Read Northwest Gbaya LEVITIK 8 Bible Online

LEVITIK 8 - Northwest Gbaya bible

LEVITIK 8

¹GASA WAN tɔ̧ɔ̧ ha̧ Moisɛ:

²«Mɛ̀ mgbɔ́ Arɔŋ in o bem kɔ‘i, ɓɛɛ mɛ̀ káí o laa kɔ-wa in nɔ̧́-wan, daŋa wiwii-ndai nɛ‘i tɛ ɗafi nɛ sɔ̧ wen ea-ɗaŋmɔ, vala-sami yiitoo, ká bá nɛ̀ be gɛsɛ brɛt nɛ̀ hao bó sɛnɛ na.

³Ɓɛɛ mɛ mɔi̧ o bíí lɛŋ si nú Tua-kpa-ŋmaa.»

⁴Moisɛ dee mɔ nɛ GASA WAN tɔ̧ɔ̧ ha̧ a̧‘i, ɓɛɛ o bíí lɛŋ mɔi̧ si nú Tua-kpa-ŋmaa.

⁵A̧ tɔ̧ɔ̧ ha̧ wa: «Mɔ nɛ GASA WAN tɔ̧ɔ̧ ha̧‘m mɛ de nɛ mɔ'ɔ.»

⁶Moisɛ saa Arɔŋ in o bem kɔ‘i piiti, ɓɛɛ a̧ zui wa.

⁷A̧ pi̧i̧ be-laa tɛ Arɔŋ, hɛr kanda ha̧ a̧, pi̧ gasa laa tɛ-a in laa-ɗafi-sɔ̧ nɛ‘i sa'e Efod zu a̧, ɓɛɛ a̧ hɛr kanda-a zu a̧.

⁸A̧ pi̧i̧ laa-kpe-yí-ŋguɗi zu a̧, ɓɛɛ a mɔɔ-tan-mɔ nɛ‘i sa'e Urim in Tumim kɔ̧ a̧.

⁹Moisɛ hɛra mɛtɛwol zu Arɔŋ, ɓɛɛ e ŋma mɔ nɛ‘i duia nɛ lɔr hɔ ŋmaa in do-te tɛ mɛtɛwol'i nɛ war sɔnti-a nɛ usi'e, a̧ tɛ de nɛ tom ko GASA WAN, hee mɔ'ɔ nɛ GASA WAN tɔ̧ɔ̧ so ha̧ Moisɛ ga.

¹⁰Nɛ mɔ'ɔ nɛ Moisɛ baa nɔ̧́-wan sɔ̧ kɔ̧ Tua-kpa-ŋmaa‘i in tɛ o mɔ nɛ a̧a̧ kɔ̧ a̧ lɛŋ. Nɛ́ hegɔ‘i a̧ a̧ ee nɛ mɔ‘i lɛŋ nɛtɛ ha̧ Sɔ̧.

¹¹A̧ misa̧ nɔ war mɔɔrɔ-ɗoŋ-yiitoo a zu fara-ɗafi-sɔ̧, ɓɛɛ a̧ sɔ̧ zu fara'i in o mɔ nɛ a̧a̧ kɔ̧ a̧‘i lɛŋ, ká bá nɛ̀ kpánà in dek-a. A̧ ee wa lɛŋ nɛtɛ ha̧ Sɔ̧.

¹²A̧ tɛna nɔ̧́‘i a zu Arɔŋ, ha̧ a̧ mɛ duk nɛ wi-de-tom ko Sɔ̧.

¹³Moisɛ saa o bem ko Arɔŋ piiti, ɓɛɛ a̧ a be laa tɛ-wa, hɛr kanda guntir-wa, ɓɛɛ a̧ hɛr mɔ zu wa hee mɔ'ɔ nɛ GASA WAN tɔ̧ɔ̧ so ha̧ a̧ mɛ de ga.

¹⁴A̧ baa daŋa wiwii ndai-ɗafi-sɔ̧ wen ea-ɗaŋmɔ piiti, ɓɛɛ Arɔŋ in o bem kɔ‘i e er zu a̧.

¹⁵Moisɛ gɔna ndai'i, a̧ baa tɔk-aa, ɓɛɛ pi̧ ndɔŋ nú-zɔ̧ɔ̧-er ɗɔɔ-aa sɔ̧ tɛ o zak nɛ ya fara-ɗafi-sɔ̧, ha̧ mɛ ɗafi war-tɛ fara'i. A̧ gbaia oi tɔk-aa a gun fara-ɗafi-sɔ̧, ɓɛɛ a̧ de mɔ nɛ usi ea-ɗaŋmɔ zu a̧ e nɛtɛ ha̧ Sɔ̧.

¹⁶Moisɛ kaia nɔ̧́ zu zaŋ-aa lɛŋ, nu see-aa lɛŋ in o gbaazaa-a yiitoo gu nɛ nɔ̧́-a̧, ɓɛɛ a̧ dɔ lɛŋ fara-ɗafi-sɔ̧.

¹⁷Wa kaia oi kpoo ndai'i, ndàrá-a, mur-aa gu nɛ ɗɔr-aa nɛɛ dɔ sɛn ɗoŋ ye hee mɔ'ɔ nɛ GASA WAN tɔ̧ɔ̧ so ha̧ Moisɛ ga.

¹⁸A̧ baa vala sami-ɗafi-sɔ̧, ɓɛɛ Arɔŋ in o bem kɔ‘i e er zu a̧.

¹⁹Moisɛ gɔna sami'i, ɓɛɛ misi̧ tɔk-aa a ɗoŋ fara-ɗafi-sɔ̧.

²⁰A̧ a̧ka̧ sami'i, ɓɛɛ a̧ dɔ zu-a in o tɛ-a gu nɛ o nɔ̧́-a̧.

²¹Moisɛ fɔra zaŋ-aa in o mbayo-a; a̧ dɔɔ sami'i lɛŋ fara-ɗafi-sɔ̧. Mɔ‘i nɛ dɔɔ-kpoo-sɔ̧ nɛ pɛr-aa duk hee nyama ga; nɛ mɔ nɛ‘i dɔɔ ha̧ GASA WAN hee mɔ'ɔ n'aa baa tɔ̧ so ha̧ Moisɛ ga.

²²A̧ baa yiitoo vala sami tɛnɛ; sami'i nɛ wan mɛ ee tom-ɗafa-sɔ̧ er wa, ɓɛɛ Arɔŋ in o bem kɔ‘i e er zu a̧.

²³Moisɛ gɔna sami'i, ɓɛɛ ba tɔk-aa e ndɔŋ nu zer Arɔŋ mɛ wiiko, in gbokoto er-a mɛ wiiko, ká bá nɛ̀ gbokoto naŋ-a mɛ wiiko mbɛt.

²⁴Moisɛ saa o bem ko Arɔŋ, ɓɛɛ e tɔk ndɔŋ zer-wa mɛ wiiko, gbokoto er-wa mɛ wiiko, ká bá nɛ̀ gbokoto naŋ-wa mɛ wiiko mbɛt; ɓɛɛ Moisɛ misi̧ oi tɔk-aa a ɗoŋ fara-ɗafi-sɔ̧.

²⁵A̧ kaia o war nɔ̧́ kpoo-aa, dom-aa, nɔ̧́ zu zaŋ-aa lɛŋ, nu see-aa in gbaazaa-a yiitoo nɛ oi nɔ̧́-a̧, ká bá nɛ̀ ku-a mɛ wiiko.

²⁶A̧ baa gɛsɛ brɛt nɛ̀ hao bó sɛnɛ na, nɛ duk ti GASA WAN, a̧ baa makala kpɔk nɛ hao bo sɛnɛ na, makala nɛ‘i dee nɛ nɔ̧́, ká bá nɛ̀ ɔ̧ɔ̧ nyɔ̧ɔ̧ makala kpɔk, ɓɛɛ a̧ a zu nɔ̧́-kpoo in ku sami mɛ wiiko.

²⁷Moisɛ aa mɔɔ nɔ‘i lɛŋ kɔ̧ er Arɔŋ in o bem kɔ‘i, ɓɛɛ a̧ tɔ̧ ha̧ wa mɛ wɛk ha̧ GASA WAN nɛ war-a.

²⁸Moisɛ kaia mɔɔ nɔ‘i er wa woyo, ɓɛɛ dɔ zu fara-ɗafi-sɔ̧. Mɔ‘i nɛ́ ee tom-ɗafa-sɔ̧ er bíí; nɛ́ dɔɔ-kpoo-sɔ̧ nɛ pɛr-aa duk nɛ de pɛr nyama tɛ GASA WAN.

²⁹Moisɛ baa tote saɗi'i, ɓɛɛ wɛk ha̧ GASA WAN; war kpoo ee tom-ɗafa-sɔ̧ er wi ko Moisɛ nɛ GASA WAN baa tɔ̧ so nɛnɛ ha̧ a̧‘i nɛ mɔ‘i.

³⁰Moisɛ baa nɔ̧́-wan in tɔk nɛ duka fara-ɗafi-sɔ̧‘i, ɓɛɛ misi̧ a tɛ Arɔŋ in o laa kɔ̧-a̧ mbɛt; nɛ́ hegɔ a̧ a̧ ee nɛ Arɔŋ in o laa kɔ‘i ká bá nɛ̀ o bem kɔ̧-a̧ nɛ oi laa kɔ-wa mbɛt, nɛtɛ ha̧ Sɔ̧.

³¹Nɛ mɔ'ɔ nɛ Moisɛ tɔ̧ɔ̧ ha̧ Arɔŋ in o bem kɔ‘i: «Ɛ̀nɛ̀ gí kpoo'i sɛn nú Tua-kpa-ŋmaa; nɛ́ sɛn fara'i ɛ̀nɛ̀ tɛ nyɔŋ nɛ kpoo'i nɛ brɛt nɛ duk kɔ̧ be gɛsɛ-a-brɛt nɛ‘i nyɔŋ wen yea-a tɛ tom-ɗafa-sɔ̧, hee mɔ'ɔ n'am tɔ̧ɔ̧ so'e, nɛ́ Arɔŋ in o bem kɔ‘i a̧ tɛ nyɔŋ mɔ‘i ga.

³²Ɓɛɛ ɛ̀nɛ̀ dɔ́ oi kpoo nɛ tɛ ɓɔn in oi brɛt'i mbɛt.

³³Ɛnɛ beka yú nú Tua-kpa-ŋmaa na tɛ zɛ mɔɔrɔ-ɗoŋ-yiitoo hɔ ŋgimbi nɛ yea-a tɛ tom-ɗafa-sɔ̧ k’ɛ́nɛ́‘i tɛ kaɗi nɛnɛ; wen tɛ zɛ mɔɔrɔ-ɗoŋ-yiitoo, wa tɛ e nɛ tom-ɗafa-sɔ̧ er'nɛ́

³⁴hee mɔ'ɔ nɛ‘i dea sɔsɔɔ ga. Nɛ́ hegɔ a̧ GASA WAN tɔ̧ɔ̧ ha'i mɛ de nɛ mɔ nɛ usi ea-ɗaŋmɔ zu'nɛ́.

³⁵Ɛnɛ tɛ ya nú Tua-kpa-ŋmaa zɛ nɛ wese tɛ zɛ mɔɔrɔ-ɗoŋ-yiitoo; hɔ-ɗoŋ-aa, ɓɛɛ ɛnɛ nyɛma mɛ de tom ko GASA WAN, ɛnɛ beka fe na. Mɔ nɛ GASA WAN tɔ̧ɔ̧ ha̧‘m a̧‘i.»

³⁶Ɓɛɛ Arɔŋ in o bem kɔ‘i de mɔ lɛŋ nɛ GASA WAN tɔ̧ɔ̧ so nɛ nú Moisɛ.