Read Northwest Gbaya LEVITIK 19 Bible Online

LEVITIK 19 - Northwest Gbaya bible

LEVITIK 19

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl‘e nde, wa a̧ duk nɛ sa̧a̧-a̧, wen mi GASA WAN Sɔ̧ k’ɛ́nɛ́, mi ɔ sa̧a̧.

³Kóó o nde a̧ yu nàà kɔ‘i in dáà kɔ‘i, ɓɛɛ ɛ̀nɛ̀ kásí o wese-ɔm-tɛ kɔ‘m. Nɛ́ mi GASA WAN Sɔ̧ k’ɛ́nɛ́.

⁴«K’ɛ́nɛ́ ndak ɗoŋ o géé-sɔ̧ na, k’ɛ́nɛ́ dui o géé-sɔ̧ na mbɛt. Nɛ́ mi GASA WAN Sɔ̧ k’ɛ́nɛ́.

⁵«K’ɛ̀nɛ̀ nɛ́ gɔna ŋma saɗi nɛ ɗafa-sɔ̧-gaŋmɔ ha̧ GASA WAN, ɛ̀nɛ̀ dé nɛ̀ war-a ha̧‘m mɛ kpɛk.

⁶Wi tɛ nyɔŋ kpoo-sɔ̧‘i kale wese'i, kóó mɛ sa̧a̧mɔ, ɓɛɛ oi-aa nɛ tɛ ɓɔn hɔ sa̧a̧mɔ oi-aa, wi tɛ dɔ yinɛ.

⁷Ɓɛɛ kà‘i nyɔŋ kpoo'i tɛ taar zɛ, kpoo'i mbɔra kaɗi, Sɔ̧ beka kpɛk mɔ‘i na.

⁸Wi nɛ tɛ nyɔŋ kpoo'i, ɗaŋmɔ kɔ̧-a̧ tɛ tik zu a̧, wen a̧ fɛŋa mɔ nɛ̀ duk nɛ́ ko GASA WAN, ɓɛɛ wi tɛ fo wi’ɛi yinɛ mgbara o bíí kɔ̧-a̧.

⁹«Ŋgimbi mɔi̧a-nyɔnɔ k’ɛ́nɛ́, k’ɛ́nɛ́ mɔi̧ hɔ mgbii fɔ na, k’ɛ́nɛ́ dɔr oi-aa nɛ mbɔɗɔnu na mbɛt.

¹⁰K’ɛ́nɛ́ ɓi oi waya-nyak-dɔ̧ɔ̧ nɛ ɓɔna kpɛɛfɔ k’ɛ́nɛ́ na, in k’ɛ́nɛ́ dɔr wan nɛ aia a nu na mbɛt; ɛ́nɛ́ tɛ e i̧i̧ nɔ‘i ha̧ o wisan in ha̧ o gɛnɛ. Nɛ́ mi GASA WAN Sɔ̧ k’ɛ́nɛ́.

¹¹«K’ɛ́nɛ́ zu̧ mɔ na, k’ɛ́nɛ́ de ndela na, k’ɛ́nɛ́ ɔr o ŋma'nɛ na mbɛt.

¹²K’ɛ́nɛ́ kan mɔ nɛ ndela nɛ nin-am na, wen k’ɛ́nɛ́ tɛɛ ɗaŋ nin Sɔ̧ k’ɛ́nɛ́; nɛ́ mi GASA WAN.

¹³«Ká mɛ́ ɔr ŋma-mɛ kai nɛ mɔ kɔ̧-a̧ na, in ká mɛ́ zu̧ a̧ na; ká mɛ́ kasi mɔɔ-oi-tom ko wi-de-tom ɓɔn er-mɛ hɔ mɔɔsa̧ mɛ tutuyɛ na.

¹⁴Ká mɛ́ da̧ wi-mgbee-zer na, ká mɛ́ e mɔ ti wi-boma-yí mɛ kɔ̧ naŋ na; nɛ́ hegɔ à̧ mɛ tɛ yu nɛ Sɔ̧ kɔ-mɛ. Nɛ́ mi GASA WAN.

¹⁵«Mɛ̀ gɔ́n kita zu o bíí nɛ yuwar-a: ká mɛ́ ye ɗoŋ wisan na, ɓɛɛ ká mɛ́ ye ɗoŋ wanmbɔi na mbɛt; mɛ̀ gɔ́n kita zu ŋma-mɛ nɛ yuwar-a.

¹⁶Ká mɛ́ kai ndaa ŋma nam kɔ-mɛ na, ká mɛ́ e ɗɔra tɛ ŋma-mɛ ha̧ wa mɛ gbɛ a̧ na mbɛt. Nɛ́ mi GASA WAN.

¹⁷«Ká mɛ́ kasi sɛnmɔ in nya-mɛ na, ɓɛɛ mɛ̀ tɔ̧́ nɛ mbɔrɔ ha̧ a̧ gai nɛ a̧, ká ɗaŋmɔ kɔ̧-a̧ tɛɛ tik zu mɛ.

¹⁸Ká mɛ́ kifi er ɗaŋmɔ ha̧ ŋma-mɛ na, in ká mɛ́ kasi sɛnmɔ in a̧ na; nɛ́ hegɔ a̧ mɛ tɛ kɔ̧ nɛ ŋma-mɛ hee kiitɛ-mɛ ga. Nɛ́ mi GASA WAN.

¹⁹Ɛ̀nɛ̀ kásí o heembea kɔ‘m: ‹Ká mɛ́ de ha̧ o mɔ-dai kɔ-mɛ zuduk-a nɛtɛ nɛtɛ mɛ daŋ ŋmaa na. Ká mɛ́ gun kpar nyɔnɔ nɛtɛ nɛtɛ kpɛɛfɔ kɔ-mɛ na. Ká mɛ́ pi̧ laa nɛ zɔ̧-a̧ nɛtɛ nɛtɛ na.›

²⁰«Kà ŋma bíí ɔ in ŋma okoo-bara, kà kóò‘i nɛ́ bòò nɛ́ kóò ko ŋma bíí nɛ̀ hara, ɓɛɛ n'aa tɛ gɔn zu-a na, in n'aa tɛ gbo a̧ tɛ bara na, wi’ɛi tɛ yoɓi mɔ; wa beka gbɛ wa na, wen bo nɛ koo'i kpaa so zu hɔ̧ɔ̧ na.

²¹Wi’ɛi tɛ ba vala sami nɛnɛ si nú Tua-kpa-ŋmaa mɛ ha̧ ha̧ GASA WAN ɗafi nɛ mgbara ŋmaa in a̧.

²²Kà wi-ɗafi-sɔ̧ de do-mɔ nɛ usi ea-ɗaŋmɔ ko wi’ɛi ti GASA WAN nɛ̀ vala sami'i kaɗi, ɓɛɛ wi’ɛi kpaa ea-ɗaŋmɔ.

²³«Ŋgimbi n’ɛnɛ be tɛɛ ye nù‘i, h’ɛ́nɛ́ mɛ gun o te nɛ wai nɛtɛ nɛtɛ lɛŋ, ɛnɛ tɛ zɔk waya-a hee ndiŋmɔ ga; o waya-te nɔ‘i tɛ duk nɛ ndiŋmɔ wen'nɛ́ tɛ pɛ taar, wi beka nyɔŋ wa na.

²⁴Tɛ naar pɛ, ɛ́nɛ́ tɛ e o waya-te lɛŋ ha̧ GASA WAN, zɔn nɛ a̧.

²⁵Ɓɛɛ nɛ́ tɛ mɔɔrɔ pɛ, ɛ̀nɛ̀ tɛ nyɔŋ nɛ o waya-te nɔ‘i. Nɛ́ hegɔ a̧ o nyɔnɔ k’ɛ́nɛ́ tɛ dɛm nɛnɛ gan kuti-a. Nɛ́ mi GASA WAN Sɔ̧ k’ɛ́nɛ́.

²⁶«K’ɛ́nɛ́ nyɔŋ mɔ nɛ tɔk ɓɔna sɛnɛ na. K’ɛ́nɛ́ de mɔɔ-gbánà in mɔɔ-kifi na mbɛt.

²⁷K’ɛ́nɛ́ ba ti zu'nɛ́ kpa ŋmaa na, in k’ɛ́nɛ́ kpui ká̧ zera k’ɛ́nɛ́ na.

²⁸K’ɛ́nɛ́ e da̧i̧ tɛ‘nɛ́ wen fio nɛ fea na, in k’ɛ́nɛ́ gɔn dap tɛ‘nɛ́ na mbɛt. Nɛ́ mi GASA WAN.

²⁹«Ká mɛ́ fo bem kɔ-mɛ mɛ okoo-a pi̧ tɛ dàlà-ɗafa-sɔ̧ na, wen ká nù tɛɛ dun nɛ pɛrti mɔɔ nɔ‘i, ká ndiŋmɔ dun nù.

³⁰Ɛ̀nɛ̀ kásí o wese-ɔm-tɛ nɛ de-a, ɓɛɛ ɛ̀nɛ̀ tú̧ tɛ sa̧a̧-fara kɔ‘m. Nɛ́ mi GASA WAN.

³¹«K’ɛ́nɛ́ kii mɛ sa o sɔ̧-fio k’ɛ́nɛ́ na, k’ɛ́nɛ́ tɛɛ duk nɛ o ndiŋ bíí hee wa ga. Nɛ́ mi GASA WAN Sɔ̧ k’ɛ́nɛ́.

³²«Mɛ̀ tú̧ tɛ o sɔkawi, in mɛ̀ gásí wa; nɛ́ hegɔ a̧ mɛ tɛ yu nɛ kíí Sɔ̧. Nɛ mi GASA WAN.

³³«K’ɛ́nɛ́ ɔr gɛnɛ nɛ tɛ mɛ duk mgbara'nɛ́ tɛ nù k’ɛ́nɛ́ kai nɛ mɔ er-a na.

³⁴Ɛ́nɛ́ tɛ zɔk gɛnɛ‘i hee be Israɛl ga, hee ŋma'nɛ ga, ɛnɛ tɛ kɔ̧ a̧ hee kiitɛ‘nɛ́ ga, wen ɛnɛ mbɛt, ɛnɛ yaa so nɛ o gɛnɛ sɛn nú Egiptɛ. Nɛ́ mi GASA WAN Sɔ̧ k’ɛ́nɛ́.

³⁵«Ɛ̀nɛ̀ tɔ́r mɔ nɛ yuwar-a; ɛ̀nɛ̀ wé zi̧a̧ mɔ in dita mɔ in gasa mɔ mbɛt nɛ yuwar-a.

³⁶O mɔɔ-we-dita-mɔ k’ɛ́nɛ́ a̧ duk nɛ de-a, o kilo wen wea mɔ k’ɛ́nɛ́ a̧ duk nɛ yuwar-a. Mɔɔ-we-fuu k’ɛ́nɛ́ a̧ duk nɛ yuwar-a, in mɔɔ-we-nɔ̧́ k’ɛ́nɛ́ a̧ duk nɛ yuwar-a mbɛt. Nɛ́ mi GASA WAN Sɔ̧ k’ɛ́nɛ́ nɛ foo'nɛ́ gbonɛ nɛ nú Egiptɛ.

³⁷«Ɛ̀nɛ̀ kásí o heembea kɔ‘m lɛŋ, in o yuwar duka-a n'am ha̧a̧‘nɛ́, ɓɛɛ ɛ̀nɛ̀ dé mɔ nyɛm nɛ ɗoŋ-aa. Nɛ́ mi GASA WAN.»