Read Northwest Gbaya LEVITIK 24 Bible Online

LEVITIK 24 - Northwest Gbaya bible

LEVITIK 24

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl‘e, wa a̧ ha̧ nɛ mbe gɛɗa nɔ̧́ ha̧ mɛ mɛ e nɛ wee, wen ha̧ lamba mɛ duk nɛ̀ nyɛka-a ɓɔnsɛnɛ.

³Arɔŋ te e wee tɛ lamba, ɓɛɛ a̧ baa e ti babir-laa nɛ kpe kuɓa-nɔɔ-tɔk kɔ̧ Tua-kpa-ŋmaa ha̧ mɛ duk nyɛk nɛnɛ ɓɔnsɛnɛ zɛ nɛ wese ti GASA WAN. Mɔ‘i nɛ heembea nɛ tɛ duk wen'nɛ́ kpoo nɛ kpoo.

⁴A̧ tɛ a o lamba nɔ‘i zu dek-e-wee nɛ‘i dee nɛ sa̧a̧ lɔr ha̧ wa mɛ duk nyɛk nɛnɛ ti GASA WAN kpoo nɛ kpoo.»

⁵«Mɛ ba fuu, ɓɛɛ mɛ gi brɛt ɓu-zua-yiitoo; kpɔk brɛt tɛ ba nɛ kilo fuu mɔɔrɔ-ɗoŋ-taar.

⁶Mɛ tɛ a o brɛt nɔ‘i zu fara-e-nyɔŋmɔ nɛ‘i dee nɛ lɔr ti GASA WAN: mɛ tɛ a mɔɔrɔ-ɗoŋ-kpɔk nɛ mgbɔɔr, mɛ aa mɔɔrɔ-ɗoŋ-kpɔk woyo nɛ mgbɔɔr.

⁷Mɛ tɛ a de fuu-nyama zu o tua-brɛt nɔ‘i yiitoo'i ha̧ mɛ duk hee mɔɔ-mbaŋ-tɛ mɔ oi brɛt nɔ‘i ga; mɔ‘i tɛ duk nɛ́ dɔ́ɔ́ nyɔŋmɔ wen GASA WAN.

⁸Wese-ɔm-tɛ lɛŋ, wi tɛ nɛk o brɛt nɔ‘i ti GASA WAN; o be Israɛl tɛ de mɔ‘i kpoo nɛ kpoo hee nɔɔ-tɔk ga.

⁹O brɛt nɔ‘i tɛ ya nɛ ko Arɔŋ in o bem kɔ‘i; wa tɛ nyɔŋ wa tɛ sa̧a̧ fara wen nɛ́ nyɔŋmɔ nɛ̀ ɔ sa̧a̧ nyɛmna wen wa nɛ́ nyɔŋmɔ nɛ‘i baa mgbara dɔɔ-nyɔŋmɔ ko GASA WAN. Mɔ‘i nɛ war mɔ kɔ-wa kpoo nɛ kpoo.»

¹⁰Ŋma obem nɛ nàà kɔ̧-a̧ nɛ zɔŋa Israɛl, ɓɛɛ dáà nɛ be Egiptɛ nɛɛ ye mgbara o be Israɛl, ɓɛɛ ba biro duk nɛ̀ ŋma be Israɛl see ye kɔ-wa mɛ.

¹¹Bem’ɛi nɛ̀ nàà kɔ̧-a̧ nɛ́ zɔŋa Israɛl‘i ɗaŋa nin Sɔ̧ da̧ nɛ Sɔ̧, ɓɛɛ wa mgbɔ a̧ si ti Moisɛ. Nin nàà ko bem’ɛi duka nɛ Selomit, boko-bem ko Divri, zuduk ko Dan.

¹²Wa pɛma bem’ɛi nɛ de-a, zɛm nɛ wen nɛ GASA WAN tɛ tɔ̧ zu a̧.

¹³GASA WAN tɔ̧ɔ̧ ha̧ Moisɛ:

¹⁴«Mɛ̀ fó wi nɛ da̧a̧ dara'i gbonɛ saaye; o wi nɛ zia a̧ fara da̧ dara'i lɛŋ a̧ e er zu-a nɛ sedaako, ɓɛɛ bíí lɛŋ a̧ yo a̧ nɛ ta gbɛ.

¹⁵Mɛ tɛ tɔ̧ hee mɔ'ɔ ga ha̧ o be Israɛl: kà ŋma bíí ɗaŋ nin Sɔ̧ kɔ‘i, ɗaŋmɔ kɔ̧-a̧ tɛ tik zu-a.

¹⁶Hegɔ wi tɛ gbɛ wi nɛ ɗaŋ nin GASA WAN yinɛ. Bíí lɛŋ tɛ yo a̧ nɛ ta; kóó nɛ́ gɛnɛ, kóó nɛ́ be-nu mbɛt, wi tɛ gbɛ a̧ wen n'aa ɗaŋa nin Sɔ̧.

¹⁷«Kà ŋma bíí gbɛ bíí, kóó wi nɛ fea'i so nɛ o, wi tɛ gbɛ wi nɛ gbɛɛ a̧‘i yinɛ.

¹⁸Kà a̧ gbɛ saɗi ko ŋma bíí, a̧ tɛ yoɓi kànà nɛ̀ ŋma mbe saɗi nɛ duk kpasa.

¹⁹«Kà ŋma bíí de ha̧ ŋma-a mɛ́ nɛ̀ kum, wi tɛ de kànà in a̧ hegɔ mbɛt.

²⁰Kà a̧ gbin ŋma bíí, wi tɛ gbin a̧ mbɛt: yí oi yí, nin oi nin; wi tɛ de kànà kum pi̧ tɛ-a hee mɔ'ɔ n'aa dee nɛnɛ pi̧ tɛ ŋma-a ga.

²¹Wi nɛ gbɛ saɗi ko ŋma bíí tɛ yoɓi nɛ̀ ŋma mbe-a; wi tɛ gbɛ wi nɛ gbɛɛ bíí.

²²Ɛnɛ tɛ zɔk nɛ kpɔk heembea wen gɛnɛ in be-nu, wen mi nɛ GASA WAN Sɔ̧ k’ɛ́nɛ́.»

²³Nɛ́ hegɔ a̧ Moisɛ tɔ̧ɔ̧ nɛ wen ha̧ o be Israɛl. Wa foo wi nɛ da̧a̧ dara'i si ɗoŋ ye, ɓɛɛ wa yo a̧ nɛ ta gbɛ. O be Israɛl dee mɔ nyɛm nɛ ɗoŋ mɔ nɛ GASA WAN tɔ̧ɔ̧ ha̧ Moisɛ.