Read Northwest Gbaya LEVITIK 7 Bible Online

LEVITIK 7 - Northwest Gbaya bible

LEVITIK 7

¹«Yuwar ɗafa-sɔ̧ ɗafa-mgbara-ŋmaa nɛ mɔ'ɔ: mɛ̀ nɛ́ ha̧a̧mɔ nɛ ɔ sa̧a̧ nyɛmna.

²Mɛ̀ nɛ́ sɛn fara-gɔn-saɗi nɛ‘i dɔ ɗafi nɛ Sɔ̧, a̧‘i gɔn saɗi ha̧a̧mɔ ɗafa-mgbara-ŋmaa in Sɔ̧ sɛnɛ mbɛt. Ɓɛɛ wi-ɗafi-sɔ̧ misa̧ tɔk-aa a ɗoŋ fara-ɗafi-sɔ̧.

³A̧ tɛ ha̧ de nɔ̧́ kpoo-aa lɛŋ: dom-aa, nɔ̧́ zu zaŋ-aa,

⁴gbaazaa-a yiitoo gu nɛ nɔ̧́-a̧; ɓɛɛ wi ee nu-see-aa zu gbaazaa-a mbɛt.

⁵Ɓɛɛ wi-ɗafi-sɔ̧ dɔɔ kpoo nɔ‘i lɛŋ zu fara-ɗafi-sɔ̧. Mɔ‘i nɛ dɔɔ-kpoo-sɔ̧ ha̧ GASA WAN. Yuwar ɗafa-sɔ̧ ɗafa-mgbara-ŋmaa nɛ mɔ‘i.

⁶Bíí lɛŋ nɛ ya nɛ o bíí ko o wi-ɗafi-sɔ̧ tɛ nyɔŋ gee, ɓɛɛ wi nyɔŋ mɔ‘i tɛ sa̧a̧ fara; nɛ mɔ nɛ ɔ sa̧a̧ nyɛmna.

⁷«Ɗafa-sɔ̧ wen ea-ɗaŋmɔ nyɛma ŋmaa in ɗafa-sɔ̧ ɗafa-mgbara-ŋmaa in Sɔ̧. Yuwar ɗafa-sɔ̧ nɔ‘i duk nɛ kpɔk mɔ ɓɛɛ kpoo saɗi'i tɛ duk nɛ ko wi-ɗafi-sɔ̧ nɛ ɗafa mɔ wen ea-ɗaŋmɔ‘i.

⁸Wi-ɗafi-sɔ̧ nɛ́ dɔɔ kpoo-ɗafi-sɔ̧ ko ŋma bíí, ɓɛɛ ndàrá saɗi n'aa ha̧a̧‘i duk nɛ kɔ̧-a̧.

⁹Ha̧a̧mɔ nɛ‘i dɔɔ dɔɔ in o ha̧a̧mɔ nɛ‘i gii gii nɛ̀ tasi, kóó nɛ̀ ŋma pɛsa mɔ duk nɛ ko wi-ɗafi-sɔ̧ nɛ ha̧a̧ mɔ‘i ha̧ Sɔ̧.

¹⁰Ha̧a̧mɔ lɛŋ nɛ‘i gii nɛ nɔ̧́, kóó nɔ̧́ bo na mbɛt, o bezaŋ Arɔŋ tɛ kɛ̧ nɛ̀ ŋmaa nyɛm ŋmaa.»

¹¹«Yuwar ɗafa-sɔ̧-gaŋmɔ ha̧ GASA WAN nɛ mɔ'ɔ:

¹²Kà‘i nɛ ɗafa-sɔ̧-gaŋmɔ, ŋgimbi dee osoko ha̧ Sɔ̧, wi tɛ ha̧ nɛ makala nɛ‘i vata nɛ nɔ̧́, nɛ hao bo sɛnɛ na, in ɔ̧ɔ̧ nyɔ̧ɔ̧ makala nɛ hao bo sɛnɛ na nɛ‘i gii nɛ nɔ̧́, ká bá nɛ̀ makala nɛ‘i vata fuu-aa nɛ nɔ̧́, ɓɛɛ nɛ hao bo sɛnɛ na mbɛt.

¹³Wi tɛ ba brɛt nɛ hao a̧a̧ sɛnɛ e zu makala nɔ‘i nɛnɛ war kpɔk in ɗafa-sɔ̧-gaŋmɔ nɛ‘i ɗafi ŋgimbi dee osoko ha̧ Sɔ̧‘i.

¹⁴Wi tɛ ha̧ makala nɔ‘i kpɔk kpɔk dam lɛŋ; mɔ‘i nɛ zu-mɔ ko GASA WAN nɛ tɛ duk nɛ ko wi-ɗafi-sɔ̧ nɛ misa̧ tɔk ɗafa-sɔ̧-gaŋmɔ‘i.

¹⁵Ɓɛɛ wi tɛ nyɔŋ kpoo-ɗafi-sɔ̧ gaŋmɔ nɛ‘i ɗafa ŋgimbi dee osoko ha̧ Sɔ̧ kpɔk wese nɛ‘i ɗafa nɛ sɔ̧‘i, ɓɛɛ wi beka e oi-aa ŋgɔn hɔ sa̧a̧mɔ na.

¹⁶«Kà ha̧a̧mɔ‘i nɛ́ bòò nɛ́ wan mɛ ha̧a̧nú, kóó nɛ wan mɛ desee, wi tɛ nyɔŋ kpoo-aa wese nɛ‘i ɗafa nɛ sɔ̧‘i, ɓɛɛ wi nyɔŋa oi-aa mɛ sa̧a̧mɔ;

¹⁷ɓɛɛ kà oi kpoo-sɔ̧‘i nɛ ɓɔna hɔ tɛ taar zɛ, wi tɛ dɔ yinɛ.

¹⁸Kà‘i nɛ nyɔŋa kpoo nɛ‘i ɗafa nɛ Sɔ̧ wen ga̧a̧mɔ tɛ taar zɛ, Sɔ̧ beka kpɛk wi nɛ ha̧a̧ mɔ‘i na; wi beka zɔk kpoo'i hee kpoo-sɔ̧ ga ɓɔna. Kpoo'i kifa nɛ ɗaŋ kpoo, ɓɛɛ wi nɛ tɛ nyɔŋ, dee ɗaŋmɔ ti Sɔ̧.

¹⁹Kpoo-sɔ̧ nɛ foo ndiŋ mɔ mbɛt kaɗi, wi beka nyɔŋ ɓɔna, wi tɛ dɔ dɔɔ yinɛ. Ɓɛɛ kóó o nde nɛ duk nɛ sa̧a̧-a̧ nyɛma mɛ nyɔŋ.

²⁰Ɓɛɛ wi nɛ duk nɛ sa̧a̧-a̧ na, nɛ tɛ nyɔŋ kpoo-sɔ̧-gaŋmɔ nɛ‘i ɗafa ha̧ GASA WAN, wi tɛ fo a̧ yinɛ mgbara o be Israɛl.

²¹Wi nɛ tɛ fo ŋma ndiŋmɔ hee bíí, kóó ndiŋ saɗi, kóó ŋma ndiŋ saɗi-zim mbɛt ga, ɓɛɛ nɛ tɛ nyɔŋ kpoo ɗafa-sɔ̧-gaŋmɔ nɛ‘i ɗafa ha̧ GASA WAN'i, wi tɛ fo a̧ yinɛ mgbara o be Israɛl.»

²²GASA WAN tɔ̧ɔ̧ ha̧ Moisɛ:

²³«Mɛ̀ tɔ̧́ ha̧ o be Israɛl ndé, ká wa nyɔŋ nɔ̧́ ndai, kóó nɔ̧́ sami, kóó nɔ̧́ gbadua na mbɛt.

²⁴Ɛnɛ nyɛma baa nɔ̧́ kpoo fio saɗi kóó nɔ̧́ kpoo saɗi nɛ ŋma ŋga saɗi baa mbɛt, de nɛ o ŋma tom; mɔ kpɔk, ɛnɛ beka nyɔŋ na.

²⁵Nɛ mbetɛ, kà ŋma bíí nyɔŋ nɔ̧́ saɗi n'aa ea wen dɔa-a ha̧ GASA WAN, wi tɛ fo a̧ yinɛ mgbara o be Israɛl.

²⁶Fara n’ɛnɛ tɛ duk sɛnɛ lɛŋ, ɛnɛ beka nyɔŋ tɔk nɔi kóó tɔk saɗi na.

²⁷Koo o nde nɛ tɛ nyɔŋ tɔk, wi tɛ fo a̧ yinɛ mgbara o be Israɛl.»

²⁸GASA WAN tɔ̧ɔ̧ ha̧ Moisɛ woyo:

²⁹«Mɛ tɔ̧ ha̧ o be Israɛl ndé, wi nɛ tɛ ɗafi-sɔ̧-gaŋmɔ ha̧ GASA WAN tɛ ɗafi kànà kɔya-a ha̧ a̧.

³⁰A̧ tɛ ba nɛ war nɔ̧́ de kpoo nɛ wa tɛ dɔ ha̧ GASA WAN nɛ er-a nɛnɛ. A̧ tɛ ba nɛnɛ in tote-a, ɓɛɛ a̧ nɛɛ wɛk ha̧ GASA WAN.

³¹Wi-ɗafi-sɔ̧ tɛ dɔ o nɔ̧́-a̧ nɔ‘i zu fara-ɗafi-sɔ̧, ɓɛɛ tote-a tɛ duk nɛ ko Arɔŋ in o bem kɔ‘i.

³²Ɓɛɛ ɛnɛ ha̧a̧ ku saɗi mɛ wiiko n’ɛnɛ ɗafa nɛ sɔ̧ wen ga̧a̧mɔ hee zu mɔ ga ha̧ wi-ɗafi-sɔ̧.

³³Wi tɛ ha̧ ku saɗi'i mɛ wiiko ha̧ bem ko Arɔŋ nɛ tɛ ha̧ tɔk in nɔ̧́-kpoo'i ha̧ Sɔ̧, ɗafi nɛ sɔ̧ wen ga̧a̧mɔ.

³⁴Mi baa tote saɗi nɛ‘i wɛk in ku saɗi nɛ‘i ha̧ nɛ zu mɔ er o be Israɛl, ɓɛɛ mi ha̧ ha̧ wi-ɗafi-sɔ̧ Arɔŋ in o bem kɔ‘i; nɛ zu mɔ nɛ o be Israɛl tɛ ha̧ kpoo nɛ kpoo.

³⁵Mɔ nɛ Arɔŋ in o bem kɔ‘i tɛ kpa zu dɔɔ kpoo ko GASA WAN ŋgimbi nɛ wa tɛ ku̧ naŋ dee tom ha̧ GASA WAN nɛ mɔ‘i;

³⁶mɔ nɛ GASA WAN gɔna ha̧ o be Israɛl mɛ ha̧ ha̧ Arɔŋ in o bem kɔ‘i wese n'aa tɛ tɛn nɛ nɔ̧́ a zu wa nɛ mɔ‘i; nɛ́ ŋma heembea nɛ tɛ duk kpoo nɛ kpoo.»

³⁷Mɔɔ nɔ‘i nɛ yuwar dɔɔ kpoo-sɔ̧ in ha̧a̧mɔ nɛ nyɔnɔ, yuwar-ɗafa-sɔ̧ wen ea ɗaŋmɔ, in wen ɗafa mgbara ŋmaa in Sɔ̧, yuwar baa tom-ɗafa-sɔ̧ ká bá nɛ̀ ɗafa-sɔ̧-gaŋmɔ.

³⁸Mɛ nɛ yuwar'i a̧ GASA WAN tɔ̧ɔ̧ ha̧ Moisɛ zu kaya sɛn ŋga-gbárà Sinai mɛ, usi nɛnɛ ha̧ o be Israɛl hee mɔ'ɔ nɛ wa tɛ ha̧ nɛ mɔ kɔ-wa ha̧ GASA WAN ga.