Read Northwest Gbaya LEVITIK 20 Bible Online

LEVITIK 20 - Northwest Gbaya bible

LEVITIK 20

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl‘e, kà ŋma be Israɛl, kóó ŋma gɔni-duk nɛ̀ tɛa mɛ duk sɛn Israɛl há̧ bem kɔ‘i ha̧ sɔ̧ Mɔlɛk, wi tɛ gbɛ wi’ɛi, wi tɛ yo a̧ nɛ ta gbɛ.

³Mi tɛ de ŋmaa in wi’ɛi, ɓɛɛ mi tɛ fo a̧ yinɛ mgbara o bíí kɔ̧-a̧, wen a̧ ha̧a̧ ŋma bem kɔ̧-a̧ ha̧ sɔ̧ Mɔlɛk, wen n'aa dee ndiŋ a sa̧a̧ fara kɔ‘m, in wen n'aa ɗaŋa sa̧a̧ nin-am mbɛt.

⁴Kà o dɔka bíí kpe yí-wa zu mɔ nɛ wi’ɛi dea'i, ɓɛɛ kà wa gbɛ a̧ yinɛ na,

⁵mi nɛ tɛ‘m, mi tɛ de ŋmaa in wi’ɛi, gu nɛ o bíí nú-gara kɔ̧-a̧, ɓɛɛ mi tɛ fo a̧ yinɛ mgbara o bíí kɔ̧-a̧, in o wi nɛ de mɔ hee a̧ ga, é nɛ̀‘m duk ndak nɛ̀ ɗoŋ sɔ̧ Mɔlɛk.

⁶«Kà ŋma bíí nɛ́ tɛ o wi-sa-sɔ̧-fio zɔk nɛ mɔ tɛ wa, pɛrti dee mɔ‘i duk nɛ ŋma gasa o géé-sɔ̧. Mi tɛ de ŋmaa in wi’ɛi, ɓɛɛ mi tɛ fo a̧ yinɛ mgbara o bíí kɔ̧-a̧.

⁷Ɛ̀nɛ̀ ɗáfí war-tɛ‘nɛ́ nɛ sa̧a̧-a̧, h’ɛ́nɛ́ mɛ ya nɛ o sa̧a̧ bíí, wen mi nɛ GASA WAN Sɔ̧ k’ɛ́nɛ́.

⁸Ɛ̀nɛ̀ kásí o heembea kɔ‘m nɛ de-a, ɓɛɛ ɛ̀nɛ̀ dé mɔ nyɛm nɛ ɗoŋ-aa. Nɛ́ mi GASA WAN nɛ de ha̧ war-tɛ‘nɛ́ mɛ sa̧.

⁹«Hegɔ, kà ŋma bíí da̧ dáà kɔ‘i, kóó nàà kɔ‘i, wi tɛ gbɛ wi’ɛi yinɛ; ɗaŋmɔ kɔ̧-a̧ tɛ tik zu a̧ wen a̧ da̧a̧ dáà kɔ̧-a̧ in nàà kɔ̧-a̧.

¹⁰«Kà ŋma bíí de dàlà in kóò ko ŋma-a, wi tɛ gbɛ wa yinɛ, wiwii'i ká bá nɛ̀ kóò‘i mbɛt.

¹¹Kà ŋma wiwii ɔ in kóò ko dáà kɔ‘i, a̧ pi̧ nɛ búù zu dáà kɔ̧-a̧, wi tɛ gbɛ o wi-de-dàlà nɔ‘i yinɛ yiitoo lɛŋ. Ɗaŋmɔ kɔ-wa tɛ tik zu wa.

¹²Kà ŋma wiwii ɔ in be-for mɛ kóò, wi tɛ gbɛ wa yiitoo lɛŋ, wa yɔɔ kɔya-tɛ-wa, ɓɛɛ ɗaŋmɔ kɔ-wa tɛ tik zu wa.

¹³Kà ŋma wiwii ɔ in wiwii woyo, hee mɔ'ɔ nɛ‘i ɔ nɛnɛ in okoo ga, nɛ ndiŋmɔ a̧ wa dea yiitoo lɛŋ, wi tɛ gbɛ wa yinɛ, ɓɛɛ ɗaŋmɔ kɔ-wa tɛ tik zu wa.

¹⁴Kà ŋma bíí ba boko-bem in nàà kɔ̧-a̧ nɛ kóò, mɔ‘i nɛ iŋa nam na. Wi tɛ dɔ wa lɛŋ, wen ká pɛrti mɔɔ-búù hegɔ tɛɛ pɛsi dam mgbara'nɛ́.

¹⁵Kà ŋma wiwii ɔ in ŋma saɗi, wi tɛ gbɛ wi’ɛi, ɓɛɛ wi gbɛɛ saɗi'i mbɛt.

¹⁶Kà ŋma okoo ba ŋma saɗi ɔ nɛnɛ, wi tɛ gbɛ kóò‘i in saɗi'i mbɛt, ɓɛɛ ɗaŋmɔ kɔ-wa tɛ tik zu wa.

¹⁷«Kà ŋma wiwii ba boko nya-wi, boko-bem ko dáà kɔ̧-a̧, kóó nɛ ko náà kɔ̧-a̧ nɛ kóò, kà wa iŋ tɛ in ŋmaa, mɔ‘i nɛ mɔɔ-búù, wi tɛ fo wa yinɛ mgbara o bíí kɔ-wa; hee mɔ'ɔ nɛ wi’ɛi pi̧i̧ naŋ zu boko-nya-wi ga, ɗaŋmɔ kɔ̧-a̧ tɛ tik zu a̧.

¹⁸Kà ŋma wiwii ɔ in okoo ŋgimbi zɔka zɛ, hee mɔ'ɔ n'aa zɔka a̧ nɛ oi tɔk ga, in hee mɔ'ɔ nɛ kóò‘i iŋa'e wiwii'i yaka nɛ oi tɔk tɛ-wi ga, wi tɛ fo wa yinɛ mgbara o bíí kɔ-wa.

¹⁹«Ká mɛ́ pi̧ naŋ zu nya-nàà kɔ-mɛ, kóó zu boko-nya dáà kɔ-mɛ na mbɛt; hee mɔ'ɔ nɛ mɛ pi̧i̧ naŋ zu mgbák nam kɔ-mɛ ga, ɗaŋmɔ k’ɛ́nɛ́ tɛ tik zu'nɛ́ yiitoo lɛŋ.

²⁰Kà ŋma wiwii pi̧ naŋ zu kóò ko nɔkɔ kɔ‘i, kóó zu kóò ko ŋma dáà kɔ‘i, a̧ pi̧i̧ nɛ búù zu nɔkɔ kɔ̧-a̧, kóó zu ŋma dáà kɔ̧-a̧‘i. Ɗaŋmɔ kɔ-wa tɛ tik zu wa yiitoo lɛŋ, wa beka kpa bem na fe nɛnɛ.

²¹Kà ŋma bíí ba kóò ko nya-wi nɛ kóò, nɛ mɔɔ-ndiŋ, a̧ pi̧i̧ nɛ búù zu nya-a̧, wa beka kpa bem na.

²²«Ɛ̀nɛ̀ kásí o heembea kɔ‘m lɛŋ in o yuwar duka-a n'am usa h’ɛ́nɛ́ nɛ de-a, ɓɛɛ ɛ̀nɛ̀ dé mɔ nyɛm ɗoŋ-aa, wen ká‘m tɛɛ fo'nɛ́ tɛ nù n'am tɛ mgbɔ‘nɛ́ si sɛnɛ‘i yinɛ.

²³K’ɛ́nɛ́ ndak ɗoŋ o heembea ko o bíí n'am tɛ ndak yinɛ ti'nɛ́‘i na; nɛ́ wen nɛ̀ wa ndaka nɛ ɗoŋ o heembea nɔ‘i sa'm sɛn wa,

²⁴ɓɛɛ sa'm tɔ̧ nɛnɛ h’ɛ́nɛ́‘e, nù kɔ-wa tɛ duk nɛ k’ɛ́nɛ́, ɓɛɛ nɛ́ mi a̧ ha̧ nù‘i h’ɛ́nɛ́; nù‘i duna nɛ yibere in gɔrɔ. Nɛ́ mi GASA WAN, Sɔ̧ k’ɛ́nɛ́, nɛ̀ hoka'nɛ mgbara o tugun bíí.

²⁵Hegɔ, ɛ̀nɛ̀ kɛ̧́ mgbara o ndiŋ saɗi in o sa̧a̧ saɗi, o ndiŋ nɔ̧́í̧ in o sa̧a̧ nɔ̧́í̧, wen k’ɛ́nɛ́ tɛɛ ɗaŋ war-tɛ‘nɛ́ tɛ nyɔŋa o saɗi nɔ‘i, o nɔ̧́í̧ nɔ‘i in mɔ lɛŋ nɛ gbur zaŋ nɛ nu. Mɛ nɛ o mɔ n'am usa h’ɛ́nɛ́ mɛ zɔk hee o ndiŋmɔ ga.

²⁶Ɛ̀nɛ̀ dúk nɛ́ o bíí kɔ‘m, ɛ̀nɛ̀ dúk nɛ sa̧a̧-a̧ hee mi GASA WAN nɛ ɔ sa̧a̧ ga; mi hoka'nɛ mgbara o tugun bíí h’ɛ́nɛ́ mɛ ya nɛ o bíí kɔ‘m.

²⁷«Kà ŋma wiwii, kóó ŋma okoo dúk mɛ́ sa o sɔ̧ fio, wi tɛ gbɛ wa yinɛ, wi tɛ yo wa nɛ ta gbɛ, ɓɛɛ ɗaŋmɔ kɔ-wa tɛ tik zu wa.»