̀ de ha'i mɛ iŋ mgbara ndiŋmɔ, in mɔ nɛ duk nɛ sa̧a̧-a̧ nɛ mɔ‘i.