Read Northwest Gbaya LEVITIK 15 Bible Online

LEVITIK 15 - Northwest Gbaya bible

LEVITIK 15

¹GASA WAN tɔ̧ɔ̧ ha̧ Moisɛ in Arɔŋ:

²«Ɛ̀nɛ̀ tɔ̧́ ha̧ o be Israɛl‘e nde, kà ŋma bíí nɛ́ baa zɛɛ horso, foka-mɔ nɛ gbo nɛ ti-a'i tɛ de ha̧ a̧ mɛ duk nɛ ndiŋ bíí.

³Mɔ nɛ tɛ de ha̧ a̧ mɛ duk nɛ ndiŋ bíí tɛ foka-mɔ‘i nɛ mɔ'ɔ: kóó mɔ foka nɛ ti-a, kóó sɔma nɛ war ti-a mbɛt.

⁴Gado n'aa ɔɔ sɛnɛ in mɔ n'aa duka nɛnɛ lɛŋ nɛ ndiŋmɔ,

⁵ɓɛɛ wi nɛ tɛ fo gado'i tɛ fɔr laa kɔ‘i, a̧ tɛ zui yì, ɓɛɛ a̧ duka nɛ ndiŋ bíí hɔ ga̧a̧mɔ.

⁶Wi nɛ tɛ duk zu mɔ nɛ wi-zɛɛ‘i duka nɛnɛ tɛ fɔr laa kɔ‘i, a̧ tɛ zui yì, ɓɛɛ a̧ duka nɛ ndiŋ bíí hɔ ga̧a̧mɔ.

⁷Wi nɛ tɛ fo tɛ wi-zɛɛ‘i tɛ fɔr laa kɔ‘i, a̧ tɛ zui yì, ɓɛɛ a̧ duka nɛ ndiŋ bíí hɔ ga̧a̧mɔ.

⁸Kà wi-zɛɛ‘i a̧ sap tɛ ŋma bíí nɛ war-tɛ-a duk nɛ sa̧a̧-a̧, wi’ɛi tɛ fɔr laa kɔ‘i, a̧ tɛ zui yi, ɓɛɛ a̧ duka nɛ ndiŋ bíí hɔ ga̧a̧mɔ.

⁹Kirki lɛŋ nɛ wi’ɛi tɛ duk zu a̧ tɛ duk nɛ́ ndiŋmɔ.

¹⁰Kóó o nde nɛ tɛ fo ŋma mɔ nɛ wi-zɛɛ‘i duka zu-a tɛ duk nɛ ndiŋ bíí hɔ ga̧a̧mɔ, ɓɛɛ wi nɛ tɛ ba mɔ‘i tɛ fɔr laa kɔ‘i mbɛt, a̧ tɛ zui yì, ɓɛɛ a̧ duka nɛ ndiŋ bíí hɔ ga̧a̧mɔ.

¹¹Kà wi-zɛɛ‘i tai er na fo nɛ ŋma bíí, wi’ɛi tɛ fɔr laa kɔ‘i, a̧ tɛ zui yi, ɓɛɛ a̧ duka nɛ ndiŋ bíí hɔ ga̧a̧mɔ.

¹²Kà wi-zɛɛ‘i fo ŋma kpánà, wi tɛ gba kpánà‘i a nu, ɓɛɛ kà nɛ́ bòò nɛ́ kpongo, wi tɛ fɔr kɔ̧ a̧ nɛ yì.

¹³«Kà zɛɛ-horso a kaɗa tɛ wi’ɛi, a̧ tɛ tɔr zɛ mɔɔrɔ-ɗoŋ-yiitoo sɛka war-tɛ-a sa̧a̧: a̧ tɛ fɔr o laa kɔ̧-a̧, a̧ tɛ zui yi ɗɔɔ de gɛɗa-yì, ɓɛɛ tɛ-a sa̧a̧.

¹⁴Tɛ mɔɔrɔ-ɗoŋ-taar zɛ, wi’ɛi tɛ kai gbaku̧i̧ yiitoo, kóó pola yiitoo nɛnɛ ha̧ wi-ɗafi-sɔ̧ sɛn nú Tua-kpa-ŋmaa ti GASA WAN.

¹⁵Wi-ɗafi-sɔ̧ tɛ ba ŋma pola kpɔk ɗafi nɛ sɔ̧ wen kpaa ea-ɗaŋmɔ, a̧ dɔɔ ɓii-aa, ɓɛɛ a̧ dee do-mɔ zu wi’ɛi mɛ usi kaɗa zɛɛ kɔ̧-a̧ ti GASA WAN.

¹⁶«Kà ti ŋma bíí nɛ foka, a̧ tɛ zui yi, ɓɛɛ a̧ duka nɛ ndiŋ bíí hɔ ga̧a̧mɔ.

¹⁷Wi tɛ fɔr o laa in mɔ nɛ‘i dee nɛ ndàrá lɛŋ nɛ yi mɔ‘i aa sɛnɛ, ɓɛɛ wa tɛ duk nɛ ndiŋmɔ hɔ ga̧a̧mɔ.

¹⁸Kà ŋma okoo nɛ́ ɔɔ in ŋma wiwii, kóó o nde tɛ nɛɛ zui yi, ɓɛɛ wa yiitoo lɛŋ tɛ ya nɛ ndiŋ bíí hɔ ga̧a̧mɔ.

¹⁹«Kà ŋma okoo nɛ́ zɔka zɛ, a̧ tɛ duk nɛ ndiŋ okoo tɛ zɛ mɔɔrɔ-ɗoŋ-yiitoo, ɓɛɛ wi nɛ tɛ fo a̧ lɛŋ, tɛ duk nɛ ndiŋ bíí hɔ ga̧a̧mɔ.

²⁰Mɔ n'aa ɔɔ nɛnɛ in mɔ n'aa duka nɛnɛ lɛŋ ŋgimbi'i tɛ duk nɛ́ ndiŋmɔ.

²¹Kóó o nde nɛ tɛ fo gado kɔ̧-a̧ tɛ fɔr laa kɔ‘i, a̧ tɛ zui yi, ɓɛɛ a̧ tɛ duk nɛ ndiŋ bíí hɔ ga̧a̧mɔ.

²²Kóó o nde nɛ fo ŋma mɔ n'aa duka nɛnɛ tɛ fɔr laa kɔ‘i, zuia yì, ɓɛɛ a̧ duka nɛ ndiŋ bíí hɔ̧ ga̧a̧mɔ.

²³Kà ŋma mɔ duk gɔn gado kɔ̧-a̧, kóó zu ŋma mɔ n'aa duka sɛnɛ, ɓɛɛ kà‘i fo mɔ‘i, wi tɛ duk nɛ ndiŋ bíí hɔ ga̧a̧mɔ.

²⁴Kà wiwii ɔ in kóò‘i nɛ oi zɔka-zɛ, ndiŋ ko kóò‘i tɛ ye tɛ-a, a̧ tɛ duk nɛ ndiŋ bíí tɛ zɛ mɔɔrɔ-ɗoŋ-yiitoo, ɓɛɛ gado lɛŋ nɛ wi’ɛi tɛ ɔ sɛnɛ tɛ duk nɛ ndiŋmɔ.

²⁵«Kà tɔk gbo ŋma okoo nɛ̀ bó nɛ́ ŋgimbi zɔka-zɛ kɔ̧-a̧ na, kóó kà a̧ zɔk zɛ ɗoŋ-aa nyɛi̧ gan wan n'aa zɔk nɛti, a̧ tɛ duk kànà ndiŋ bíí, hɔ ŋgimbi nɛ tɔk'i tɛ gɔn; a̧ tɛ duk nɛ ndiŋ bíí ŋgimbi'i hee ŋgimbi n'aa zɔk nɛ̀ zɛ ga.

²⁶Gado n'aa ɔ sɛnɛ in mɔ n'aa duk sɛnɛ lɛŋ nɛ́ ndiŋmɔ hee ŋgimbi n'aa zɔk nɛ zɛ ga.

²⁷Kóó o nde nɛ tɛ fo o mɔɔ nɔ‘i nɛ er tɛ fɔr laa kɔ‘i, a̧ tɛ zui yì, ɓɛɛ a̧ duka nɛ ndiŋ bíí hɔ ga̧a̧mɔ.

²⁸Kà nyim-tɛ ko kóò‘i nɛ́ gɔna, a̧ tɛ duk zɛ mɔɔrɔ-ɗoŋ-yiitoo, ɓɛɛ war-tɛ-a sa̧a̧.

²⁹Tɛ mɔɔrɔ-ɗoŋ-taar zɛ, kóò‘i tɛ kai gbaku̧i yiitoo, kóó pola yiitoo nɛnɛ ha̧ wi-ɗafi-sɔ̧ sɛn nú Tua-kpa-ŋmaa.

³⁰«Wi-ɗafi-sɔ̧ tɛ ba ŋma nɔ̧́í̧ kpɔk ɗafi nɛ sɔ̧ wen kpaa ea-ɗaŋmɔ, ɓɛɛ a̧ dɔɔ ɓii-aa dɔɔ nɛ kpoo-sɔ̧; wi-ɗafi-sɔ̧ tɛ de do-mɔ zu kóò‘i ti GASA WAN mɛ usi'e, nyim-tɛ nɛ dee so ha̧ a̧ mɛ duk nɛ ndiŋ bíí gɔna kaɗi.

³¹«Ɛ̀nɛ̀ tɔ̧́ ha̧ o be Israɛl‘e, ŋgimbi nɛ wa duk nɛ̀ ndiŋ, ká wa hɛɗi ká̧ sa̧a̧-fara na. Hegɔ‘i, wa beka fe na wen nɛ wa beka e ndiŋ tɛ tua-laa n'am duk sɛnɛ mgbara wa na.»

³²Usamɔ zu wi nɛ baa horso, wi nɛ ti fok, ɓɛɛ ee a̧ tɛ ndiŋ,

³³okoo nɛ zɔk zɛ, wiwii, kóó okoo nɛ nyimi to a̧, kóó wiwii nɛ ɔ in okoo nɛ oi zɔka-zɛ nɛ mɔ‘i.