Read Northwest Gbaya LEVITIK 26 Bible Online

LEVITIK 26 - Northwest Gbaya bible

LEVITIK 26

¹«K’ɛ́nɛ́ dui o géé-sɔ̧ na, k’ɛ́nɛ́ mbo géé-sɔ̧ in k’ɛ́nɛ́ ba ta e ŋgɔn mɛ gasi na; k’ɛ́nɛ́ sɛk ta sɛn nù k’ɛ́nɛ́ h’ɛ́nɛ́ mɛ gasi na mbɛt wen mi nɛ GASA WAN Sɔ̧ k’ɛ́nɛ́.

²Ɛ̀nɛ̀ zɔ́k o wese-ɔm-tɛ nɛ de-a, ɓɛɛ ɛ̀nɛ̀ tú̧ tɛ sa̧a̧-fara kɔ‘m mbɛt. Nɛ́ mi GASA WAN.

³«K’ɛ̀nɛ̀ ndak ɗoŋ o heembea kɔ‘m, k’ɛ̀nɛ̀ kasi o wen kɔ‘m in k’ɛ̀nɛ̀ de mɔ nyɛm nɛ ɗoŋ-aa,

⁴mi tɛ ha̧ kórò h’ɛ́nɛ́ mɛ ɓar, nù tɛ dɛm nyɔnɔ, ɓɛɛ o te kpɛɛfɔ tɛ wai.

⁵Ɛ́nɛ́ be tɛ̀ɛ́ gusi alkamaari kaɗi, ɓɛɛ ɛ́nɛ́ ɓii waya-nyak-dɔ̧ɔ̧; ɛ́nɛ́ tɛ ɓi waya-nyak-dɔ̧ɔ̧ hɔ ŋgimbi guna mɔ; ɛnɛ tɛ nyɔŋ mɔ zaŋ‘nɛ́ sur, ɓɛɛ ɛnɛ yaa nɛ de-a tɛ nu k’ɛ́nɛ́.

⁶«Mi tɛ e gaŋmɔ tɛ nu k’ɛ́nɛ́, ɛnɛ tɛ ɔ ya nɛ fee-see, ŋma mɔɔ-ndekeli'nɛ́ beka bo na. Mi tɛ ndak o ɗaŋ saɗi yinɛ nù k’ɛ́nɛ́, wi beka zii nyɛrɛ biro tɛ nù k’ɛ́nɛ́ ɓɔna.

⁷Ɛnɛ tɛ ndak o wisɛn k’ɛ́nɛ́ ɓɛɛ ɛnɛ tɛ gbɛ wa nɛ gba-paa k’ɛ́nɛ́.

⁸O bíí k’ɛ́nɛ́ mɔɔrɔ nyɛma mɛ ndak o wisɛn k’ɛ́nɛ́ gɔmŋmaa, ɓɛɛ o bíí k’ɛ́nɛ́ gɔmŋmaa nyɛma ndaka o wisɛn k’ɛ́nɛ́ booro-ɓu. Ɛnɛ tɛ gbɛ wa nɛ gba-paa k’ɛ́nɛ́.

⁹Mi tɛ zik tɛ‘m sitɛ‘nɛ́; mi tɛ de h’ɛ́nɛ́ mɛ dɔk, ɓɛɛ ɛnɛ duna nù; mi tɛ kasi nɔɔ-tɔk kɔ‘m in'nɛ̀ɛ́.

¹⁰Ɛnɛ tɛ nyɔŋ o nyɔnɔ hɔ mbe pɛ, ɓɛɛ ɛnɛ kaia o gba̧‘a̧-a̧ yinɛ kpai nɛ mbe-a.

¹¹Mi tɛ duk mgbara'nɛ́; mi beka sɛn'nɛ́ na.

¹²Mi tɛ nɛ nɔ in'nɛ, mi tɛ duk nɛ Sɔ̧ k’ɛ́nɛ́, ɓɛɛ ɛnɛ tɛ ya nɛ dukbíí kɔ‘m.

¹³Nɛ́ mi GASA WAN Sɔ̧ k’ɛ́nɛ́ nɛ foo'nɛ́ gbonɛ nɛ nú Egiptɛ, wen k’ɛ́nɛ́ tɛɛ ya nɛ o bara kɔ-wa siti; nɛ́ mi a̧ gbina kpáŋá k’ɛ́nɛ́ yinɛ ger'nɛ́, in nɛ́ mi a̧ dee h’ɛ́nɛ́ mɛ ba zu'nɛ́ nɛ ŋgɔn.

¹⁴«K’ɛ̀nɛ̀ zii wen nú‘m na, in k’ɛ̀nɛ̀ de mɔ nyɛm nɛ ɗoŋ o ha̧a̧nú kɔ‘m na,

¹⁵k’ɛ̀nɛ̀ siŋ o heembea kɔ‘m a nù, k’ɛ̀nɛ̀ sɛn o yuwar duka-a n'am usi h’ɛ́nɛ́, de nɛ mɔ nyɛm nɛ ɗoŋ o wen kɔ‘m na, gbin nɛ nɔɔ-tɔk kɔ‘m,

¹⁶kɔ‘m n'am tɛ de in'nɛ̀ɛ́ nɛ mɔ'ɔ: mi tɛ tom o ŋga-zɛɛ pi̧ zu'nɛ́, ɛnɛ tɛ ɔ̧k, gɛ̧ɛ̧ tɛ de'nɛ́ nɛ ŋgaya-a nɛ̀ tɛ ɗaŋ yí‘nɛ́ in nɛ̀ tɛ de h’ɛ́nɛ́ mɛ zɔk bɔnɛ. Ɛnɛ tɛ gun nyɔnɔ ba nɛ tɛ‘nɛ́; nɛ́ o wisɛn k’ɛ́nɛ́ a̧ tɛ nyɔŋ nyɔŋa-a.

¹⁷Mi tɛ zik ɗoŋ-am e h’ɛ́nɛ́, ɓɛɛ o wisɛn k’ɛ́nɛ́ tɛ gusi'nɛ́, o wisɛn k’ɛ́nɛ́ tɛ gan'nɛ, ɓɛɛ kóó kà wa ndak'nɛ́ na, ɛ́nɛ́ tɛ yu kànà mɔ ti wa.

¹⁸«K’ɛ̀nɛ̀ zii wen kɔ‘m na siti, mi tɛ ha̧ mɔɔ-oi-ɗaŋmɔ k’ɛ́nɛ́ nɛ ŋga bɔnɛ gan kuti-a war mɔɔrɔ-ɗoŋ-yiitoo.

¹⁹Mi tɛ ɗaŋ ŋgai n’ɛnɛ ŋmaŋ nɛ tɛ‘nɛ́‘i yinɛ; kórò beka hɔ na, ɓɛɛ nù k’ɛ́nɛ́ tɛ ŋgai hee ndɛrɛ ga.

²⁰Nù beka dɛm nyɔnɔ ɓɔna, te nu k’ɛ́nɛ́ beka wai ɓɔna, ɛnɛ tɛ ɗaŋ ŋgai k’ɛ́nɛ́ ba nɛ tɛ‘nɛ́.

²¹«K’ɛ̀nɛ̀ dé ŋgazu in am, ɓɛɛ k’ɛ́nɛ́ kɔ̧́ zia wen nú‘m na, mi tɛ usi ŋga bɔnɛ h’ɛ́nɛ́ war mɔɔrɔ-ɗoŋ-yiitoo gan kuti-a nyɛm nɛ ɗoŋ ɗaŋmɔ k’ɛ́nɛ́.

²²Mi tɛ tom o ɗaŋ saɗi pi̧ mgbara'nɛ́ nɛ tɛ kai o bem k’ɛ́nɛ́, nɛ tɛ ɗaŋ o mɔ-dai k’ɛ́nɛ́ yinɛ, in nɛ tɛ kum'nɛ́, ɓɛɛ yuwar k’ɛ́nɛ́ tɛ kifi nɛ ŋga-gbárà.

²³«Kà o bɔnɛ nɔ‘i de h’ɛ́nɛ́ mɛ kpai taamɔ na, ɓɛɛ k’ɛ̀nɛ̀ de nɛ ŋgazu in am,

²⁴mi mbɛt, mi tɛ ba zu'm duk nɛ̀ ɛnɛ, mi tɛ pi̧ ɗaŋmɔ zu'nɛ́ war mɔɔrɔ-ɗoŋ-yiitoo nɛ mɔɔ-oi-ɗaŋmɔ k’ɛ́nɛ́.

²⁵Mi tɛ pi̧ biro zu'nɛ́ mɛ de mɔɔ-oi-nɔɔ-tɔk n’ɛnɛ gbina in'nɛ̀ɛ́, ɓɛɛ ɛnɛ tɛ mɔi̧ ŋmaa lɛŋ sitɛ gasa ye k’ɛ́nɛ́; mi tɛ tom ŋga-zɛɛ pi̧ mgbara'nɛ́, ɓɛɛ o wisɛn k’ɛ́nɛ́ tɛ kpa ŋgai zu'nɛ́.

²⁶Ŋgimbi n'am tɛ dor nyɔŋmɔ er'nɛ́, okoo ɓu tɛ dɔ brɛt k’ɛ́nɛ́ tɛ kpɔk fara; brɛt nɛ wa tɛ ba tɛnɛ‘i, wa tɛ kɛ̧ h’ɛ́nɛ́, ɛnɛ tɛ nyɔŋ, ɓɛɛ beka sur'nɛ́ na.

²⁷«K’ɛ̀nɛ̀ zii wen kɔ‘m na, ɓɛɛ k’ɛ̀nɛ̀ de ŋgazu siti,

²⁸mi tɛ ba zu'm duk nɛ ɛnɛ nɛ ŋga nyimsea; mi nɛ tɛ‘m, mi tɛ usi bɔnɛ h’ɛ́nɛ́ war mɔɔrɔ-ɗoŋ-yiitoo oi ɗaŋmɔ k’ɛ́nɛ́.

²⁹Ɛnɛ tɛ nyɔŋ kpoo-tɛ bui-bem in kpoo-tɛ boko-bem k’ɛ́nɛ́.

³⁰Mi tɛ ɗaŋ o fara gasi géé-sɔ̧ k’ɛ́nɛ́, mi tɛ gbin o fara-ɗafi-sɔ̧ k’ɛ́nɛ́ n’ɛnɛ a nɔ̧́-nyama sɛnɛ‘i. Mi tɛ mɔi̧ wɔr'nɛ́ a zu o wɔr géé-sɔ̧ k’ɛ́nɛ́, bɛɛ mi tɛ sɛn'nɛ́.

³¹Mi tɛ gbin o ye k’ɛ́nɛ́ a nù, mi tɛ ɗaŋ o sa̧a̧-fara k’ɛ́nɛ́, mi beka nun de pɛr nyama k’ɛ́nɛ́ ɓɔna.

³²Mi nɛ tɛ‘m, mi tɛ ɗaŋ nù k’ɛ́nɛ́, ɓɛɛ o wisɛn k’ɛ́nɛ́ nɛ tɛɛ mɛ duk tɛ nù‘i tɛ ya yemsele.

³³Ɓɛɛ k’ɛ́nɛ́, mi tɛ pɛsi'nɛ́ dam nù, ɓɛɛ mi tɛ dak gba-paa kɔ‘m in'nɛ̀ɛ́. Nù k’ɛ́nɛ́ tɛ kifi ŋga-gbárà, ɓɛɛ o gasa ye k’ɛ́nɛ́ kifa nɛ bɛɛ-oi.

³⁴Ɓɛɛ ŋgimbi n’ɛnɛ a̧a̧ k’ɛ́nɛ́ tɛ nù ko o wisɛn k’ɛ́nɛ́, nù tɛ duk kɔ‘i tɛ ɔma-tɛ.

³⁵Hee mɔ'ɔ n’ɛnɛ bo tɛ nù k’ɛ́nɛ́ ɓɔna ga, nù‘i tɛ kpa ɔma-tɛ kɔ̧-a̧ n'aa tɛɛ kpa so ŋgimbi n’ɛnɛ ɓɔna so nɛnɛ sɛnɛ‘i.

³⁶«Mi tɛ gbin gba̧a̧-tɛ o bíí mgbara'nɛ́ nɛ tɛ ɓɔn kpasa tɛ nù ko o wisɛn kɔ-wa. Wa̧a̧ tɛ fo mɔ, ɓɛɛ wa dee kíì, ma yi yak hee mɔ'ɔ nɛ‘i yu nɛ gba-paa’ɛ ga; wa tɛ yo nù nɛ tɛ-wa, ŋma bíí ndak wa na mbɛt.

³⁷Wa tɛ tir a zu ŋmaa hee mɔ'ɔ nɛ‘i tir nɛnɛ a nù nú gba-paa’ɛ ga, ŋma bíí ndak wa na mbɛt. Ɛnɛ beka yor ti o wisɛn k’ɛ́nɛ́ na.

³⁸Ɛnɛ tɛ fe sɛn gɔni-nù, ɓɛɛ nù ko o wisɛn k’ɛ́nɛ́ tɛ gur'nɛ́.

³⁹O bíí mgbara'nɛ́ nɛ tɛ ɓɔn kpasa tɛ fe tɛ nù ko o wisɛn kɔ-wa wen zu yɔɔ-kaya kɔ-wa. Mɛ̀ nɛ́ wen zu ɗaŋmɔ kɔ-wa in ko o zɔmdáa kɔ-wa mbɛt a̧ wa tɛ kum nɛnɛ.

⁴⁰«Ɓɛɛ wa tɛ gbar o ɗaŋmɔ kɔ-wa in ɗaŋmɔ ko o dáà kɔ-wa, tɔ̧ nɛnɛ‘e, wi dee ɗaŋmɔ in am, wi dee ŋgazu in am.

⁴¹Wa tɛ tɔ̧ mbɛt'e mi baa zu'm duk nɛ wi in mi mgbɔɔ wi si nù ko o wisɛn kɔ‘i. Hegɔ, see-wa nɛ ɔ ŋgaya'i tɛ mɔk, ɓɛɛ wa tɛ zɔk bɔnɛ oi ɗaŋmɔ kɔ-wa.

⁴²Tɛ‘m tɛ mbaŋ ɗoŋ nɔɔ-tɔk kɔ‘m in Jakob, Izak in Abraham; tɛ‘m tɛ mbaŋ ɗoŋ nù'ɛ.

⁴³Wa tɛ e nù duk ha̧ nù mɛ kpa ɔma-tɛ kɔ‘i. Nù kɔ-wa tɛ kifi ŋga-gbárà. Wa tɛ zɔk bɔnɛ wen nɛ wa ee o yuwar-duka-a n'am usa ha̧ wa duk in wen nɛ wa sɛna o heembea kɔ‘m.

⁴⁴Wa tɛ ye nù ko o wisɛn kɔ-wa, ɓɛɛ kɔ‘m, mi e wa duk na, mi sɛn wa mɛ kum wa, gbin nɛ nɔɔ-tɔk kɔ‘m in wa na mbɛt, wen mi nɛ GASA WAN Sɔ̧ kɔ-wa.

⁴⁵Tɛ‘m tɛ mbaŋ ɗoŋ nɔɔ-tɔk kɔ‘m in o zɔmdáà kɔ-wa n'am foo so gbonɛ nɛ nú Egiptɛ, nɛ yí o dɔka dukbíí, wen ha̧‘m, mi GASA WAN, mɛ duk nɛ Sɔ̧ kɔ-wa.»

⁴⁶O geŋa, o yuwar-duka-a in o heembea nɛ GASA WAN ee mgbara wi in o be Israɛl zu kaya Sinai nɛ nú Moisɛ nɛ mɔɔ nɔ‘i.