Read Northwest Gbaya LEVITIK 5 Bible Online

LEVITIK 5 - Northwest Gbaya bible

LEVITIK 5

¹«Kà ŋma bíí nɛ duka sedaako kan nɛ mɔ zu mɔ n'aa zɔka, kóó mɔ n'aa zia, kà a̧ nɛ́ tɔ̧ɔ̧ mgbara mɔ n'aa iŋa'i na, a̧ dee nɛ ɗaŋmɔ, ɓɛɛ ɗaŋmɔ‘i tɛ ɓɔn zu a̧.

²«Kà ŋma bíí a̧ tama ŋma ndiŋmɔ n'aa iŋ na, hee wɔr ndiŋ saɗi-zaŋbɛɛ in wɔr ndiŋ mɔ-dai ga, kóó wɔr ŋma ndiŋ saɗi-gbur-zaŋ nɛ nu, war-tɛ-a ɗaŋa, ɓɛɛ ɗaŋmɔ‘i tika zu a̧.

³Kà ŋma bíí a̧ foo ŋma ndiŋmɔ tɛ ŋma ɓii bíí, ɓɛɛ kà a̧ iŋ na, ŋgimbi n'aa tɛ iŋ, ɗaŋmɔ‘i tɛ tik zu a̧.

⁴«Kóó kà ŋma bíí tɔ̧ wen, kan nɛ mɔ nɛ nú-tum tɛ mɔ lɛŋ nɛ bíí tɛ kan mɔ sɛnɛ, kóó nɛ́ wen-gbak-bíí, kóó nɛ́ wen-tik-bíí, kà a̧ iŋ kaɗi, ɗaŋmɔ‘i tika zu a̧.

⁵«Kà ŋma bíí nɛ́ dee ŋma ɗaŋmɔ nɔ‘i, a̧ tɛ gbar ɗaŋmɔ n'aa dea'i,

⁶ɓɛɛ a̧ tɛ ba zɔŋa mɔ-dai hee be-zɔŋa sami, kóó be-zɔŋa gbadua ga tɛnɛ ha̧ GASA WAN ɗafi nɛ sɔ̧ oi ɗaŋmɔ n'aa dea'i; ɓɛɛ wi-ɗafi-sɔ̧ dee mɔ zu wi nɛ baa ha̧a̧mɔ nɛnɛ‘i mɛ usi'e Sɔ̧ ea ɗaŋmɔ ko wi’ɛi ha̧ a̧.»

⁷«Kà ŋma bíí a̧ bòó nɛ̀ yuwar kpaa nana sami, kóó nana gbadua na, a̧ tɛ kai gbaku̧i yiitoo nɛnɛ; kóó pola yiitoo mɛ ɗafi nɛ sɔ̧ sɛn ti GASA WAN wen ɗaŋmɔ kɔ̧-a̧; kpɔk tɛ duk kɔ‘i wen ɗafa-sɔ̧-ea-ɗaŋmɔ, ɓɛɛ ɓii-aa duka kɔ‘i wen dɔa-a nɛ kpoo-sɔ̧.

⁸A̧ tɛ kai o nɔ̧́í̧ nɔ‘i nɛnɛ ha̧ wi-ɗafi-sɔ̧, ɓɛɛ wi-ɗafi-sɔ̧ ha̧a̧ wan mɛ ɗafi-sɔ̧-ea-ɗaŋmɔ nɛti. A̧ tɛ gbin ger nɔi'i, ɓɛɛ a̧ beka ŋman yinɛ na.

⁹A̧ tɛ misi̧ tɔk nɔi'i a fara-ɗafi-sɔ̧ nɛ ká̧-a̧, ɓɛɛ a̧ zura oi tɔk-aa a gun fara-ɗafi-sɔ̧. Mɔ‘i nɛ ɗafa-sɔ̧ wen ea-ɗaŋmɔ.

¹⁰A̧ tɛ ba ɓii nɔ̧́í̧ dɔ nɛ kpoo-sɔ̧ nɛ yuwar-a. Ŋgimbi nɛ wi-ɗafi-sɔ̧ dee mɔ zu a̧ wen ɗaŋmɔ n'aa dea'i kaɗi, wi’ɛi kpaa ea-ɗaŋmɔ.

¹¹«Kà ŋma bíí nɛ́ bòó nɛ̀ gbaku̧i̧ yiitoo, kóó pola yiitoo na, a̧ nyɛma mɛ ba nɛ kilo fuu naar nɛnɛ mɛ ha̧ wen ea-ɗaŋmɔ. A̧ beka a nɔ̧́, kóó nɔ̧́-nyama zu a̧ na, wen ɗafa-sɔ̧ kpaa ea-ɗaŋmɔ.

¹²A̧ tɛ ba mɔ‘i nɛnɛ ha̧ wi-ɗafi-sɔ̧, ɓɛɛ wi-ɗafi-sɔ̧ tɛ kai be fuu dun er hee mbaŋa-tɛ-mɔ ga, ɓɛɛ dɔɔ zu fara-ɗafi-sɔ̧ hee dɔɔ nyɔŋmɔ ha̧ GASA WAN ga. Mɔ‘i nɛ ɗafa-sɔ̧ wen kpaa ea-ɗaŋmɔ.

¹³Kà wi-ɗafi-sɔ̧ nɛ́ dee mɔ nɛ usi ea-ɗaŋmɔ zu wi’ɛi, ɓɛɛ wi’ɛi kpaa ea-ɗaŋmɔ. Wi-ɗafi-sɔ̧ tɛ de do-mɔ‘i hee wan mɛ ha̧a̧mɔ nɛ nyɔnɔ ga.»

¹⁴GASA WAN tɔ̧ɔ̧ ha̧ Moisɛ:

¹⁵«Kà ŋma bíí nɛ́ dee ɗaŋmɔ nɛ̀ bó nɛ́ a̧ a̧ kɔ̧ɔ̧ na nyɔŋ nɛ mɔ nɛ‘i ha̧a̧ ha̧ GASA WAN, a̧ tɛ ba vala sami nɛ ŋma mɔ ɗaŋ tɛ-a na mgbara o geɗek mɔ-dai, ɓɛɛ nɛ̀ gɛnɛ-a ɔ ŋgaya nyɛm nɛ ɗoŋ sede sa̧a̧ fara, ɗafi nɛ mgbara a̧ in GASA WAN.

¹⁶A̧ tɛ yoɓi mɔ n'aa ɗaŋa'i[1] nɛ ŋma mɔ zu-a ha̧ wi-ɗafi-sɔ̧; wi-ɗafi-sɔ̧ tɛ ba vala-sami'i ɗafi nɛ sɔ̧ wen ɗafa mgbara wi’ɛi in GASA WAN, ɓɛɛ kà a̧ nɛ dee mɔ zu wi’ɛi nɛ usi ea-ɗaŋmɔ, ɓɛɛ wi’ɛi kpaa ea-ɗaŋmɔ.

¹⁷«Kà ŋma bíí gbin ŋma heembea ko GASA WAN kpɔk nɛ bo nɛ a̧ a̧ kɔ̧a̧ na, tui ɗaŋmɔ‘i duk nɛ zu-a.

¹⁸A̧ tɛ ba vala sami nɛ ŋma mɔ ɗaŋ tɛ-a na mgbara o geɗek mɔ-dai kɔ̧-a̧ ha̧ wi-ɗafi-sɔ̧, nyɛm nɛ ɗoŋ mɔ nɛ‘i gɔna wen ɗafa-sɔ̧ ɗafa-mgbara-ŋmaa. Kà wi-ɗafi-sɔ̧ de mɔ nɛ usi ea-ɗaŋmɔ zu wi’ɛi, ɓɛɛ wi’ɛi kpaa ea-ɗaŋmɔ.

¹⁹Mɔ‘i nɛ yuwar ɗafa mgbara wi’ɛi in GASA WAN; wi’ɛi dee nɛ ɗaŋmɔ ti GASA WAN nɛ mbetɛ.»

²⁰GASA WAN tɔ̧ɔ̧ ha̧ Moisɛ:

²¹«Kà ŋma bíí de ndela zu mɔ nɛ ŋma bíí nù kɔ̧-a̧ ee er-a, kóó zu mɔ n'aa gbaka gbak, kóó zu mɔ n'aa zu̧a̧, kóó kà a̧ nɛ baa mɔ nɛ gɔn-zaŋ er ŋma bíí nù kɔ̧-a̧, kóó a̧ nɛ́ dee nɛ ndela zu mɔ nɛ yɔa n'aa kpaa mbɛt, ɓɛɛ kà a̧ nɛ́ kana mɔ nɛ ndela zu mɔ‘i, a̧ dee nɛ ɗaŋmɔ ti GASA WAN.

²³Wi nɛ dee ɗaŋmɔ hegɔ, nɛ̀ ɗaŋmɔ‘i tika zu a̧, tɛ kai mɔ n'aa zu̧a̧‘i, kóó mɔ n'aa kaia nɛ gɔn-zaŋ er bíí nù kɔ̧-a̧‘i, kóó mɔ nɛ‘i ee er-a in mɔ nɛ yɔa n'aa kpaa'i,

²⁴kóó mɔ lɛŋ n'aa kàná mɔ nɛ ndela zu-a'i si ɗoŋ. A̧ tɛ ha̧ mɔ‘i si ɗoŋ lɛŋ e nɛ ŋma mɔ zu-a ha̧ wan-aa, wese n'aa tɛ iŋ‘e nɛ́ wi'i dee mɔ‘i[2].

²⁵A̧ tɛ ba vala sami nɛ ŋma mɔ ɗaŋ tɛ-a na mgbara geɗek mɔ-dai kɔ̧-a̧ nɛnɛ ha̧ wi-ɗafi-sɔ̧, ɗafi nɛ mgbara a̧ in GASA WAN, nyɛm nɛ ɗoŋ mɔ nɛ‘i gɔna wen ɗafa-mgbara-ŋmaa.

²⁶Kà wi-ɗafi-sɔ̧ nɛ dee mɔ nɛ usi ea-ɗaŋmɔ ko wi’ɛi ti GASA WAN kaɗi, koo ɗaŋmɔ‘i tika so nɛ zu wi’ɛi, a̧ kpaa ea-ɗaŋmɔ.»