Read Northwest Gbaya LEVITIK 21 Bible Online

LEVITIK 21 - Northwest Gbaya bible

LEVITIK 21

¹GASA WAN tɔ̧ɔ̧ ha̧ Moisɛ: «Mɛ̀ tɔ̧́ ha̧ o wi-ɗafi-sɔ̧, o bem ko Arɔŋ‘e, ká wi-ɗafi-sɔ̧ ɗaŋ war-tɛ tɛ hɔa-a fara-fio ko bíí kɔ̧-a̧ na.

²Nɛ́ bòò nɛ́ fio ko mgbák bíí kɔ̧-a̧ hee nàà kɔ̧-a̧, kóó dáà kɔ̧-a̧ ga, bem kɔ̧-a̧ mɛ be-wiwii-a kóó be-okoo-a ga, kóó hee nya-a̧ ga, ɓɛɛ a̧ hɔɔ fara-a.

³A̧ tɛ hɔ fara-fio ko boko-nya-a̧ nɛ tɛ iŋ wiwii na, nɛ̀ ɓɔna in a̧, nɛ̀ ŋma wiwii tɛ har na mbɛt.

⁴Hee mɔ'ɔ n'aa duk nɛ gasawi mgbara o bíí kɔ̧-a̧ ga, a̧ beka de mɔɔ-ndiŋ ɗaŋ nɛ war-tɛ-a na.

⁵«O wi-ɗafi-sɔ̧ beka kpui zu na, wa beka kpui ká̧ zera kɔ-wa na, wa beka gɔn dap tɛ-wa na mbɛt.

⁶Wa tɛ ya nɛtɛ wen Sɔ̧ kɔ-wa, ɓɛɛ wa beka ɗaŋ nin Sɔ̧ kɔ-wa na, wen nɛ́ wa a̧ ɗafi sɔ̧, e nɛ nyɔŋmɔ ti a̧ mbɛt, hegɔ wa tɛ ya nɛ o sa̧a̧ bíí.

⁷Wa beka ba kó-de-mɔ nɛ mbɔɗɔnu, kóó kó-de-mɔɔ-búù na. Wa beka ba okoo nɛ wíì ndaka na, wen wi-ɗafi-sɔ̧ duk nɛtɛ wen Sɔ̧ kɔ‘i ɓɛɛ.

⁸Mɛ̀ zɔ́k wi-ɗafi-sɔ̧ hee sa̧a̧ bíí ga, wen nɛ́ a̧ a̧ wɛk nyɔŋmɔ ha̧ Sɔ̧ kɔ-mɛ; mɛ tɛ zɔk a̧ hee sa̧a̧ bíí ga, wen mi ɔ sa̧a̧, mi GASA WAN nɛ de ha̧ war-tɛ‘nɛ́ mɛ sa̧.

⁹Kà boko-bem ko wi-ɗafi-sɔ̧ fɛŋ tɛ nɛ dee mɔ nɛ mbɔɗɔnu, a̧ fɛŋ nɛ dáà kɔ̧-a̧, ɓɛɛ wi tɛ dɔ a̧ yinɛ.

¹⁰«Ɓɛɛ nɛ̀ war ko wan-ɗafi-sɔ̧ nɛ duk zu o nya-a̧, nɛ‘i tɛna nɔ̧́ a zu a̧, e nɛ tom-ɗafa-sɔ̧ er-a, pi̧ nɛ o laa tɛ-a'i, ká a̧ yai zu-a in ká a̧ a̧k laa tɛ-a wen ɗaŋsee na.

¹¹Ká a̧ hɔ fara-fio na, ká a̧ tɛ ɗaŋ war-tɛ-a, kóó nɛ fio ko dáà kɔ̧-a̧, kóó nɛ fio ko nàà kɔ̧-a̧ mbɛt.

¹²Ká a̧ gbo nɛ kɔ̧ sa̧a̧-fara na, wen ká a̧ tɛɛ ɗaŋ sa̧a̧-fara ko Sɔ̧ kɔ̧-a̧, wen nɔ̧́ ko GASA WAN nɛ tɛna a zu-a'i duk nɛ mɔɔ-sedaako. Nɛ́ mi GASA WAN.

¹³Kóó n'aa tɛ ba, a̧ duk nɛ okoo nɛ tɛ iŋ wiwii na.

¹⁴Ká a̧ ba ko-gera na, kóó okoo nɛ wa ndaka na, kóó okoo nɛ fɛŋa tɛ tɛ dee mɔ nɛ mbɔɗɔnu na mbɛt; ɓɛɛ a̧ a̧ ba nɛ ŋma be-zɔŋa mgbara dùk kɔ̧-a̧.

¹⁵Hegɔ a̧ beka ɗaŋ war-tɛ o bezaŋ-aa na, wen nɛ́ mi GASA WAN a̧ ɗafi war-tɛ-a.»

¹⁶GASA WAN tɔ̧ɔ̧ ha̧ Moisɛ:

¹⁷«Mɛ̀ tɔ̧́ ha̧ Arɔŋ‘e ká ŋma bíí mgbara o bezaŋ-aa nɛ a̧a̧ nɛ kum wɛk nyɔŋmɔ ha̧ Sɔ̧ kɔ̧-a̧ na kpoo nɛ kpoo.

¹⁸Ká ŋma bíí nɛ a̧a̧ nɛ kum tɛ pii katɛ‘m na, kóó nɛ wi-boma-yí, kóó nɛ wi-nɛ̀-kum, kóó nɛ wan-gbɔsa-zɔ̧ɔ̧, kóó nɛ ŋma bíí nɛ o naŋ-a, kóó er-a de na,

¹⁹wi nɛ̀ naŋ kóó ɓaa gbina,

²⁰wi nɛ̀ ŋgɔmba bira ɗoŋ-aa, sira-wi, wan-fɛŋa-yí, wan-tara, wan-lalamzi, kóó wi nɛ̀ gba̧a̧ fala-a mbaŋa.

²¹Ká ŋma bíí nɛ a̧a̧ nɛ kum mgbara o bezaŋ Arɔŋ, wi-ɗafi-sɔ̧, nɛ́ si katɛ GASA WAN mɛ wɛk nyɔŋmɔ ha̧ a̧ na. Hee mɔ'ɔ nɛ a̧ nɛ wi-kum ga, ká a̧ ɗɔŋ siti mɛ wɛk nyɔŋmɔ ha̧ Sɔ̧ kɔ̧-a̧ na.

²²A̧ nyɛma mɛ nyɔŋ nyɔŋmɔ ko Sɔ̧ kɔ̧-a̧ nɛ duk nɛ o ha̧a̧mɔ nɛ ɔ sa̧a̧ in o wan nɛ ɔ sa̧a̧ nyɛmna mbɛt.

²³Ɓɛɛ mɔ kpɔk, wi’ɛi beka hɔ ká̧ babir-laa na, in a̧ beka hɔ ká̧ fara-ɗafi-sɔ̧ na, wen a̧ nɛ wi-kum, ká a̧ tɛɛ de ndiŋ a kɔ̧ sa̧a̧-fara kɔ‘m, in tɛ o mɔ nɛ ya kɔ̧ a̧‘i, wen mi nɛ GASA WAN nɛ de ha̧ war-tɛ-wa mɛ sa̧.»

²⁴Moisɛ tɔ̧ɔ̧ wen'i lɛŋ ha̧ Arɔŋ in o bem kɔ‘i ká bá nɛ̀ o be Israɛl lɛŋ.