Read Northwest Gbaya LEVITIK 22 Bible Online

LEVITIK 22 - Northwest Gbaya bible

LEVITIK 22

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ Arɔŋ in o bem kɔ‘i'e, wa a̧ zɔk o sa̧a̧ ha̧a̧mɔ nɛ o be Israɛl ha̧ ha̧‘m nɛ̀ de-a, ɓɛɛ ká wa ɗaŋ sa̧a̧ nin-am na. Nɛ́ mi GASA WAN.

³Mɛ̀ tɔ̧́ ha̧ wa'e, kà ŋma bíí mgbara o bezaŋ-wa nɛ̀ duk nɛ́ ndiŋ bíí nɛ́ si ká̧ o sa̧a̧ ha̧a̧mɔ nɛ o be Israɛl e ha̧ GASA WAN, wi’ɛi beka hɔ ti'm ɓɔna. Yuwar mɔ‘i tɛ duk hegɔ kpoo nɛ kpoo. Nɛ́ mi GASA WAN.

⁴«Ká ŋma bezaŋ Arɔŋ nɛ a̧a̧ nɛ doko, kóó nɛ baa horso nyɔŋ o sa̧a̧ ha̧a̧mɔ nɛti sɛka a̧ ɗafa war-tɛ-a na. Nɛ́ kalemɔ wen wi nɛ tɛ fo wɔr, ká bá nɛ̀ wi nɛ yí-tɛ gbo a̧ gboo.

⁵Nɛ kalemɔ wen wi nɛ fo ndiŋ saɗi, kóó ndiŋ bíí de nɛ ndiŋ pi̧ tɛ.

⁶Wi nɛ fo o pɛrti ndiŋmɔ nɔ‘i tɛ duk nɛ ndiŋ bíí hɔ ga̧a̧mɔ, ɓɛɛ a̧ tɛ zui yì kaɗi sɛka a̧ nyɔŋa o sa̧a̧ nyɔŋmɔ.

⁷Kà wese ye kaɗi, a̧ tɛ duk nɛ sa̧a̧ bíí, ɓɛɛ a̧ tɛ nyɛm nyɔŋa o sa̧a̧ ha̧a̧mɔ wen nɛ́ nyɔŋmɔ kɔ̧-a̧.

⁸Ká wi’ɛi nyɔŋ wɔr saɗi, kóó saɗi nɛ mɔ baa na, wen ká mɔɔ nɔ‘i tɛɛ ɗaŋ war-tɛ-a. Nɛ́ mi GASA WAN.

⁹«Wa a̧ kasi o wen kɔ‘m, wen ká wa tɛɛ de ɗaŋmɔ tɛ nyɔŋa mɔ nɛ nú-tum; kà wa ɗaŋ war nyɔŋmɔ‘i, wa tɛ fe. Nɛ́ mi GASA WAN nɛ de ha̧ war-tɛ-wa mɛ sa̧.

¹⁰«Ká ŋma gee bíí nyɔŋ mɔ nɛ ɔ sa̧a̧ na; kóó nɛ́ gɛnɛ ko wi-ɗafi-sɔ̧, kóó wi-de-tom kɔ̧-a̧ mbɛt beka nyɔŋ mɔ nɛ ɔ sa̧a̧ na.

¹¹Ɓɛɛ nɛ́ bara nɛ wi-ɗafi-sɔ̧ gɔna zu a̧, in wan nɛ wa kòó kɔ̧ kira ko wi-ɗafi-sɔ̧ a̧ nyɛma mɛ nyɔŋ nyɔŋmɔ‘i.

¹²Boko-bem ko wi-ɗafi-sɔ̧ nɛ̀ baa gee bíí beka nyɔŋ ŋma nyɔŋmɔ tɛ sa̧a̧ ha̧a̧mɔ na.

¹³Ɓɛɛ kà wíì fe er ŋma boko-bem ko wi-ɗafi-sɔ̧, kóó kà wíì nɛ́ ndaka a̧, kà a̧ nɛ́ kòó bem na, ɓɛɛ kà a̧ si ɗoŋ tɛ ko dáà kɔ̧-a̧ hee ŋgimbi n'aa ɓɔna so nɛnɛ nɛ zɔŋa ga, a̧ tɛ nyɛm nyɔŋa nyɔŋmɔ ko dáà kɔ̧-a̧, nɛ̀ o gee bíí beka nyɔŋ so na'i.

¹⁴«Kà ŋma bíí iŋ na, nyɔŋ nɛ mɔ nɛ ɔ sa̧a̧, a̧ tɛ ha̧ mɔ‘i sinɛ ɗoŋ ha̧ wi-ɗafi-sɔ̧, e nɛ ŋma zu-a woyo.[5]

¹⁵Ká o wi-ɗafi-sɔ̧ ɗaŋ o sa̧a̧ ha̧a̧mɔ ko o be Israɛl nɛ ndɛm ha̧ GASA WAN na.

¹⁶Kà wa nɛ́ nyɔŋa o sa̧a̧ ha̧a̧mɔ nɔ‘i, ɗaŋmɔ nɛ wa dea'i tɛ tik zu o be Israɛl; hegɔ mɔ‘i tɛ de ha̧ wa mɛ ɗafi mgbara ŋmaa in Sɔ̧, wen mi nɛ GASA WAN nɛ de ha̧ war-tɛ-wa mɛ sa̧.»

¹⁷GASA WAN tɔ̧ɔ̧ ha̧ Moisɛ:

¹⁸«Mɛ tɔ̧ ha̧ Arɔŋ in o bem kɔ‘i ká bá nɛ̀ o be Israɛl lɛŋ‘e, kà ŋma be Israɛl, kóó ŋma gɔni-duk nɛ̀ tɛɛ mɛ duk Israɛl nɛ́ kɔ̧ɔ̧ mɛ ha̧ mɔ nɛ̀ dɔɔ kpoo-sɔ̧ ha̧ GASA WAN, kà nɛ́ bòò nɛ́ ha̧a̧mɔ oi ha̧a̧nú, kóó nɛ ha̧a̧mɔ nɛ ta-tɛ,

¹⁹wi’ɛi tɛ ba nɛ wiwii ndai, kóó vala sami, kóó vala gbadua nɛ ŋma mɔ ɗaŋ tɛ-wa na, sɛka Sɔ̧ tɛɛ kpɛk ha̧a̧mɔ‘i.

²⁰K’ɛ́nɛ́ ha̧ nɛ ŋma saɗi nɛ tɛ-a ɗaŋa ɗaŋ na, wen Sɔ̧ beka kpɛk ha̧a̧mɔ‘i na.

²¹Kà ŋma bíí nɛ́ ha̧a̧ mɔ-gaŋmɔ ha̧ GASA WAN nɛ gasa mɔ-dai, kóó nɛ geɗek mɔ-dai, nɛ́ bòò nɛ́ ha̧a̧mɔ oi ha̧a̧nú, kóó gee ha̧a̧mɔ nɛ ta-tɛ, wi’ɛi tɛ ha̧ nɛ saɗi nɛ tɛ-a ɔ dee sɛka Sɔ̧ kpɛka ha̧a̧mɔ‘i.

²²K’ɛ́nɛ́ ha̧ saɗi nɛ zɔk mɔ na, kóó wan nɛ nɛ kum, kóó wan nɛ naŋ-a ɓira ɓir, kóó wan nɛ mɔ aa tɛ-a, kóó wan nɛ tara aa tɛ-a in wan nɛ lalamzi baa na mbɛt; ɛ́nɛ́ beka ha̧ o pɛrti saɗi nɔ‘i ha̧ GASA WAN na; bé k’ɛ̀nɛ̀ dɔ pɛrti o saɗi nɔ‘i mɛ ha̧ nɛ mɔ ha̧ GASA WAN na mbɛt.

²³Ɛnɛ nyɛma mɛ ha̧ wiwii ndai, kóó sami, kóó gbadua nɛ ŋma naŋ-a dura, kóó dee dɔ̧-a̧ gan o oi-aa nɛ gee ha̧a̧mɔ nɛ ta-tɛ; ɓɛɛ k’ɛ̀nɛ̀ nɛ́ ha̧a̧ mɔ‘i nɛ̀ ha̧a̧mɔ oi ha̧a̧nú, Sɔ̧ beka kpɛk na.

²⁴Saɗi nɛ‘i too fala-a, kóó wan nɛ‘i ɓira fala-a kai yinɛ, ɛnɛ beka ha̧ ha̧ GASA WAN na; k’ɛ́nɛ́ de pɛrti mɔ‘i tɛ nù k’ɛ́nɛ́ na.

²⁵«K’ɛ́nɛ́ ba pɛrti o saɗi nɔ‘i er gɛnɛ mɛ ha̧ hee nyɔŋmɔ ga ha̧ Sɔ̧ k’ɛ́nɛ́ na, wen Sɔ̧ beka kpɛk ha̧a̧mɔ nɛ duk nɛ kuma saɗi nɛ tɛ-wa de na'i, na.»

²⁶GASA WAN tɔ̧ɔ̧ ha̧ Moisɛ:

²⁷«Kà nana ndai, kóó nana sami, kóó nana gbadua mbɛt nɛ́ koa, o be-a tɛ ya in o nàà kɔ‘i tɛ zɛ mɔɔrɔ-ɗoŋ-yiitoo, ɓɛɛ tɛ mɔɔrɔ-ɗoŋ-taar zɛ, kà‘i dɔ́ wa nɛ ha̧a̧mɔ ha̧ GASA WAN, a̧ tɛ kpɛk ha̧a̧mɔ‘i.

²⁸K’ɛ́nɛ́ gɔn nana ndai, kóó nana sami, ko náná gbadua in be-a kpɔk kale wese na.

²⁹K’ɛ̀nɛ̀ gbɛ́ saɗi ɗafi nɛ sɔ̧, gasi nɛ GASA WAN, ɛ̀nɛ̀ dé nɛ̀ yuwar-a ha̧ a̧ mɛ kpɛk.

³⁰Wi tɛ nyɔŋ kpoo saɗi'i kaɗi kpɔk kale wese'i, wi beka e oi-aa hɔ sa̧a̧mɔ na. Nɛ mi GASA WAN.

³¹«Ɛ̀nɛ̀ kásí o wen kɔ‘m, ɓɛɛ ɛ̀nɛ̀ dé mɔ nyɛm ɗoŋ-aa. Nɛ́ mi GASA WAN.

³²K’ɛ́nɛ́ ɗaŋ sa̧a̧ nin-am na, wen ha̧ war-tɛ‘m mɛ sa̧ mgbara o be Israɛl; nɛ́ mi GASA WAN nɛ de ha̧ war-tɛ‘nɛ́ mɛ sa̧.

³³Wi nɛ foo'nɛ́ gbonɛ nɛ nú Egiptɛ, ha̧ a̧ mɛ duk nɛ Sɔ̧ k’ɛ́nɛ́, nɛ́ mi GASA WAN.»