Read Northwest Gbaya LEVITIK 3 Bible Online

LEVITIK 3 - Northwest Gbaya bible

LEVITIK 3

¹«Kà ŋma bíí nɛ́ tɛ̀ɛ́ ɗafi sɔ̧-gaŋmɔ, kà nɛ́ bòò nɛ́ gasa mɔ-dai, kóó nɛ́ wiwii-a, kóó nɛ nana-a, a̧ a̧ ha̧ nɛ́ saɗi nɛ ŋma mɔ ɗaŋ tɛ-a na ha̧ GASA WAN.

²Wi’ɛi tɛ e er zu saɗi n'aa ha̧a̧‘i, ɓɛɛ wi gɔna a̧ sɛn nú Tua-kpa-ŋmaa, ɓɛɛ o wi-ɗafi-sɔ̧ nɛ ya nɛ o bem ko Arɔŋ misa̧ tɔk-aa a ɗoŋ fara-ɗafi-sɔ̧.

³Wi tɛ dɔ nɔ̧́ zu zaŋ saɗi nɛ‘i ɗafi nɛ̀ GASA WAN wen gaŋmɔ‘i;

⁴wi tɛ dɔ o gbaazaa-a yiitoo nɛ oi nɔ̧́-a̧ gu nɛ nɔ̧́ ká̧ ɔm-a, in nú-see-aa mbɛt.

⁵O bem ko Arɔŋ tɛ dɔ kpoo'i zu fara-ɗafi-sɔ̧ in o dɔka kpoo-aa nɛ a̧a̧ zu gua yí wee'i. Mɔ‘i nɛ dɔɔ-kpoo-sɔ̧ nɛ pɛr-aa duk nɛ de pɛr nyama tɛ GASA WAN.

⁶«Kà‘i ha̧ nɛ geɗek mɔ-dai ha̧ GASA WAN ɗafi nɛ Sɔ̧ wen ga̧a̧mɔ, wi tɛ ha̧ nɛ wiwii-a, kóó nana-a nɛ ŋma mɔ ɗaŋ tɛ-a na.

⁷Kà bó nɛ́ be-sami a̧‘i ha̧, wi tɛ e a̧ ti GASA WAN.

⁸Wi tɛ e er zu saɗi'i, ɓɛɛ wi gɔna a̧ nu Tua-kpa-ŋmaa, ɓɛɛ o bem ko Arɔŋ misa̧ tɔk-aa a ɗoŋ fara-ɗafi-sɔ̧‘i.

⁹Pɛrti yuwar-ɗafa-sɔ̧ wen ga̧a̧mɔ hegɔ‘i, wi tɛ dɔ kana nɛ de fara nɔ̧́-a̧ hee dom-aa nɛ oi-aa, nɔ̧́ zu gbazaŋ-aa in wan mɛ zu bezaŋ-aa,

¹⁰ká bá nɛ̀ o gbaazaa-a nɛ oi nɔ̧́-a̧ gu nɛ nu see-aa mbɛt ga.

¹¹Ɓɛɛ wi-ɗafi-sɔ̧ tɛ dɔ mɔ‘i zu fara-ɗafi-sɔ̧; mɔ‘i nɛ dɔɔ-kpoo-sɔ̧ ha̧ GASA WAN.

¹²«Kà bó nɛ́ gbadua a̧‘i ba nɛnɛ, wi tɛ e ti GASA WAN.

¹³Wi tɛ e er zu saɗi'i, ɓɛɛ wi gɔna a̧ nu Tua-kpa-ŋmaa, ɓɛɛ o bem ko Arɔŋ misa̧ tɔk-aa a ɗoŋ fara-ɗafi-sɔ̧.

¹⁴Dɔɔ-kpoo-sɔ̧ nɛ‘i tɛ ha̧ ha̧ GASA WAN nɛ nɔ̧́ zu gbazaŋ-aa in wan mɛ zu bezaŋ-aa,

¹⁵in o gbaazaa-a nɛ oi nɔ̧́-a̧ ká bá nɛ̀ nu see-aa mbɛt;

¹⁶ɓɛɛ wi-ɗafi-sɔ̧ tɛ dɔ kpoo'i zu fara-ɗafi-sɔ̧. Mɔ‘i nɛ dɔɔ-kpoo-sɔ̧ nɛ duk nɛ́ de pɛr nyama tɛ GASA WAN. Nɔ́-kpoo lɛŋ duk nɛ ko GASA WAN.

¹⁷«Ɛ̧ɛ̧ hɛ̧ɛ̧ nɛ heembea nɛ tɛ duk wen'nɛ́ kpoo nɛ kpoo fara lɛŋ n’ɛnɛ tɛ ya sɛnɛ. Mɔ nɛ‘i saa'e nɔ̧́ in tɔk, ɛnɛ beka nyɔŋ na.»