Read Northwest Gbaya LEVITIK 14 Bible Online

LEVITIK 14 - Northwest Gbaya bible

LEVITIK 14

²«Yuwar ɗafa war-tɛ wi-doko nɛ‘i tɛ zɔk wese ɗafa war-tɛ-a nɛ mɔ'ɔ: wa tɛ mgbɔ wi’ɛi sitɛ wi-ɗafi-sɔ̧,

³ɓɛɛ wi-ɗafi-sɔ̧ mgbɔɔ wi’ɛi si ɗoŋ ye mɛ zɔk a̧; kà zɛɛ doko nɛ́ kaɗa tɛ wi’ɛi kaɗi,

⁴wi-ɗafi-sɔ̧ tɛ́ tɔ̧ ha̧ wi’ɛi mɛ kai nɔ̧́í̧ nɛ duk kpasa, nɛ tɛ-wa duk nɛ de-a tɛnɛ yiitoo in te gbatui, gbɛ̧ laa ká bá nɛ̀ gbaa-er be-te.[3]

⁵Ɓɛɛ a̧ tɛ tɔ̧ ha̧ wa mɛ gɔn kuti nɔi'i zu kpánà nɛ de gɛɗa-yì a̧a̧ kɔ̧ a̧.

⁶A̧ tɛ ba nɔ̧́í̧ nɛ duk kpasa in te gbatui, gbɛ̧ laa ká bá nɛ̀ gbaa-er be-te, a ɗɔɔ de gɛɗa-yì kɔ̧ kpánà nɛ‘i gɔna tɔk nɔ̧́í̧ a sɛnɛ‘i.

⁷A̧ tɛ misi̧ yì‘i a tɛ wi-doko war mɔɔrɔ-ɗoŋ-yiitoo tɔ̧ nɛnɛ‘e, tɛ-a duk nɛ sa̧a̧-a̧; ɓɛɛ a̧ ee ha̧ nɔ̧́í̧ nɛ duk kpasa'i mɛ bu̧i̧ yaknɛ si zaŋbɛɛ.

⁸Wi nɛ zui tɛ-wi’ɛi tɛ fɔr o laa kɔ‘i, kpuia buma tɛ lɛŋ, nɛɛ zui yì, ɓɛɛ war-tɛ-a sa̧a̧; hɔ-ɗoŋ-aa, a̧ tɛ si ɗoŋ saaye, ɓɛɛ a̧ beka ɔ kɔ̧ tua kɔ̧-a̧ na tɛ zɛ mɔɔrɔ-ɗoŋ-yiitoo.

⁹Tɛ mɔɔrɔ-ɗoŋ-yiitoo zɛ, wi’ɛi tɛ kpui o buma tɛ a nu lɛŋ woyo: mui-zu, zera in buma zu yí-a. Mɛ ɗoŋ, a̧ tɛ fɔr o laa tɛ-a, a̧ tɛ zui yì mbɛt, ɓɛɛ war-tɛ-a sa̧a̧.

¹⁰«Tɛ mɔɔrɔ-ɗoŋ-taar zɛ, wi’ɛi tɛ kai be-sami yiitoo nɛ ŋma mɔ ɗaŋ tɛ-wa na, in be-zɔŋa sami nɛ ŋma mɔ ɗaŋ tɛ-a na mbɛt, nɛ a̧a̧ nɛ pɛ kpɔk, kilo fuu ɓu-zua-yiitoo nɛ‘i vata nɛ̀ nɔ̧́ ká bá nɛ̀ reeta litrɛ nɔ̧́.

¹¹Wi-ɗafi-sɔ̧ nɛ tɛ ɗafi war-tɛ wi-doko'i tɛ e a̧ in o mɔ kɔ̧-a̧ lɛŋ nú Tua-kpa-ŋmaa, ti GASA WAN.

¹²Wi-ɗafi-sɔ̧ tɛ ba kuti be-sami ha̧ nɛ mɔ ɗafa-mgbara-ŋmaa in Sɔ̧ in reeta litrɛ nɔ̧́. A̧ tɛ wɛk wa ti GASA WAN.

¹³A̧ tɛ gɔn be-sami‘i sɛn fara nɛ‘i gɔn saɗi-ɗafi-sɔ̧ wen ea ɗaŋmɔ sɛnɛ, in fara dɔ kpoo-sɔ̧ sɛn kɔ̧ sa̧a̧ fara. Kpoo ɗafi mgbara ŋmaa in Sɔ̧ nɛ ko wi-ɗafi-sɔ̧ hee kpoo-ɗafi-sɔ̧ wen kpaa ea-ɗaŋmɔ ga mbɛt; nɛ́ mɔ nɛ ɔ sa̧a̧ nyɛmna.

¹⁴Wi-ɗafi-sɔ̧ tɛ ba tɔk saɗi ɗafa-mgbara-ŋmaa in Sɔ̧ e ndɔŋ nú-zer wi nɛ tɛɛ mɛ ɗafi war-tɛ‘i mɛ wiiko, ɓɛɛ a̧ ee ŋma gbokoto er-a in gbokoto naŋ-a mɛ wiiko mbɛt.

¹⁵Wi-ɗafi-sɔ̧ tɛ ba reeta litrɛ nɔ̧́ tɛn tikiɗi a kɔ̧ er mɛ gale.

¹⁶A̧ tɛ pi̧ hɔ-ɗoŋ gbokoto er-a mɛ wiiko ɗɔɔ nɔ̧́ nɛ duk kɔ̧ er-a mɛ gale'i, ɓɛɛ a̧ misa̧ ti GASA WAN war mɔɔrɔ-ɗoŋ-yiitoo.

¹⁷Wi-ɗafi-sɔ̧ tɛ sɔ̧ oi nɔ̧́ nɛ ɓɔna er-a'i ndɔŋ zer wi nɛ tɛɛ mɛ ɗafi war-tɛ‘i nɛ wiiko in gbokoto er-a ká bá nɛ̀ gbokoto naŋ-a mɛ wiiko mbɛt, fara n'aa ee tɔk saɗi ɗafa-mgbara-ŋmaa in Sɔ̧ sɛnɛ‘i.

¹⁸Wi-ɗafi-sɔ̧ tɛ sɔ̧ oi nɔ̧́ nɛ ɓɔna kɔ̧ er'i zu wi nɛ ɗafi war-tɛ‘i, ɓɛɛ a̧ dee do-mɔ nɛ usi ea-ɗaŋmɔ zu wi’ɛi sɛn ti GASA WAN.

¹⁹«Wi-ɗafi-sɔ̧ tɛ gɔn kpoo ha̧a̧mɔ wen kpaa ea-ɗaŋmɔ, a̧ tɛ de do-mɔ nɛ usi ea-ɗaŋmɔ zu wi nɛ ɗafi war-tɛ‘i mɛ usi'e, tɛ-a sa̧a̧ kaɗi; hɔ-ɗoŋ-aa, ɓɛɛ a̧ gɔna saɗi wen dɔa-a.

²⁰Wi-ɗafi-sɔ̧ tɛ kai kpoo-sɔ̧ in ha̧a̧mɔ nɛ nyɔnɔ si fara-ɗafi-sɔ̧, ɓɛɛ a̧ dee do-mɔ nɛ usi ea-ɗaŋmɔ zu wi’ɛi; hegɔ, war-tɛ-wi'ɛi ɗafa kaɗi.

²¹«Kà wi’ɛi nɛ́ bòò nɛ́ wisan nɛ nyɛm mɛ kpa mɔɔ nɔ‘i lɛŋ na, a̧ tɛ ba nɛ be-sami tɛnɛ kpɔk wen ɗafa-mgbara-ŋmaa in Sɔ̧, ɓɛɛ a̧ wɛka ha'i mɛ de do-mɔ nɛ usi ea-ɗaŋmɔ zu a̧; a̧ tɛ ha̧ kilo fuu naar nɛ‘i vata nɛ nɔ̧́ in be reeta litrɛ nɔ̧́,

²²ká bá nɛ̀ gbakui yiitoo, kóó pola yiitoo, mɔ n'aa nyɛma mɛ kpa lɛŋ. Ŋma kpɔk tɛ duk wen ɗafa-sɔ̧ wen kpaa ea-ɗaŋmɔ, ɓɛɛ ɓii-aa duka wen dɔa-a.

²³Tɛ mɔɔrɔ-ɗoŋ-taar zɛ, a̧ tɛ kai wa nɛnɛ ha̧ wi-ɗafi-sɔ̧ sɛn nu Tua-kpa-ŋmaa ti GASA WAN, wen ɗafa war-tɛ-a.

²⁴Wi-ɗafi-sɔ̧ tɛ ba be-sami wen ɗafa-mgbara-ŋmaa in Sɔ̧ in be reeta litrɛ nɔ̧́, ɓɛɛ a̧ wɛka ti GASA WAN.

²⁵A̧ tɛ gɔn be-sami‘i, ɓɛɛ a̧ baa tɔk-aa e ndɔŋ nú-zer wi nɛ tɛɛ mɛ ɗafi war-tɛ‘i mɛ wiiko in zu gbokoto-er-a ká bá nɛ̀ gbokoto-naŋ-a mɛ wiiko mbɛt.

²⁶Wi-ɗafi-sɔ̧ tɛ tɛn be nɔ̧́ a kɔ̧ er mɛ gale;

²⁷ɓɛɛ a̧ pi̧i̧ hɔ-ɗoŋ gbokoto-er-a mɛ wiiko ɗɔɔ nɔ̧́‘i misi̧ nɛnɛ ti GASA WAN war mɔɔrɔ-ɗoŋ-yiitoo.

²⁸Wi-ɗafi-sɔ̧ tɛ e ŋma nɔ̧́ nɛ duk kɔ̧ er'i ndɔŋ nú-zer wi nɛ tɛɛ mɛ ɗafi war-tɛ‘i in zu gbokoto-er-a ká bá nɛ̀ gbokoto naŋ-a mɛ wiiko, fara n'aa sɔ̧ɔ̧ so tɔk saɗi ɗafa-mgbara-ŋmaa in Sɔ̧ sɛnɛ‘i.

²⁹Ɓɛɛ a̧ sɔ̧ɔ̧ oi nɔ̧́ nɛ ɓɔna kɔ̧ er-a zu wi nɛ tɛɛ mɛ ɗafi war-tɛ‘i de nɛ do-mɔ nɛ usi ea-ɗaŋmɔ zu a̧ ti GASA WAN.

³⁰Kóó wi’ɛi baa so nɛ gbaku̧i̧ tɛnɛ, kóó pola, de ŋma mɔ na;

³¹a̧ tɛ ba ŋma nɔ̧́í̧ kpɔk n'aa kpaa'i ɗafi nɛ sɔ̧ wen kpaa ea-ɗaŋmɔ, a̧ dɔɔ ɓii-aa nɛ̀ kpoo-sɔ̧, ɓɛɛ wi-ɗafi-sɔ̧ dee do-mɔ nɛ usi ea-ɗaŋmɔ zu wi nɛ tɛɛ mɛ ɗafi war-tɛ‘i ti GASA WAN.»

³²Usamɔ zu wi-doko nɛ nyɛm mɛ kpa mɔ mɛ ha̧ wen ha̧ war-tɛ-a mɛ sa̧ na nɛ mɔ‘i.

³³GASA WAN tɔ̧ɔ̧ ha̧ Moisɛ in Arɔŋ:

³⁴«Ŋgimbi n’ɛnɛ tɛ ye nɛ̀ nú Kanaŋ n'am ha̧a̧ h’ɛ́nɛ́, ɓɛɛ kà‘m de ha̧ ŋma tua k’ɛ́nɛ́ mɛ do ɓuki,

³⁵wan-tua tɛ nɛɛ tɔ̧ ha̧ wi-ɗafi-sɔ̧‘e: ‹Duk hee tua kɔ‘m doo ɓuki ga.›

³⁶Wi-ɗafi-sɔ̧ tɛ tɔ̧ ha̧ wa mɛ kai mɔɔ kɔ̧ tua gbonɛ sɛka a̧ nɛɛ mɛ ye tua mɛ zɔk mɔ nɛ aa sɛnɛ‘i; hegɔ, mɔ lɛŋ nɛ a̧a̧ so kɔ̧ tua'i ya kɔ‘i nɛ sa̧a̧-a̧. Wa tɛ kai mɔɔ nɔ‘i gbonɛ kaɗi sɛka wi-ɗafi-sɔ̧ yee tua mɛ zɔk.

³⁷A̧ tɛ zɔk mɔ nɛ aa tɛ tua'i; kà mɔ‘i nɛ́ dee be kɔ̧ nɛ mbui-a kóó nɛ gbɛ̧-a̧ tɛ ŋgeŋ,

³⁸wi-ɗafi-sɔ̧ tɛ gbo kɔ̧ tua'i, ɓɛɛ a̧ kpee nu tua ha̧ mɛ duk hegɔ gee tɛ zɛ mɔɔrɔ-ɗoŋ-yiitoo.

³⁹Tɛ mɔɔrɔ-ɗoŋ-yiitoo zɛ, wi-ɗafi-sɔ̧ tɛ si ɗoŋ zɔk mɔ‘i woyo; kà mɔ‘i nɛ́ ɗuka siti zaŋ ŋgeŋ tua,

⁴⁰ɓɛɛ wi-ɗafi-sɔ̧ tɛ tɔ̧ ha̧ wa mɛ kai o ta nɛ̀ mɔ aa sɛnɛ‘i a zuku-paa ɗoŋ ye mɛ.

⁴¹A̧ tɛ tɔ̧ ha̧ wa mɛ gbɛr yiŋgamɔ zaŋ ŋgeŋ kɔ̧ tua'i lɛŋ yinɛ a zuku-paa ɗoŋ ye mɛ mbɛt.

⁴²Wi tɛ kai o mbe ta kpai nɛ o kuti-a'i, ɓɛɛ wi kaia mbe nu dikiri nɛ tua.

⁴³«Kà yiŋgamɔ‘i nɛ́ ndaɗa o ŋma ta ɗoŋ nɛ‘i hu̧i̧a̧ kuti ta yinɛ gbɛr nɛ zaŋ ŋgeŋ yɔk nɛ ɗoŋ-aa mbɛt kaɗi,

⁴⁴ɓɛɛ wi-ɗafi-sɔ̧ nɛɛ zɔk tua'i woyo. Kà yiŋgamɔ pɛsi siti tɛ tua'i, tua'i do nɛ ɓuki, ɓɛɛ tua'i nɛ́ ndiŋ tua.

⁴⁵Hegɔ‘i wi tɛ gbin tua'i in o ta, o te ká bá nɛ̀ ŋgeŋ lɛŋ, ɓɛɛ wi kaia a zuku-paa si ɗoŋ ye mɛ.

⁴⁶Wi nɛ tɛ ye kɔ̧ tua'i tɛ zɛ mɔɔrɔ-ɗoŋ-yiitoo nɛ‘i kpee nɛnɛ‘i tɛ duk nɛ ndiŋ bíí hɔ ga̧a̧mɔ.

⁴⁷Wi nɛ tɛ ɔ nu, kóó nɛ tɛ nyɔŋ mɔ kɔ̧ tua'i tɛ fɔr laa kɔ‘i.

⁴⁸«Ɓɛɛ kà wi-ɗafi-sɔ̧ nɛ́ nɛ̀ɛ́ ye tua, zɔk mɔ, nɛ mɔ'ɔ n'aa zɔka'e yiŋgamɔ zaŋ ŋgeŋ‘i pɛsi siti ɗoŋ dikira tua'i na, a̧ tɛ tɔ̧‘e, tua ɔ sa̧a̧ wen doo-ɓuki-mɔ‘i kaɗa kaɗi.

⁴⁹Hegɔ a̧ tɛ kai nɔ̧́í̧ yiitoo, te gbatui, gbɛ̧ laa ká bá nɛ̀ gbaa-er be-te nɛnɛ wen fɔra ndiŋmɔ kɔ̧ tua yinɛ ha̧ war-a mɛ sa̧.

⁵⁰A̧ tɛ gɔn kuti nɔ̧́í̧ zu kpánà nɛ de gɛɗa-yì a̧a̧ kɔ̧ a̧,

⁵¹ɓɛɛ a̧ baa te gbatui, gbaa-er be-te, gbɛ̧ laa ká bá nɛ̀ nɔ́í̧ nɛ duk kpasa a ɗɔɔ yì nɛ tɔk kuti nɔ̧́í̧ a̧a̧ sɛnɛ‘i; ɓɛɛ a̧ misa̧ yì‘i war mɔɔrɔ-ɗoŋ-yiitoo a tɛ tua.

⁵²Nɛ́ hegɔ a̧ a̧ tɛ fɔr nɛ ɗaŋmɔ yinɛ tɛ tua nɛ tɔk nɔ́í̧, nɛ de gɛɗa-yì, nɔ̧́í̧ nɛ duk kpasa, te gbatui in gbaa-er be-te ká bá nɛ̀ gbɛ̧ laa.

⁵³A̧ tɛ e nɔ̧́í̧ nɛ duk kpasa mɛ bu̧i̧ yaknɛ si zaŋbɛɛ, ɓɛɛ a̧ dee do-mɔ nɛ usi ea-ɗaŋmɔ zu tua'i; hegɔ‘i, war-tua'i sa̧a̧.»

⁵⁴Usamɔ zu pɛrti zɛɛ doko lɛŋ, laaloo,

⁵⁵doo ɓuki laa kóó doo ɓuti tua,

⁵⁶suyamɔ, lalamzi in yiŋgamɔ nɛ mɔ‘i.

⁵⁷O usamɔ nɔ‘i kɛ̧ nɛ mgbara ndiŋmɔ in mɔ nɛ duk nɛ sa̧a̧-a̧. Usamɔ zu zɛɛ doko nɛ mɔ‘i.