Read Northwest Gbaya LEVITIK 23 Bible Online

LEVITIK 23 - Northwest Gbaya bible

LEVITIK 23

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl‘e, wese-gbaŋa ko GASA WAN lɛŋ tɛ ya nɛ o wese-mɔi̧a-ŋmaa wen gasa'm. O wese gbaŋa kɔ‘m nɛ mɔɔ nɔ'ɔ.

³Wi tɛ de tom tɛ zɛ mɔɔrɔ-ɗoŋ-kpɔk, ɓɛɛ mɔɔrɔ-ɗoŋ-yiitoo zɛ nɛ́ wese Sabat; wese'i, ɛnɛ beka de ŋma tom kpɔk na; ɛnɛ tɛ mɔi̧ wen tu̧u̧ tɛ‘m. Wese'i nɛ́ wese-ɔm-tɛ ko GASA WAN fara lɛŋ n’ɛnɛ tɛ ya sɛnɛ.

⁴O wese gbaŋa ko GASA WAN n’ɛnɛ tɛ gɔn wen mɔi̧a-a tu̧ nɛ tɛ‘m nɛ mɔɔ nɔ'ɔ.

⁵«Kuti fio-zɛ, tɛ ɓu-zua-naar ɔɔ-zɛ tɛ ŋgimbi nɛ wese ye nɛnɛ, wese'i, nɛ wese Paska ko GASA WAN.

⁶Ɓu-zua-mɔɔrɔ ɔɔ-zɛ tɛ fio-zɛ‘i tɛ duk nɛ gbaŋa brɛt nɛ̀ hao bó sɛnɛ na wen GASA WAN; ɛnɛ tɛ nyɔŋ brɛt nɛ hao bo sɛnɛ na tɛ zɛ mɔɔrɔ-ɗoŋ-yiitoo.

⁷Kuti wese ɛnɛ tɛ mɔi̧ ŋmaa tu̧ nɛ tɛ‘m; ɛnɛ beka de ŋma tom wese'i na.

⁸Ɛnɛ tɛ dɔ nyɔŋmɔ ha̧ GASA WAN dam ɗoŋ zɛ nɔ‘i mɔɔrɔ-ɗoŋ-yiitoo'i lɛŋ; tɛ mɔɔrɔ-ɗoŋ-yiitoo ɔɔ-zɛ, ɛnɛ tɛ mɔi̧ ŋmaa tu̧ nɛ tɛ‘m; ɛnɛ beka de ŋma tom wese'i na.»

⁹GASA WAN tɔ̧ɔ̧ ha̧ Moisɛ:

¹⁰«Mɛ̀ tɔ̧́ ha̧ o be Israɛl‘e, wa be tɛɛ ye tɛ nù n'am ha̧a̧ ha̧ wa'i, ɓɛɛ kà wa bé tɛ̀ɛ́ mɔi̧ nyɔnɔ kpɛɛfɔ kɔ-wa, wa a̧ ha̧ kuti sika zu-nyɔnɔ kɔ-wa ha̧ wi-ɗafi-sɔ̧.

¹¹Mɔ tɛ sa̧ ɗoŋ wese-ɔm-tɛ‘i, ɓɛɛ wi-ɗafi-sɔ̧ ha̧a̧ kuti sika zu-nyɔnɔ‘i ha̧ GASA WAN, wen ha̧ Sɔ̧ mɛ kpɛk wa.

¹²Wese n’ɛnɛ tɛ ha̧ nɛ sika nyɔnɔ‘i, ɛnɛ tɛ dɔ be-sami nɛ a̧a̧ nɛ pɛ kpɔk, nɛ ŋma mɔ ɗaŋ tɛ-a na ha̧ GASA WAN,

¹³ɓɛɛ ɛnɛ ha̧a̧ be fuu tɛ kilo mɔɔrɔ-ɗoŋ-taar nɛ‘i zaŋa nɛ ŋmaa in nɔ̧́ e zu-a; mɔ‘i nɛ́ dɔɔ-nyɔŋmɔ nɛ pɛr-aa ɔ dee tɛ GASA WAN; ɛnɛ tɛ ha̧ be dɔ̧ɔ̧ litrɛ kpɔk nɛ reeta tɛn a nù nɛ̀ ha̧a̧mɔ mbɛt.

¹⁴Ɛnɛ beka nyɔŋ brɛt, kóó ŋma ha̧na gba̧a̧-mɔ, kóó mbe gba̧a̧ nyɔnɔ, nɛti ha̧ wese n’ɛnɛ tɛ ha̧ nɛ mɔ ha̧ GASA WAN na.» Mɔ‘i tɛ duk nɛ heembea k’ɛ́nɛ́, n’ɛnɛ beka gbin na kpoo nɛ kpoo, fara lɛŋ n’ɛnɛ tɛ duk sɛnɛ.

¹⁵«Ɛ́nɛ́ tɛ tɔr alat mɔɔrɔ-ɗoŋ-yiitoo nɛ dama-a ɗoŋ wese-ɔm-tɛ n’ɛnɛ ha̧a̧ nɛ sika-zu-nyɔnɔ k’ɛ́nɛ́‘i.

¹⁶Ɗoŋ mɔɔrɔ-ɗoŋ-yiitoo wese-ɔm-tɛ, ɛnɛ tɛ tɔr zɛ ɓu-mɔɔrɔ, ɓɛɛ ɛ́nɛ́ ha̧a̧ mbe zu-nyɔnɔ k’ɛ́nɛ́ ha̧ GASA WAN.

¹⁷Fara lɛŋ n’ɛnɛ tɛ duk sɛnɛ, ɛnɛ tɛ ba brɛt yiitoo nɛ‘i dee nɛ fuu, kilo mɔɔrɔ-ɗoŋ-taar nɛ hao a̧a̧ sɛnɛ tɛnɛ wen wɛka-a; mɔɔ nɔ‘i nɛ o zu-nyɔnɔ wen GASA WAN.

¹⁸Ɛnɛ tɛ ha̧ o be-sami nɛ a̧a̧ nɛ pɛ kpɔk, nɛ ŋma mɔ ɗaŋ tɛ-wa na mɔɔrɔ-ɗoŋ-yiitoo, in daŋa wiwii ndai ká bá nɛ̀ vala sami yiitoo e zu brɛt, ɓɛɛ ɛnɛ dɔɔ wa nɛ̀ kpoo-sɔ̧ ha̧ GASA WAN. Ɛ̀nɛ̀ bá ha̧a̧mɔ-nyɔnɔ in dɔ̧ɔ̧ wen tɛna-a a nu e sɛnɛ mbɛt. Mɔɔ nɔ‘i nɛ́ dɔɔ-nyɔŋmɔ nɛ pɛr-aa ɔ dee tɛ GASA WAN.

¹⁹Ɛnɛ tɛ ba vala gbadua ɗafi nɛ sɔ̧ wen kpaa ea-ɗaŋmɔ, ɓɛɛ ɛnɛ kaia be-sami yiitoo nɛ a̧a̧ nɛ pɛ kpɔk ɗafi nɛ sɔ̧ wen ga̧a̧mɔ.

²⁰Wi-ɗafi-sɔ̧ tɛ wɛk o be-sami nɔ‘i yiitoo'i ká bá nɛ̀ brɛt-zu-nyɔnɔ ti GASA WAN. Mɔɔ nɔ‘i nɛ o mɔ nɛ ɔ sa̧a̧ ti GASA WAN; wa tɛ ya nɛ ko wi-ɗafi-sɔ̧.

²¹Wese'i, ɛnɛ tɛ sa ŋmaa, ɓɛɛ ɛnɛ mɔi̧a tu̧ nɛ tɛ‘m; ɛnɛ beka de ŋma tom na. Mɔ‘i nɛ heembea nɛ tɛ duk kpoo nɛ kpoo wen ɛnɛ fara lɛŋ n’ɛnɛ tɛ ya sɛnɛ.

²²«Ŋgimbi mɔi̧a-nyɔnɔ k’ɛ́nɛ́, k’ɛ́nɛ́ mɔi̧ hɔ mgbii fɔ na, k’ɛ́nɛ́ dɔr wan nɛ aia a nu na mbɛt; ɛnɛ tɛ e i̧i̧ nɔ‘i ha̧ o wisan in o gɛnɛ. Nɛ mi GASA WAN Sɔ̧ k’ɛ́nɛ́.»

²³GASA WAN tɔ̧ɔ̧ ha̧ Moisɛ:

²⁴«Mɛ tɔ̧ ha̧ o be Israɛl‘e: tɛ mɔɔrɔ-ɗoŋ-yiitoo fio-zɛ, kuti zɛ tɛ duk nɛ wese-ɔm-tɛ wen'nɛ́; ɛnɛ tɛ dɔm mbia wese'i; nɛ wese-desee in wese-mɔi̧a ŋmaa tu̧ nɛ tɛ Sɔ̧.

²⁵Ɛnɛ beka de ŋma tom wese'i na, ɓɛɛ ɛnɛ tɛ ha̧ dɔɔ-nyɔnɔ ha̧ GASA WAN.»

²⁶GASA WAN tɔ̧ɔ̧ ha̧ Moisɛ:

²⁷«Zɛ ɓu tɛ mɔɔrɔ-ɗoŋ-yiitoo fio-zɛ, nɛ duk nɛ wese kpaa ea-ɗaŋmɔ, ɛnɛ tɛ mɔi̧ ŋmaa tu̧ nɛ tɛ‘m, ɛnɛ tɛ zim yì, ɓɛɛ ɛnɛ ha̧a̧ dɔɔ-nyɔŋmɔ ha̧ GASA WAN.

²⁸Ɛnɛ beka de ŋma tom wese'i na, wen nɛ́ wese kpaa ea-ɗaŋmɔ; nɛ́ kale wese'i a̧‘i tɛ de nɛ do-mɔ nɛ usi ea-ɗaŋmɔ zu'nɛ́ ti GASA WAN Sɔ̧ k’ɛ́nɛ́.

²⁹Hegɔ, wi nɛ beka zim yì wese'i na, wi tɛ fo a̧ yinɛ mgbara o bíí kɔ̧-a̧,

³⁰ɓɛɛ wi nɛ tɛ de tom wese'i, mi tɛ gbɛ a̧ yinɛ mgbara o bíí kɔ̧-a̧.

³¹K’ɛ́nɛ́ de ŋma tom wese'i na; nɛ́ heembea nɛ tɛ duk wen'nɛ́ kpoo nɛ kpoo, fara lɛŋ n’ɛnɛ tɛ duk sɛnɛ.

³²Wese'i tɛ duk nɛ wese-ɔm-tɛ, ɛnɛ tɛ zim yì wese'i. Ɛnɛ tɛ de kànà mɔ nyɛm nɛ ɗoŋ ŋgimbi-ɔma-tɛ‘i, ku̧u̧naŋ-a mɛ ga̧a̧mɔ tɛ mɔɔrɔ-ɗoŋ-naar ɔɔ-zɛ hɔ nɛnɛ ga̧a̧mɔ mɛ ɓii-aa.»

³³GASA WAN tɔ̧ɔ̧ ha̧ Moisɛ:

³⁴«Mɛ̀ tɔ̧́ ha̧ o be Israɛl‘e, Gbaŋa-mɔi̧a-nyɔnɔ nɛ de tɛ ɓu-zua-mɔɔrɔ ɔɔ-zɛ tɛ mɔɔrɔ-ɗoŋ-yiitoo fio-zɛ, gbaŋa'i nɛ́ wen tu̧u̧ tɛ GASA WAN; wi tɛ de gbaŋa'i zɛ mɔɔrɔ-ɗoŋ-yiitoo.

³⁵Wi tɛ mɔi̧ ŋmaa tu̧ nɛ tɛ Sɔ̧ tɛ kuti ɔɔ-zɛ gbaŋa'i, ɓɛɛ ɛnɛ beka de ŋma tom na.

³⁶Ɛnɛ tɛ ha̧ dɔɔ-nyɔŋmɔ ha̧ GASA WAN dam ɗoŋ zɛ nɔ‘i mɔɔrɔ-ɗoŋ-yiitoo'i lɛŋ. Tɛ mɔɔrɔ-ɗoŋ-taar ɔɔ-zɛ, ɛnɛ tɛ mɔi̧ ŋmaa tu̧ nɛ tɛ Sɔ̧, ɓɛɛ ɛnɛ ha̧a̧ dɔɔ-nyɔŋmɔ ha̧ GASA WAN. Wese'i tɛ duk nɛ sɔŋkur wese gbaŋa; ɛnɛ beka de ŋma tom na.

³⁷«Wese gbaŋa ko GASA WAN n’ɛnɛ tɛ mɔi̧ nɛ ŋmaa tu̧ nɛ tɛ-a, ha̧ nɛ dɔɔ-nyɔŋmɔ, ɛnɛ tɛ ɗafi sɔ̧ wen ga̧ŋmɔ, kóó tɛna dɔ̧ɔ̧ a nu ha̧ GASA WAN nyɛm nɛ ɗoŋ wese kpɔk kpɔk.

³⁸Ɛnɛ tɛ de mɔɔ nɔ‘i e zu o wese-ɔm-tɛ ko GASA WAN ká bá nɛ̀ o ha̧a̧mɔ in o ɗafa-sɔ̧ oi ha̧a̧nú in o ɗafa-sɔ̧ n’ɛnɛ ɗafi nɛ ta-tɛ‘nɛ́ ha̧ GASA WAN.

³⁹«Tɛ ɓu-zua-mɔɔrɔ ɔɔ-zɛ tɛ mɔɔrɔ-ɗoŋ-yiitoo fio-zɛ, k’ɛ̀nɛ̀ bé tɛ̀ɛ́ mɔi̧ nyɔnɔ k’ɛ́nɛ́ kaɗi, ɛ́nɛ́ tɛ de gbaŋa wen GASA WAN, ɓɛɛ gbaŋa'i tɛ de nɛ zɛ mɔɔrɔ-ɗoŋ-yiitoo. Kuti wese in sɔŋkur wese tɛ ya nɛ wese-ɔm-tɛ.

⁴⁰Kuti zɛ gbaŋa'i, ɛnɛ tɛ ɓi o de waya-te ɓɛɛ ɛnɛ kaia o wa̧a̧ ndɛŋgɛ in o da̧a̧ gbaa-er-te ká bá nɛ̀ o wa̧a̧ kusa te[6] mɛ ká̧ zaŋ yi, mɛ hi̧i̧ nɛ gbaŋa; ɛnɛ tɛ ya nɛ desee tɛ zɛ mɔɔrɔ-ɗoŋ-yiitoo ti GASA WAN Sɔ̧ k’ɛ́nɛ́.

⁴¹Ɛnɛ tɛ de gbaŋa gasi nɛ GASA WAN tɛ pɛ lɛŋ, tɛ zɛ mɔɔrɔ-ɗoŋ-yiitoo. Mɔ‘i tɛ duk nɛ heembea n’ɛnɛ beka gbin na kpoo nɛ kpoo: ɛnɛ tɛ de gbaŋa'i tɛ mɔɔrɔ-ɗoŋ-yiitoo fio-zɛ.

⁴²Ɛnɛ tɛ ɔ kɔ̧ tua-laa ŋgimbi gbaŋa'i tɛ zɛ mɔɔrɔ-ɗoŋ-yiitoo; o be Israɛl lɛŋ tɛ ɔ kɔ̧ tua-laa tɛ ŋgimbi'i,

⁴³wen h’ɛ́nɛ́ mɛ iŋ‘e, mi dee ha̧ o be Israɛl mɛ ɔ kɔ̧ tua-laa ŋgimbi n'am foo nɛ̀ wa gbonɛ nɛ̀ nú Egiptɛ; nɛ́ mi GASA WAN Sɔ̧ k’ɛ́nɛ́.»

⁴⁴Nɛ hegɔ a̧ Moisɛ usa nɛ o yuwar gbaŋa ko GASA WAN ha̧ o be Israɛl.