Read Northwest Gbaya LEVITIK 16 Bible Online

LEVITIK 16 - Northwest Gbaya bible

LEVITIK 16

¹GASA WAN tɔ̧ɔ̧ wen ha̧ Moisɛ ɗoŋ fio ko o bem ko Arɔŋ yiitoo nɛ fee so tɛ ɗaŋ yuwar-ɗafa GASA WAN.

²A̧ tɔ̧ɔ̧ ha̧ Moisɛ: «Mɛ̀ tɔ̧́ ha̧ nya-mɛ Arɔŋ‘e, ká a̧ ye kɔ̧ sa̧a̧-fara si ɗoŋ babir nɛ zɔk ŋmaa in mɔɔ-gu-zu kuɓa-nɔɔ-tɔk ŋgimbi lɛŋ na; hegɔ a̧ beka fe ŋgimbi n'am tɛ usi nɛ tɛ‘m mgbara bu-zan zu mɔɔ-kpe-nú kuɓa'i na.

³Mɔ nɛ Arɔŋ tɛ kai ye nɛnɛ kɔ̧ sa̧a̧-fara nɛ mɔ'ɔ: daŋa wiwii ndai-ɗafi-sɔ̧ wen kpaa ea-ɗaŋmɔ in vala sami wen dɔa-a.

⁴«A̧ tɛ pi̧ be laa mɛ ŋgɔn in laa mɛ ɗɔɔ, a̧ tɛ hɛr zaŋ-aa nɛ kanda, ɓɛɛ a̧ hɛra mɛtɛwol zu-a; mɔɔ nɔ‘i lɛŋ nɛ o laa-ɗafi-sɔ̧ nɛ‘i dee nɛ yɛ́m-yɛ́m zɔ̧ laa. A̧ tɛ zui yì kaɗi sɛka a̧ aa wa.

⁵«Ɓɛɛ o be Israɛl tɛ ha̧ kɔ‘i nɛ vala gbadua yiitoo wen ɗafa-sɔ̧ kpaa ea-ɗaŋmɔ in vala sami kpɔk wen dɔa-a.

⁶Arɔŋ tɛ ha̧ daŋa wiwii ndai nɛ mɔɔ-ɗafi-sɔ̧ wen kpaa ea-ɗaŋmɔ, ɓɛɛ a̧ dee do-mɔ nɛ usi ea-ɗaŋmɔ zu a̧ nɛ tɛ-a in o bíí nutua kɔ̧-a̧.

⁷A̧ tɛ kai o vala gbadua yiitoo'i e nú Tua-kpa-ŋmaa ti GASA WAN.

⁸Arɔŋ tɛ pi̧ tani zu o vala gbadua nɔ‘i yiitoo'i: kpɔk tɛ duk nɛ ko GASA WAN, ɓɛɛ ɓii-aa duka nɛ ko Azazɛl.[4]

⁹Arɔŋ tɛ ba vala gbadua nɛ tani baa ha̧ mɛ duk nɛ ko GASA WAN'i ɗafi nɛ sɔ̧ wen kpaa ea-ɗaŋmɔ.

¹⁰A̧ tɛ e ɓii vala gbadua nɛ tani baa mɛ duk nɛ ko Azazɛl'i nɛ kpasa ti GASA WAN; a̧ tɛ de do-mɔ nɛ usi ea-ɗaŋmɔ zu a̧, ɓɛɛ a̧ foo a̧ yaknɛ si ŋga-gbárà mɛ ha̧ Azazɛl.

¹¹«Arɔŋ tɛ ha̧ daŋa wiwii ndai wen ɗafa-sɔ̧ kpaa ea-ɗaŋmɔ kɔ‘i; a̧ tɛ de do-mɔ nɛ usi ea-ɗaŋmɔ zu a̧ nɛ tɛ-a in o bíí nutua kɔ̧-a̧, ɓɛɛ a̧ gɔna ndai'i ɗafi nɛ sɔ̧ wen kpaa ea-ɗaŋmɔ kɔ̧-a̧ nɛ tɛ-a.

¹²A̧ tɛ aŋ wee nɛ duk fara-ɗafi-sɔ̧ ti GASA WAN'i, a kɔ̧ mɔɔ-a-kɛ̧i̧-wee in fuu-nyama dun er-a war yiitoo wen dɔa-a, ɓɛɛ a̧ kaia mɔɔ nɔ‘i lɛŋ si ɗoŋ babir-laa.

¹³A̧ tɛ dɔ fuu nyama ti GASA WAN, ɓɛɛ zi-wee-aa kpee zu gu-zu-nu kuɓa-nɔɔ-tɔk‘i, hegɔ a̧ beka fe na.

¹⁴«A̧ tɛ pi̧ ndɔŋ nu zɔ̧ɔ̧ er-a ɗɔɔ tɔk daŋa wiwii ndai'i, ɓɛɛ a̧ misa̧ a gu-zu-nu kuɓa-nɔɔ-tɔk nɛ war daŋa-wese, ɓɛɛ a̧ tɛɛ misi̧ woyo war mɔɔrɔ-ɗoŋ-yiitoo a ti kuɓa-nɔɔ-tɔk.

¹⁵«Mɛ ɗoŋ a̧ tɛ gɔn vala gbadua ɗafi nɛ sɔ̧ wen kpaa ea-ɗaŋmɔ ko dukbíí, a̧ tɛ ba tɔk-aa nɛnɛ si ɗoŋ babir-laa, ɓɛɛ a̧ misa̧ a zu gu-zu-nu kuɓa in nɛ ti a̧ mbɛt, hee mɔ'ɔ n'aa dee so nɛ tɔk daŋa wiwii ndai ga.

¹⁶A̧ tɛ de do-mɔ ɗafi nɛ war-tɛ o be Israɛl sɛn zu sa̧a̧-fara wen zu ŋgazu in ɗaŋmɔ kɔ-wa. Mɛ nɛ mɔ nɛ tɔ̧‘e, wen ɗaŋmɔ kɔ-wa lɛŋ; a̧ tɛ de kalemɔ‘i wen Tua-kpa-ŋmaa nɛ duk mgbara wa poo ndiŋmɔ kɔ-wa.

¹⁷Ŋgimbi nɛ Arɔŋ tɛ ye nɛ kɔ̧ sa̧a̧-fara mɛ de do-mɔ nɛ usi ea-ɗaŋmɔ, ŋma bíí beka duk kɔ̧ Tua-kpa-ŋmaa na hɔ ŋgimbi n'aa tɛ gbo nɛnɛ. A̧ tɛ de do-mɔ nɛ usi ea-ɗaŋmɔ zu a̧ nɛ tɛ-a, zu o bíí nutua kɔ̧-a̧ in o be Israɛl.

¹⁸A̧ tɛ gbo si fara-ɗafi-sɔ̧ nɛ duk ti GASA WAN'i, ɓɛɛ a̧ dee do-mɔ nɛ usi ea-ɗaŋmɔ zu fara'i; a̧ tɛ ba tɔk daŋa wiwii ndai in tɔk vala gbadua sɔ̧ tɛ o zak nɛ ya fara-ɗafi-sɔ̧‘i.

¹⁹A̧ tɛ misi̧ tɔk nɛ ndɔŋ nu-zɔ̧ɔ̧-er-a war mɔɔrɔ-ɗoŋ-yiitoo a fara-ɗafi-sɔ̧, deemɔ‘i tɛ duk nɛ ɗafa war fara-ɗafi-sɔ̧ nɛ o be Israɛl ɗaŋa'i, ɓɛɛ kifa duk nɛ sa̧a̧-a̧.»

²⁰«Ɗoŋ n'aa kaɗa dea do-mɔ nɛ usi ea-ɗaŋmɔ zu sa̧a̧-fara, zu Tua-kpa-ŋmaa in zu fara-ɗafi-sɔ̧ kaɗi, a̧ tɛ ha̧ vala gbadua nɛ duk kpasa'i.

²¹Arɔŋ tɛ gu er yiitoo zu vala gbadua'i gbar nɛ̀ ɗaŋmɔ ko o be Israɛl in o ŋgazu kɔ-wa, mɛ nɛ wen nɛ tɔ̧, o yɔɔ-kaya kɔ-wa lɛŋ; a̧ tɛ e o ɗaŋmɔ nɔ‘i zu gbadua'i, ɓɛɛ a̧ foo a̧ nɛ ŋma mgbák bíí si ŋga-gbárà mɛ.

²²Vala gbadua'i tɛ kai ɗaŋmɔ kɔ-wa lɛŋ yak nɛnɛ si ŋga-gbárà. «Kà Arɔŋ nɛ́ foo vala gbadua'i si ŋga-gbárà kaɗi,

²³a̧ tɛ nɛ si kɔ̧ Tua-kpa-ŋmaa, ɓɛɛ a̧ kpɔ̧i̧a̧ yɛ́m-yɛ́m laa n'aa pi̧i̧ ye nɛnɛ kɔ̧ sa̧a̧-fara e hi̧i̧.

²⁴A̧ tɛ zui yì tɛ ŋma sa̧a̧ fara, ɓɛɛ a̧ pi̧i̧ o laa kɔ̧-a̧ gbo nɛnɛ wen dɔɔ kpoo-sɔ̧ kɔ̧-a̧ in ko dukbíí; a̧ tɛ de do-mɔ nɛ usi ea-ɗaŋmɔ zu a̧ nɛ tɛ-a, in zu dukbíí.

²⁵A̧ tɛ dɔ de nɔ kpoo saɗi zu fara-dɔ-kpoo-sɔ̧ wen kpaa ea-ɗaŋmɔ.

²⁶Wi nɛ gbura vala gbadua ha̧ Azazɛl tɛ fɔr o laa kɔ‘i, zuia yì, sɛka a̧ yee saaye.

²⁷Ɓɛɛ nɛ̀ war ko daŋa wiwii ndai in vala gbadua nɛ‘i ɗafa nɛ sɔ̧ wen kpaa ea-ɗaŋmɔ, ɓɛɛ kà‘i bá tɔk-aa si kɔ̧ sa̧a̧-fara wen dee do-mɔ nɛ usi ea-ɗaŋmɔ‘i, wi tɛ kai wa siɗoŋ mɛ dɔ, ndàrá-a in mur-aa gu nɛ ɗɔr-aa.

²⁸Wi nɛ tɛ dɔ mɔɔ nɔ‘i tɛ fɔr o laa kɔ‘i, zuia yi, sɛka a̧ yee saaye.»

²⁹«Mɔ'ɔ nɛ́ heembea n’ɛnɛ tɛ kasi kpoo nɛ kpoo; zɛ ɓu tɛ mɔɔrɔ-ɗoŋ-yiitoo fio-zɛ, ɛnɛ lɛŋ gu nɛ o gɔni-duk mgbara'nɛ́ tɛ zim yì wese'i, ɓɛɛ ɛnɛ beka fo tom nɛ er'nɛ́ na.

³⁰Nɛ́ wese'i a̧ wa tɛ de nɛ do-mɔ nɛ usi ea-ɗaŋmɔ zu'nɛ́ ha̧ war-tɛ‘nɛ́ mɛ sa̧. Hegɔ, ɗaŋmɔ k’ɛ́nɛ́ lɛŋ yua, ɓɛɛ ɛnɛ duk nɛ sa̧a̧-a̧ ti GASA WAN.

³¹Wese'i nɛ́ wese Sabat, wese-ɔm-tɛ n’ɛnɛ tɛ zim nɛ yì. Mɔ‘i nɛ heembea n’ɛnɛ tɛ kasi kpoo nɛ kpoo.

³²Wi nɛ tɛ de do-mɔ nɛ usi ea-ɗaŋmɔ tɛ duk nɛ wi-ɗafi-sɔ̧ nɛ‘i tɛna nɔ̧́ a zu-a, e nɛ a̧ tɛ tom-ɗafa-sɔ̧ oi dáà kɔ̧-a̧. A̧ tɛ pi̧ nɛ́ o de yɛ́m-yɛ́m laa-ɗafi-sɔ̧,

³³wen dee do-mɔ nɛ usi ɗafa-war sa̧a̧-fara, Tua-kpa-ŋmaa in fara-ɗafi-sɔ̧, ɓɛɛ a̧ dee do-mɔ‘i zu o wi-ɗafi-sɔ̧, in zu o bíí lɛŋ nɛ mɔi̧a mbɛt.

³⁴Wese de do-mɔ wen ea-ɗaŋmɔ ko o be Israɛl lɛŋ tɛ de war kpɔk zaŋ pɛ, ɓɛɛ mɔ‘i tɛ́ dùk nɛ́ heembea wen ɛnɛ kpoo nɛ kpoo.» Ɓɛɛ wa de hee mɔ'ɔ nɛ GASA WAN tɔ̧ɔ̧ so ha̧ Moisɛ ga.