Read Northwest Gbaya LEVITIK 6 Bible Online

LEVITIK 6 - Northwest Gbaya bible

LEVITIK 6

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ wen’ɛ ha̧ Arɔŋ in o bem kɔ‘i; mɔ nɛ wa tɛ de nɛ kpoo-sɔ̧ nɛ́ mɔ'ɔ: kpoo tɛ duk yí wee mɛ zɛ hegɔɔ mɔ sa̧ nɛnɛ, wee tɛ nyɛk kànà nɛ nyɛka-a fara-ɗafi-sɔ̧.

³Wi-ɗafi-sɔ̧ tɛ pi̧ nɛ be yɛ́m-yɛ́m laa in yɛ́m-yɛ́m sir-laa mbɛt. A̧ tɛ kai bùk kpoo-ɗafi-sɔ̧ nɛ bia wee sɛn fara-ɗafi-sɔ̧ yinɛ, ɓɛɛ a̧ gbaia a ká̧ fara-ɗafi-sɔ̧.

⁴A̧ tɛ kpai laa kɔ̧-a̧ ha̧ a̧ mɛ pi̧ nɛ mbe-a, ɓɛɛ sɛka a̧ tɛɛ kai bùk wee a ɗɔŋ ye tɛ ŋma sa̧a̧ fara.

⁵Wee zu fara-ɗafi-sɔ̧ tɛ nyɛk ɓɔnsɛnɛ; wi-ɗafi-sɔ̧ tɛ a gua yí wee'i mɛ tutuyɛ lɛŋ; a̧ tɛ e kpoo-sɔ̧ sɛn zu-a, ɓɛɛ a̧ dɔɔ nɔ̧́-a̧ nɛ ɗafa-sɔ̧-gaŋmɔ.

⁶Wee tɛ nyɛk fara-ɗafi-sɔ̧ ɓɔnsɛnɛ, a̧ beka bi na.»

⁷«Yuwar ha̧a̧mɔ nɛ mɔ'ɔ: Nɛ́ o bem ko Arɔŋ a̧ tɛ ba ha̧a̧mɔ nɛnɛ fara-ɗafi-sɔ̧ ti GASA WAN.

⁸Wi tɛ kai fuu nɛ‘i zaŋa nɛ ŋmaa in nɔ̧́ dun er-wi, ká bá nɛ̀ nyama nɛ oi-aa lɛŋ nɛ duk zu ha̧a̧mɔ‘i, ɓɛɛ wi dɔɔ zu fara-ɗafi-sɔ̧; mɔ‘i nɛ de pɛr nyama mbaŋa-tɛ-mɔ ha̧ GASA WAN.

⁹Arɔŋ in o bem kɔ‘i tɛ nyɔŋ oi mɔ nɛ ɓɔna. Wa beka a hao sɛnɛ na nyɔŋ nɛnɛ sɛn tɛ sa̧a̧ fara. Wa tɛ nyɔŋ mɔ‘i sɛn nu zala kɔ̧ Tua-kpa-ŋmaa.

¹⁰«Wí gí mɔ‘i nɛ̀ hao na. War kɔ-wa n'am ha̧a̧ ha̧ wa zu dɔɔ-nyɔnɔ nɛ o bíí ha̧ ha̧‘m nɛ mɔ‘i. Mɔ‘i ɔ sa̧a̧ nyɛmna hee oi ha̧a̧mɔ ɗafa-mgbara- ŋmaa ga.

¹¹O bezaŋ Arɔŋ lɛŋ nyɛma mɛ nyɔŋ mɔ‘i. Mɔ n’ɛnɛ tɛ kpa zu dɔɔ-nyɔnɔ ko GASA WAN pɛ lɛŋ a̧‘i. Mɔ lɛŋ nɛ tɛ fo nyɔŋmɔ‘i tɛ kifi duk nɛ sa̧a̧-a̧.»

¹²Nɛ mɔ'ɔ nɛ GASA WAN tɔ̧ɔ̧ ha̧ Moisɛ:

¹³«Mɔ nɛ Arɔŋ in o bem kɔ‘i tɛ ha̧ ha̧ GASA WAN wese nɛ wa tɛ tɛn nɔ̧́ a zu wa nɛ mɔ'ɔ: wa tɛ ba kilo fuu naar hee ha̧a̧mɔ ga ɓɔnsɛnɛ; wa tɛ ha̧ reeta-a mɛ tutuyɛ, ɓɛɛ wa ha̧a̧ oi-aa mɛ ga̧a̧mɔ.

¹⁴Wi tɛ gi a̧ nɛ nɔ̧́ kɔ̧ pɛsa nyɛk ɓɛɛ wi vata nɛ de-a ba nɛnɛ; wi tɛ ba gbina brɛt'i nɛnɛ ti GASA WAN, hee pɛr nyama ga.

¹⁵Ŋma mgbara o bem kɔ̧-a̧ nɛ‘i tɛ tɛn nɔ̧́ a zu-a mɛ duk wi-ɗafi-sɔ̧ oi-aa tɛ de kale mɔ‘i. Mɛ nɛ heembea nɛ tɛ duk kpoo nɛ kpoo. Wa tɛ dɔ mɔ‘i lɛŋ ha̧ GASA WAN.

¹⁶Ha̧a̧mɔ ko wi-ɗafi-sɔ̧ tɛ duk nɛ oi-aa lɛŋ, wi beka nyɔŋ na.»

¹⁷Nɛ mɔ'ɔ nɛ GASA WAN tɔ̧ɔ̧ ha̧ Moisɛ:

¹⁸«Mɛ̀ tɔ̧́ ha̧ Arɔŋ in o bem kɔ‘i: Ɛ̀nɛ̀ zɔ́k yuwar ɗafa-sɔ̧ n’ɛnɛ tɛ ɗafi wen ɗaŋmɔ. Wí gɔn saɗi-ɗafi-sɔ̧ wen ɗaŋmɔ sɛn fara nɛ‘i gɔn saɗi dɔ ha̧ GASA WAN sɛnɛ‘i, wen nɛ́ mɔ nɛ ɔ sa̧a̧ nyɛmna.

¹⁹Nɛ́ wi-ɗafi-sɔ̧ nɛ duk ti tɛ ɗafa-sɔ̧ a̧ nyɛma mɛ nyɔŋ kpoo-aa, ɓɛɛ wi nyɔŋ a̧ tɛ sa̧a̧-fara nú-zala, sɛn kɔ̧ Tua-kpa-ŋmaa.

²⁰Mɔ lɛŋ nɛ fo kpoo'i tɛ kifi duk nɛ sa̧a̧-a̧. Kà tɔk fok a tɛ laa, mɛ tɛ fɔr fara nɛ tɔk aa sɛnɛ‘i tɛ ŋma sa̧a̧ fara.

²¹Mɛ tɛ gba kpánà nɛ mɛ gii nɛ kpoo'i. Kà mɛ nɛ gii so kpoo'i nɛ kpáná-ndɛrɛ, mɛ tɛ sɔ̧ kɔ̧ a̧, ɓɛɛ mɛ yɛŋgɛsa nɛ yì.

²²O bíí lɛŋ nɛ ya nɛ o bíí ko wi-ɗafi-sɔ̧ tɛ nyɔŋ kpoo'i gee, wen nɛ kpoo nɛ duk nɛ sa̧a̧-a̧ nyɛmna.

²³Wi beka nyɔŋ saɗi-ɗafi-sɔ̧ ea-ɗaŋmɔ nɛ‘i baa tɔk-aa nɛnɛ si kɔ̧ sa̧a̧ fara kɔ̧ Tua-kpa-ŋmaa na; wi tɛ dɔ dɔɔ.»