Read Northwest Gbaya LEVITIK 2 Bible Online

LEVITIK 2 - Northwest Gbaya bible

LEVITIK 2

¹«Kà ŋma bíí ba ha̧a̧mɔ tɛnɛ ha̧ GASA WAN, ha̧a̧mɔ‘i tɛ duk nɛ fuu nɛ‘i zaŋa nɛ ŋmaa in nɔ̧́, ká bá nɛ̀ nyama.

²Wi tɛ ba mɔ‘i nɛnɛ ha̧ o wi-ɗafi-sɔ̧ nɛ duk nɛ o bem ko Arɔŋ, ɓɛɛ wa kaia fuu nɛ‘i zaŋa nɛ ŋmaa in nɔ̧́ dun er, ká bá nɛ̀ nyama nɛ oi-aa a yí wee-ɗafi-sɔ̧ hee mbaŋa-tɛ-mɔ ga. Mɔ‘i nɛ dɔɔ nyɔŋmɔ nɛ duk nɛ de pɛr nyama tɛ GASA WAN.

³Oi ha̧a̧mɔ tɛ duk nɛ ko Arɔŋ in o bem kɔ‘i. Mɔ‘i nɛ nyɔŋmɔ nɛ ɔ sa̧a̧ nyɛmna, wen nɛ́ oi dɔɔ ha̧a̧mɔ-ɗafi-sɔ̧ ha̧ GASA WAN.

⁴«Kà ha̧a̧mɔ kɔ-mɛ nɛ́ bòò nɛ́ dɔɔ brɛt, a̧ duk nɛ́ fuu nɛ‘i vata nɛ nɔ̧́, kóó a̧ duk nɛ́ makala nɛ‘i vata nɛ nɔ̧́, ɓɛɛ ká hao duk sɛnɛ na; kóó a̧ duk nɛ́ makala nɛ‘i aa nɔ̧́ zu a̧, ɓɛɛ nɛ̀ hao bo sɛnɛ na mbɛt.

⁵«Kà ha̧a̧mɔ kɔ-mɛ nɛ́ bòò nɛ́ mɔ nɛ‘i dɔɔ zu wee, ɓɛɛ ha̧a̧mɔ‘i a̧ duk nɛ́ fuu nɛ‘i vata nɛ nɔ̧́, nɛ hao bo sɛnɛ na.

⁶Mɛ tɛ gbin a̧ sɛ́kɛ́ɗɛ́-sɛ́kɛ́ɗɛ́, ɓɛɛ mɛ aa nɔ̧́ zu a̧; mɔ‘i nɛ ha̧a̧mɔ.

⁷«Nɛ́ bòò nɛ́ ha̧a̧mɔ nɛ‘i ha̧na kɔ̧ pɛsa tasi, wi tɛ vati nɛ fuu nɛ nɔ̧́.

⁸Mɛ tɛ ba ha̧a̧mɔ nɛ mɛ ɗafa'i nɛnɛ ha̧ GASA WAN, ɓɛɛ mɛ ha̧a̧ ha̧ wi-ɗafi-sɔ̧ mɛ ba nɛnɛ si fara-ɗafi-sɔ̧.

⁹Hegɔ‘i, wi-ɗafi-sɔ̧ tɛ ba ŋma ha̧a̧mɔ‘i hee mbaŋa-tɛ-mɔ ga mɛ dɔ zu fara-ɗafi-sɔ̧. Mɔ‘i nɛ dɔɔ ha̧a̧mɔ-ɗafi-sɔ̧ nɛ duk nɛ de pɛr nyama tɛ GASA WAN.

¹⁰Oi ha̧a̧mɔ‘i tɛ duk nɛ ko Arɔŋ in o bem kɔ‘i. Mɔ‘i nɛ nyɔŋmɔ nɛ ɔ sa̧a̧ nyɛmna, wen nɛ́ oi dɔɔ ha̧a̧mɔ-ɗafi-sɔ̧ ha̧ GASA WAN.

¹¹«Hao beka bo tɛ dɔɔ brɛt n’ɛnɛ tɛ ha̧ ha̧ GASA WAN na; ɛnɛ beka dɔ hao, kóó gɔrɔ mɛ ha̧ ha̧ GASA WAN na.

¹²Ɛnɛ nyɛma mɛ ha̧ mɔ‘i ha̧ GASA WAN hee zu-nyɔnɔ ga, ɓɛɛ bo nɛ wi tɛ dɔ zu-nyɔnɔ‘i zu fara-ɗafi-sɔ̧ wen ha̧ de pɛr-aa mɛ daŋ sitɛ GASA WAN na.

¹³Mɛ̀ á tɔŋ tɛ ha̧a̧mɔ kɔ-mɛ lɛŋ; ká mɛ mbosi aa tɔŋ tɛ ha̧a̧mɔ kɔ-mɛ na, wen tɔŋ usi nɛ nɔɔ-tɔk ko Sɔ̧ in bíí. Hegɔ‘i, mɛ̀ á tɔŋ tɛ ha̧a̧mɔ kɔ-mɛ lɛŋ.

¹⁴Mɛ́ nɛ́ tɛ̀ɛ́ ha̧ zu-nyɔnɔ ha̧ GASA WAN, mɛ̀ há̧ nɛ ha̧na gba̧a̧-nyɔnɔ, koo hɔ̧na fuu-aa.

¹⁵Mɛ̀ á nɔ̧́ zu a̧, ɓɛɛ mɛ aa fuu-nyama sɛnɛ mbɛt; mɔ‘i nɛ ha̧a̧mɔ ha̧ GASA WAN.»

¹⁶Ɓɛɛ wi-ɗafi-sɔ̧ tɛ dɔ mɔ‘i hee mbaŋa-tɛ-mɔ ga: be fuu, be nɔ̧́, ká bá nɛ̀ fuu-nyama nɛ oi-aa. Mɔ‘i nɛ dɔɔ ha̧a̧mɔ-ɗafi-sɔ̧ ha̧ GASA WAN.