Read Northwest Gbaya LEVITIK 17 Bible Online

LEVITIK 17 - Northwest Gbaya bible

LEVITIK 17

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ Arɔŋ, ha̧ o bem kɔ̧-a̧ in ha̧ o be Israɛl lɛŋ‘e:

³kà ŋma be Israɛl gɔn ndai, kóó be-sami, kóó nana gbadua sɛn saaye, kóó nɛ̀ ɗoŋ ye,

⁴kà a̧ nɛ́ baa saɗi'i si nú Tua-kpa-ŋmaa ti fara-duk ko GASA WAN sɛka a̧ ɗafa ha̧ a̧ na, simbo saɗi nɛ tɔk-aa aa nu'i tɛ tik zu wi’ɛi, ɓɛɛ wa tɛ fo a̧ yinɛ mgbara o bíí kɔ̧-a̧.

⁵Hegɔ, o be Israɛl tɛ kai o saɗi nɛ wa kɔ̧ɔ̧ mɛ ɗafi nɛ sɔ̧ sɛn ɗoŋ ye mɛ nɛnɛ ha̧ wi-ɗafi-sɔ̧, si nú Tua-kpa-ŋmaa ha̧ GASA WAN. Wa tɛ ɗafi wa ha̧ GASA WAN nɛ ɗafa-sɔ̧-gaŋmɔ.

⁶Wi-ɗafi-sɔ̧ tɛ misi̧ tɔk saɗi nɔ‘i a fara-ɗafi-sɔ̧ ko GASA WAN sɛn nú Tua-kpa-ŋmaa, ɓɛɛ a̧ dɔɔ de nɔ̧́ kpoo-aa nɛ pɛr-aa ɔ dee ha̧ GASA WAN.

⁷Hegɔ, o be Israɛl beka ɗafi o ɗaŋ-sɔ̧ nɛ wa gasi'i ɓɔna. Mɔ‘i nɛ́ heembea nɛ̀ tɛ duk kpoo nɛ kpoo wen wa.

⁸«Mɛ̀ tɔ̧́ ha̧ wa mbɛt'e: kà ŋma be Israɛl, kóó o gɔni-duk nɛ̀ tɛ̀ɛ́ mɛ́ duk mgbara wa nɛ́ kɔ̧ɔ̧ mɛ dɔ kpoo-sɔ̧, kóó mɛ ɗafi sɔ̧,

⁹kà a̧ nɛ́ baa mɔ-a nɛnɛ si nú Tua-kpa-ŋmaa ɗafi nɛnɛ ha̧ GASA WAN na, wa tɛ fo wi’ɛi yinɛ mgbara o bíí kɔ̧-a̧.

¹⁰«Kà ŋma be Israɛl, kóó nɛ gɔni-duk nɛ̀ tɛ̀ɛ́ mɛ́ duk mgbara wa nyɔŋ tɔk, mi tɛ de ŋmaa in wi’ɛi, ɓɛɛ mi foo a̧ yinɛ mgbara o bíí kɔ̧-a̧.

¹¹Wen duka-kpasa ko mɔ lɛŋ duk sɛn tɛ tɔk; ɓɛɛ kɔ‘m, mi ee h’ɛ́nɛ́ mɛ gbai tɔk a zu fara-ɗafi-sɔ̧ wen kpaa ea-ɗaŋmɔ. Nɛ́ tɔk a̧ de ha'i mɛ kpa ea-ɗaŋmɔ wen nɛ́ a̧ a̧ de ha'i mɛ duk kpasa.

¹²Nɛ́ mɔ‘i a̧ dee ha̧‘m mɛ tɔ̧ ha̧ o be Israɛl‘e nde: ‹Ká bíí kpɔk nyɔŋ kpoo nɛ oi tɔk na, kóó nɛ́ be Israɛl, kóó nɛ́ gɔni-duk nɛ̀ duk mgbara'nɛ́.›

¹³«Kà ŋma bíí, kóó nɛ́ be Israɛl, kóó nɛ́ gɔni-duk nɛ̀ duk mgbara'nɛ́ gbɛ ŋma saɗi, kóó ŋma be nɔ̧́í̧ nɛ‘i nyɔŋ nyɔŋ, a̧ a̧ e ha̧ tɔk-aa mɛ zur a nu, ɓɛɛ a̧ tura fuunu a zu a̧,

¹⁴wen duka-kpasa ko mɔ lɛŋ duk sɛn tɛ tɔk. Nɛ́ mɔ‘i a̧ dee ha̧‘m mɛ tɔ̧ ha̧ o be Israɛl‘e, ká wa nyɔŋ kpoo saɗi nɛ oi tɔk na, wen duka-kpasa ko mɔ lɛŋ duk sɛn tɛ tɔk. Wi nɛ tɛ de hegɔ, wi tɛ fo a̧ yinɛ mgbara o bíí kɔ̧-a̧.

¹⁵«Kóó nɛ be-nu, kóó nɛ́ gɛnɛ nɛ̀ tɛ nyɔŋ wɔr saɗi, kóó ŋma saɗi nɛ ŋma mɔ baa, wi’ɛi tɛ fɔr o laa kɔ‘i, ɓɛɛ zuia yì; a̧ tɛ duk nɛ ndiŋ bíí hɔ ga̧a̧mɔ, sɛka tɛ-a sa̧a̧.

¹⁶Ɓɛɛ kà wi’ɛi nɛ́ fɔra o laa kɔ‘i na in kà a̧ nɛ́ zuia yì na mbɛt, ɗaŋmɔ kɔ̧-a̧ tɛ tik zu a̧.»