Read Northwest Gbaya LEVITIK 18 Bible Online

LEVITIK 18 - Northwest Gbaya bible

LEVITIK 18

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl‘e ndé, mi nɛ GASA WAN Sɔ̧ k’ɛ́nɛ́.

³K’ɛ́nɛ́ de mɔ hee mɔ'ɔ n’ɛnɛ dee so ŋgimbi n’ɛnɛ duka so nɛnɛ Egiptɛ ga na, k’ɛ́nɛ́ de mɔ hee o be nu Kanaŋ n'am tɛ mgbɔ‘nɛ́ si sɛnɛ‘i ga na. K’ɛ́nɛ́ ndak ɗoŋ o heembea kɔ-wa na.

⁴Ɛ̀nɛ̀ zɔ́k ɗoŋ yuwar duka-a n'am usa h’ɛ́nɛ́, ɓɛɛ ɛ̀nɛ̀ kásí o heembea kɔ‘m. Nɛ́ mi, GASA WAN, Sɔ̧ k’ɛ́nɛ́.

⁵Ɛ̀nɛ̀ ndák ɗoŋ o heembea kɔ‘m in yuwar duka-a n'am usa h’ɛ́nɛ́. Nɛ́ tɛ kasa o mɔɔ nɔ‘i, ɛ̀nɛ̀ tɛ kpasi nɛnɛ. Nɛ́ mi GASA WAN.

⁶«Ká ŋma bíí mgbara'nɛ́ pi̧ naŋ zu nam kɔ‘i na. Nɛ́ mi GASA WAN.

⁷Ká mɛ pi̧ naŋ zu nàà kɔ-mɛ na, wen ká mɛ tɛɛ pi̧ búù zu dáà kɔ-mɛ. Hee mɔ'ɔ nɛ a̧ nɛ naa kɔ-mɛ ga, kà mɛ de hegɔ, mɛ pi̧i̧ buu zu a̧.

⁸Ká mɛ pi̧ naŋ zu ŋma kóò ko dáà kɔ-mɛ na; kà mɛ de hegɔ, ɓɛɛ mɛ pi̧i̧ búù zu dáà kɔ-mɛ.

⁹Ká mɛ pi̧ naŋ zu boko-nya-mɛ kɔ-mɛ na, kóó nɛ́ ŋma boko-nya-mɛ nɛ dáà nɛtɛ nɛtɛ na, kóó wa kòó a̧ kɔ̧ kira ko dáà kɔ-mɛ, kóó nɛ zan mbɛt.

¹⁰Ká mɛ pi̧ naŋ zu be-koo-mɛ na, kóó nɛ bem ko be-wiwii, kóó nɛ bem ko be-okoo; kà mɛ de hegɔ, mɛ pi̧i̧ búù zu mɛ nɛ tɛ-mɛ.

¹¹Ká mɛ pi̧ naŋ zu boko-bem ko gɔya nàà kɔ-mɛ na; hee mɔ'ɔ nɛ a̧ gboo nɛ tɛ dáà kɔ-mɛ ga, a̧ nɛ boko-nya-mɛ.

¹²Ká mɛ pi̧ naŋ zu sembaa kɔ-mɛ na, wen a̧ nɛ kiitɛ dáà kɔ-mɛ.

¹³Ká mɛ pi̧ naŋ zu o nya nàà kɔ-mɛ na, wen wa nɛ kiitɛ nàà kɔ-mɛ.

¹⁴Ká mɛ pi̧ naŋ zu kóò ko nya dáà kɔ-mɛ na, ká mɛ tɛɛ pi̧ búù zu nya ko dáà kɔ-mɛ, wen kóò‘i nɛ ŋma nàà kɔ-mɛ.

¹⁵Ká mɛ pi̧ naŋ zu be-for-mɛ mɛ kóò na, wen a̧ nɛ kóò ko bem kɔ-mɛ.

¹⁶Ká mɛ pi̧ naŋ zu kóò ko nya-mɛ na, wen ká mɛ tɛɛ pi̧ búù zu nya-mɛ.

¹⁷Ká mɛ ɔ in ŋma okoo, ɓɛɛ sɛka mɛ tɛɛ ɔ in be-okoo kɔ̧-a̧ mbɛt na; ká mɛ ɔ in be-koo-aa na mbɛt, kóó nɛ boko-bem ko bui-bem kɔ̧-a̧, kóó nɛ be-koo boko-bem kɔ̧-a̧ na, wen wa lɛŋ nɛ kiitɛ-a. Deemɔ hegɔ nɛ ndiŋmɔ.

¹⁸Ká mɛ ba nya-kóò kɔ-mɛ nɛ kóò, ŋgimbi nɛ kóò kɔ-mɛ biti duk kpasa na, wen ká wa tɛɛ de gɔya.

¹⁹«Ká mɛ ɔ in okoo ŋgimbi zɔka-zɛ kɔ̧-a̧ na; wen ŋgimbi'i, a̧ nɛ ndiŋ bíí.

²⁰Ká mɛ ɔ in gɔni kóò ko ŋma mɛ na, wen mɔ‘i nɛ ɗaŋa war-tɛ-mɛ.

²¹Ká mɛ ba bem kɔ-mɛ ɗafi nɛ sɔ̧ Mɔlɛk na, wen ká mɛ ɗaŋ nin Sɔ̧ kɔ-mɛ. Nɛ́ mi GASA WAN.

²²Ká mɛ ɔ in ŋma-mɛ wiwii hee mɔ'ɔ nɛ‘i ɔ nɛnɛ in okoo’ɛ ga na, wen mɔ‘i nɛ gasa ɗaŋmɔ.

²³Ká mɛ ɔ in saɗi na, wen mɔ‘i tɛ ɗaŋ war-tɛ-mɛ, in ká ŋma okoo ba ŋma saɗi ɔ nɛnɛ na, wen mɔ‘i nɛ́ ɗaŋa war-tɛ.

²⁴«K’ɛ́nɛ́ de ndiŋ pi̧ tɛ‘nɛ́ tɛ ɗaŋ yuwar deemɔ hegɔ na, wen mɛ̀ nɛ́ tɛ ɗaŋa war duka-a hegɔ‘i a̧ o tugun bíí n'am ndak yinɛ ti'nɛ́ dea ɗaŋ nɛ̀ war-tɛ-wa.

²⁵Ɗaŋ deemɔ ko o wi nɔ‘i dee ndiŋ pi̧ tɛ nù kɔ-wa, ɓɛɛ mi GASA WAN de ŋgamɔ pi̧ zu nù‘i ndak nɛ o bíí lɛŋ a taŋ.

²⁶War k’ɛ́nɛ́, ɛ̀nɛ̀ kásí o heembea in yuwar duka-a n'am usa h’ɛ́nɛ́, ɓɛɛ k’ɛ́nɛ́ de ŋma ndiŋmɔ nɔ‘i na, ɛnɛ o be-nu, kóó o gɔni-duk nɛ duk mgbara'nɛ́ mbɛt.

²⁷Wen o bíí nɛ yaa so tɛ nù‘i dee o ndiŋ mɔɔ nɔ‘i, ɓɛɛ nù ɗaŋ.

²⁸Hegɔ, mi beka ndak'nɛ́ yinɛ tɛ nù‘i hee mɔ'ɔ n'am ndaka nɛ o kuti bíí nɛ yaa so hi̧i̧ ti h’ɛ́nɛ́ ga na.

²⁹Ɓɛɛ kóó o nde mgbara'nɛ́ nɛ tɛ de pɛrti mɔ hegɔ, wi tɛ fo a̧ yinɛ mgbara o bíí kɔ̧-a̧.

³⁰«Ɛ̀nɛ̀ kásí o wen kɔ‘m, ɓɛɛ k’ɛ́nɛ́ kasi o ɗaŋ heembea ko o bíí nɛ yaa so ti h’ɛ́nɛ́ na, k’ɛ́nɛ́ ɗaŋ war-tɛ‘nɛ́ tɛ dee o pɛrti mɔɔ nɔ‘i na. Nɛ́ mi GASA WAN Sɔ̧ k’ɛ́nɛ́.»